“Nikulekeskenge Uhule Wako”

1, 2. Kasi ni hule wuli ilo ŵanthu ŵangalichitira chitima yayi?

WALIYOSE chitima chikumukora para wawona munthu munyake wayamba uhule. Panji tingajifumba kuti, ntchivichi chikamupangiska kuti wambe nkharo yawakawaka iyi? Kasi wakamba uhule apo wakaŵa muchoko chifukwa cha nkhaza izo ŵakamuchitiranga pa nyumba? Panji ukavu ndiwo ukamupangiska? Panji wakachimbiranga nkhaza izo mfumu wake wakamuchitiranga? Nkhani zachitima zanthena izi zikupulikikwa kanandi waka mu charu chiheni ichi. Ipo lekani Yesu wakalengera lusungu mahule ghanyake. Iyo wakati wose awo ŵang’anamuka mtima na kuleka nkharo zawo zawakawaka, umoyo wawo ungasintha ndipo ŵangaŵa na chigomezgo.—Mat. 21:28-32; Luka 7:36-50.

² Kweni tiyeni tiwone hule lamtundu unyake. Muŵe nga mukuwona mwanakazi uyo wakwambira dala uhule. Iyo wakuwona kuti ntchinthu chakuseluska yayi, kweni ni nthowa yakusangira sopo na mchere. Mtima wake uli waka pa ndalama na vinthu vinyake ivyo wasangenge. Sono tiyelezgere kuti mwanakazi uyu walekera dala mfumu wake muwemi na wakugomezgeka na kwamba uhule. Kasi ni njani wangamusekelera? Palije. Umo ise tingawonera mwanakazi uyu, ndimo Yehova nayo wakuwonera chisopa chautesi. Lekani nyengo zinandi Chiuta wakuyaniska awo ŵamugalukira na mahule.

 3. Kasi tisambirenge vichi mu mutu uwu?

³ Mu buku la Ezekiyeli muli nkhani ziŵiri zakuyowoya vya uhule, izo zikulongora umo ŵanthu ŵa Chiuta mu Israyeli na Yuda ŵakaŵira ŵambura kugomezgeka. (Ezek., chaputara 16 na 23) Kweni pambere tindasambire nkhani izi, tiwone dankha hule linyake. Hule ili likamba uhule wake pambere Ezekiyeli kweniso Ŵaisrayeli ŵandaŵeko, ndipo lichaliko m’paka sono. Hule ili likuzunulika mu buku la Chivumbuzi, mu Baibolo.

4, 5. Kasi “Babuloni Mukuru” ni njani, ndipo tikumanya wuli? (Wonani chithuzi chakwamba.)

⁴ Yesu wakawoneska mpositole Yohane mboniwoni ya mwanakazi muhule. Mwanakazi uyu wakuchemeka “muhule mukuru” na “Babuloni Mukuru, nyinawo wa mahule.” (Chivu. 17:1, 5) Ŵalongozgi ŵavisopa na ŵanyake awo ŵakusanda Baibolo ŵatindikika kwa vyaka vinandi ndipo ŵakumumanya makora yayi mwanakazi uyu. Ŵanyake ŵakuti mwanakazi uyu wakwimira Babuloni, Romu, panji Tchalitchi la Katolika. Kweni Ŵakaboni ŵa Yehova ŵakamba kumumanya nikale “muhule mukuru” uyu. Iyo wakwimira visopa vyose vyautesi pa charu chapasi. Kasi tikumanya wuli?

⁵ Hule ili likususkika chifukwa cha kuchita uzaghali na “mathemba gha charu chapasi,” panji kuti ŵandyali. Ntheura tingati likwimira ŵandyali yayi. Chinyake ntchakuti, buku la Chivumbuzi likulongora kuti “ŵamalonda ŵa charu chapasi,” panji kuti ŵabizinesi ŵa charu ichi, ŵakulira pakuparanyika kwa Babuloni Mukuru. Ipo Babuloni Mukuru wakwimira ŵamalonda yayi. Sono ni njani pera? Malemba ghakuti iyo wali na mulandu wa “kuchita vyamizimu,” kusopa vikozgo, na kupusika ŵanthu. Asi ivi ndivyo ŵalongozgi ŵavisopa ŵakuchita? Baibolo likulongoraso kuti mwanakazi uyu wakwenda panji kuti wakuchita mazaza pa ŵandyali. Chinyake ntchakuti wakuyuzga ŵateŵeti ŵakugomezgeka ŵa Yehova Chiuta. (Chivu. 17:2, 3; 18:11, 23, 24) Asi ivi ndivyo chisopa chautesi chikuchita kwamba kale m’paka sono?

