Bɔhyɛ Asase no so Mmeae Ahorow

Bra Bɛhwehwɛ Galilea Po no So!

ƐKAME ayɛ sɛ beae titiriw biako a ɛba Bible akenkanfo adwenem ntɛm ne Galilea Po no. Nanso so wubetumi akata w’ani na woatwa ɛpo a emu nsu ani tew yi ho mfonini, ahu mmeae atitiriw, te sɛ beae a Yordan Asubɔnten no fa ba mu ne beae a ɛfa pue anaa baabi a Kapernaum ne Tiberia wɔ?

Tɔ wo bo asɛ hwɛ ase hɔ mfonini a wofi wim twae no, na fa toto nea wɔde kyerɛkyerɛ Galilea Po so a nɔma wowɔ ho no ho. Mmeae a nɔma wowɔ ho no ahe na wunim ɛhɔ nsɛm? Dodow a wunim emu pii ho nsɛm no, dodow no ara na w’ani begye wo Bible no ho ma emu nsɛm ayɛ nokware ama wo, na ɛso aba wo mfaso. Ɛno nti, bra ma wɔmfa bere tiaa bi nkɔkyerɛkyerɛ wo mmeae ahorow no.

Mfonini a wofi wim twae yi yɛ kusuu fam apuei de. Momma yɛmfa #1 mfi ase. Ɛpo no fã bɛn nen? Yiw, ɛyɛ ne kesee fam pɛɛ, faako a Yordan mu nsu pue kɔfa Samaria ne Gilead ntam sian kogu Po a Awu no mu no. Wɔ wo benkum so no, wuhu po no fã yi ho mfonini kɛse, a ɛwɔ 1993 Calendar of Jehovah’s Witnesses no nso mu no.

Galilea Po no wɔ Obon Kɛse no mu, na ɛwɔ fam bɛyɛ mita 200 sen Mediteranea Po no. Bere a wohwɛ mfonini a wofi wim twae no, hyɛ mmepɔw a ɛwɔ n’apuei fam mpoano a wuhu no nsow (wɔ #7 nkyɛn hɔ). Yehu nkoko ne mmepɔw wɔ po no fã a ɛbɛn yɛn anaa atɔe fam de no ano, ma esi so dua sɛ ɛpo no da obon mu, ne tenten yɛ bɛyɛ kilomita 21, na baabi a ɛhɔ trɛw sen biara no yɛ kilomita 12. Ná asase wɔ mpoano hɔ ma nkuraa ne nkurow akɛse mpo te sɛ Tiberia (#2). Kae sɛ nnipakuw bi faa akorow fii Tiberia twaa po no kɔɔ faako a na Yesu ama nnipa 5,000 aduan anwonwa kwan so no.​—Yohane 6:1, 10, 17, 23.

Bere a wufi Tiberia fa kusuu fam mpoano no, wubetwam wɔ Genesaret asase pa no so (#3).a Saa beae yi na Yesu maa ne Bepɔw so Ɔkasa no, na ɛbɛyɛ sɛ ɛpo no fã a ɛbɛn hɔ ano na ɔfrɛɛ Petro ne afoforo baasa sɛ wɔmmɛyɛ “nnipa yifo,” sɛnea ɛha mfonini yi kyerɛ no. (Mateo 4:18-22) Sɛ wotoa akwantu no so a, wubedu Kapernaum (#4), beae a Yesu yɛɛ adwuma wɔ hɔ kɛse a wɔfrɛ hɔ mpo sɛ “n’ankasa ne kurom” no. (Mateo 4:13-17; 9:1, 9-11; Luka 4:16, 23, 31, 38-41) Sɛ wotoa so kɔ apuei fam wɔ ɛpo no nkyɛn a, wobɛfa (#5), faako a Yordan fã a ɛwɔ soro no sian kogu po (a ɛwɔ ase hɔ) no mu no. Afei wubedu Betsaida (#6).

Yebetumi de mmeae kakraa yi mpo akyerɛ sɛnea Galilea Po ho nimdeɛ a wowɔ no betumi aboa wo ma woadi Bible kyerɛwtohɔ akyi na woatwa ho mfonini wɔ w’adwene mu. Bere a Yesu maa nnipa 5,000 aduan wɔ Betsaida wiei, a nnipakuw bi bɔɔ mmɔden sɛ wɔbɛyɛ no ɔhene no, ɔmaa asomafo no faa ɔkorow kɔɔ Kapernaum. Wɔ ɛpo so akwantu no mu no, mframa a ano yɛ den a efi mmepɔw no so maa ɛpo no bɔɔ asorɔkye, na ɛmaa asomafo no suroe. Nanso Yesu nantew po no so baa wɔn nkyɛn maa ahum no gyaee, na ɛma wotumi koduu asase kesee so dwoodwoo wɔ baabi a ɛbɛn Genesaret. (Mateo 14:13-34) Wɔn a wofi Tiberia bae no san twaa nsu no kɔɔ Kapernaum.​—Yohane 6:15, 23, 24.

Sɛ wotoa so wɔ po no apuei fam a, wobɛfa baabi a ɛbɛyɛ sɛ na wɔfrɛ hɔ sɛ “Gadarafo [anaa Gerasefo] asase so.” Kae sɛ ɛha na Yesu tuu adaemone fii mmarima baanu mu no. Saa ahonhom no fi atirimɔden mu kɔhyɛɛ mprakokuw bi mu maa wɔn nyinaa bɔɔ kirididi fi koko bi so koguu po no mu. Ɛno akyi no mmarima no biako dii adanse wɔ Dekapoli nkurow a ɛbemmɛn hɔ a wɔka Hela kasa no mu. Bere a Yesu reba saa beae yi ne bere a ɔrefi hɔ nyinaa no, ɔde ɔkorow faa Galilea Po no so.​—Mateo 8:28-9:1; Marko 5:1-21.

Bere a w’akwantu no reba awiei wɔ po no fã a esian hɔ no, wobɛfa baabi a asubɔnten kɛse bi (a wɔfrɛ no Yarmuk) de nsu pii ba Yordan Asubɔnten no anafo fam no.

Bible no nka Galilea Po no ho beae pɔtee a nsɛm bi sisii, te sɛ yi a Yesu yii ne ho adi wɔ ne wusɔre akyi bere a na Petro ne asomafo afoforo reyi nam (wɔ ase hɔ) no. So ɛyɛ wo sɛ ɛbɛn Kapernaum? Sɛnea ɛte biara no, po a ɛho hia yi ho nimdeɛ a wowɔ no boa wo ma wotwa ɛho mfonini sɛ ebetumi aba saa.

[Ase hɔ asɛm]

[Mfonini wɔ kratafa 24]

1

2

3

4

5

6

7

N

S

E

W

[Mfonini Fibea wɔ kratafa 24]

Pictorial Archive (Near Eastern History) Est.

[Mfonini Fibea wɔ kratafa 24]

Pictorial Archive (Near Eastern History) Est.

[Mfonini Fibea wɔ kratafa 24, 25]

Garo Nalbandian

[Mfonini Fibea wɔ kratafa 25]

Pictorial Archive (Near Eastern History) Est.