Memeneda, October 3
Ɔmfa ne tɛkrɛma nkeka nkurɔfo ho nsɛmmɔne.—Dw. 15:3.
Odwontofo no hyɛɛ da kaa dinsɛe ho asɛm. Dɛn na obi yɛ a ɛkyerɛ sɛ ɔyɛ dinsɛefo? Ɛne sɛ ɔbɛkeka atosɛm afa obi ho de asɛe ne din. Afei nso, Dwom 15:3 kae yɛn sɛ wɔn a wɔabɛsoɛ Yehowa ntamadan mu no, wɔnyɛ wɔn mfɛfo bɔne biara, na wɔn nnamfo nso, wɔnsɛe wɔn din. (Dw. 15:1) Ɛnde, tebea ahorow bɛn mu na obi betumi asɛe nkurɔfo din? Yɛanhwɛ yiye a, yebetumi akeka afoforo ho atosɛm a yɛn ani nna. Yɛnhwɛ tebea ahorow a edidi so yi: (1) onuawa bi agyae akwampae adwuma no, (2) awarefo bi afi Betel, anaa (3) onua bi nyɛ asafo mu panyin anaa ɔsomfo bio. Wohwɛ a, ɛbɛyɛ papa sɛ yɛde yɛn adwene bebu nea enti a nsakrae a ɛte saa aba na yɛkeka ho nsɛm kyerɛ afoforo anaa? Wobɛhwɛ mu no, ebia nea enti a wɔyɛɛ saa nsakrae no, pii wɔ hɔ a yennim. Momma yɛnkae sɛ, obi a wabɛsoɛ Yehowa ntamadan mu no, “ɔnyɛ ne mfɛfo bɔne biara, na ne nnamfo nso, ɔnsɛe wɔn din.” w24.06 11-12 ¶11-13.
Kwasida, October 4
Mede Yehowa asi m’anim daa. Ɔwɔ me nsa nifa, enti merenhinhim da biara da.—Dw. 16:8.
Gyinae biara a yebesi no, ɛsɛ sɛ yɛhwɛ sɛ ɛsɔ Yehowa ani. Yɛyɛ saa a ɛbɛma yɛakɔ so asuro Yehowa. Sɛ wokenkan Bible mu asɛm bi a, bisa wo ho sɛ, ‘Me na saa asɛm yi too me a, gyinae bɛn na anka mesi?’ Fa no sɛ bere a Israel mpanyimfo du no kɔhwɛɛ asaase a Yehowa de hyɛɛ Israelfo no bɔ na wɔbɛbɔɔ amanneɛ sɛ wɔrentumi nni Kaananfo no so nkonim no, na wowɔ hɔ bi. Nnipa ho suro nti, anka wubegye wɔn asɛm no adi, anaa ɔdɔ a wowɔ ma Yehowa nti, anka wobɛyɛ nea ɔpɛ? Israelfo a na ɛwɔ hɔ saa bere no annye anni sɛ nokware na na Yosua ne Kaleb reka no. Ɛno nti, Yehowa amma saa Israelfo no ankɔ Bɔhyɛ Asaase no so bi.—Num. 14:10, 22, 23. w24.07 10 ¶7
Dwoda, October 5
Nea ɔhwehwɛ komam ne Yehowa.—Mmeb. 17:3.
Odiyifo Hosea yere Gomer kodii mmarima afoforo akyi. Wohwɛ a, ɛno kyerɛ sɛ na watew nkensen a wɔboa no a ɛrenyɛ yiye anaa? Yehowa a otumi hu nea ɛwɔ onipa koma mu no ka kyerɛɛ Hosea sɛ: “San kɔ, kɔdɔ ɔbea a ɔbarima foforo dɔ no, ɔbea a wasɛe aware no. Kɔdɔ no sɛnea Yehowa dɔɔ Israelfo bere a wofii n’akyi kodii anyame foforo akyi” no. (Hos. 3:1; Mmeb. 16:2) Hyɛ no nsow sɛ, na Hosea yere no da so ara te ne bɔne no mu. Nanso Yehowa ka kyerɛɛ Hosea sɛ ɔmfa ne yere no bɔne nkyɛ no, na wɔnsan ntena. Saa ara nso na na Yehowa ntoo ne man asoɔdenfo no paahwii. Ɛwom sɛ na wɔreyɛ bɔne akɛseakɛse de, nanso na Yehowa da so ara dɔ wɔn na ɔkɔɔ so hyɛɛ wɔn nkuran sɛ wɔnsakra wɔn adwene na wɔnsesa wɔn akwan. Saa nhwɛso yi kyerɛ sɛ, Yehowa a “ɔhwehwɛ koma mu” no, sɛ obi da so ara reyɛ bɔne kɛse mpo a, obetumi aboa no ma wasakra n’adwene. w24.08 10 ¶7