Gyidi a Edi Mu Wɔ Ɔtaa Mu

BƐYƐ mfe 60 a atwam ni no, Mina Esch nsa kaa krataa bi fii ne kunu Peter hɔ. Na nsɛm a ɛwɔ krataa no mu no yɛ kakraa bi, na na emu nso nna hɔ. Nanso, n’ani gyei sɛ ne nsa kaa krataa no. Esiane sɛ na Mina kunu no yɛ Yehowa Adansefo mu biako nti Nasi aban no de no kɔtoo Buchenwald nneduaban mu. Asɛntiaa yi na na wɔakyerɛw wɔ krataa no akyi: “Deduani no yɛ Bible Suani [Sɛnea na wonim Yehowa Adansefo saa bere no] . . . a ommu ade. Eyi nti, onni hokwan biara sɛ obetumi ne obi adi nkitaho.” Asɛm yi maa Mina hui sɛ Peter da so ara kura ne gyidi mu.

Seesei, krataa no ayɛ mmerɛw na ne kɔla asesa na wɔagye ato Beae a Wɔkora Yudafo Amammerɛ—Okunkɛse no Ho Adanse a Ɛfata, a ɛwɔ Battery Park, New York City, a wotua ho ka. Krataa a ɛka Peter Esch mfonini ho no yɛ adanse ketewaa bi a ɛkyerɛ atirimmɔdenne a wɔahu wɔ adesamma mu—Okunkɛse no—a ɛno mu na wokunkum Yudafo ɔpepem asia no. Nneɛma atitiriw a ɛwɔ akorae hɔ no ne mfonini bɛboro 2,000 ne nnwinnade 800 a ɛfa Yudafo abakɔsɛm ne wɔn amammerɛ ho fi 1880 reba a Okunkɛse no ka ho. Dɛn nti na Beae a Wɔkora Yudafo Amammerɛ no na ɛfata sɛ wɔde krataa a Peter Esch kyerɛw no to?

Ɔbenfo Jud Newborn a onim akorae hɔ abakɔsɛm no kyerɛkyerɛ mu sɛ: “Wɔnam akorae no so ma obiara hu Yudafo abakɔsɛm titiriw. Wɔtaa Yehowa Adansefo esiane wɔn som no nti. Adansefo no som mu gyidi ne gyina a wɔannyina ɔman biara afa na wɔansom wiase sodifo tirimmɔdenfo bi no nti na ɛmaa wɔtaa wɔn. Na wɔampɛ nso sɛ wɔbɛko ama no. . . . Wɔ ɔtaa bebrebe nyinaa mu no, Yudafo no bɔɔ mmɔden sɛ wobekura wɔn amammerɛ ne wɔn gyidi mu. Ɛyɛ gyidi a edi mu a ebinom daa no adi no na akorae yi kamfo kyerɛ. Ne saa nti, wɔn a wɔhwɛ tete nneɛma akorae hɔ no kyerɛ anisɔ ma gyidi a Yehowa Adansefo daa no adi wɔ Nasi nniso no ase no na wɔkyerɛ ho anigye.”

Krataa a wɔakyerɛw nsɛm kakraa bi wom a seesei ɛwɔ Beae a Wɔkora Yudafo Amammerɛ no kyerɛ ɔbarima bi a ohuu amane denam Yehowa mu gyidi a ɔwɔ a wɔsɔ hwɛe no so. Peter Esch gyidi ano ammrɛ ase wɔ amane pii a ohyiae wɔ Nasi nsraban mu no ho.

[Mfonini wɔ kratafa 31]

Beae a Wɔkora Yudafo Amammerɛ Wɔ New York City

[Mfonini ahorow wɔ kratafa 31]

Wɔde Esch a ɔyɛ Yehowa Dansefo no kɔtoo afiase wɔ 1938 kosi 1945 mu esiane ne gyidi a okuraa mu no nti