Ahenni Adawurubɔfo Bɔ Amanneɛ

Onyankopɔn Asɛm mu Tumi a Ɛtew Nnipa Ho

WƆBƆ amanneɛ sɛ nnipa a nnubɔne nom aka wɔn hɔ no mu dodow no ara san kɔnom bio bere a woyi wɔn fi ayaresabea akyi no. Nanso, Onyankopɔn Asɛm betumi ayɛ nea mpɛn pii no ayaresabea ahorow ntumi nyɛ no. (Hebrifo 4:12) Onyankopɔn Asɛm ne ne honhom aboa nnipa bebree ma wɔagyae nnubɔne nom na wodi afotu yi so: “Momma yɛnhohoro yɛn ho mfi ɔhonam ne honhom mu fi nyinaa mu, na yɛawie yɛn ahotew Onyankopɔn suro mu.”—2 Korintofo 7:1.

Osuahu a efi Myanmar yi yɛ eyi ho nhwɛso. Ɔbarima bi a ɔde mfe pii bɔɔ mmɔden sɛ obegyae nnubɔne nom no ka sɛ: “Nnubɔne nom kaa me hɔ bere a na minnya nnii mfe aduonu no. Mebɔɔ mmɔden mpɛn pii sɛ megyae nnubɔne nom, nanso mantumi. Nea ɛbɛyɛ na makɔ so anom no, mifii ase bɔɔ korɔn. Ne saa nti, wɔ 1988 mu no, wɔde me kɔtoo afiase afe bio.

“Woyii me fii afiase no, mesan ne me kan nnamfo kɔbɔe. Ankyɛ biara na mesan fii ase nom nnubɔne. Abrabɔ a na ɛresɛe me yi maa m’abusua mufo ne me gyaee fekubɔ biara. Bio nso, atuatew su a medaa no adi no maa nnipa bebree a wɔwɔ mpɔtam hɔ no suroo me, na wɔn nso fii ase twee wɔn ho fii me ho.

“Na afei da koro bi, biribi a wɔyɛ ho hwee a ɛnyɛ yiye sii—menom nnubɔne ma ɛboroo so. Wɔde me kɔtoo afiase bio, saa bere yi midii mfe abiɛsa. Ɛwom sɛ na afiase asetra yɛ den de, nanso ɔkwan bi so no, mitumi traa hɔ.

“Bere a mifi afiase baa fie akyi no, meka kyerɛɛ m’abusuafo no sɛ wɔmfa mfomso a mayɛ dedaw no nkyɛ me. Wofi ahummɔbɔ mu gyee me bio, nanso nnamfo san daadaa me ma mekɔbɔɔ me kan bra no.

“Awiei koraa no, me nenabea ka kyerɛɛ ɛhɔnom sɔfo bi sɛ ɔmma menkɔ Bible sukuu bi. Ɔsɔfo no penee so. Nanso, ansa na merebɛkɔ no, me sewaa a ɔyɛ Yehowa Adansefo no mu biako kae sɛ sɛ mepɛ sɛ misua Bible no ampa a, me ne Adansefo no nsua.

“Mekɔɔ Ahenni Asa so na wɔde me kyerɛɛ owura bi a ɔpenee so sɛ ɔne me besua Bible no. Wɔn a na wɔwɔ hɔ no mu bebree kyiakyiaa me fɛw so na wɔmaa m’ani kae.

“Mifii ase suaa Bible no na mekɔɔ Kristofo nhyiam no, ɔpɛ a mewɔ sɛ mɛbɛn Onyankopɔn no sii akɔnnɔ a na mewɔ ma nnubɔne ananmu. Afe biako akyi no minyaa nkɔso hyiraa me nkwa so maa Yehowa Nyankopɔn, na mede nsu mu asubɔ yɛɛ saa ahosohyira no ho nsɛnkyerɛnne.

“Ɛnkyɛe biara, bere a na merekɔ afie afie asɛnka no, mihyiaa me kan nnamfo a na me ne wɔn nom nnubɔne no mu biako. Na ontumi nte nsrakrae a ɛyɛ nwonwa a mayɛ no ase. Eyi buee kwan ma metumi dii no adanse kaa Ahenni anidaso no ho asɛm kyerɛɛ no.

“Manya anya asetra ho nokware atirimpɔw ne ntease. Esiane Onyankopɔn mmoa ne afotu a efi n’Asɛm mu nti, mprempren mitumi boa afoforo ma wɔde wɔn ho fi subammɔne a ɛne nnubɔne nom no ho.”