Kasi Sembe ya Yesu ‘Ntchiwombolero cha Ŵanandi’ mu Nthowa Wuli?
Ivyo Baibolo Likuyowoya
Sembe ya Yesu ni nthowa iyo Chiuta wakuwombolera, panji kuti kuponoska mtundu wa ŵanthu ku kwananga na nyifwa. Baibolo likuti ndopa za Yesu izo zikathiskika ni mtengo wa chiwombolero. (Ŵaefeso 1:7; 1 Petrosi 1:18, 19) Lekani Yesu wakati wakiza kuzakapeleka “umoyo wake kuŵa chiwombolero cha ŵanandi.”—Mateyu 20:28.
Chifukwa wuli pakakhumbikwanga “chiwombolero cha ŵanandi”?
Munthu wakwamba, Adamu, wakalengeka wakufikapo, panji kuti wambura kwananga. Iyo wakaŵa na mwaŵi wakuti wangakhala kwamuyirayira kweni wakawutaya chifukwa cha kusankha kuleka kumupulikira Chiuta. (Genizesi 3:17-19) Wakati waŵa na ŵana, wakaŵapirako kwananga uku. (Ŵaroma 5:12) Pa chifukwa ichi, Baibolo likuti Adamu “wakaguliskika” iyomwene na ŵana ŵake ku wuzga wa kwananga na nyifwa. (Ŵaroma 7:14) Pakuŵa ŵambura kufikapo, palije mwa ŵana ŵake uyo wakate wakwaniskenge kuguraso ivyo Adamu wakataya.—Salimo 49:7, 8.
Chiuta wakaŵalengera lusungu ŵana ŵa Adamu chifukwa ŵakaŵavya kwakuya. (Yohane 3:16) Ndipouli, kuyana na fundo zake zaurunji, Chiuta wakeneranga kusulako waka yayi panji kugowoka waka kwambura kuchita chinthu chinyake chakuzirwa. (Salimo 89:14; Ŵaroma 3:23-26) Chiuta wakuŵatemwa chomene ŵanthu, ntheura wakanozga nthowa yakwenelera yakuti zakwananga zawo zigowokereke kweniso kuwuskikapo. (Ŵaroma 5:6-8) Nthowa yakwenelera iyi ni sembe yakuwombora.
Kasi chiwombolero chikugwira wuli ntchito?
Mu Baibolo, lizgu lakuti “chiwombolero” likuyowoya vya vinthu vitatu ivi:
Ni malipiro.—Maŵazgo 3:46, 47.
Likukhwaskana na kuwombokwa, panji kuti kuponoskeka.—Ekisodo 21:30.
Mtengo wakuyana waka na icho chikugulika, panji kuti mtengo wose.a
Wonani umo vinthu ivi vikukolerana na sembe yakuwombora ya Yesu Khristu.
Malipiro. Baibolo likuti Ŵakhristu ŵali kugulika “na mtengo ukuru.” (1 Ŵakorinte 6:20; 7:23) Mtengo uwu ni ndopa za Yesu, izo Chiuta wakagulira “ŵanthu kufuma mu fuko lililose na lulimi na ŵanthu na mtundu.”—Chivumbuzi 5:8, 9.
Kuwombokwa. Chifukwa cha sembe ya Yesu tili “kufwatulika na chiwombolero” ku kwananga.—1 Ŵakorinte 1:30; Ŵakolose 1:14; Ŵahebere 9:15.
Mtengo wakuyana waka. Sembe ya Yesu yikuyana waka ndendende na ivyo Adamu wakataya, uwo mbumoyo wakufikapo. (1 Ŵakorinte 15:21, 22, 45, 46) Baibolo likuti: “Ŵanandi ŵakaŵa ŵakwananga chifukwa cha kuleka kupulikira kwa munthu yumoza [Adamu], mwakuyana waka, ŵanandi ŵaŵenge ŵarunji chifukwa cha kupulikira kwa munthu yumoza [Yesu Khristu].” (Ŵaroma 5:19) Lemba ili likulongosora mwakupulikikwa makora umo nyifwa ya munthu yumoza yingaŵira chiwombolero cha ŵanthu ŵanandi ŵakwananga. Nakuti sembe ya Yesu ni “chiwombolero chakuyana chakuwombolera ŵanthu wose” awo ŵakuchita ivyo vikukhumbikwa kuti ŵasange chandulo na sembe iyi.—1 Timote 2:5, 6.
a Mu Baibolo, mazgu agho ghakang’anamurika kuti “chiwombolero” ghakuyana waka na mazgu ghakuti mtengo, panji chinthu chakuzirwa chakulipilira. Mwachiyelezgero, verebu la Chihebere lakuti ka·pharʹ likung’anamura “kubenekelera.” (Genizesi 6:14) Kanandi likung’anamura kubenekelera zakwananga. (Salimo 65:3) Zina lakuyanako waka na mazgu agha lakuti koʹpher likung’anamura mtengo uwo ukupelekeka kuti zakwananga zibenekelereke, panji kuti kuponoska munthu. (Ekisodo 21:30) Mwakuyana waka, lizgu la Chigiriki lakuti lyʹtron, ilo kanandi likung’anamulika kuti “chiwombolero,” lingalembekaso kuti “mtengo wakuwombolera.” (Mateyu 20:28) Ŵalembi Ŵachigiriki ŵakagwiliskiranga ntchito lizgu ili kuti ŵayowoye vya malipiro agho ghakapelekekanga kuti ŵawombore mukayidi panji muzga.