 6. Chifukwa wuli Babuloni Mukuru wakuchemeka “nyinawo wa mahule”?

⁶ Ipo chifukwa wuli Babuloni Mukuru wakuchemeka “muhule mukuru” kweniso “nyinawo wa mahule”? Chifukwa ntchakuti chisopa chautesi chagaŵikana mu magulu ghanandi. Kwambira waka apo viyowoyero vikatimbanizgikira pa Babele panji kuti Babuloni, visambizgo vyakupambanapambana vya chisopa chautesi vyathandazgika pa charu chose chapasi. Ivi vyapangiska kuti paŵe visopa vinandi. Ipo zina lakuti “Babuloni Mukuru” ndakwenelera nadi, chifukwa lili kufuma ku zina la msumba wa Babuloni, uko kukambira magulu gha visopa vyautesi. (Gen. 11:1-9) Ntheura magulu ghose gha visopa vyautesi ghali nga ni “ŵanaŵanakazi” ŵa muhule mukuru. Kanandi Satana wakugwiliskira ntchito visopa ivi kunyenga ŵanthu kuti ŵachitenge vyamizimu, kusopa vikozgo, na kulondezga vigomezgo na maluso agho ghakuyuyura Chiuta. Lekani Chiuta wakuchenjezga ŵanthu ŵake kuti ŵaleke kukolerana na gulu liheni ili, wakuti: “Fumanimo mwa iyo, mwaŵanthu ŵane, usange mukukhumba yayi kuchitako zakwananga zake.”—Ŵazgani Chivumbuzi 18:4, 5.

 7. Chifukwa wuli tikupulikira chenjezgo lakuti “fumanimo mwa” Babuloni Mukuru?

⁷ Kasi imwe mukupulikira chenjezgo ili? Kumbukani kuti Yehova ndiyo wali kutilenga na “njara yauzimu” panji kuti khumbo la kusopa. (Mat. 5:3) Munthu wangamazga njara iyi pekha para wakusopa Yehova. Ŵateŵeti ŵa Yehova ŵangakhumba yayi kukolerana na chisopa chautesi. Kweni Satana wali na maghanoghano ghake. Iyo wakutemwa kunyenga ŵanthu ŵa Chiuta kuti ŵawire mu chipingo cha uhule wauzimu. Nakuti kanandi chipingo ichi chikumwendera. Kuzakafika mu nyengo ya Ezekiyeli, ŵanthu ŵa Chiuta ŵakachitapo uhule wauzimu kanandi waka. Tiyeni tisande umo vikaŵira, chifukwa tingasambirapo vinandi vyakukhwaskana na fundo za Yehova, urunji, na lusungu lwake.

8-10. Ntchinthu wuli chakukhumbikwa pakusopa kutuŵa icho chikutovwira kupulikiska umo Yehova wakuwonera chisopa chautesi? Yowoyani chiyelezgero.

⁸ Mu buku la Ezekiyeli, Yehova wakugwiliskira ntchito chiyelezgero cha hule pakulongosora ivyo ŵanthu ŵake ŵakamuchitira. Ezekiyeli wakatumika kulemba nkhani ziŵiri zakulongosora umo Yehova vikamuŵinyira apo ŵanthu ŵake ŵakamuleka na kwamba kuchita uzaghali wauzimu. Chifukwa wuli wakaŵayaniska na mahule?

