Umaliro Wa Caru, Ŵanji Ŵakopa, Kunweka, Na Kukhuŵara

Kasi mukujipulika wuli na deti la Disembala 21, 2012 ilo ŵanandi ŵakatenge pa caru paŵenge kusintha kukuru? Vingathemba pa ivyo imwe mukakhazganga. Nyengo zinyake mungapembuzgika, kukhuŵara panji kusulako waka nkhani iyi. Kweni kasi ili likaŵaso waka deti lautesi la apo caru cimalirenge?

Wuli pakuyowoya za “umaliro wa mgonezi” uwo ukuzunulika mu Baibolo? (Mateyu 24:3) Ŵanji ŵakopa kuti caru cose cizamocheka. Kweni ŵanji mbakunweka kuti ŵazakawone ivyo vizamucitika apo caru cizamumara. Ndipouli, ŵanyake ŵanandi ŵavuka kupulika vyakuti umaliro uli pafupi. Kasi cinthu ico ŵanthu aŵa ŵakopa ciliko panji kulije?

Mungazizwa na ivyo Baibolo likuyowoya vyakukhwaskana na umaliro wa caru. Baibolo likutiphalira kuti tikwenera kulindilira umaliro, kweniso likuti ŵanji ŵavukenge kulindilira pakuwona nga umaliro ukucedwa. Tikumupemphani kuti muwone mazgoro gha mu Baibolo gha mafumbo agho ŵanthu ŵakutemwa kufumba pa nkhani iyi.

ZGORO LA MU BAIBOLO: ‘Ciuta wali kukhozga malufura gha caru mwakuti cileke kusunkhunyika.’—SALMO 104:5.

Caru cizamuparanyikapo yayi na moto panji munthowa yinyake yiliyose. M’malo mwake Baibolo likusambizga kuti caru ndico nchikaya ca ŵanthu kwamuyirayira. Lemba la Salmo 37:29 likuti: “Ŵakunyoloka ŵamukuhara caru na kukhala mwenemumo kwandanda.”—Salmo 115:16; Yesaya 45:18.

Ŵati walenga caru, Yehova wakayowoya kuti: ‘Cikaŵa ciwemi comene,’ ndipo ndimo wacali kuciwoneraso. (Genesis 1:31) M’malo mwa kuparanya caru, Ciuta walayizga kuti wazamuparanya “awo ŵakunanga caru capasi.” Fundo iyi yikung’anamura kuti wazamucivikilira kuti cileke kunangikirathu.—Uvumbuzi 11:18.

Kweni panji mungazizwa na ivyo lemba la 2 Petrosi 3:7 likuyowoya. Lemba ili likuti: “Macanya na caru capasi ivyo viliko sono, vyaŵikikira moto.” Nyengo zinyake mungajifumba kuti, kasi lemba ili likulongora yayi kuti caru cizamocheka? Unenesko ngwakuti, nyengo zinyake Baibolo likuzunura mazgu ghakuti “macanya,” “caru,” kweniso “moto,” mwakuyelezgera kwimira waka vinthu vinyake. Mwaciyelezgero, pa Genesis 11:1 pakuti, “Caru cose cikaŵa na lulimi lumoza na kayowoyero kamoza.” Apa mazgu ghakuti “caru” ghakung’anamura ŵanthu.

Mavesi ghakuzingilira lemba la 2 Petrosi 3:7 ghakulongora kuti mazgu ghakuti, macanya, caru, kweniso moto ghakwimira vinthu vinyake. Mavesi 5 na 6 ghakuyowoya za Ciwowota ca mu nyengo ya Nowa. Panyengo iyi caru cakale [ŵanthu ŵaheni] cikaparanyika, kweni caru canadi cikaparanyikapo yayi. M’malo mwake Ciwowota cikaparanya ŵanthu ŵankhaza awo ŵakaŵako pa nyengo iyo. Ciwowota cikaparanyaso “macanya” kung’anamura ŵalongozgi awo ŵakawusanga pa caru pa nyengo iyo. (Genesis 6:11) Mwakuyana waka, lemba la 2 Petrosi 3:7 likuti pakuti ŵanthu ŵaheni na maboma ghaheni ghazamuparanyika kwa muyirayira vizamuŵa nga ni para vyaphya na moto.

