AIDS Asɛnnennen Ma Mmofra A Wonni Mfe Aduonu

AIDS yaredɔm no nnim mfe a obi adi anaa mmofra ne mpanyimfo ntam nsonsonoe. Sɛnea New York Times mu AIDS ho asɛm bi kae wɔ n’asɛmti mu no, amanneɛbɔ ahorow a efi wiase nyinaa no di adanse a ɛyɛ awerɛhow sɛ “AIDS Retrɛw wɔ Mmofra a Wonnii Mfe Aduonu no mu, Ade Foforo a Ɛhaw Abenfo.” Oduruyɛfo Gary R. Strokash, mmofra a wɔasi mpanyin afe so aduruyɛ so panyin a ɔwɔ Chicago ayaresabea bi a agye din no kae sɛ sɛnea mmofra a wonnii mfe aduonu pii nya AIDS no “na ɛbɛyɛ asɛnnennen a edi hɔ.” Ɔkae sɛ: “Ɛyɛ hu na ɛbɛyɛ nea ɛsɛe ade.” Oduruyɛfo Charles Wibbelsman, mmofra a wonnii mfe aduonu ayaresabea wɔ Kaiser Permanente Medical Center wɔ San Francisco no panyin kae sɛ: “Akyinnye biara nni ho sɛ sɛ wɔannya ano aduru a, 1990 mfe no mu AIDS ɔyaredɔm no bɛka . . . mmofra a wonnii mfe aduonu.” New York City AIDS ho nsɛm amanneɛbɔfo ka mmofra a wonnii mfe aduonu a wɔanya AIDS no ho asɛm sɛ: “Yesusuw sɛ tebea no yɛ asɛnhia a ɛyɛ aniberesɛm.”

Canada Toronto Star no kaa sɛnea AIDS retrɛw wɔ mmofra a wonnii mfe aduonu mu ma ɛyɛ hu no ho asɛm. Oduruyɛfo bi kae sɛ: “Mprempren, ɛyɛ hu koraa sen sɛnea obiara hu. Misusuw sɛ ɛyɛ asɛnnennen a yentumi nyɛ ho hwee. Akyiri yi na yebehu sɛnea ennye koraa no.” Oduruyɛfo no asɛm tiawa no yɛ nsusuwii a nnuruyɛfo ne aban mpanyimfo nyinaa gye tom wɔ wiase nyinaa bere a AIDS retrɛw no.

Kan no, na AIDS ho abenfo nsusuw sɛ wɔn a wɔabɛn mpanyin afe so no mu pii nso betumi anya HIV (human immunodeficiency virus) , a ɛma AIDS no. Oduruyɛfo bi a ɔwɔ New York City kae sɛ: “Yɛreka biribi a afe a atwam pɛ ni no na ɛyɛ nsusuwii ara kwa ho asɛm.” Nanso, The New York Times no bɔɔ amanneɛ sɛ: “Mprempren nnuruyɛfo a afe biako pɛ a atwam ni no na wonni abofra a onnii mfe aduonu a ɔyare AIDS biako mpo no anya pii.

Nhwehwɛmufo te nka sɛ bere a mmofra a wonnii mfe aduonu a wɔanya AIDS ho asɛm a wɔte no yɛ hu no, ɛyɛ nea ɛsen saa ho “amanneɛbɔ” ketewaa bi ara kwa, efisɛ sɛ wonya yare no a, ɛho sɛnkyerɛnne no nna adi kosi bɛyɛ ɛno akyi efi mfe ason kosi du. Enti ebia wɔn a wonya HIV no wɔ bere a wɔrekodi mfe aduonu mfiase mu no renhu AIDS ho sɛnkyerɛnne kosi bere a aka kakra na wɔadi mfe aduonu anaa wɔ wɔn mfe 20 no mfiase.