⁹ Kuti tisange zgoro la fumbo ili, tikwenera kukumbuka dankha chinthu chakukhumbikwa pakusopa kutuŵa icho tikasambira mu Mutu 5 wa buku ili. Yehova wakaphalira Ŵaisrayeli dango lakuti: “Ungaŵanga na ŵachiuta ŵanyake chara padera pa ine [“kwimikana na ine,” mazgu ghamusi]. . . . Ine Yehova Chiuta wako, ndine Chiuta uyo wakukhumba kuti ŵanthu ŵasopenge iyo pera.” (Eks. 20:3, 5) Pamanyuma, wakadidimizgapo fundo yeneyiyi apo wakati: “Mungakasindamiranga chiuta munyake chara, chifukwa Yehova ni Chiuta uyo wakumanyikwa kuti wakukhumba ŵanthu ŵasopenge iyo pera. Iyo ni Chiuta uyo wakukhumba kuti ŵanthu ŵasopenge iyo pera.” (Eks. 34:14) Apa Yehova wakayowoya fundo yakupulikikwa makora chomene. Para tikukhumba kukondweska Yehova tikwenera kusopa iyo pera.

¹⁰ Kuti tipulikiske makora umo Yehova wakajipulikira, tiyeni tiwone ivyo vikuchitika mu nthengwa. Mfumu na muwoli, waliyose wakumanya kuti pali chinthu chinyake icho wakwenera kupeleka kwa munyake pera. Usange yumoza wangamba kuphotokerana panji kugonana na munthu munyake, mbwenu munyake wangachita sanji na kuwona kuti wamwendera mphiska. (Ŵazgani Ŵahebere 13:4.) Ndimo Yehova wakujipulikira para ŵanthu awo ŵali kujipeleka kwa iyo ŵamba kusopa ŵachiuta ŵatesi. Mu chaputara 16 cha buku la Ezekiyeli, Yehova wali kulongosora umo vikamuŵinyira chifukwa chakuti ŵanthu ŵake ŵakamwendera mphiska.

11. Kasi Yehova wakawulongosora wuli msumba wa Yerusalemu, na umo ukaŵirako?

¹¹ Mu chaputara 16 cha buku la Ezekiyeli, ndimo Yehova wali kuyowoya nyengo yitali chomene. Nakuti ndigho ngamoza mwa mazgu ghauchimi ghatali chomene agho Yehova wali kuyowoya mu Malemba ghose Ghachihebere. Yehova wakayowoya chomene vya msumba wa Yerusalemu, kwimira Ŵayuda ŵambura kugomezgeka. Iyo wakayowoya nkhani ya umo mtundu uwu ukambira kweniso umo ukamugalukira. Yuda wakaŵa kabonda kakubinkha na kambura kupwelelereka. Ŵapapi ŵake ŵakaŵa Ŵakenani ŵakusopa ŵangoza. Nakuti nadi, kwa nyengo yitali, Yerusalemu wakaŵa pasi pa Ŵayebusi, fuko la Ŵakenani, m’paka apo Davide wakapokera msumba uwu. Yehova wakalengera lusungu bonda uyu, wakamugeziska na kumupwelelera. Nyengo yikati yajumphapo, Yuda wakaŵa nga ni muwoli wa Yehova. Nakuti Ŵaisrayeli, awo ŵakamba kukhala mu msumba uwu, ŵakaŵa mu phangano na Yehova, ilo ŵakachita mu nyengo ya Mozesi. (Eks. 24:7, 8) Yerusalemu wakati wazgoka msumba ukuru wa charu ichi, Yehova wakawutumbika, kuwusambazga na kuwutozga, nga umo mwanalume musambazi na wankhongono wangatozgera muwoli wake uyo wakumutemwa chomene.—Ezek. 16:1-14.

