Mma Abufuw Nnni Wo So

“KA WO koma to wo yam!” “Nya abotare!” “Mua w’ano!” So wotaa te nsɛm a ɛte saa? Ebia woka no wo tirim, sɛnea ɛbɛma woadi w’abufuw so. Wɔ nnipa binom fam no, nea ɛbɛyɛ na wɔadi wɔn abufuw so no, wotu mpase. Eyinom yɛ ɔkwan tiawa a wɔfa so siw abufuw ano, na wɔkora wɔne afoforo ntam abusuabɔ so.

Nanso, nnansa yi no, nsɛm a afotufo de ma a enhyia wɔ sɛnea ɛsɛ sɛ wodi abufuw so anaa wɔhyɛ so ho no ma nnipa pii adwene mu yɛ wɔn naa. Sɛ nhwɛso no, adwene ho nimdefo bi akɔ so akyerɛkyerɛ sɛ, sɛ wote nka sɛ woka nea ɛhyɛ wo bo na “wo ho bɛtɔ wo a” ka. Afoforo ka sɛ sɛ wo bo taa fuw a “ebetumi ama woawu ntɛm asen [sɛnea] nneɛma a etumi kum nnipa te sɛ sigaretnom, mogya mmoroso, ne komayare yɛ no.” Onyankopɔn Asɛm ka no pefee sɛ: “Ma abufuw ntwa, na gyae bo bɔne yɛ.” (Dwom 37:8) Dɛn nti na Bible de afotu a ɛte saa ma?

Abufuw a wonsiw ano no kowie nneyɛe a wontumi nyɛ ho hwee mu. Eyi daa adi wɔ onipa abakɔsɛm mfiase pɛɛ. Yɛkenkan sɛ: “Na Kain bo fuwii pii na omunae.” Ewiee no dɛn? N’abufuw no hyɛɛ ne so dii ne so araa ma opirim ne koma wɔ afotu a Yehowa de maa no sɛ ɔnyɛ yiye no ho. Kain abufuw a wanni so no ma ɔyɛɛ bɔne a anibere wom—okum ne nua.—Genesis 4:3-8.

Bere a Saul, Israel hene a odi kan no, tee sɛ Dawid anya nkamfo kɛse no, ne bo fuwii wɔ ɔkwan a ɛte saa ara so. “Na mmea a wɔregoru no gyigyee wɔn so sɛ: “Saul akum n’apem, na Dawid akum ne pedu. Na Saul bo fuwii kɛse, na asɛm no anyɛ no dɛ.” Abufuw hyɛɛ Saul so araa ma ɔpam Dawid tiri so mpɛn pii sɛ obekum no. Ɛwom mpo sɛ Dawid bɔɔ mmɔden sɛ ɔne Saul besiesie wɔn ntam na ama wɔn adamfofa no atra hɔ de, nanso Saul ampɛ sɛ asomdwoe ne biakoyɛ bɛba wɔn ntam. Awiei koraa no, ɔhweree Yehowa anim dom koraa.—1 Samuel 18:6-11; 19:9, 10; 24:1-21; Mmebusɛm 6:34, 35.

Sɛ obi ma ne bo fuw tra so a, ɔbɛkeka nsɛm na wayɛ nneɛma bi a ebepira obiara a ne ho wɔ asɛm no mu. (Mmebusɛm 29:22) Kain ne Saul nyinaa bo fuwii, esiane sɛ wɔn mu biara yɛɛ ahoɔyaw ne anibere nti. Nanso, nneɛma ahorow a ɛde abufuw ba no betumi agu ahorow. Ɔkasatia a ntease nnim, atennidi, akasakasa, ne animtiabu betumi ayɛ ade a ɛde abufuw ba.

Kain ne Saul nhwɛso no ma yehu mmerɛwyɛ a anibere wom a na wɔn baanu wɔ. Ɛda adi sɛ, ɛnyɛ gyidi na ɛkanyan Kain ma ɔbɔɔ afɔre. (Hebrifo 11:4) Yehowa ahyɛde a Saul anni so ne ɔkwan ahorow a ɔfaa so pɛe sɛ obu ne ho bem no maa ɔhweree Onyankopɔn anim dom ne ne honhom. Ɛda adi sɛ, mmarima baanu yi sɛee wɔne Yehowa ntam abusuabɔ.

