“Mitumi Huu Asomdwoe a Ɛwɔ Hɔ No”

ƆBARIMA bi a ɔka German kasa kɔɔ nhyiam bi a Yehowa Adansefo yɛe ase sɛ ɔrekɔhwɛ sɛnea Adansefo no yɛ wɔn ade. Dɛn ntia? Na ne botae ne sɛ “ɔbɛpa saa som yi ho ntama de abɔ ne nnamfonom ho ban na amma wɔanyera.” Bere a ɔkɔɔ nhyiam no ase akyi no, ɔkyerɛw krataa a edi hɔ yi kɔmaa ne nnamfonom no:

“Bere a miduu beae a wɔreyɛ nhyiam no, na mennye nni sɛ beae no ankasa ne no. M’ani antwa obiara so wɔ adiwo hɔ, na na nwura anaa nsa nkankyee biara ngugu fam hɔ. Bere a mebɛn hɔ no, mihuu mmerante baanu bi wɔ agumadibea no ano. Wokyiaa me de me kɔɔ mu.

“Mehwɛɛ kwan sɛ mɛte dede a nnipa ɔpepem pii a wɔahyia wɔ hɔ no reyɛ no, nanso na ɛhɔ ayɛ komm. Misusuw sɛ: ‘Ebia nnipa kakraa bi na wɔabɔ ahwete wɔ hɔ.’

Bere a mekɔɔ mu no, ntɛm ara na m’adwene kɔɔ drama a na wɔreyɛ wɔ ɔkasa agua so no so. Akyiri yi koraa ansa na merehu sɛ atiefo ɔpepem pii a wɔayɛ aso retie dwumadi no ahyɛ agumadibea hɔ mã. Mitumi huu asomdwoe a ɛwɔ hɔ no. Nea metee, nea mihui, ne nkate a minyae wɔ nhyiam no fã a aka no nyinaa mu no kaa me kɛse.

“Bere a mefra Adansefo no mu no, anigye a wɔwɔ ne ɔdɔ a wɔda no adi no maa me ho dwiriw me. Mpofirim ara no, mantumi anka m’ano antom: ‘Eyinom ne Onyankopɔn nkurɔfo ankasa!’”

Sɛ anka ‘ɔbɛbɔ ne nnamfonom ho ban na wɔanyera no,’ aberante no srɛe sɛ wɔne no mmesua Bible. Dɛn na efi mu bae? Nnɛ, ɔyɛ ɔpanyin wɔ Kristofo asafo no mu. Ɔne n’abusua no de nnamyɛ resom wɔ asafo ahorow a ɛwɔ Zug, Switzerland no biako mu.