12. Kasi kusopa kwautesi kukamba wuli mu Yerusalemu?

¹² Wonani ivyo vikachitika nyengo yikati yajumphapo. Yehova wakati: “Kweni ukamba kugomezga kutowa kwako ndipo ukazgoka hule chifukwa cha kumanyikwa kwako. Ukajipeleka kuchita uhule na munthu waliyose wakujumpha mu nthowa, ndipo kutowa kwako ukakupeleka kwa iyo.” (Ezek. 16:15) Mu mazuŵa gha Solomoni, Yehova wakatumbika ŵanthu ŵake na kuŵasambazga mwakuti Yerusalemu ukaŵa msumba wakutowa chomene kuluska misumba yose nyengo yakale. (1 Mathe. 10:23, 27) Kweni pachokopachoko, ŵanthu ŵakaleka kugomezgeka. Solomoni wakamba kusopa ŵachiuta ŵachilendo kuti wakondweske ŵawoli ŵake ŵanandi awo wakaŵa nawo, ndipo wakafipiska Yerusalemu. (1 Mathe. 11:1-8) Nakuti mathemba ghanyake agho ghakaŵapo Solomoni wati wafwa ndigho ghakanangirathu vinthu, chifukwa ghakafipiska charu chose na chisopa chautesi. Kasi Yehova wakajipulika wuli na vinthu vyaukazuzi ivyo ŵakachitanga? Iyo wakati: “Vinthu vyanthena ivi vikwenera kuchitika yayi, ndipo vingachitikanga yayi.” (Ezek. 16:16) Kweni ŵanthu ŵake ŵakupuluka, ŵakalutilira na maukazuzi ghawo.

13. Kasi ŵanthu ŵa Chiuta mu Yerusalemu ŵakachitanga viheni wuli?

¹³ Yehova vikamuŵinya kweniso wakaseluka pakuwona uheni uwo ŵanthu ŵake ŵakusoleka ŵakachitanga. Iyo wakati: “Ukatoranga ŵana ŵako ŵanalume na ŵanakazi awo ukanibabira, ndipo ukaŵapelekanga sembe ku vikozgo kuti ŵaryeke. Kasi vyakuchita vyako vyauhule vyatalulira yayi? Ukakomanga ŵana ŵane na kuŵapeleka sembe pakuŵajumphiska pa moto.” (Ezek. 16:20, 21) Vinthu viheni ivyo ŵanthu ŵa mu Yerusalemu ŵakachitanga vikulongora kuti Satana ni muheni chomene. Satana wakutemwa chomene kukopa ŵanthu kuti ŵagalukirenge Yehova. Kweni Yehova wakuwona vyose ivi. Chiuta wazamumazga ntchito zose za Satana, ndipo wazamuchita urunji.—Ŵazgani Yobu 34:24.

14. Kasi mukuru na munung’una wa Yerusalemu wakaŵa njani, ndipo pa ŵatatu aŵa ni njani wakaŵa muheni chomene?

¹⁴ Yerusalemu soni zikeneranga kumukora chifukwa cha mauheni ghake. Kweni na soni ndizo! Wakalutilira na uhule wake. Yehova wakati Yerusalemu wakaŵavyirathu soni kupambana na mahule ghanyake, chifukwa ndiyo wakalipiranga ŵanalume kuti ŵagone nayo. (Ezek. 16:34) Chiuta wakati Yerusalemu wakakozga “nyina,” kung’anamura mafuko ghakusopa ŵangoza agho kumanyuma ghakakhalanga mu charu chira. (Ezek. 16:44, 45) Pakulutilira na chiyelezgero cha mbumba, Yehova wakati Yerusalemu mukuru wake wakaŵa Samariya uyo wakamba uhule pambere Yerusalemu wandambe. Chiuta wakatiso munung’una wa Yerusalemu wakaŵa Sodomu. Apa wakazunura Sodomu nga ntchiyelezgero waka pakuti msumba uwu ukaŵa kuti waparanyika kale chifukwa cha kujikuzga na unyankhasi wake. Fundo ya Yehova yikaŵa yakuti Yerusalemu wakachita viheni chomene kuluska Samariya na Sodomu. (Ezek. 16:46-50) Ŵanthu ŵa Chiuta ŵakalutilira kugaluka, nangauli ŵakachenjezgeka kanandi waka.

