² Ŵanthu awo ŵali ku chigaŵa cha Satana nawo ŵali na vinthu ivyo ŵakulindizga, ndipouli ŵakukayika usange vizamufiskika nadi. Mwachiyelezgero, ŵanthu ŵanandi awo ŵakutchova njuga ŵakugomezga kuti nyengo zinyake ŵangawina, kweni ŵakusimikizga yayi kuti ŵawinenge nadi. Ndipouli, Baibolo likuti chipulikano cheneko “ntchilindizga chanadi cha vinthu ivyo tikugomezga.” (Heb. 11:1) Kweni kasi tingachita wuli kuti tilutilire kugomezga kuti ivyo tikulindilira vizamufiskika nadi? Chifukwa wuli ntchiwemi kuŵa na chipulikano chakukhora mu ivyo tikulindizga?

 3. Kasi munthu wangachita wuli kuti waŵe na chipulikano chanadi?

³ Munthu wakuchita kubabika nacho yayi chipulikano, kweniso vikuchitika waka vyekha yayi kuti waŵe nacho. Chipulikano ntchipambi cha mzimu utuŵa uwo ukugwira ntchito mu ŵanthu awo ŵakupulikira Chiuta. (Gal. 5:22) Baibolo likuyowoyapo yayi kuti Yehova wali na chipulikano panji wakukhumbikwira chipulikano. Yehova ni Chiuta wankhongonozose ndipo wali na vinjeru chomene. Ntheura palije icho chingamutondeska kufiska ivyo walayizga. Dada withu wakuchanya ngwakusimikizga kuti wazamufiska vyose ivyo wali kulayizga, nakuti wakuwona nga kuti wavifiska kale. Ntheura wakuyowoya kuti: “Ghafiskika!” (Ŵazgani Chivumbuzi 21:3-6.) Munthu wakuŵa na chipulikano para wamanya kuti Yehova ni “Chiuta wakugomezgeka,” uyo nyengo zose wakuchita ivyo walayizga.—Doto. 7:9.

 4. Kasi ŵateŵeti ŵakugomezgeka ŵakale ŵali na chilindizga wuli?

⁴ Chaputara 11 cha buku la Ŵahebere chikuzunura mazina 16 gha ŵateŵeti ŵa Chiuta awo ŵakaŵa na chipulikano. Paulosi wakalongosora kuti ŵanthu aŵa, kweniso ŵanyake ŵanandi “ŵakaŵa na ukaboni wakuti Chiuta wakakondwa nawo chifukwa cha chipulikano chawo.” (Heb. 11:39) Wose ŵakaŵa na ‘chilindizga chanadi’ kuti Chiuta wazamuwuska mphapu yakulayizgika iyo yizamudinya mutu wa Satana na kufiska khumbo lakwamba la Yehova. (Gen. 3:15) Pa ŵateŵeti ŵakugomezgeka aŵa palije uyo wali na chilindizga cha kuluta kuchanya chifukwa ŵakafwa pambere “mphapu” yakulayizgika panji kuti Yesu Khristu wandize kuzakajura nthowa yakulutira kuchanya. (Gal. 3:16) Ndipouli, ŵakulindilira kuti Yehova wazakaŵawuske na kuŵapa umoyo waurunji mu charu chapasi cha paradiso.—Sal. 37:11; Yes. 26:19; Hos. 13:14.

 7. Kasi Yehova watipa vichi ivyo vingatovwira kukhozga chipulikano chithu, ndipo tikwenera kuchita navyo vichi?

⁷ Yehova watipa Baibolo kuti litovwire kuŵa na chipulikano chakukhora. Ntheura tikwenera kuŵazga Baibolo zuŵa lililose kuti tiŵe ‘ŵakukondwa’ kweniso kuti vyose ivyo tikuchita ‘vyende makora.’ (Sal. 1:1-3; ŵazgani Milimo 17:11.) Nga mbateŵeti ŵakugomezgeka ŵakale, nase tikwenera kulutilira kughanaghanira malayizgo gha Chiuta na kupulikira malango ghake. Yehova watipaso “muzga wakugomezgeka na wavinjeru” uyo nyengo zose wakutipa chakurya chinandi chauzimu pa nyengo yakwenelera. (Mat. 24:45) Ntheura usange tikulutilira kugwiliskira ntchito makora ivyo tikusambira, tiŵenge nga mbateŵeti ŵa Yehova ŵakale awo ŵakaŵa na ‘chilindizga chanadi’ cha Ufumu wa Chiuta.