Ahotɔ ma Nnipa a Wɔn Ho Nni Asɛm

ƐYƐ amumɔyɛ a ɛyɛ abofono sen biara a onipa adi pɛn no mu biako—mmofra a wɔde wɔn bɔ afɔre. Ebinom nnye nni sɛ wobetumi ayɛ adebɔne a ɛte saa. Nanso nneɛma pii a fam a wotutu de hwehwɛ tetefo nneɛma ama wɔahu no asi Foinikefo agyiraehyɛde yi so dua.

Wɔde mmofra a wofi adehye mmusua mu bɔɔ afɔre wɔ ogya mu maa anyame te sɛ Tanit ne Baal-Hammon. Wɔ Carthage no, wɔhyew mmofra de wɔn bɔɔ afɔre maa Kronos kɔbere honi bi. Diodorus Siculus, afeha a edi kan A.Y.B. mu abakɔsɛm kyerɛwfo bi ka sɛ na wɔmma abofra no abusuafo kwan sɛ wonsu. Ebia wogye dii sɛ nusu a ɛkyerɛ ɛyawdi no bɛtew bo a afɔrebɔ no som so.

Bere bi no, wɔyɛɛ amanne a ɛte saa ara wɔ Yerusalem wɔ tete Tofet. Ná asomfo a wɔwɔ hɔ no saw bɔ mpintin sɛnea ɛbɛyɛ a wɔnte abofra no su bere a wɔtow no kyene Molek yafunu a ɛyɛ fononoo no mu gyaframa mu no.—Yeremia 7:31.

Yehowa bo fuw wɔn a wɔde atirimɔden sisiw wɔn aso wɔ afoforo yawdi ho no kɛse. (Fa toto Mmebusɛm 21:13 ho.) Sɛ́ Onyankopɔn a ohu mmofra mmɔbɔ no, ɛda adi sɛ Yehowa de mmofra a wɔte saa a wɔn ho nni asɛm no bɛka “owusɔre a wɔn a wɔteɛ ne wɔn a wɔnteɛ bɛsɔre” no ho.—Asomafo no Nnwuma 24:15; Exodus 22:22-24.