Ɔkwan Bɛn So Na Yehowa Bɛkae wo?

“ME Nyankopɔn, kae me.” Nehemia de saa nsɛm no koto srɛɛ Onyankopɔn mpɛn pii. (Nehemia 5:19; 13:14, 31) Ɛyɛ ne kwan so sɛ mpɛn pii no, sɛ nnipa ba ahokyere mu a, wɔde nkotɔsrɛ nsɛm a ɛte saa dan kɔ Onyankopɔn anim.

Nanso dɛn na ɛba nkurɔfo adwenem bere a wɔka sɛ Onyankopɔn nkae wɔn no? Ɛda adi sɛ, wɔwɔ anidaso wɔ Onyankopɔn mu sɛ ɔbɛyɛ pii asen sɛnea wɔbɛkae wɔn din ara kwa. Akyinnye biara nni ho sɛ wɔwɔ anidaso a ɛte sɛ nsɛmmɔnedifo a wokum wɔne Yesu no mu biako no. Nea na ɛnte sɛ ɔbɔnefo foforo no, ɔbɔnefo yi srɛɛ Yesu sɛ: “Sɛ woba w’ahenni mu a, kae me!” Ɛnyɛ sɛ na ɔpɛ sɛ Yesu kae nipa ko a ɔyɛ nko na mmom na ɔpɛ sɛ ɔyɛ biribi ma no—sɛ obenyan no afi awufo mu.—Luka 23:42.

Bere nyinaa, Bible no ka wɔ Onyankopɔn ho sɛ “ɔkae,” kyerɛ sɛ ɔyɛ tebea bi ho biribi. Sɛ nhwɛso no, bere a nsuyiri maa asase daa mpan nnafua 150 no, “Onyankopɔn kaee Noa . . . , na Onyankopɔn maa mframa bɔ faa asase so, na nsu no ano brɛɛ ase.” (Genesis 8:1) Mfeha pii akyi no, Simson a na Filistifo ama n’ani afura na wɔde nkɔnsɔnkɔnsɔn agu no no bɔɔ mpae sɛ: “[Yehowa, NW] Nyankopɔn, afei kae me, na hyɛ me den prɛko pɛ yi nko.” Yehowa kaee Simson na ɔmaa no ahoɔden a ɛboro nnipa de so sɛnea ɛbɛyɛ a obetumi adi Onyankopɔn atamfo so werɛ. (Atemmufo 16:28-30) Yehowa hyiraa Nehemia mmɔdenbɔ so, na wɔde nokware som sii hɔ bio wɔ Yerusalem.

Ɔsomafo Paulo kyerɛwee sɛ: “Na biribiara a wɔakyerɛw ato hɔ no, wɔakyerɛw ama yɛn kyerɛkyerɛ sɛ yɛmfa boasetɔ ne kyerɛw nsɛm no mu awerɛkyekye so nnya anidaso.” (Romafo 15:4) Sɛ yɛkae Yehowa denam n’apɛde a yɛbɛyɛ so, sɛnea n’asomfo anokwafo yɛe wɔ bere bi a atwam no a, yɛwɔ ahotoso sɛ Yehowa bɛkae yɛn na waboa yɛn ama yɛanya nea yehia da biara da, aboa yɛn ma yɛagyina yɛn sɔhwɛ ahorow ano, na wagye yɛn bere a ɔde atemmu ba abɔnefo so no.—Mateo 6:33; 2 Petro 2:9.