Onyankopɔn Ahenni No Asase So Mma

1, 2. (a) Wobuu akontaa sɛ na nnipa dodow a wɔwɔ wiase wɔ 1914 Y.B. mu no yɛ ahe, na na wɔn mu apaapae wɔ dɛn mu? (b) Ná aman ne nhemman horow no te dɛn wɔ wiase no mu, nanso na wɔte sɛ dɛn ma Ɔbɔadeɛ no?

WƆ AFE a wɔahyɛ no agyirae 1914 mu no, wobuu akontaa sɛ nnipa a wɔwɔ wiase dodow boro ɔpepepem biako.a Wɔ ɔpepem pii a Wiase Ko I ne Spanish influenza kunkum wɔn akyi no, ebedu afe 1920 mu no na nnipa a wɔwɔ asase so no dodow reyɛ adu 1,859,892,000. Na wiase nnipa dodow yi mu apaapae ayeyɛ aman ne nhemman pii, a ahemman a na ɛsõ sen ne nyinaa wɔ 1914 mu ne Engiresi Aburokyiri Ahemman a edii asase yi nkyem anan mu biako ne ɛso nnipa so no. Nanso ná nhemman afoforo te sɛ Turkey Ahemman, China Ahemman, Dutch Ahemman, Franse Ahemman, German Ahemman, Austro-Hungaria Ahemman, ne Portuguese Ahemman no wɔ hɔ saa bere no. Na saa aman ne nhemman ahorow yi wɔ tumi kɛse wɔ asase so, nanso na wɔte dɛn wɔ asase Wura, Ɔbɔadeɛ Kɛse, Ɔsorosoroni Nyankopɔn anim? So obetumi adi wɔn nyinaa ho dwuma wɔ anibu biako mu? Ɔrekamfo Ɔbɔadeɛ no ahoɔden a ɛkyɛn onipa de no, odiyifo Yesaia se:

² “Hena na ɔteɛ [Yehowa] honhom so, na ɔfotufo bɛn na ɔma ohu ade? Ɔne hena na atu agyina, na wama wahu biribi, na wakyerɛ no atemmu kwan, na wakyerɛ no nimdeɛ, na wama wahu nhumu kwan? Hwɛ, amanaman te sɛ bokiti ho nsukoko a ɛresosɔ, na wobu wɔn sɛ nsenia mu mfutumawa bi. . . . Ɔno na ɔte asase kontonkron so, na ɛsotefo te sɛ mmoadabi.’​—Yes. 40:13-15, 22.

 3, 4. (a) So amanaman nyinaa a wɔboaboa wɔn ano n’anim no yɛ ade a ɛyɛ den ma Onyankopɔn Temmufo Abadiakyiri, Yesu Kristo anaa, na wɔaka eyi ho asɛm ato hɔ wɔ ɛbɛ bɛn mu? (b) Saa bɛ yi kyerɛ nea wɔhwehwɛ wɔ nnipa a wɔwɔ anidaso bɛn ho?

³ Ɛnde nyansa mu no, ɛyɛ mmerɛw koraa ma Ɔbɔadeɛ Nyankopɔn no sɛ ɔbɛboaboa amanaman no nyinaa ano wɔ n’anim na wabu wɔn atɛn na ɔde asotwe ama wɔn. Saa ara nso na, ɛyɛ mmerɛw ma Onyankopɔn Ba tumfoɔ, Yesu Kristo, a Yehowa apaw no sɛ ne Temmufo Abadiakyiri no sɛ ɔbɛyɛ eyi. (Aso. 17:31) Sɛ́ ɔbɛyɛ saa ade yi wɔ bere a ɛsɛ mu no, Onyankopɔn Ba no ankasa ka too hɔ wɔ ne bɛ a ɛfa nguanten ne mpapo ho no mu. Saa bɛ yi na ɔsomafo Mateo de twa nkɔmhyɛ a Awurade Yesu Kristo de mae wɔ Ngo Bepɔw no so a ɛfa ne ba a waba (parousia) ne “nneɛma nhyehyɛe no awiei” ho “sɛnkyerɛnne” no to. (Mat. 24:3) Wɔ ɛbɛ a edi eyi anim pɛɛ a ɛne “talente” ho bɛ no mu no, Awurade Yesu kyerɛe sɛ ɛsɛ sɛ asuafo anokwafo a wɔne no bedi hene wɔ ne soro ahenni no mu no yɛ adwuma bere a wɔwɔ asase so ha no na ama “nea ɔwɔ” no adɔɔso. Ɛnde, ɛyɛ nea ɛfata sɛ wɔ ɛbɛ a edi hɔ mu no ɔkyerɛ nea wɔhwehwɛ wɔ wɔn a wɔte ase nnɛ a wɔbɛba abɛyɛ ne soro ahenni no mma no ho. Ofi ɛbɛ no ase sɛ:

⁴ “Na onipa ba no bɛba n’anuonyam mu a n’abɔfo nyinaa ka ne ho no, ɔbɛtra n’anuonyam ahengua so. Na wɔbɛboaboa amanaman nyinaa ano n’anim. Na ɔbɛpaapae wɔn mu, sɛnea oguanhwɛfo paapae nguanten ne mpapo mu. Na ɔde nguanten no begyina ne nifa, na ɔde mpapo no agyina benkum.”​—Mat. 25:31-33.

5, 6. (a) Wɔ ne nkɔmhyɛ no mu no, Yesu frɛɛ ne ho dɛn? (b) Dɛn nti na eyi kae yɛn Daniel nkɔmhyɛ no ti ason?

⁵ Ansa na ɔrebu saa bɛ yi no, na Yesu aka n’ankasa ho asɛm mpɛn ason dedaw sɛ “onipa ba.” (Mat. 24:27, 30, 37, 39, 44; 25:13) Esiane sɛ na wɔde din yi di dwuma fa Mesia ahenni no ho nti, dwuma a wɔde dii wɔ ha no yɛ nea ɛfata yiye. Dwuma a wɔde di wɔn ha no ma yɛkae nkɔmhyɛ a ɛwɔ Daniel 7:9, 10, 13, 14, faako a yɛkenkan sɛ:

⁶ “Wosisii agua na obi a ne nna akyɛ bɛtraa ase. . . . mpem mpem som no, na ɔpedu huhaa gyina n’anim, wɔtraa ase sɛ wɔrebu atɛn, na wobuebuee nhoma no mu. Mede hwɛ, anadwo adehu no mu ara, na hwɛ, obi a ɔte sɛ onipa ba nam ɔsoro amununkum mu reba, na oduu nea ne nna akyɛ no nkyɛn, na wɔma ɔbɛn n’anim. Na ɔno na wɔde tumi ne anuonyam ne ahenni maa no ma aman, nkurɔfo ne ɔkasa horow nyinaa som no; ne tumi yɛ daa tumi a ɛrentwam da, na n’ahenni yɛ nea ɛrensɛe da.”

 7. Bere bɛn na Yesu Kristo bae a abɔfo ka ne ho na ɔtraa “n‘anuonyam ahengua so,” na enti dɛn na wɔsan de sii hɔ?

⁷ Ɛwom sɛ ɛyɛ nea esii a yɛantumi amfa yɛn desani aniwa anhu wɔ ɔsoro de, nanso na ɛyɛ afe 1914 mu, wɔ “Amanaman mmere” (anaasɛ “amanaman no mmere a wɔahyɛ ato hɔ”) no awiei, na “onipa ba” no duu Nea ne Nna Akyɛ, Yehowa Nyankopɔn nkyɛn, na wɔde saa “tumi ne anuonyam ne ahenni” no nyinaa maa “onipa ba” no. Enti saa bere no, Amanaman Mmere no awiei wɔ 1914 mu, na Awurade Yesu sɛ́ onipa Ba no, bae a abɔfo no nyinaa ka ne ‘ho na ɔbɛtraa “n’anuonyam ahengua so.” Enti wɔwoo Onyankopɔn Mesia ahenni no wɔ soro. (Adi. 12:5, 10) Ɛyɛ Dawid ahenni a na adi tumi wɔ Yerusalem nanso Babilon hene Nebukadnesar betu gui wɔ 607 A.Y.B. mu no a wɔsan de sii hɔ. Enti ná nea esii wɔ afe 1914 mu no yɛ nea esii wɔ 607 mu no a wɔdan no. Afei Dawid aseni dii tumi bio.

 8. Esiane nea esii wɔ 607 A.Y.B. mu no nti, dɛn nti na na ɛyɛ ade a ɛfata ma Amanaman no nyinaa sɛ wɔbɛboaboa wɔn ano wɔ onipa Ba a wɔde no asi ahengua so no anim wɔ 1914 Y. B. mu?