Sɛ nhwɛso no, wɔ nnansa yi nhwehwɛmu bi a wɔyɛe wɔ mmofra a wɔwo wɔn wɔ New York State fi 1987 mu mu no, New York State Health Department no hui sɛ na nkokoaa a ɛnãnom a wɔadi mfe 15 wo wɔn no mu 1,000 biara mu 1 wɔ nea ɛko tia AIDS mmoawa, a ɛkyerɛ sɛ ebi wɔ akokoaa no nã no ho. Nea ɛyɛ hu bio nso ne sɛ, nhwehwɛmu koro no ara ma ɛdaa adi sɛ na nkokoaa 100 a wɔn a wɔadi mfe 19 wo wɔn no mu 1 biara wɔ nea ɛko tia AIDS mmoawa. Nhwehwɛmu foforo a CDC (U. S. Centers for Disease Control) yɛe no ma ɛdaa adi sɛ Amerikafo mmarima mu ɔha biara mu nkyem 20 ne Amerikafo mmea mu ɔha biara mu nkyem 25 a wohuu AIDS wɔ wɔn nipadua mu no yɛ wɔn a wɔwɔ wɔn mfe 20 mfe no mu. CDC nhwehwɛmu no bɔ amanneɛ sɛ wɔn mu pii nyaa yare no bere a wosii mpanyin afe kwan so no.

Nanso, dɛn nti na sɛ wɔwo nkokoaa a wɔwɔ AIDS mmoawa no bi a, wɔntaa nni mfe aduonu? Nea enti a ɛte saa no yɛ ahodwiriw!

The New York Times bɔɔ amanneɛ sɛ nhwehwɛmuyɛfo ne nnuruyɛfo kyerɛkyerɛ mu ntɛm ara sɛ nnɛyi mmofra a wonnii mfe aduonu no de wɔn ho hyɛ “ɔbarima ne ɔbea nna mu yiye sɛnea wɔn mu nyarewa a wonya fi ɔbarima ne ɔbea nna mu dodow no kyerɛ no.” Center for Population Options bɔ amanneɛ sɛ afe biara, mmofra a wonnii mfe aduonu 6 biara mu 1 nya ɔyare fi ɔbarima ne ɔbea nna mu ne sɛ ntoaso sukuufo mmeawa a wɔde wɔn hyɛ ɔbarima ne ɔbea nna mu 6 biara mu 1 ne anyɛ yiye koraa no nnipa baanan ada.

U.S. News & World Report bɔ amanneɛ sɛ: “Wɔ afotu ahorow a ɛkyerɛ sɛ ‘wɔnka sɛ dabi’ nyinaa akyi no, Amerikani abofra a onnii mfe aduonu no sɛe ɔbaabun a ɔyɛ no bere a wadi mfe 16.” Nsɛmma nhoma no kae sɛ: “Esiane sɛ wɔn a wonnii mfe aduonu no mu kakraa bi na wɔhwehwɛ wɔn mogya mu nti, wɔn a wɔanya ɔyare no bi no mu dodow no ara nnim sɛ wɔwɔ HIV mmoawa no bi.” AIDS ho ɔbenfo bi kae sɛ, sɛ wɔbɔ aguaman de ka krak kokaine a wɔde di dwuma ho anaasɛ wɔnyɛ saa, sɛ wɔyɛ akobɔfo anaa wɔnyɛ saa no, “Amerikafo a wonnii mfe aduonu no yɛ wɔn a wobetumi anya AIDS titiriw.” “Wɔn mu ɔpepem 2.5 nya ɔyare fi ɔbarima ne ɔbea nna mu afe biara.” Oduruyɛfo Gary Noble a ɔwɔ CDC kaa saa asɛm yi sɛ: “Yenim sɛ wɔn suban wɔ ɔbarima ne ɔbea nna ho no kowie ɔyare a wobenya ho asiane mu.”

Nea ɛma wɔn a wɔde AIDS mmoawa san nkurɔfo a wɔkɔ so yɛ pii dedaw no dodow renya nkɔanim no ne mmɔnten so mmofra a wɔn mu binom nnii mfe dumiɛnsa, a wɔn mu pii yɛ wɔn a wɔaguan afi awofo a wɔyɛ mmofra ayayade nkyɛn no. Wɔn mu dodow a wɔde krak kokaine di dwuma no ayɛ pii. Wɔn mu pii bɔ tuutuu na wɔatumi atɔ nnubɔne anaasɛ wɔanya baabi ada. Sɛ nhwɛso no, Brazilni mmofra ɔfotufo bi kae sɛ wɔ South America no, “mmeawa a wɔadi mfe akron ne 10 pɛ no taa yɛ atuutuufo, ɛtɔ da bi a, wɔyɛ saa na wɔanya aduan kakraa.” Ɔkae sɛ: “Wɔn mu bebree nnim AIDS anaa ɔbarima ne ɔbea nna ho nsɛm ahe biara. Mahyia mmeawa a wɔayinsɛn na wosusuw sɛ ‘ɛbɔɔ wɔn’ te sɛ ɔpakum.”