Fa su ahorow a ɛte saa no toto Dawid a na ɔwɔ nea enti a ɛsɛ sɛ ne bo fuw wɔ nea Saul de yɛɛ no no ho no ho. Dawid dii ne honhom so. Dɛn ntia? Ɔkae sɛ: “Na [Yehowa, NW] mma ɛmpare me sɛ mɛyɛ me wura a [Yehowa, NW] asra no no ade a ɛte sɛɛ.” Dawid susuw ɔne Yehowa ntam abusuabɔ ho yiye, na ɛkaa sɛnea ɔne Saul dii no. Ofi ahobrɛase mu gyaee nsɛm mu maa Yehowa.—1 Samuel 24:6, 15.

Nokwarem no, nea efi abufuw a wonsiw ano mu ba no yɛ aniberesɛm. Ɔsomafo Paulo bɔɔ kɔkɔ sɛ: “Mo bo mfuw, na monnyɛ bɔne!” (Efesofo 4:26) Bere a abufuw a wɔfa no trenee so wɔ n’afa no, asiane wom bere nyinaa sɛ abufuw betumi adi yɛn so. Enti, ɛnyɛ nwonwa sɛ ɛyɛ den ma yɛn sɛ yebesiw yɛn abufuw ano. Yɛbɛyɛ dɛn atumi ayɛ saa?

Ɔkwan titiriw ne sɛ yɛne Yehowa benya abusuabɔ a emu yɛ den. Ɔhyɛ wo nkuran sɛ bue wo koma ne w’adwene mu ma no. Ka wo haw ne wo dadwen kyerɛ no na srɛ no sɛ ɔmma wo odwo koma, mma wuntumi nni w’abufuw so. (Mmebusɛm 14:30) Nya awerɛhyem sɛ “[Yehowa, NW] ani wɔ wɔn a wɔteɛ so, na n’aso abue ama wɔn adesrɛ.”—1 Petro 3:12.

Mpaebɔ betumi asiesie wo na abɔ wo ho ban. Ɔkwan bɛn so? Ebetumi anya sɛnea wo ne afoforo di no so nkɛntɛnso a emu yɛ den. Kae sɛnea Yehowa ne wo adi no. Sɛnea Kyerɛwnsɛm no ka no, Yehowa, “nhwɛ yɛn mfomso nhyɛ yɛn ananmu.” (Dwom 103:10) Fafiri honhom ho hia na ‘Satan anni wo amim.’ (2 Korintofo 2:10, 11) Bio nso, mpaebɔ bebue wo koma mu ma woahwehwɛ honhom kronkron akwankyerɛ, na ebetumi asesa w’asetra mu nneyɛe a agye ntini denneennen no. Yehowa fi anigye mu de ‘asomdwoe a ɛtra adwene nyinaa so,’ a ebetumi agye wo afi abufuw nhyɛso mu ma.—Filipifo 4:7.

Nanso, ɛsɛ sɛ yɛde Kyerɛwnsɛm no mu a yɛbɛhwehwɛ daa ka yɛn mpaebɔ ho, na ama ‘yɛahu ade a Yehowa pɛ.’ (Efesofo 5:17; Yakobo 3:17) Sɛ ɛyɛ den ma wo sɛ wubesiw w’abufuw ano a, bɔ mmɔden sɛ wubenya Yehowa adwene wɔ asɛm no ho. Hwehwɛ kyerɛw nsɛm a ɛfa sɛnea wosiw abufuw ano ho titiriw.

Ɔsomafo Paulo de nkaesɛm a ɛho hia yi ma sɛ: “Enti yɛwɔ bere a ɛfata yi, momma yɛnyɛ nnipa nyinaa yiye, ne titiriw no wɔn a wɔyɛ gyidi fifo.” (Galatifo 6:10) Ma wo nsusuwii ne wo nneyɛe nnyina papa a wobɛyɛ ama afoforo so. Nneyɛe pa a ɛte saa a ɛho tew no bɛma woanya tema ne ahotoso, na ɛbedwudwo akyinnyegye a ɛnyɛ den sɛ ebetumi akowie abufuw mu ano.

Odwontofo no kae sɛ: “Ma m’anammɔn ntim w’asɛm mu, na mma amumɔyɛ biara nnni me so. Asomdwoe pii wɔ wɔn a wɔdɔ wo mmara, na biribi ntõatõa wɔn.” (Dwom 119:133, 165) Ebetumi aba saa wɔ wo nso wo fam.

[Kratafa 9 adaka/mfonini]

Akwan a Wobɛfa So Adi Abufuw So

□ Bɔ Yehowa mpae.—Dwom 145:18.

□ Hwehwɛ Kyerɛwnsɛm no mu daa.—Dwom 119:133, 165.

□ Fa wo ho hyɛ nnwuma pa mu.—Galatifo 6:9, 10.