15. Chifukwa wuli Yehova wakapeleka cheruzgo pa Yerusalemu, ndipo chikaŵapa chigomezgo wuli?

¹⁵ Kasi Yehova wakati wachitenge wuli? Iyo wakalayizga Yerusalemu kuti: “Niwunjikenge pamoza vibwezi vyako vyose ivyo ukavikondweskanga” ndipo “nikupelekenge mu woko lawo.” Yehova wakati vibwezi vya Yerusalemu ndivyo vizamumuparanya, vizamumuvura na kumupoka vitoweskero vyake. Wakayowoyaso kuti: “Ŵakuswenge na malibwe na kukukoma na malupanga ghawo.” Chifukwa wuli Yehova wakapeleka cheruzgo ichi? Kasi wakakhumbanga waka kukoma ŵanthu ŵake? Yayi, iyo wakakhumbanga ‘kuŵalekeska uhule wawo.’ Chiuta wakayowoyaso kuti: “Kutukutwa kwane kutunirenge pa iwe, ndipo ukali wane ufumengeko kwa iwe. Mtima wane uzikenge ndipo nikwiyiskikengeso yayi.” Nga umo tikasambilira mu Mutu 9 wa buku ili, Yehova wakakhumbanga kuti ŵanthu ŵake ŵazakawelereso ku charu chawo para wuzga wawo wamara. Chifukwa wuli? Iyo wakati: “Ine nikumbukenge phangano ilo nkhachita na iwe mu mazuŵa gha uwukirano wako.” (Ezek. 16:37-42, 60) Mwakupambana na ŵanthu ŵake, Yehova wakalongora kuti ngwakugomezgeka.—Ŵazgani Chivumbuzi 15:4.

16, 17. (a) Chifukwa wuli sono tikuyowoyaso yayi kuti Ohola na Oholiba ŵakwimira Chikhristu chautesi? (Wonani bokosi “Mahule Ghaŵiri, Paukuru na Unung’una.”) (b) Kasi tingasambirako vichi ku nkhani ya pa Ezekiyeli chaputara 16 na 23?

¹⁶ Yehova, kwizira mu ivyo wali kuyowoya mu Ezekiyeli chaputara 16, wakutisambizga vinandi pa nkhani ya fundo zake zaurunji, urunji wake, na lusungu lwake lwapadera. Ndivyoso wakutisambizga mu Ezekiyeli chaputara 23. Ŵakhristu ŵaunenesko mazuŵa ghano, ŵakupulikira mauthenga gha Yehova ghakuyowoya vya uhule wa ŵanthu ŵake. Tikukhumba yayi kukwenyerezga Yehova, nga umo wakachitira Yuda na Yerusalemu. Ntheura tikwenera kuseluka na kusopa vikozgo kwa mtundu uliwose, nga udokezi na kutemweseska vyakuthupi. (Mat. 6:24; Kol. 3:5) Tikuwonga chomene kuti Yehova walongora lusungu pakuwezgerapo kusopa kutuŵa mu mazuŵa ghaumaliro agha, nakuti wazamuzomerezgaso yayi kuti kubinkhiskike. Iyo wachita “phangano lamuyirayira” na Israyeli wauzimu, ilo lizamumara yayi chifukwa cha kuleka kugomezgeka panji uhule. (Ezek. 16:60) Ntheura tiyeni tikoleske mwaŵi uwo tili nawo wakuŵa pakati pa ŵanthu ŵa Yehova, awo mbakutowa.

¹⁷ Kasi ivyo Yehova wakayowoya kususka mahule gha mu buku la Ezekiyeli vikutisambizga vichi vya “muhule mukuru,” uyo ni Babuloni Mukuru? Tiyeni tiwone.

18, 19. Kasi pali kuyana wuli pakati pa mahule agho ghakuzunulika mu buku la Ezekiyeli na hule ilo likuzunulika mu buku la Chivumbuzi?

¹⁸ Yehova wakusintha yayi. (Yak. 1:17) Iyo wachali kutinkha chisopa chautesi. Ntheura tikuzizwa yayi kuwona kuti cheruzgo icho Yehova wakapeleka pa mahule gha mu Ezekiyeli chikuyana waka na icho wazamupeleka kwa “muhule mukuru” uyo wakuzunulika mu buku la Chivumbuzi.

¹⁹ Mwachiyelezgero, wonani kuti chilango icho mahule gha mu uchimi wa Ezekiyeli ghakapokera chikafuma kwa Yehova mwakudunjika yayi, kweni chikafuma ku mitundu iyo ŵanthu ŵa Chiuta ŵakachitanga nayo uzaghali. Babuloni Mukuru nayo wali na mulandu wakuchita uzaghali na “mathemba gha charu chapasi.” Kasi chilango chake chizamufuma kwa njani? Baibolo likuti ŵandyali ‘ŵazamumutinkha muhule ndipo ŵazamumuparanya na kumuleka wali nkhule. Ŵazamurya minofu ya thupi lake na kumotcha thibu na moto.’ Chifukwa wuli maboma gha charu ghazamumuwukira nthena? Chifukwa Chiuta ‘wazamuŵika maghanoghano ghake mu mitima yawo.’—Chivu. 17:1-3, 15-17.

