SAMBIRO 54
Kasi “Muzga Wakugomezgeka na Wavinjeru” Ni Njani Ndipo Wali na Udindo Wuli?
Yesu ndiyo ni mutu wa mpingo Wachikhristu. (Ŵaefeso 5:23) Pasono Yesu wali kuchanya, ndipo wakulongozga ŵalondezgi ŵake pano pa charu chapasi kwizira mwa “muzga wakugomezgeka na wavinjeru.” (Ŵazgani Mateyu 24:45.) Nangauli Yesu wali kwimika “muzga” uyu na kumupa mazaza ghachoko waka, kweni nayo wakwenera kulutilira kupulikira Khristu na kuteŵetera ŵabali ŵake. Kasi muzga uyu ni njani? Ndipo wakutipwelelera wuli?
1. Kasi “muzga wakugomezgeka na wavinjeru” ni njani?
Kwamba kale, Yehova wakusankha munthu panji gulu lichoko waka la ŵanthu kuti lilongozgenge ŵanthu ŵake. (Malaki 2:7; Ŵahebere 1:1) Yesu wakati wafwa, ŵapositole kweniso ŵalara ku Yerusalemu ndiwo ŵakalongozganga. (Milimo 15:2) Mazuŵa ghano napo, kagulu kachoko waka ka ŵalara, panji kuti Wupu Wakulongozga wa Ŵakaboni ŵa Yehova ndiwo ukupeleka chakurya chauzimu, kweniso kudangilira pa mulimo wakupharazga. Wupu Wakulongozga ndiyo ni ‘muzga wakugomezgeka na wavinjeru uyo Yesu wamwimika.’ (Mateyu 24:45a) Ŵabali wose ŵa mu Wupu Wakulongozga Mbakhristu ŵakuphakazgika, awo ŵamulamulira na Yesu kuchanya para uteŵeti wawo wa pa charu chapasi wamara.
2. Kasi muzga wakugomezgeka wakupeleka chakurya wuli chauzimu?
Yesu wakati muzga wakugomezgeka “waŵape chakurya [Ŵakhristu ŵanyake] pa nyengo yakwenelera.” (Mateyu 24:45b) Nga umo chakurya cha kuthupi chikutovwilira kuti thupi lithu liŵe lankhongono, chakurya chauzimu nacho, uwo ni ulongozgi wakufuma mu Mazgu gha Chiuta, ukutovwira kuti tilutilire kugomezgeka kwa Yehova na kufiska mulimo uwo Yesu wali kutipa. (1 Timote 4:6) Tikupokera chakurya chauzimu ichi kwizira mu maungano gha mpingo, gha dera, gha chigaŵa, ndiposo kwizira mu mabuku ghakulongosora Baibolo kweniso mavidiyo. Ivi vikutovwira kuti tilutilire kumumanya makora Chiuta na kuŵa nayo paubwezi wakukhora.
MANYANI VINANDI
Wonani chifukwa icho tikwenera kuŵira na “muzga wakugomezgeka na wavinjeru” panji kuti Wupu Wakulongozga.
Wupu Wakulongozga ukupeleka chakurya chauzimu, ulongozgi, kweniso kovwira Ŵakaboni ŵa Yehova pa charu chose chapasi
3. Ŵanthu ŵa Yehova ŵakwenera kuchita vinthu mwakukolerana
Nga umo vikaŵira na Ŵakhristu ŵakwambilira, mazuŵa ghano napo Yesu ndiyo wakupeleka ulongozgi ku Wupu Wakulongozga umo ungalongozgera milimo ya Ŵakaboni ŵa Yehova. Wonelerani VIDIYO.
Ŵazgani 1 Ŵakorinte 14:33, 40, kufuma apo dumbiskanani fumbo ili:
Kasi mavesi agha ghakulongora wuli kuti Yehova wakukhumba kuti Ŵakaboni ŵake ŵachitenge vinthu mwakukolerana?
4. Muzga wakugomezgeka ndiyo wakulongozga pa mulimo wakupharazga
Mulimo wakupharazga ndiwo ukaŵa wakuzirwa chomene ku Ŵakhristu ŵakwambilira. Ŵazgani Milimo 8:14, 25, kufuma apo dumbiskanani mafumbo agha:
Kasi ni njani wakalongozganga mulimo wakupharazga mu nyengo ya Ŵakhristu ŵakwambilira?
