7. Kasi munthu wa mu ntharika ya Yesu wakacita wuli na suzgo lake?

⁷ Para tingaweleraso ku ntharika ya Yesu, kasi musambazi uyu wakacitaci apo munda wake ukapasa comene kuluska ukuru wa nthamba izo wakaŵa nazo kale? Wakaghanaghana kupankhura nthamba zake na kuzenga zikuruko kuti warongemo mbuto zake na vyuma vyake. Wakawona kuti ivyo wakaghanaghananga vingamuvikilira ndiposo kumukhorweska mwakuti wakayowoya kuti: “Ndiyowoyenge na umoyo wane, Wa umoyo wane, uli na vyuma vinandi vyakuŵikikira vilimika vinandi; uvukenge, uryenge, umwenge, usekelerenge.”—Luka 12:19.

Cifukwa Wuli Wakaŵa “Cindere”?

 8. Kasi nchinthu wuli cakuzirwa ico munthu wa mu ntharika ya Yesu wakazerezga?

⁸ Ndipouli, kuyana na mazgu gha Yesu, ivyo musambazi uyu wakakhumbanga kucita vikaŵa vyakuti vingamuvikilira nadi yayi. Nangauli vikawoneka nga ni vyakovwira, kweni iyo wakaluwa cinthu cakukhumbikwa comene, wakazerezga khumbo la Ciuta. Munthu uyu wakajighanaghaniranga waka yekha, umo wapumulirenge, umo waryelenge, kumwa, na kusangwa na umoyo. Wakaghanaghana kuti cifukwa wali na “vyuma vinandi” ndikuti wakhalengeso “vilimika vinandi.” Kweni cikaŵa cacitima comene cifukwa vinthu vikenda nga ni umo wakaghanaghaniranga yayi. Nga ni umo Yesu wakayowoyera pakwamba, “umoyo wa munthu kuti uli mu unandi wa vinthu ivyo wakuŵeta cara.” (Luka 12:15) Mu usiku wenewuwo, vinthu vyose ivyo munthu uyu wakajiwunjikira vikamara, cifukwa Ciuta wakati kwa iyo: “Wa cindere iwe, usiku uno umoyo wako ukukufumbikira iwe; ndipo vyeneivyo ukaŵikanga viti viŵenge vya njani?”—Luka 12:20.

10. Nchifukwa wuli tingati kuŵa na “vyuma vinandi” kungawovwira munthu yayi kukhala “vilimika vinandi”?

¹⁰ Nchakukhumbikwa kusambirapo kanthu pa ntharika iyi. Kasi tikucita nga ni umo wakacitira munthu wa mu ntharika iyi, kulimbikira comene kugwira nchito kuti tisange “vyuma vinandi” na kutondeka kucita vinthu ivyo vingatovwira kuti tizakakhale “vilimika vinandi”? (Yohane 3:16; 17:3) Baibolo likuti: “Usambazi kuti ukupindula cara mu zuŵa la ukali,” nanga ni “uyo wakutamira mu usambazi tiwawenge pasi.” (Zintharika 11:4, 28) Mwantheura, Yesu wakamarizga ntharika yake na cenjezgo lakuti: “Ndimo waliri uyo wakujiŵikira usambazi, ndipo kuti ndi musambazi kwa Ciuta cara.”—Luka 12:21.