Romafo
16 Mekamfo yɛn nuabea Foibe a ɔsom+ wɔ asafo a ɛwɔ Kenkrea+ mu no kyerɛ mo, 2 na moagye no+ Awurade mu sɛnea ɛsɛ akronkronfo no, na moaboa no biribiara mu bere a obehia mo+ no, efisɛ ɔno nso agyina nnipa pii akyi, yiw, m’ankasa meka ho.
3 Munkyia Priska ne Akwila+ a wɔyɛ me mfɛfo adwumayɛfo+ wɔ Kristo Yesu mu no mma me, 4 wɔn na wɔde wɔn ankasa kɔn too hɔ+ maa me kra, na ɛnyɛ me nko na meda wɔn ase,+ na mmom asafo a ɛwɔ amanaman mu nyinaa nso; 5 na munkyia asafo a ɛwɔ wɔn fie+ no nso. Munkyia me dɔfo Epaineto a ɔka Kristo mu aba a edi kan+ wɔ Asia no ho no. 6 Munkyia Maria a wayɛ adwumaden pii ama mo no. 7 Munkyia m’abusuafo+ ne me mfɛfo nneduafo+ Androniko ne Yunia a wɔwɔ din pa wɔ asomafo no anim na wɔbaa Kristo mu+ akyɛ sen me no.
8 Munkyia+ Ampliato a ɔyɛ me dɔfo wɔ Awurade mu no mma me. 9 Munkyia Urbano, yɛn yɔnko dwumayɛni wɔ Kristo mu, ne me dɔfo Staki. 10 Munkyia+ Apele a wɔagye no atom wɔ Kristo mu no. Munkyia Aristobulo fiefo. 11 Munkyia me busuani+ Herodion. Munkyia Narkiso fiefo a wɔwɔ Awurade mu+ no. 12 Munkyia Trifaina ne Trifosa, mmea a wɔreyɛ adwumaden wɔ Awurade mu. Munkyia yɛn dɔfo Persi a ɔyɛɛ adwumaden pii wɔ Awurade mu no. 13 Munkyia Rufo a wɔapaw no Awurade mu, ne ne maame a ɔyɛ me maame no. 14 Munkyia Asinkrito, Flegon, Herme, Patroba, Herma ne anuanom a wɔka wɔn ho no. 15 Munkyia Filologo ne Yulia, Nereo ne ne nuabea, ne Olimpa ne akronkronfo a wɔka wɔn ho+ no nyinaa. 16 Momfa mfewano kronkron nkyiakyia mo ho.+ Kristo asafo ahorow nyinaa kyiakyia mo.
17 Afei anuanom, mitu mo fo sɛ monhwɛ mo ho yiye wɔ wɔn a wɔde mpaapaemu+ ne hintiduato ba a ɛne nkyerɛkyerɛ+ a moasua no nhyia no ho, na montwe mo ho mfi wɔn ho.+ 18 Na nnipa a wɔte saa no nyɛ nkoa mma yɛn Awurade Yesu Kristo, na mmom wɔyɛ nkoa ma wɔn ankasa yafunu;+ na wɔde tɛkrɛmadɛ+ ne adɔkɔdɔkɔsɛm+ daadaa wɔn a wɔn tirim fitaa no koma. 19 Na obiara ahu mo asoɔmmerɛw no.+ Enti midi mo ho ahurusi. Nanso mepɛ sɛ moyɛ anyansafo+ wɔ nnepa ho, na moyɛ kronn+ wɔ nnebɔne+ ho. 20 Onyankopɔn a ɔma asomdwoe+ no bɛpɛtɛw Satan+ mo nan ase ntɛm. Yɛn Awurade Yesu Kristo adom nka mo.+
21 Me yɔnko dwumayɛni Timoteo kyia mo, ɔne m’abusuafo+ Lukio ne Yason ne Sosipatro.
22 Me Tertio a mekyerɛw krataa yi, mikyia mo Awurade mu.
23 Gaio+ a mekɔsoɛɛ no, a asafo no nyinaa hyia wɔ ne fie no kyia mo. Erasto a ɔyɛ kurow+ no sohwɛfo no kyia mo, ɔne ne nua Kwarto. 24 ——
25 Onyankopɔn na+ obetumi ahyɛ mo den sɛnea asɛmpa a meka ne Yesu Kristo ho asɛnka no te. Saa asɛmpa yi ne ahintasɛm kronkron+ a wɔammɔ so bere tenteenten no adiyi hyia; 26 ahintasɛm yi na afei wɔayi no adi,+ na wɔnam nkɔmhyɛsɛm a wɔakyerɛw so ayi no adi akyerɛ amanaman nyinaa, sɛnea daa Onyankopɔn ahyɛde te, na ama asoɔmmerɛw afa gyidi so aba;+ 27 Onyankopɔn a ɔno ne onyansafo koro pɛ+ no, ɔno na anuonyam+ mfa Yesu Kristo so+ nka no daa. Amen.