Yesu Asetra Ne Ne Som Adwuma

Yesu Asubɔ

BERE a Yohane fii asɛnka no ase bɛyɛ asram asia akyi no, Yesu a na afei wadi mfe 30 no ba ne nkyɛn wɔ Yordan ho. Dɛn ntia? So na ɔrebɛsra no ahwɛ? So na Yesu ani ara kwa na egye sɛnea Yohane adwuma no rekɔ so ho? Dabi, Yesu ka kyerɛ Yohane sɛ ɔmmɔ no asu.

Ntɛm ara Yohane pow sɛ ɔbɛyɛ saa. Obisa no sɛ, “Me mmom a ehia me sɛ wobɔ me asu no na woba me nkyɛn yi?” Yohane nim sɛ ne na nua ba Yesu yɛ Onyankopɔn Ba titiriw. Ɛdɛn, na Yohane de anigye ahuruw wɔ ne na yafunu mu bere a Maria a ɔyem Yesu no bɛsraa wɔn no! Akyinnye biara nni ho sɛ Yohane ne na Elisabet kaa eyi ho asɛm kyerɛɛ no akyiri yi. Na ebia ɔkaa abɔfo a wɔbɛbɔɔ Yesu awo ho amanneɛ ne abɔfo a woyii wɔn ho adi kyerɛɛ nguanhwɛfo anadwo a wɔwoo no no nso ho asɛm kyerɛɛ no.

Enti na Yesu nyɛ ɔhɔho mma Yohane. Na Yohane nim sɛ ɛnyɛ ɔno na ɛsɛ sɛ ɔbɔ Yesu asu. Wɔn a wɔanu wɔn ho wɔ wɔn bɔne ho na ɔbɔ wɔn asu, nanso na Yesu nni bɔne. Wɔ eyi a Yohane ka nyinaa akyi no, nea Yesu ka ara ne sɛ: “Mprempren de, ma ho kwan; na saa ara na ɛsɛ yɛn sɛ yɛma trenee nyinaa wie pɛyɛ.”

Dɛn nti na ɛteɛ sɛ wɔbɔ Yesu asu? Efisɛ Yesu asubɔ no nyɛ bɔne mu adwensakra ho sɛnkyerɛnne, na mmom ne ho a ɔde ama sɛ ɔrebɛyɛ n’Agya no apɛde. Na Yesu yɛ duadwumfo, nanso mprempren de na bere adu sɛ ofi ɔsom adwuma a Onyankopɔn somaa no baa asase so sɛ ɔmmɛyɛ no ase. So wugye di sɛ na Yohane rehwɛ kwan sɛ anwonwade bi besi bere a wabɔ Yesu asu no?

Wiɛ, Yohane bɔɔ amanneɛ akyiri yi sɛ: “Nea ɔsomaa me sɛ memmɛbɔ asu nsu mu no, ɔno ara na osee me sɛ: Nea wubehu sɛ honhom no asian abɛtra no so no, ɔno ne nea ɔbɔ asu honhom kronkron mu.” Enti na Yohane rehwɛ kwan sɛ Onyankopɔn honhom bɛba obi a ɔbɔ no asu so. Enti ebia anyɛ no nwonwa pii bere a Yesu refi nsu no mu apue no, ‘Onyankopɔn honhom sian baa ne so te sɛ aborɔnoma.’

Nanso nea ɛsen saa sii bere a wɔbɔɔ Yesu asu no. Ɔsoro bue maa Yesu, na ɛnne bi kae sɛ: “Oyi ne me dɔba a ɔsɔ m’ani.” Hena nne nen? Yesu ankasa nne? Dabida! Ɛyɛ Onyankopɔn nne. Ɛda adi sɛ Yesu yɛ Onyankopɔn Ba, ɛnyɛ Onyankopɔn ankasa sɛnea nnipa binom kyerɛ no. Mateo 3:13-17; Luka 3:21-23; 1:34-36, 44; 2:10-14; Yohane 1:32-34; Hebrifo 10:5-9.

◆ Dɛn nti na na Yesu nyɛ ɔhɔho mma Yohane?

◆ Esiane sɛ na Yesu nyɛɛ bɔne biara nti, dɛn nti na wɔbɔɔ no asu?

◆ Esiane nea na Yohane nim wɔ Yesu ho no nti, dɛn nti na ebia anyɛ no nwonwa bere a Onyankopɔn honhom baa Yesu so no?