⁸ Saa bere no Awurade Yesu Kristo “ba a waba” anaasɛ parousia no fii ase. Enti, nea wɔka ho asɛm wɔ nguanten ne mpapo ho bɛ no mu no si wɔ ne parousia no mu. Nea ɛka eyi ho ne amanaman no nyinaa a wɔboaboa wɔn ano wɔ n’anim sɛ Ɔhene a ɔwɔ hɔ a ɔto n’ahengua so. Ná eyi ne ade a ɛsɛ sɛ esi. Dɛn ntia? Efisɛ ná ‘Amanaman no mmere a wɔahyɛ ato hɔ’ no aba awiei. (Luka 21:24) Wɔ sɛnkyerɛnne kwan so “mmere” ason mu no saa Amanaman yi adi asase nyinaa so tumi a Onyankopɔn Mesia ahenni biara ammɔ wɔn mmataho. Wɔ Bible mu no, nkɔmhyɛ bere kyerɛ nnafua 360, anaasɛ mfe wɔ sɛnkyerɛnne kwan so. Afei ná ɛsɛ sɛ saa nkɔmhyɛ kwan so “mmere” ason a ɛte saa wɔ hɔ. Na ɛno kyerɛ mfe 2,520 (7 x mfe 360) . Saa bere tenten yi na Amanaman no de dii asase nyinaa so tumi. Saa bere no nyinaa mu no ná wɔatiatia hokwan a Onyankopɔn Mesia ahenni no wɔ sɛ edi wiase so tumi no so. Sɛ yɛsan yɛn akyi kan mfe 2,520 fi 1914 Y.B. a ɛbɛkɔ akosi afe 607 A.Y.B. so. Ɛno ne bere a Babilon hene Nebukadnesar bɛyɛɛ wiase sodifo denam Ɔhene Dawid ahenni abusua a ɛwɔ Yerusalem a otu gui no so.​—Hes. 21:27.

 9. (a) Esiane sɛ Nebukadnesar dae a ɛfa “mmere nson” no ho no bae bere a wanya wiase tumi akyi bɛboro afe nti, so eyi kyerɛ sɛ na Amanaman Mmere no rentumi mfi ase gye sɛ bere a ɔdae no anya ne mmamu ankasa no akyi ansa anaa? (b) Ɛhe na “mmere nson” no bɛkɔ akosi, sɛ yɛkan fi bere a Babilon hwee ase wɔ Mediafo ne Persiafo nsam no so a, na dɛn na ɛbɛyɛ nea nyansa wom sɛ esi saa bere no?

⁹ Enti “mmere nson” a Amanaman no de adi tumi no fii ase 607 A.Y.B. mu, nanso na ɛyɛ bɛboro afe fi bere a Ɔhene Nebukadnesar a ofi Babilon no nyaa n’adaeso a ɛfa saa “mmere nson” no ho no. (Dan. 4:16, 23, 25, 32) Ade foforo: saa dae yi nyaa ne mmamu ankasa wɔ Nebukadnesar so bere a ɔbɔɔ dam “mmere” (mfe) ason ankasa na ɔwee nwura sɛ nantwi wɔ wuram no. So eyi kyerɛ sɛ ná “mmere nson” a Amanaman no de adi tumi no rentumi mfi ase wɔ 607 A.Y.B. mu, nni nkɔmhyɛ dae no anim anaa? So ná ɛsɛ sɛ saa Amanaman Mmere no fi ase bere a ɔhene no ho asan no afi saa mfirihyia ason adammɔ no mu no anaa? Dabi! Esiane sɛ yennim afe a ne ho san no no nti, ɛnhwehwɛ sɛ, sɛ “mmere nson” a Amanaman no de bedi wiase so tumi no befi ase a, na etwa sɛ Nebukadnesar ahenni no di kan hwe ase wɔ afe 539 A.Y.B. mu ansa. Sɛ yɛkan nkɔmhyɛ “mmere nson” (mfe 2,520) no fi bere a Babilon hwee ase Mediafo ne Persiafo nsam wɔ 539 A.Y.B. mu no a, ɛnde na saa “mmere nson” no bɛba awiei wɔ afe 1982 Y.B. awiei mu hɔ, a na ɛda so ara yɛ daakye. Esiane eyi nti, dɛn na ɛbɛyɛ nea nyansa wom sɛ wɔhwɛ kwan wɔ saa afe a ɛreba no mu? Nea ɛne nea esii wɔ 539 A.Y.B. mu no bɔ abira no, a ɛne, Ɔhene Nebukadnesar ahenni no a wɔbɛsan de asi hɔ, Babilon Ahemman no a wɔbɛsan de asi hɔ a Nebukadnesar aseni te ahengua no so!