Kasi Petrosi na Yohane ŵakachita wuli na ulongozgi wakufuma ku ŵapositole ŵanyawo?
Wupu Wakulongozga ndiwo ukudangilira pa mulimo wakuzirwa chomene wakupharazga. Wonelerani VIDIYO.
Yesu wakadidimizgapo chomene kuzirwa kwa mulimo wakupharazga. Ŵazgani Mariko 13:10, kufuma apo dumbiskanani mafumbo agha:
Chifukwa wuli Wupu Wakulongozga ukuwona kuti mulimo wakupharazga ngwakuzirwa chomene?
Chifukwa wuli “muzga wakugomezgeka na wavinjeru” ndiyo wakwenera kulongozga mulimo wakupharazga pa charu chose?
5. Muzga wakugomezgeka ndiyo wakupeleka ulongozgi
Wupu Wakulongozga ndiwo ukupeleka ulongozgi ku Ŵakhristu pa charu chose. Kasi ukuchita wuli kuti upeleke ulongozgi? Wonani umo wupu wakulongozga ukachitiranga mu nyengo ya Ŵakhristu ŵakwambilira. Ŵazgani Milimo 15:1, 2, kufuma apo dumbiskanani mafumbo agha:
Kasi Ŵakhristu ŵakwambilira ŵakapambana maghanoghano pa nkhani wuli?
Kasi Paulosi, Baranaba, na ŵanyake ŵakachita wuli na nkhani iyi?
Ŵazgani Milimo 15:12-18, 23-29, kufuma apo dumbiskanani fumbo ili:
Kasi wupu wakulongozga wa Ŵakhristu ŵakwambilira ukachita wuli kuti udumure makora nkhani iyi mwakuyana na ulongozgi wa Chiuta?—Wonani vesi 12, 15, na 28.
Ŵazgani Milimo 15:30, 31 na 16:4, 5, kufuma apo dumbiskanani mafumbo agha:
Kasi Ŵakhristu ŵakwambilira ŵakachita wuli na ulongozgi wakufuma ku wupu wakulongozga?
Kasi Yehova wakaŵatumbika wuli chifukwa cha kupulikira?
Ŵazgani 2 Timote 3:16 na Yakobe 1:5, kufuma apo dumbiskanani fumbo ili:
Kasi Wupu Wakulongozga ukuwusanga nkhu ulongozgi para ukukhumba kusankha vyakuchita mazuŵa ghano?
IVYO ŴANYAKE ŴAKUYOWOYA: “Usange munthu wakupulikira Wupu Wakulongozga, ndikuti wakwendera waka maghanoghano gha ŵanthu.”
Kasi ntchivichi chikumukhorweskani kuti Yesu ndiyo wakulongozga Wupu Wakulongozga?
MWAKUDUMURA
Wupu Wakulongozga ni “muzga wakugomezgeka na wavinjeru” uyo Yesu wali kumwimika. Ndiwo ukupeleka ulongozgi na chakurya chauzimu ku Ŵakhristu pa charu chose.
Kuweleramo
Kasi ni njani wali kwimika “muzga wakugomezgeka na wavinjeru”?
Kasi Wupu Wakulongozga ukutipwelelera wuli?
Kasi mukugomezga kuti Wupu Wakulongozga ndiyo ni “muzga wakugomezgeka na wavinjeru”?
SANGANI FUNDO ZAKUSAZGIKIRA
Wonani umo Wupu Wakulongozga ukuchitira kuti ukwaniske mulimo uwo uli kupika.
“Kasi Wupu Wakulongozga wa Ŵakaboni ŵa Yehova Ni Vichi?” (Nkhani ya pa Intaneti)
Wonani umo Wupu Wakulongozga ukuchitira kuti utipenge chakurya chauzimu chakugomezgeka.
Kasi awo ŵali mu Wupu Wakulongozga ŵakuwuwona wuli mulimo uwo Yesu wali kuŵapa?
Kasi maungano gha mpingo kweniso maungano ghakurughakuru ghakulongora wuli kuti Yehova ndiyo wakudangilira Wupu Wakulongozga?