Oduruyɛfo Philip Pizzo, AIDS ho ɔbenfo ne mmofra nnuruyɛfo panyin a ɔwɔ National Cancer Institute no kae sɛ, sɛnea mmofra a wonnii mfe aduonu a wɔyɛ akobɔfo no mu pii nya HIV no kyerɛ AIDS ho asɛm bi a ɛyɛ hu. “Akobɔfo bɛboro ɔpepem biako nam ɔbarima ne ɔbea nna so na ɛhwɛ wɔn ho. Akyinnye biara nni ho sɛ wɔn mu pii bɛsan de wɔn ho afra nnipa mu.”

So ɛyɛ nwonwa sɛ AIDS yaredɔm no retrɛw pii wɔ mmofra a wonnii mfe aduonu no mu wɔ wiase nyinaa? So ɛyɛ nea wontumi nsiw ano? Ɛbɛkɔ so ayɛ saa bere dodow a wɔn a wɔwɔ AIDS mmoawa, ne wɔn a wontumi nka dabi wɔ ɔbarima ne ɔbea nna a edi aware anim ho no yɛ anibiannaso no. Sɛ nhwɛso no, hwɛ amanneɛbɔ a efi Johannesburg, South Africa The Sunday Star mu yi. Wɔ ayarefo 1,142 a wɔn yare no fi ɔbarima ne ɔbea nna mu no mu nhwehwɛmu bi a wɔyɛe nnansa yi mu no, wɔn mu ɔha biara mu 70 gye too mu sɛ wɔne nnipa fi 3 kosi 80 da ɔsram biara. Na emu binom da so ara yɛ saa na wɔkɔ so de yare no san afoforo.

Awerɛhosɛm no ne sɛ, mmofra a wonnii mfe aduonu no mu pii fam no, AIDS a wobenya no mfa wɔn ho ahe biara. Wɔn fam no da biara da, wɔpere na wɔakɔ so atra ase​—akwan pii wɔ hɔ a wɔnam so wu wɔ abɔnten so​—nti wonnwen biribi a ebetumi akum wɔn wɔ mfe a ɛreba mu no ho. Wɔte nka sɛ, ɔkwan biara so wobenya ano aduru a ebegye wɔn. AIDS ho ɔbenfo bi kae sɛ: “Mmofra yɛ kuw bi a wonnwen nea ɛbɛba mfe 10 bere mu ho no ho nhwɛso titiriw.”

Nnipa pii nso wɔ adwene a ɛnteɛ a ɛne sɛ sɛ wɔn a wɔne wɔn deda no ka sɛ wonni AIDS mmoawa a, ɛyɛ nokware. Mpɛn pii no ɛnyɛ nokware. Nnipa pii fam no, bere a ɔyare no akyɛ wɔ wɔn ho no, esiane abufuw anaa aweredi nti wɔhyɛ da de san afoforo.

Nea ɛnsɛ sɛ wobu ani gu so nso ne mmoawa no a wonya fi mpaane a wɔde wɔ wɔn ho nnubɔne mu no​—nea ama nnipa pii anya ɔyare no. Afei awiei koraa no, AIDS a wonya fi mogya a wɔtwe gu afoforo mu no wɔ hɔ. Ɔyare no akunkum nnipa pii dedaw a mfomso no mfi wɔn, na mogya a HIV wom bɛkɔ so akunkum pii. Nnuruyɛfo ne ayarehwɛfo pii suro sɛ mpaane a AIDS mmoawa wɔ ho a ebetumi asakra wɔn asetra koraa no betĩ wɔn. So ɛyɛ nwonwa sɛ wɔfrɛ AIDS sɛ’90’ mfe no ne akyi asɛnnennen?