Nsɛmmisa a Efi Akenkanfo Hɔ

Yehowa Adansefo bu abatow dɛn?

Wɔde nnyinasosɛm ahorow a emu da hɔ ama wɔ Bible mu a ɛboa Onyankopɔn asomfo ma wonya adwene a ɛfata wɔ asɛm yi ho. Nanso, ɛte sɛnea yenni nnyinasosɛm biara a etia abatow ankasa. Sɛ nhwɛso no, ntease biara nni hɔ a enti akwankyerɛfo a wɔda adwuma bi ano no ntumi ntow aba mfa nsisi gyinae ahorow wɔ wɔn adwuma no ho. Yehowa Adansefo Asafo ahorow no mufo taa moma wɔn nsa so de paw mmere a wɔde hyiam ne sɛnea ɛsɛ sɛ wɔde asafo no fotow di dwuma.

Ɛnde, amammui ho abatow nso ɛ? Nokwarem no, wɔ kwasafo aman bi mu no, sɛ eduru da a wɔde tow aba a, ɛhɔfo no mu ɔha biara mu 50 nkɔtow aba no. Wɔ Yehowa Adansefo fam no, wɔmfa wɔn ho nnyigye hokwan a afoforo wɔ sɛ wɔtow aba no mu, na wɔnkasa ntia amammui ho abatow. Wobu atumfo a wɔnam abatow a ɛte saa so paw wɔn no na wɔbrɛ wɔn ho ase ma wɔn. (Romafo 13:1-7) Sɛ́ ebia wɔn ankasa bɛtow aba ama obi no de, Yehowa Dansefo biara gyina n’ahonim a ɔde Bible atete no, ne nim a onim sɛ ɔwɔ asɛyɛde wɔ Onyankopɔn ne Ɔman no anim so na esi gyinae. (Mateo 22:21; 1 Petro 3:16) Wɔ gyinaesi yi a Adansefo no ankasa si mu no, wosusuw nsɛm pii ho.

Nea edi kan no, Yesu Kristo kaa n’akyidifo ho asɛm sɛ: “Womfi wiase, sɛnea me nso mimfi wiase no.” (Yohane 17:14) Yehowa Adansefo bu saa nnyinasosɛm yi aniberesɛm. Sɛ́ nnipa a “womfi wiase” no, wonni ɔfã biara wɔ wiase no amammuisɛm mu.—Yohane 18:36.

Nea ɛto so abien no, ɔsomafo Paulo frɛɛ ne ho ‘ɔhemmɔfo’ a ogyina Kristo ananmu ma ne bere sofo no. (Efesofo 6:20; 2 Korintofo 5:20) Yehowa Adansefo gye di sɛ wɔde Kristo asi agua so mprempren sɛ Onyankopɔn soro Ahenni no so Hene, na sɛ ahemmɔfo no, ɛsɛ sɛ wɔka ho asɛm kyerɛ amanaman no. (Mateo 24:14; Adiyisɛm 11:15) Ɛsɛ sɛ ahemmɔfo yɛ nnipa a wonni afa biara wɔ amammuisɛm mu, na wɔkwati sɛ wɔde wɔn ho bɛhyehyɛ aman a wɔasoma wɔn mu no nsɛm mu. Sɛ́ Onyankopɔn soro Ahenni no ananmusifo no, Yehowa Adansefo te nka sɛ wɔwɔ asɛyɛde a ɛte saa ara sɛ enni sɛ wɔde wɔn ho hyehyɛ ɔman a wɔte mu no amammuisɛm mu.

Nea ɛto so abiɛsa a ɛsɛ sɛ yesusuw ho ne sɛ, biribiara a nea wɔto aba ma no no bɛyɛ no ho asodi da wɔn a wɔtoo aba paw no no so. (Fa toto 1 Timoteo 5:22 ho; The New English Bible.) Ɛsɛ sɛ Kristofo susuw ho yiye hwɛ sɛ wɔbɛpɛ sɛ wɔde biribi a ɛte saa ho asodi to wɔn so anaa.

Nea ɛto so anan no, Yehowa Adansefo bu wɔn Kristofo biakoyɛ no sɛ ɛsom bo kɛse. (Kolosefo 3:14) Sɛ ɔsom ahorow no de wɔn ho hyehyɛ amammuisɛm mu a, ɛtaa de mpaapaemu ba wɔn asɔremma no ntam. Bere a Yehowa Adansefo suasua Yesu Kristo no, wɔkwati sɛ wɔde wɔn ho bɛhyehyɛ amammuisɛm mu ma enti wɔn Kristofo biakoyɛ no tra hɔ.—Mateo 12:25; Yohane 6:15; 18:36, 37.

Nea ɛto so anum a etwa to no, Yehowa Adansefo ho a wɔmfa nhyɛ amammuisɛm mu no ma wonya ɔkasa mu ahofadi de Onyankopɔn Ahenni ho asɛm a mfaso wɔ so no kɔ nnipa a wɔwɔ amammuisɛm ho adwene horow nyinaa nkyɛn.—Hebrifo 10:35.