10. (a) Dɛn na Bible no ka wɔ tete Babilon Nebukadnesar ahenni no ne Babilon Ahemman no a wɔsan de si hɔ ho? (b) Enti, bere bɛn na “mmere nson” no fii ase, na dɛn ne nea ɛsɛ sɛ wɔsan de si hɔ?

¹⁰ Nanso, ɛno ne nea Onyankopɔn Asɛm a efi honhom mu no ka to hɔ no bɔ abira koraa. Tete Babilon a na ɛda Asubɔnten Eufrate ho no asɛe korakora! Wɔatu Ɔhene Nebukadnesar ahenni no agu korakora. Babilon Ahemman no afi hɔ koraa sɛ wiase tumi a ɛto so abiɛsa. Nanso dɛn na Yehowa Nyankopɔn a ná n’ahengua nsiananmu wɔ Yerusalem no hyɛe bɔ sɛ ɔbɛsan de asi hɔ? Ɛyɛ Mesia ahenni a ɛwɔ Dawid aseni nsam no na Onyankopɔn a ɔwɔ soro no ahyɛ bɔ sɛ ɔbɛsan de asi hɔ. (Hes. 21:27; Luke 1:30-33) Yerusalem ne Yudea asase no a Babilonfo ma ɛyɛɛ amamfo wɔ 607 A.Y.B. mu no hyɛɛ Dawid Mesia ahenni a wotu gui no agyirae, na enti ɛne nea ɛhyɛɛ Amanaman no “mmere nson” a wɔde bedi adesamma wiase so tumi no mfiase agyirae. Ne saa nti, mfe 2,520 a ɛyɛ Amanaman no Mmere no fii ase saa bere no, na, esiane sɛ efii ase wɔ hɔ nti, ɛbaa awiei wɔ afe 1914 Y.B. twabere mfiase mu hɔ.

11. Dam a Nebukadnesar bɔe mfe ason bere a otuu Dawid ahengua no gui akyi no kyerɛɛ dɛn wɔ Amanaman Mmere no ho?

¹¹ Enti, nokwasɛm a ɛyɛ sɛ Ɔhene Nebukadnesar tuu Dawid ahengua a na ɛwɔ Yerusalem no gui wɔ 607 A.Y.B. mu ansa na ɔrebɔ dam mfirihyia ason no boae, na ɛkyerɛɛ bere tenten a saa Amanaman Mmere a na ahyɛ ase dedaw no begye. Wiase nsɛm ahorow kyerɛe sɛ ɛkɔɔ so ara besii afe 1914 Y.B.

12. Bere a “mmerɛ nson” no baa awiei wɔ 1914 mu no, na bere adu ama Yesu Kristo sɛ odi ɔsoro frɛ bɛn ho dwuma?

¹² Wɔ saa afe no mu, bere a “mmere nson” a Amanaman no de adi wiase so tumi a obiara nsiw wɔn kwan no baa awiei na afei wɔman “onipa ba” no bɛn Nea ne Nna Akyɛ no anim no, ná ɛyɛ bere a ɛfata ma onipa Ba a ɔwɔ soro no sɛ odi nsa a wɔto frɛ wɔ nkɔmhyɛ mu a ɛwɔ Dwom abien, nkyekyem ason kosi akron no ho dwuma: “Mɛka no sɛ ade a wɔahyɛ, [Yehowa,] ase me sɛ: Me ba ne wo, ɛnnɛ na mawo wo. Bisa me, na mede amanaman mɛyɛ w’apɛgyade, na mama woafa asase ano nohɔ adi so. Wode dade poma bebubu wɔn, na woabobɔ wɔn sɛ ɔnwemfo ahina.”​—Hwɛ Adiyisɛm 12:5 nso.

[Ase hɔ asɛm]

April Da Biara Da Asɛm

(Wopɛ nsɛm a wɔahyehyɛ no nyinaa a, hwɛ nhoma no mu)