Kwati Ahomaso Honhom!

Bible bɛ bi a nyansa wom se: “Obiara a ɔma ne fie ano korɔn no hwehwɛ asehwe.” (Mmebusɛm 17:19, New World Translation.) Mfomso bɛn na ɛwɔ ofi kwan ano a ɛkorɔn no mu? Na saa bɛ yi kyerɛ dɛn ankasa?

Wɔ tete no, na ankorankoro ne adwowtwafo akuw a wɔtete apɔnkɔ so nyɛ na. Ná akorɔnfo betumi akɔ nkuraase a afasu nni ho afie a wonnyee ho ban mu. Nea ɛbɛyɛ na afiewuranom no bi abɔ wɔn agyapade ho ban na wɔanwia no, wɔtoo ɔfasu a ɔpon soronko bi da ano. Ná ɔfasu no ware, nanso na ɔkwan no yɛ tiatiaa. Nokwarem no, na ebi sorokɔ nnu mita 1 mpo​—ɛyɛ tiatiaa dodo sɛ ɔpɔnkɔ ne ɛsotefo betumi ahyɛn mu. Ná wɔn a wɔanyɛ wɔn fie ano kwan tiatiaa no da asiane a ɛbɛma mmarima a wɔte apɔnko so aba hɔ abɛfow wɔn agyapade mu.

Ná wɔtaa yɛ nkuropɔn mu afie ano kwan tiatiaa, na ɛhɔ nyɛ fɛ ahe biara, na na ɛmma obiara adwene nkɔ ahonyade a ebia ɛwɔ ofi bi a wɔagye ho ban mu so. Nanso, wɔ Persia no, na apon a ɛkorɔn yɛ adehye agyiraehyɛde biako, a nkoa binom de wɔn ho too asiane kɛse mu bɔɔ mmɔden suasuae. Obiara a ɔma ne fie kwan ano pon korɔn de ne ho too korɔnbɔ ho asiane mu, esiane ahonyade a ɔde hoahoaa ne ho nti.

Enti Mmebusɛm 17:19 kyerɛ sɛ wɔn a wɔma wɔn afie ano kwan korɔn no de wɔn ho reto asiane mu denam wɔn ho so a wɔma sen sɛnea wɔte ankasa no so. Nanso ɛbɛ yi betumi afa ano ho sɛ ofie ano kwan a wɔnam ahohoahoa ne ahomaso kasa so ama akorɔn. Ɔkasa a ɛte saa ma ntawntawdi ba, na awiei koraa no ebetumi de nea ɔma ne ho so no akɔ ɔhaw mu. Ɛnde, hwɛ nyansa a ɛwom sɛ yɛbɛkwati ahomaso honhom!

[Mfonini Fibea wɔ kratafa 30]

Picturesque Palestine, Sinai and Egypt, Volume 1, by Colonel Wilson (1881)