Mafaufau ki te tulaga tenei. E salasala koe ki se galuega ˋtogi ke tausi atu ki tou kāiga. E lua a galuega e avanoa mai. E onoono koe ki fakamatalaga katoa, te vaegā galuega tenā, taimi gaˋlue, taimi ke faimalaga atu ki ei, mo nisi mea aka. A galuega katoa konā e ˋlei i te kilokiloga a te Tusi Tapu. Kāti e gali ki a koe te galuega e tasi ona ko vaegā galuega e fai i ei, io me ko te lasi o te ˋtogi i ei. Kae e uke aka foki a nisi mea e ˋtau o iloilo fakaˋlei ne koe a koi tuai o fai sau fakaikuga. E pelā me se fakaakoakoga, e mata, e feˋpaki a taimi gaˋlue i galuega konā mo taimi o fakatasiga i tau fakapotopotoga? E mata, ka fai ne galuega ˋtogi konei ke se lava tou taimi ke tausi atu ki tou kāiga i te feitu faka-te-agaga mo mea tau lagonaga? A te mafaufau ki fesili konei ka fesoasoani atu ke fakamuamua ne koe “a mea kolā e sili atu i te tāua”—tau tapuakiga mo manakoga o tou kāiga—i lō manakoga faka-te-foitino. Tenā ko mafai ei o fai ne koe se fakaikuga telā ka fakamanuia ne Ieova. w25.01 17 ¶11-13

Kafai foki loa ne fai fakamasei koe ne nisi tino, e mafai o mautinoa i a koe me alofa kae fakatāua koe ne Ieova. Kafai ko ‘fatifati tou loto,’ ke masaua me ne lavea ne Ieova a mea ˋlei i tou loto kae fakapilipili atu ne ia koe ki a ia. (Ioa. 6:44) E toka faeloa a ia o fesoasoani ki a koe me e tāua eiloa koe ki a ia. E mafai o iloa ne tatou a lagonaga o Ieova māfai e mafauˋfau ki te fakaakoakoga a Iesu. I te faiga o tena galuega talai i te lalolagi, ne lavea ne Iesu a tino kolā e ˋkilo fatauva ki ei a nisi tino, kae ne fakaasi atu ne ia te alofa atafai ki a latou. (Mata. 9:​9-12) I te taimi ne patele atu ki a ia se fafine telā ne manako ke fakaˋlei tena masaki fakalogoˋmae, ne fakamafanafana atu a Iesu ki a ia kae fakamālō atu mō tena fakatuanaki. (Male. 5:​25-34) Ne fakaata mai ne Iesu i se auala ˋlei katoatoa a uiga o tena Tamana. (Ioa. 14:9) Tela la, e mafai o mautinoa i a koe me e fakatāua ne Ieova koe kae iloa ne ia ou uiga ˋlei, e aofia i ei tou fakatuanaki mo tou alofa ki a ia. w24.10 7 ¶4-5

I tena olaga, ne fakafesagai a Tavita mo nisi tulaga faigaˋta kolā ne fai ei ke tagi a ia. Ne ˋteke atu a tino ki a ia kae fakatogafiti ne tino kolā ne talitonu a ia ki ei. (1 Samu. 19:​10, 11; 2 Samu. 15:​10-14, 30) I se taimi e tasi, ne tusi mai a ia: “Au ko gasolo o fiˋta ona ko toku mānava fiˋta; i te po kātoa ne ufi ne au toku moega ki loimata; ne fakalofia ne au toku moega ki te tagi.” (Sala. 6:6) Faitalia a mea faigaˋta ne fepaki mo Tavita, ne talitonu a ia i a Ieova e alofa ki a ia. Ne tusi mai a ia: “Ka lagona ne Ieova a te leo o toku tagi.” (Sala. 6:8) A pati i te ˋtou tusi siki e fakaasi mai i ei a te lasi o te alofa mo te atafai o Ieova ki ˋtou lagonaga. Ne mafaufau a Tavita me e pelā loa me tausi ne Ieova ana loimata i loto i se fagu io me fakamau ki loto i tena tusi. Ne mautinoa i a Tavita me lavea kae masaua ne Ieova a tena logoˋmae. Ne talitonu a ia me iloa ˋlei ne tena Tamana i te lagi ana fakalavelave mo te auala ne pokotia a ia i ei. w24.12 22 ¶11-12