Ulongozgi Uwo Ungamovwirani Kuti Mukhalenge Mwamtende na Ŵanyinu

“Lutilirani . . . kugowokerana na mtima wose usange munthu wali na chifukwa chakudandawulira na munyake.”​—ŴAKOLOSE 3:13.

Tose tikubudiska. Tingaŵabudira ŵanyithu ndipo nawo ŵangatibudira. Mulimose umo vingaŵira, ichi chikulongora kuti tose tikukhumbikwira kuti ŵanyithu ŵatigowokere. Usange ndise ŵakugowoka mbwenu uyo watibudira tingamusungira vyakusingo yayi. Tingamuwezgera “uheni pa uheni” yayi, panji kumukumbuska ivyo wakatibudira. (Ŵaroma 12:17) Kweni wuli usange ivyo munthu watibudira vyatipweteka chomene ndipo tikutondeka kuluwa? Para vyaŵa nthena, mwantchindi tikwenera kudumbiskana nayo kwatekha munthu uyo. Chilato chithu chikwenera kuŵa chakuti tiwezgerepo mtende, kuti tisange uyo wakabudiska yayi.—Ŵaroma 12:18.

“Muŵe ŵakujiyuyura na kuwona ŵanyinu kuti ŵakumuluskani.”​—ŴAFILIPI 2:3.

Ŵanyithu ŵatemwenge kuchezga nase usange tili ŵakujiyuyura kweniso tikuŵachindika. Vili nthena chifukwa chakuti ŵakumanya kuti tili ŵalusungu kweniso kuti tikuŵaghanaghanira ndipo tingaŵakhuŵazgira dala yayi. Kweni usange tikujiwona kuti tili ŵapachanya kuluska ŵanyithu, panji usange nyengo zose tikukakamira pa maghanoghano ghithu, mbwenu kanandi tambanenge na ŵanyithu na kukwiyiskana. Ŵanthu ŵatigegenge ndipo tingaŵa na ŵabwezi ŵachoko panji tingaŵavyirathu.

“Chiuta wakutemwera yayi. Kweni wakupokelera munthu wa mtundu uliwose uyo wakumopa na kuchita urunji.”​—MILIMO 10:34, 35.

Mlengi withu wakutemwera ŵanthu chifukwa cha mtundu wawo yayi, nesi chifukwa cha chiyowoyero, kasangiro kawo panji mtundu wa thupi lawo. Iyo “wakalenga mitundu yose ya ŵanthu kufuma mwa munthu yumoza.” (Milimo 17:26) Ntheura fundo iyi yikulongora kuti ŵanthu wose mphaubali. Para ŵanthu wose tikuŵachindika na kuŵachitira lusungu, ŵakuŵa ŵakukondwa ndipo nase tikuŵaso ŵakukondwa, kweniso tikukondweska Mlengi withu.

“Vwarani . . . kuzika.”​—ŴAKOLOSE 3:12.

Para tili ŵakuzika, ŵanyithu ŵakufwatuka nase. Ŵakuyowoya nase mwakufwatuka kweniso kutipa ulongozgi chifukwa ŵakumanya kuti tikwiyenge yayi. Kweniso para munthu watikwiyira, zgoro lithu lakuzika lingamovwira kuti watune. Lemba la Zintharika 15:1 likuti: “Zgoro lakuzika likuwezga ukali, kweni mazgu ghakukalipa ghakwambiska mbembe.”

“Uyo wakupeleka wakukondwa chomene kuluska uyo wakupokera.”​—MILIMO 20:35.

Mazuŵa ghano ŵanthu ŵanandi mbaryezi ndipo mbakujighanaghanira waka ŵekha. Kweni munthu wakuŵa wakukondwa zanadi para wakupako ŵanyake vinthu. (Luka 6:38) Ŵanthu awo ŵakupako ŵanyawo ŵakuŵa ŵakukondwa chifukwa ŵakutemwa chomene ŵanthu kuluska katundu. Chitemwa chikuŵawovwira kuti ŵawongenge usange munthu munyake waŵapa chinthu chinyake. (Ŵakolose 3:15) Jifumbani kuti, ‘Kasi ine nkhutemwa kuchezga na ŵanthu awo mbakaka kupeleka vinthu kweniso awo mbambura kuwonga? Panji kasi nkhutemwa kuchezga na ŵanthu awo mbakupa kweniso ŵakuwonga?’ Kasi fundo njakuti wuli apa? Muchitenge ivyo imwe mukukhumba kuti ŵanyinu ŵamuchitirani.​—Mateyu 7:12.