Adɛn Nti Na Onyankopɔn Ntie Mpaebɔ Ahorow Bi?

Sɛ yefi yɛn koma mu bɔ mpae a, yɛn soro Agya Yehowa Nyankopɔn ani gye ho, na wayɛ krado sɛ obetie yɛn. Nanso nneɛma bi wɔ hɔ a yɛyɛ a, ɛmma ontie yɛn mpaebɔ. Ɛyɛ nneɛma bɛn saa? Afei nso, sɛ yɛbɔ mpae a, dɛn na ɛsɛ sɛ yɛma ɛtena yɛn adwenem? Ma yɛnhwɛ Bible mu afotusɛm bi a ebetumi aboa yɛn.

Nnipa bi wɔ asɔre, na wɔrehwɛ nhoma bi a wɔakyerɛw mpaebɔ wom so abɔ mpae.

“Sɛ worebɔ mpae a, ntĩ nsɛm koro no ara mu nka no mpɛn pii.”—Mateo 6:7.

Yehowa mpɛ sɛ yɛkyere mpaebɔ bi gu yɛn tirim na yɛka. Afei nso nhoma bi wɔ hɔ a, wɔakyerɛw mpaebɔ ahorow agu mu, na ebinom hwɛ so bɔ mpae. Ɛno nso, n’ani nnye ho. Mmom, ɔpɛ sɛ yefi yɛn komam ne no kasa. Wo de, fa no sɛ wowɔ adamfo bi, na da biara da ohyia wo a, asɛm koro no ara na ɔka kyerɛ wo. Anka wobɛte nka sɛn? Nnamfo pa de, wofi wɔn komam bɔ nkɔmmɔ, na wɔmfa biribiara nsie wɔn ho. Sɛ yɛde yɛn ankasa yɛn nsɛm bɔ mpae a, ɛkyerɛ sɛ yehu yɛn soro Agya no sɛ ɔyɛ yɛn adamfo.

Nkrataa a wɔde twa loto gu ɔbarima bi anim, na wapagyaw ne ti rehwɛ soro.

“Mubisa nanso mo nsa nka, efisɛ mode adwemmɔne na ebisa.”—Yakobo 4:3.

Sɛ Onyankopɔn ani nnye biribi ho, na yɛbɔ no mpae srɛ no sɛ ɔmma yɛn nsa nka saa ade no a, ɛnsɛ sɛ yɛhwɛ kwan sɛ obetie yɛn. Na sɛ yɛreyɛ biribi a ɔmpɛ nso a, ɛnsɛ sɛ yɛhwɛ kwan sɛ ɔbɛboa yɛn. Sɛ nhwɛso no, Yehowa bɔ yɛn kɔkɔ sɛ ɛnsɛ sɛ yɛma yɛn ani bere ade, afei nso ɔkasa tia gyidihunu. Enti sɛ obi to kyakya na ɔsrɛ Onyankopɔn sɛ ɔmmoa no mma ne ti nyɛ yiye na onni a, wohwɛ a obetie no? (Yesaia 65:11; Luka 12:15) Mpae a ɛte saa de, ɛnsɛ sɛ yɛhwɛ kwan sɛ Yehowa betie! Sɛ Onyankopɔn betie yɛn mpaebɔ a, ɛsɛ sɛ yɛhwɛ hu sɛ ade ko a yɛrebisa no no, Bible nkasa ntia.

“Nea oyi n’asõ fi mmara tie ho no, ne mpaebɔ mpo yɛ akyide.”—Mmebusɛm 28:9.

Tete mmere mu no, wɔn a wɔamfa Onyankopɔn mmara anyɛ adwuma no, wantie wɔn mpaebɔ. (Yesaia 1:15, 16) Onyankopɔn nsesae. (Malaki 3:6) Ɛnnɛ nso, sɛ yɛpɛ sɛ Onyankopɔn tie yɛn mpaebɔ a, ɛsɛ sɛ yɛyɛ nea yebetumi biara de ne mmara bɔ yɛn bra. Nanso yɛmfa no sɛ bere bi a atwam no, yɛyɛɛ nneɛma bi a enye. Ɛno kyerɛ sɛ Onyankopɔn rentie yɛn mpaebɔ da anaa? Ɛnte saa koraa! Sɛ yɛasesa yɛn abrabɔ na yɛbɔ mmɔden yɛ nneɛma a ɛsɔ Onyankopɔn ani a, ɔno nso de yɛn bɔne bɛkyɛ yɛn.—Asomafo Nnwuma 3:19.