E mafai o tauloto tatou ki te tāua ke maua se loto fakamaoni mai te fetauiga a Iesu mo Natanielu i te taimi muamua. I te taimi ne mai ei ne Filipo tena taugasoa ko Natanielu ke fetaui mo Iesu, ne tupu se mea fakaofoofogia. E tiga loa e seki fetaui aka loa a Iesu mo Natanielu, ne fai atu a Iesu: “Kiloke, tenei eiloa te tino Isalaelu telā e seai se uiga fakaloiloi i a ia.” (Ioa. 1:47) Ne lavea ne Iesu me tu ˋkese a te fakamaoni o Natanielu. E pelā mo tatou, e se ˋlei katoatoa a Natanielu. Kae ko ia e se uiga fakaloiloi kae e fakamaoni i mea katoa. Ne gali ki a Iesu tena uiga tenā kae fakamālō atu ki a Natanielu. A te ukega o mea i te Salamo 15 ko te auala ke fakafiafia ne tatou a Ieova, kolā e manakogina ke fai ne tatou e isi se lotou sokoga ki ˋtou faifaiga ki nisi tino. Salamo 15:3 e fai mai me i te mālō i te faleie o Ieova “e se gutu fatufatu, e seai se mea masei e fai ne ia ki tena tuakoi, kae e se fakalogoˋmae ne ia ana taugasoa.” Kafai e fatufatu ne tatou a nisi tino ka fakalogoˋmae atu te mea tenā ki a latou.—Iako. 1:26. w24.06 10 ¶7, 9; 11 ¶10

Kafai e fakatoka fakaˋlei koe mō te galuega talai, ka fai ei ke se polepole malosi koe ma faipati atu ki tino. Ne fesoasoani atu a Iesu ki ana soko ke fakatoka latou a koi tuai o uga atu latou ke fai te galuega talai. (Luka 10:​1-11) Ne fakagalue ne latou a mea ne akoako atu ne Iesu, kae ne fai i ei ke fiaˋfia malosi latou ona ko galuega e uke ne fai ne latou. E fakatoka pefea tatou mō te galuega talai? E manakogina ke mafauˋfau fakaˋlei tatou ki te auala ke fakamatala atu te munatonu i se auala magoi kae i ˋtou pati eiloa. E gali foki māfai e mafaufau muamua koe ki tali masani e lua io me tolu a tino i tau koga talai mo auala ke tali atu ei ki tulaga keseˋkese konā. Kae kafai ko fetaui tatou mo tino ke faipati atu i se auala filemu kae mata katakata. w24.04 16 ¶6-7

A te ˋtoe pogai tāua e talai ei ne tatou te tala ˋlei, ona ko ˋtou aˋlofa ki a Ieova te Atua mo tena igoa tapu. E ˋkilo atu tatou ki te ˋtou galuega talai e pelā me se auala ke ˋviki atu ki te Atua e aˋlofa tatou ki ei. E ˋlago atu tatou mo te loto kātoa me e ˋtau eiloa o maua ne Ieova te Atua a te vikiga mo te ˋmalu, mo te malosi mai ana tino tapuaki fakamaoni. E ˋviki kae fakaˋmalu ne tatou a ia mai te fakailoa atu ki nisi tino a fakamaoniga mautinoa me ne “faite ne [ia] a mea katoa” kae e maua ne tatou a te ola ona ko ia. E tuku atu ne tatou ki a ia te malosi—ˋtou malosi—māfai e fakaaoga ˋtou taimi, malosi, mo kope ke ˋkau katoatoa atu ki te galuega talai e ˋtusa mo ˋtou fakanofonofoga. (Mata. 6:33; Luka 13:24; Ko. 3:23) Tela la, e fiaˋfia tatou o faiˋpati e uiga ki te Atua e aˋlofa tatou ki ei. E fakamalosi foki tatou ke fakaasi atu ki nisi tino a tena igoa mo te uiga o tena igoa. w24.05 17 ¶11