Nea Ɛbɛma Yɛatu Mpɔn Wɔ Asɛnka Mu​—Wo Ne Nkurɔfo Mmɔ Nkɔmmɔ a Ebetumi Abue Kwan Ama Woadi Wɔn Adanse

Esiane sɛ Yesu fii ase ne Samariani bea no bɔɔ nkɔmmɔ nti, otumi dii no adanse bɔnnɔ so. Sɛnea yefi ase ne ahɔho bɔ nkɔmmɔ no, yɛbɛyɛ dɛn atu mpɔn wom?

• Tew w’anim na wo ne nkurɔfo mmɔ nkɔmmɔ. Ɛwom, na Yesu abrɛ, nanso ɔhyɛɛ nkɔmmɔbɔ ase. Nea ɔyɛe ara ne sɛ obisaa nsu. Enti wo nso, wubetumi atew w’anim akyia obi, na ebia woaka biribi afa wim tebea, anaa asɛm bi a asi ho. Kae sɛ, nea wopɛ sɛ woyɛ ara ne sɛ wubefi nkɔmmɔbɔ ase, enti nea wohwɛ a onipa no ani begye ho biara, wubetumi aka ho asɛm. Sɛ wannye wo so a, ɛnyɛ hwee. Hwehwɛ obi foforo. Bɔ Yehowa mpae na ɔmma wo akokoduru.—Ne 2:4; Aso 4:29.

• Yɛ krado sɛ hokwan biara a wubenya no, wobɛka asɛmpa no, nanso mpere wo ho. Tɔ wo bo ase na nkɔmmɔ no nyɛ anika. Sɛ wopere wo ho a, anhwɛ a ɔbɛte nka sɛ wode nsɛm repuapua no, na ɛbɛma wagyae nkɔmmɔ no bɔ. Sɛ nkɔmmɔ no ba awiei na woantumi anni adanse a, mma w’abam mmu. Sɛ ɛyɛ wo den sɛ wubedi adanse bɔnnɔ so a, sua sɛ wo ne afoforo bɛbɔ nkɔmmɔ kɛkɛ a wunni wɔn adanse. [Yi video a edi kan na munsusuw ho.]

• Wubetumi aka wo gyidi ho asɛm bi a ɛka koma. Ebia ebetumi apusuw no ama wabisa ho asɛm, na abue kwan ama woadi no adanse. Yesu kaa nsɛm bi de kanyan ɔbea no adwene, na ɛno pusuw ɔbea no ma obisaa Yesu nsɛm. Awiei koraa no, bere a Yesu de asɛmpa no wuraa nkɔmmɔbɔ no mu no, na akɔyɛ sɛ ɔbea no nsɛmmisa na ɔreyi ano. [Yi video a ɛto so mmienu na munsusuw ho, afei yi video a ɛto so mmiɛnsa na munsusuw ho.]