Mataupu e 89

Te Malaga Alofa ki Iutaia

I VAIASO mai mua atu i ei, i te ‵Kaiga o te Fakatapuga o te Faletapu i Ielusalema, ne taumafai ei te kau Iutaia o tamate a Iesu. Tela la, ne faimalaga atu a ia ki te feitu ki mātū, ki te koga telā kāti ne tu pili ki te Namo o Kalilaia.

Kae fakamuli loa, ne toe kamata ei a ia o faimalaga atu ki te ­feitu ki saute ki Ielusalema, kae ne talai atu a ia i te auala tenā i fakai fo‵liki o Pelea, ko te kogā laukele i te feitu ki saegāla o te Vai­tafe o Iolitana. Ne fatoā oti ne taku atu ne ia a te tala fakatusa e uiga ki te tagata maukoloa mo Lasalo. Kae ne toe akoako atu ne ia ki ana soko a mea kolā ne akoako atu muamua ne ia i Kalilaia.

E pelā mo ana muna, e ‵lei atu ki se tino māfai e “‵sai se fatu solo lasi ki tena ua kae ‵pei ki te moana,” i lō te fakaagasala ne se tino a “tino fo‵liki” o te Atua. Ne faka‵mafa mai foki ne ia a te tāua o te fakamagalo atu, ana pati: “Kafai foki e agasala fakafitu mai tou taina ki a koe i te aso, kae e foki fakafitu mai foki a ia ki a koe o fai mai, ‘Au ko salamō ki aku agasala,’ e ‵tau la mo koe o fakamagalo atu a ia.”

I te taimi ne fakamolemole atu ei ana soko penei: “Fakalasi aka te motou fakatuanaki,” ne tali atu penei a Iesu: “Kafai e fo‵liki otou fakatuanaki e pelā me se fuaga o te sinapi, kae kafai se fakatuanaki tonu eiloa, ko tena uiga e mafai o fai atu koutou ki te ­lakau lasi penei, ‘Ke maunu nei koe kae fano o to ki te tai; kae ka fai eiloa penā.’” Tela la, e mafai foki ne te tamā fakatuanaki foliki o fai a mea ‵lasi.

Oti aka loa, ne taku atu ei ne Iesu se tala e uiga ki mea kolā e ‵tupu sāle i te olaga kae ne fakatusa ne ia ki te kilokiloga tonu a te tavini ‵lei a te Atua malosi katoatoa. Muna a Iesu: “Kafai e isi se tino o koutou, e isi sena tavini fakamalū laukele io me e tausi mamoe, e a, e fai atu a ia ki ei i te taimi e foki mai ei i te vao, ‘Vau fakavave o nofo ki lalo o kai’? E se penā! Kae ka muna atu koe ­penei, ‘Fakatoka taku ‵kaiga ke toka, ‵sai tou gatu laulau meakai, kae laulau mai aku meakai, ke kai au kae inu, ka palele ko kai ei koe kae inu.’ E fakafetai atu la a ia ki te tavini, i te mea ne fai ne ia a mea kolā ne fakatonu atu ne ia ke fai? E penā foki koutou, kafai ko oti ne fai ne koutou a mea katoa kolā ne fakatonu atu ke fai, fai atu la, ‘A matou ne tavini e se aogā; ne fai fua ne matou te motou tiute.’” Tela la, e se ‵tau o ma‵natu aka a tavini a te Atua me e nofo kaitalafu te Atua ki a latou me e tavini atu latou ki a ia. Kae e ‵tau o masaua faeloa ne latou me e taulia latou ke tapuaki atu ki a ia e pelā me ne tino fakamaoni i tena kaufale.

Kāti ne fatoā oti ne fai atu ne ia te tala fakatusa tenā kae ne tu mai se ave­fekau. Ne uga mai a ia ne Malia mo Maleta, ko tuagane o Lasalo, kolā ne ‵nofo atu i Petania i Iutaia. Muna a te avefekau: “Te Aliki, a tou taugasoa faga­sele e masaki.”

Ne tali atu a Iesu penei: “A te masaki tenei e se iku ki te mate; kae mō te ­vikiga o te Atua, ke vikia foki i ei te Tama a te Atua.” Ne nofo atu a ia i konā i aso e lua, kae ne fai atu a Iesu ki ana soko penei: “‵Tou ‵foki ki Iutaia.” Kae ne toe fakamasaua atu latou penei ki a ia: “Te Faiakoga, ne fatoā teka atu fua nei te taimi ne fia peipei ei koe ki fatu ne tino Iutaia, kae ko mafaufau foki koe ke toe foki ki ei?”

Ne fesili atu penei a Iesu: “E se sefulu lua itula i te ao? Tela la, kafai e sasale se tino i te ao, e seai se mea e fakalavelave ki tena sasale, me e lavea faka‵lei ne ia a mea i te mainaga o te lalolagi nei. Kae kafai e sasale a ia i te po, e mafai o siga a ia, me e seai se mainaga i a ia.”

Kāti ne fakauiga ne Iesu ana pati me i te “ao,” io me ko te taimi ne fakatoka ne te Atua mō tena taviniga i te lalolagi, ne seki oko atu ki tena fakaotiga, kae ke oko eiloa ki te taimi tenā, e seai se tino ne fakapakia atu ki a ia. Ne ‵tau o fakaaogā katoatoa ne ia te taimi toetoe o te “ao” telā ne ‵toe mai mō ia, me ka oko mai fakamuli te “po” māfai ko tamate a ia ne ana fili.

Ne toe fai atu penei a Iesu: “A te taugasoa o tatou ko Lasalo e moe, kae ka fano au o ‵fagu ake ke ala.”

Kāti ne ma‵natu aka ana soko me i a Lasalo ko malōlō i te moe kae e fakaasi mai i ei me ko pili o toe ‵lei a ia, kae ne tali atu latou penei: “Te Aliki, kafai a ia e moe, kāti ka toe ‵lei a ia.”

I konā loa, ne takutonu atu ne Iesu ki a latou penei: “A ­Lasalo ko mate. Ona ko koutou, ko fiafia ei au, i a au e seki nofo i tena matega, ko te mea ke tali‵tonu koutou. ‵Tou olo ki ei.”

Ne iloa ne Toma me kāti ka tamate a Iesu i Iutaia, kae ne fia fesoasoani atu a ia ki tou tagata. Tela la, ne fakamalosi atu a ia ki ana taina: “‵Tou olo katoa fakatasi mo te Faiakoga, ke ‵mate fakatasi tatou mo ia.” Tela la, e tiga eiloa kāti ka ‵mate latou i ei, ne olo fakatasi atu te kau soko mo Iesu i te malaga alofa tenā ki Iutaia. Luka 13:22; 17:1-10; Ioane 10:22, 31, 40-42; 11:1-16.

▪ Tefea te koga ne fatoā talai atu Iesu i ei?

▪ Ne a akoakoga ne toe taku atu ne Iesu, kae se a te tala fakatusa e uiga ki mea kolā e ‵tupu i te olaga telā ne fakaaogā ne ia i te taimi tenā?

▪ Se a te tala ne maua ne Iesu, kae se a te uiga o ana pati e uiga ki te “ao” mo te “po”?

▪ Se a te uiga o pati konei a Toma: ‘‵Tou olo ko te mea ke ‵mate fakatasi tatou mo ia’?