ZGORO LA MU BAIBOLO: “Caru cikuluta, ntheura pera makhumbiro ghake, kweni uyo wakucita khumbo la Ciuta wakukhalilira muyirayira.”—1 YOHANE 2:17.

“Caru” ico cikuluta ni caru canadi yayi, kweni ni ŵanthu ŵaheni awo vyakucita vyawo vikukolerana yayi na khumbo la Ciuta. Nga umo dokotala wangafumiskiramo cakutupa ico cili na kansa mu thupi la mulwari kuti waponoske umoyo wake, ntheura Yehova nayo ‘wazamudumura’ ŵaheni kuti ŵanthu ŵawemi ŵazakaŵe na umoyo uwemi pa caru. (Salmo 37:9) Ntheura “umaliro wa mgonezi” ni nkhani yakukondweska.

Mabaibolo ghanyake nagho ghali na ng’anamuro lakwenelera pa nkhani ya umaliro wa caru. Mu Mabaibolo agha ŵali kung’anamura kuti “Umaliro wa mgonezi,” panji “umaliro wa muwiro.” (Mateyu 24:3; New International Version) Pakuti ŵanthu ŵarunji na caru vyose vizamupona pa umaliro wa caru, ndikuti ŵanthu ŵazamulutilira kukhala pa caru ndipo umoyo uzamuŵa wambura masuzgo. Baibolo nalo likukhozgera fundo iyi cifukwa likuyowoya za umaliro wa “mgonezi uwo ukwiza.”—Luka 18:30.

Yesu wakati iyi yizamuŵa nyengo “yakunozgeraso vinthu vyose.” Pa nyengo iyi Yesu wazamuzgoraso umoyo wa ŵanthu kuti uŵe nga umo Ciuta wakakhumbiranga pakwamba. (Mateyu 19:28, NIV) Pa nyengo iyo tizamukondwa na

• Paradiso pa caru capasi umo muzamuŵa civikiliro kweniso muzamuŵavya ukavu.—Yesaya 35:1; Mika 4:4.

• Nchito ziwemi na zakukhorweska.—Yesaya 65:21-23.

• Matenda ghazamumara.—Yesaya 33:24.

• Ŵacekuru ŵazamuwelera ku uphya wawo.—Job 33:25.

• Ŵakufwa ŵazamuwuskika.—Yohane 5:28, 29.

Palije cifukwa cakopera umaliro wa caru usange tikucita “khumbo la Ciuta.” M’malo mwake, tikwenera kunweka kuti wize.

ZGORO LA MU BAIBOLO: “Para mukuwona vinthu ivi vikucitika, manyani kuti ufumu wa Ciuta uli pafupi.”—LUKA 21:31.

Profesa Richard Kyle mu buku lake wali kulemba kuti: ‘Cifukwa cakuti vinthu vyasintha mwamabuci, kweniso masuzgo nganandi, ŵanthu ŵakughanaghana kuti “umaliro wa caru” uli pafupi. Ŵakughanaghana nthena comenecomene para ŵakupulikiska yayi cifukwa ico masuzgo ghaliri ghanandi nthena.–The Last Days Are Here Again.

Ndipouli, nchimi izo zikalemba vya umaliro kuti zikalongosoranga cifukwa ico viheni vikacitikiranga mu nyengo yawo yayi. M’malo mwake, izo zikakhuŵilizgika na Ciuta kulemba vinthu ivyo vizamulongora kuti umaliro wa caru uli pafupi. Wonani usange ghanji mwa maucimi ghakulondezgapo agha ghakufiskika mu nyengo yithu.

• Nkhondo, njara, vindindindi, kweniso nthenda zakwambukira zakukoma.—Mateyu 24:7; Luka 21:11.

