Yehowa de mfatoho kyerɛ yɛn sɛnea ɔpopa yɛn bɔne. Ɔka sɛ: “Mɛpopa wo mmarato te sɛ nea omununkum akata so, na mapopa wo bɔne te sɛ nea omununkum tumm akata so.” (Yes. 44:22) Sɛ Yehowa de yɛn bɔne kyɛ yɛn a, ɛte sɛ nea ɔde omununkum tumm akata so, sɛnea ɛbɛyɛ a obiara renhu bio. Dɛn na yesua fi saa mfatoho ahorow yi mu? Sɛ Yehowa de yɛn bɔne kyɛ yɛn a, ɛnsɛ sɛ yɛma yɛn ahonim kɔ so bu yɛn fɔ. Bɔne ho ka biara a yɛde no, Yesu Kristo de ne mogya no atwam koraa. Wei nti, ɛte sɛ nea yɛnyɛɛ bɔne koraa da. Sɛ yɛyɛ bɔne na yenu yɛn ho na Yehowa de kyɛ yɛn a, na ɔde akyɛ yɛn koraa. Saa na Yehowa bɔnefakyɛ te. Afei nso, Yehowa mmɔborɔhunu ma yɛne ne ntam san yɛ kama, na ɛboa yɛn na yɛn ahonim ankɔ so anhaw yɛn. w25.02 10-11 ¶11-14

Sɛ obi yɛ bɔne wɔ asafo no mu a, boayikuw a ehyia no no, Yehowa hwɛ kwan sɛ wɔbɛbɔ asafo no ho ban na nea wayɛ bɔne no amfa ne bɔne no angu asafo no ho fi. (1 Kor. 5:7) Nanso, sɛ ɔbɔnefo no ma kwan a, wɔyɛ nea wɔbetumi biara boa no sɛnea ɛbɛyɛ a ɔbɛsakra. Enti bere a wɔreboa ɔbɔnefo no nyinaa, wɔn anidaso ne sɛ ɛbɛyɛ yiye. Adɛn ntia? Efisɛ wɔpɛ sɛ wɔsuasua Yehowa a ‘ɔwɔ ayamhyehye ne mmɔborɔhunu’ no. (Yak. 5:11) Saa na ɔsomafo Yohane yɛe. Wo de, hwɛ asɛm a ɔkae yi: “Me mma nkumaa, merekyerɛw eyinom abrɛ mo, na moanyɛ bɔne. Nanso ɛba sɛ obi yɛ bɔne a, yɛwɔ ɔboafo bi wɔ Agya no nkyɛn. Ɔno ne ɔtreneeni Yesu Kristo.” (1 Yoh. 2:1) Nea ɛyɛ awerɛhow ne sɛ, ɛnyɛ Kristofo a wɔyɛ bɔne kɛse no nyinaa na wɔsakra wɔn adwene. Sɛ obi yɛ bɔne kɛse na wansakra a, ɛsɛ sɛ wɔyi no fi asafo no mu. w24.08 25 ¶19-20

Anhwɛ a, wode wo ho bɛtoto afoforo ho. Nanso nyɛ saa! Adɛn ntia? Efisɛ Yehowa mfa yɛn ntoto obiara ho. (Gal. 6:4) Yɛbɛyɛ nhwɛso a, Maria de ngo huamhuam a ne bo yɛ den paa maa Yesu. (Yoh. 12:​3-5) Nanso sɛ yɛhwɛ okunafo hiani no a, ɔde nkaprɛ mma mmienu a ɛnsom bo ahe biara yii ntoboa wɔ asɔrefie hɔ. (Luka 21:​1-4) Yesu amfa okunafo hiani no antoto Maria ho; ohui sɛ na wɔn mmienu nyinaa reyɛ biribi de akyerɛ sɛ wɔwɔ gyidi. N’agya Yehowa nso, biribiara a woyɛ ma no no, sɛ esua sɛ dɛn mpo a, n’ani sɔ paa, efisɛ onim sɛ ahofama ne ɔdɔ a wowɔ ma no nti na woyɛ saa. Ɛtɔ da a, yɛn nyinaa adwenem tumi yɛ yɛn naa. Nanso, Onyankopɔn Asɛm Bible no betumi aboa yɛn ma yɛadi so. Ɛremma w’abam mmu, mmom w’adwene besi wo pi. Kae sɛ, Yehowa nim wo paa. Biribiara a wode abɔ afɔre ama no no, n’ani sɔ paa, na ɔhyɛ bɔ sɛ obetua wo ka. Nya awerɛhyem sɛ Yehowa dɔ n’asomfo nyinaa na odwen wɔn ho. w24.10 25 ¶3; 29 ¶17-18