Kupulikiska Mauchimi gha Ezekiyeli

Mu Baibolo, verebu Lachihebere lakuti na·vaʼ, ilo lang’anamulika kuti “kuchima,” likung’anamura kuyowoya uthenga, cheruzgo, chisambizgo, panji dango, ivyo vyapelekeka na Chiuta kwizira mwa mzimu. Lingang’anamuraso kupharazga chinthu icho Chiuta wayowoya kuti chichitikenge. Mu mauchimi gha Ezekiyeli muli mitundu yose ya vinthu ivyo Chiuta wavumbura.—Ezek. 3:10, 11; 11:4-8; 14:6, 7; 37:9, 10; 38:1-4.

• 

  MBONIWONI

• 

  VIYELEZGERO

• 

  MASEŴERO

Mu buku la Ezekiyeli uthenga wauchimi ukupelekeka kwizira mu mboniwoni, viyelezgero, ntharika, na maseŵero.

Mauchimi gha Ezekiyeli ghakufiskika kamoza pera yayi. Chiyelezgero, mauchimi ghakuyowoya vya kuwezgerapo vinthu ghakafiskika pachoko waka pa nyengo iyo ŵanthu ŵa Chiuta ŵakawelera ku Charu cha Layizgano. Kweni nga umo Mutu 9 wa buku ili ukulongosolera, mauchimi ghanandi ghakuyowoya vya kuwezgerapo vinthu ghakufiskika mazuŵa ghano, ndipo ghazamufiskikaso munthazi.

Nyengo zakumasinda, tikatenge vinthu vinandi mu mauchimi gha Ezekiyeli vikwimira waka vinthu vinyake ivyo vikufiskika. Kweni buku ili likulongosorapo yayi kuti munthu, chinthu, malo, panji chakuchitika chinyake chikwimira uchimi unyake uwo ukufiskika mazuŵa ghano, pekha usange ndivyo Malemba ghakuyowoya nadi.a M’malo mwake, likulongosora umo mauchimi ghanandi gha Ezekiyeli ghakufiskikira. Litovwirengeso kumanya ivyo tikusambirako ku uthenga wa Ezekiyeli, kweniso ku ŵanthu, malo, na vyakuchitika ivyo wali kulemba.