• Kusazgikira kwa ucikanamalango.—Mateyu 24:12.

• Ŵanthu ŵazamunanga caru.—Uvumbuzi 11:18.

• Ŵanthu ŵazamuŵa ŵakujitemwa, kutemwa ndalama na vyakukondweska, kweniso ŵambura kutemwa Ciuta.—2 Timote 3:2, 4.

• Kugaŵikana kwa mbumba.—2 Timote 3:2, 3.

• Ŵanthu ŵanandi ŵazamuŵikako mahara yayi ku vinthu ivyo vikulongora kuti umaliro uli pafupi.—Mateyu 24:37-39.

• Kupharazgika kwa Makani ghawemi gha Ufumu wa Ciuta pa caru cose.—Mateyu 24:14.

Yesu wakati para ‘tikuwona vinthu vyose ivi’ tikwenera kumanya kuti umaliro uli pafupi. (Mateyu 24:33) Ŵakaboni ŵa Yehova ŵakukhorwa na ukaboni uwu, ntheura ŵakuphalirako ŵanyawo cipulikano cawo ndipo ŵakupharazga mu vyaru 236.

ZGORO LA MU BAIBOLO: “Pa nyengo iyo ŵakuti: ‘Bata na mtende!’ penepapo ndipo pharanyiko lamabuci lizamuŵawira mwaluŵiro nga ni vyakuŵinya vya kubaba pa mwanakazi wanthumbo; ndipo ŵazamupona cara napacoko.”—1 ŴATESALONIKA 5:3.

Baibolo likuyaniska kuparanyika kwa caru na vyakuŵinya vya kubaba pa mwanakazi wanthumbo. Nyengo ya umaliro wa caru nayo yili nga ni mwanakazi wa nthumbo. Mwanakazi wanthumbo wakumanya kuti wali pafupi kubaba para vyakuŵinya vikusazgikira. Nyengo zinyake dokotala wake wangasacizga na deti wuwo ilo wababirenge. Nanga ni para deti ili lajumpha wakugomezga nipera kuti waŵenge na mwana sonosono. Mwakuyana waka, nangauli paŵa kupuvya pa nkhani ya nyengo iyo umaliro wizirenge, kweni vimanyikwiro vyakulongora kuti tili mu “mazuŵa ghaumaliro” vindasinthe.—2 Timote 3:1.

Panji mungajifumba kuti, usange vimanyikwiro vyakuti tili mu mazuŵa gha umaliro vikuwonekerathu, cifukwa wuli ŵanthu ŵanandi ŵakutondeka kuvimanya? Baibolo likulongora kuti para umaliro uli pafupi ŵanandi ŵazamwamba kusulako vimanyikwiro ivi. M’malo mwa kugomezga kuti ŵali mu mazuŵa ghaumaliro, ŵanandi ŵazamwamba kugoska na kuyowoya kuti: “Kufuma mu zuŵa ilo ŵasekuru ŵithu ŵakagonera tulo mu nyifwa, vinthu vyose vikulutilira ntheura pera kufuma pa kwamba kwa cilengiwa.” (2 Petrosi 3:3, 4) Mukuyowoya kunyake tingati vimanyikwiro vya mazuŵa ghaumaliro vikuwonekerathu, kweni ŵanthu ŵanandi ŵakuŵikako mahara yayi.—Mateyu 24:38, 39.

Nkhani iyi yalongosora ukaboni ucoko waka wa mu Malemba uwo ukulongora kuti umaliro uli pafupi.a Kasi mungatemwa kusambira vinandi? Usange mungatemwa, kumanani na Ŵakaboni ŵa Yehova kuti mwambe kusambira Baibolo kwambura kulipira. Mungasambilira pa nyumba yinu, panji pa malo ghanyake agho ghangaŵa ghawemi kwa imwe, kweniso pa foni. Cinthu cekha ico cingakhumbikwa nkhupatura nyengo yinu ndipo muzamusanga candulo cikuru comene.