Bere a Yehowa Adansefo ma Kyerɛwnsɛm mu nnyinasosɛm a yɛasusuw ho wɔ atifi hɔ no tra wɔn adwene mu no, wɔn ankasa si gyinae wɔ aman pii mu sɛ wɔmfa wɔn ho nhyɛ amammui abatow mu, na ɔman no mmara boa wɔn ma wonya ahofadi de si gyinae a ɛte saa. Nanso, sɛ mmara hwehwɛ sɛ ɔman mma tow aba nso ɛ? Wɔ asɛm a ɛte saa mu no, ɛyɛ Ɔdansefo biara asɛyɛde sɛ ofi ahonim pa mu si gyinae a egyina Bible so wɔ sɛnea obedi tebea no ho dwuma ho. Sɛ obi si gyinae sɛ ɔbɛkɔ faako a wɔretow aba no a, ɛyɛ ɔno ara n’asɛm. Nea ɔyɛ wɔ faako a wɔtow aba hɔ no yɛ ɔne ne Bɔfo no ntam asɛm.

November 15, 1950, Engiresi Ɔwɛn-Aban no ka wɔ nkratata 445 ne 446 sɛ: “Sɛ Kaesare hyɛ mmara katee sɛ ɔman mma ntow aba a . . [Adansefo] betumi akɔ faako a wɔretow aba hɔ, na wɔawura abatow dan no mu. Ɛha na wɔhwɛ kwan sɛ wɔbɛsensan abatow krataa no so anaasɛ wɔbɛkyerɛw nea wɔpɛ no no wɔ so. Nea wɔn a wɔtow aba no pɛ na wɔde wɔn abatow krataa no yɛ. Enti wɔ Onyankopɔn anim wɔ ha no, ɛsɛ sɛ n’adansefo yɛ ade ma ɛne ne mmara ne wɔn gyidi hyia. Ɛnyɛ yɛn asɛyɛde ne sɛ yɛbɛkyerɛ wɔn nea ɛsɛ sɛ wɔde abatow krataa no yɛ.”

Na sɛ Kristoni bea bi kunu a onnye nni hyɛ no katee sɛ ɔnkɔtow aba nso ɛ? Wiɛ, ɔhyɛ ne kunu ase, sɛnea Kristofo hyɛ atumfoɔ ase no. (Efesofo 5:22; 1 Petro 2:13-17) Sɛ otie ne kunu na ɔkɔ faako a wɔretow aba hɔ a, ɛyɛ ɔno ara n’asɛm. Ɛnsɛ sɛ obiara kasa tia no.—Fa toto Romafo 14:4 ho.

Na ɔman a mmara nhyɛ obi katee sɛ ɔntow aba nanso nkurɔfo sɔre tia wɔn a wɔntow aba denneennen—na ebi mpo a wobetumi apira wɔn no nso ɛ? Anaasɛ bere a mmara nhyɛ sɛ obi ntow aba no, sɛ wɔfa ɔkwan bi so bɔ obi ka kɛse esiane sɛ wankɔ faako a wɔretow aba no nso ɛ? Wɔ eyi ne nsɛm foforo a ɛtete saa mu no, Kristoni ankasa na ɛsɛ sɛ osi ho gyinae. “Obiara bɛsoa n’ankasa n’adesoa.”—Galatifo 6:5.

Nnipa bi wɔ hɔ a, sɛ wohu sɛ Yehowa Adansefo bi akɔ faako a wɔretow aba wɔ wɔn man mu na ebi nso ankɔ a, ɛto wɔn hintidua. Ebia wɔbɛka sɛ, ‘Yehowa Adansefo adwene nhyia.’ Nanso, ɛsɛ sɛ nkurɔfo hu sɛ, ɛdefa nsɛm a ɛsɛ sɛ ankorankoro de wɔn ahonim di ho dwuma te sɛ eyi ho no, ɛsɛ sɛ Kristoni biara si n’ankasa gyinae wɔ Yehowa Nyankopɔn anim.—Romafo 14:12.

Gyinae biara a Yehowa Adansefo sisi wɔ nsɛm mu no, wɔbɔ mmɔden sɛ wobekura afã biara a wonni ne kasa mu ahofadi a wɔwɔ sɛ Kristofo no mu. Wɔ ade nyinaa mu no, wɔde wɔn ho to Yehowa Nyankopɔn so sɛ ɔnhyɛ wɔn den, na ɔmma wɔn nyansa, na ɔmmoa wɔn na wɔannyae wɔn gyidi mu wɔ ɔkwan biara so. Enti wɔde wɔn ho to Odwontofo no nsɛm no so: “Na wone me botantim ne me trabea srɔnsrɔn, na wo din nti wobɛkyerɛ me kwan na woakogya me.”—Dwom 31:3.