Bere a “Mframa Biara Nyɛ Mframa Pa”

“BERE a onipa nnim beae a n’ani kyerɛ no, na mframa biara nyɛ mframa pa.” Saa asɛm yi a wɔkyerɛ sɛ afeha a edi kan no mu Romani nyansapɛfo Lucius Annaeus Seneca na ɔkae no yɛ nokware a wohui akyɛ: Sɛ asetra bɛyɛ nea atirimpɔw wom a, botae ahorow ho hia.

Nanso, asetra taa yɛ nea atirimpɔw nnim. Nea nnipa pii ani gye ho ara ne sɛ wɔbɛkwati da biara da asetram abotan ne ɔhweam. Esiane sɛ wonni atirimpɔw pɔtee bi nti, wɔbɛyɛ te sɛ asorɔkye a “mframa bɔ de no di akɔneaba bere nyinaa.” (Yakobo 1:6, “Phillips”) Wɔ saa nkurɔfo no fam no, “mframa biara nyɛ mframa pa.”

Bible no de wɔn a wɔde botae sii wɔn ani so, na wɔyɛɛ nhwɛso maa nnɛyi Kristofo, no ho nhwɛso ma. Mose ‘hwɛɛ akatua no.’ (Hebrifo 11:26) Paulo kyerɛwee sɛ: “Mitu mmirika kɔ botae no ho tee, na manya nkonimdi bo no.” Ɔhyɛɛ mfɛfo gyidifo nkuran sɛ “wonnya adwenkoro no ara.”—Filipifo 3:14, 15, “Today’s English Version.”

Bere a yɛde yɛn ani si Bible bɔhyɛ ahorow so no, ɛmmra sɛ yebesuasua mmarima a wɔde botae sii wɔn ani so no gyidi.—Fa toto Hebrifo 13:7 ho.