20. Ntchivichi chikulongora kuti cheruzgo cha Babuloni Mukuru chizamuŵa chaumaliro?

²⁰ Ntheura Yehova wazamutuma maboma kuti ghapeleke cheruzgo chake pa visopa vyose vyautesi, kusazgapo magulu ghanandi gha Chikhristu chautesi. Cheruzgo ichi chizamuŵa chaumaliro; pazamuŵavya chigowokero kweniso mwaŵi wakuti visopa visinthe nthowa zawo. Buku la Chivumbuzi likuti Babuloni Mukuru ‘wazamuŵakoso yayi.’ (Chivu. 18:21) Ŵangelo ŵa Chiuta ŵazamukondwa chomene na kuparanyika kwake, ndipo ŵazamuti: “Lumbani Ya, imwe mwaŵanthu! Ndipo josi lakufuma kwa iyo likutoloka muyirayira swii.” (Chivu. 19:3) Para cheruzgo ichi chazakachitika, mbwenu kwamara. Chisopa chautesi chizamuzomerezgekaso yayi kuti chiŵeko na kutimbanizga kusopa kutuŵa. Para Babuloni Mukuru wazakeruzgika na kuparanyika, vizamuŵa nga kuti josi lakufuma kwa iyo likutoloka kwamuyirayira.

21. Kasi ntchivichi chizamuchitika para chisopa chautesi chazakaparanyika, ndipo vizamumara wuli?

²¹ Apo maboma ghazamuwukira Babuloni Mukuru, ghazamupeleka cheruzgo cha Chiuta, ndipo vizamovwira kuti Yehova wafiske khumbo lake. Uku kuzamuŵa kwamba kwa suzgo yikuru, iyo yindachitikepo. (Mat. 24:21) Suzgo yikuru yizamufika peneko pa Aramagedoni, nkhondo iyo Yehova wazamuparanyira mgonezi uheni uwu. (Chivu. 16:14, 16) Buku la Ezekiyeli likutiphalira vinandi vya umo suzgo yikuru yizamuchitikira, nga umo tiwonerenge mu mitu yakulondezgapo ya buku ili. Kweni kasi ni fundo wuli za mu chaputara 16 na 23 cha buku la Ezekiyeli izo tikwenera kukumbuka na kuzilondezga?

22, 23. Kasi nkhani za mahule agho ghakuzunulika mu buku la Ezekiyeli na Chivumbuzi zingatikhwaska wuli apo tikuteŵetera Chiuta?

²² Satana wakutemwa kutimbanizga awo ŵakukhozgera kusopa kutuŵa. Iyo wakukondwa chomene para watipatuska pa kusopa kutuŵa kweniso para tamba kuchita vinthu nga ivyo mahule gha mu buku la Ezekiyeli ghakachitanga. Ipo tikwenera kukumbuka kuti Yehova wakulekelera yayi awo ŵamugalukira, panji kuti ŵambura kugomezgeka. (Maŵa. 25:11) Tikwenera kukhala kutali na chisopa chautesi, tileke kukhwaska “chinthu chakufipirwa” pamaso pa Chiuta. (Yes. 52:11) Pa chifukwa ichi, tikunjilirapo yayi pa mphindano na mbembe za mu charu chakugaŵikana ichi. (Yoh. 15:19) Tikutemwera yayi charu chithu chifukwa vikuyana waka na kunjira chisopa chautesi.

²³ Chakuzirwa chomene, tikumbukenge kuti tili na mwaŵi ukuru kusopa Yehova mu tempile lake lauzimu ilo ndakutowa. Apo tikukondwa na ndondomeko yiwemi iyi, tiyeni tiŵikepo mtima kuti tiŵe kutali na chisopa chautesi kweniso uhule wake.