Nsɛmmɔnedi A Wɔfa Mmara So Yi Fi Hɔ​—So Ebetumi Ayɛ Yiye?

Asuade a Mose Mmara No Kyerɛkyerɛe

NSƐMMƆNEDI ho mmara a ɛwɔ wiase no sonosonoe yiye. Nanso nea wobu no sɛ ɛyɛ nsɛmmɔnedi no sɛ, na saa ara nso na wobu nsɛmmɔnedi sɛ ɛyɛ aniberesɛm. Bere a Onyankopɔn de Mose mmara no maa Israel na ɛnyɛ ɔman biara no, aman horow pii wɔ hɔ a wɔn mmara no nso da nnyinasosɛm a ɛwɔ Mose mmara no mu no adi. Sɛ́ a saa aman horow yi mmara no sɛ́ eyi no fi nokware a ɛyɛ sɛ nniso horow no mu binom yii wɔn mmara horow no fii Mose mmara no mu.

Mmara horow a mmara a wɔde maa Israel man no nyaa so nkɛntɛnso no nso sɛ wɔ akwan bi so, na eyi fi nea ɔsomafo Paulo kyerɛkyerɛɛ mu no sɛ: “Na amanaman mufo a wonni mmara no de wɔn awosu yɛ mmara no mu nneɛma a, eyinom a wonni mmara no yɛ mmara ma wɔn. Wɔde eyi kyerɛ sɛ wɔakyerɛw mmara adwuma no wɔ wɔn komam, na wɔn ahonim nso redi wɔn adanse, na wɔn susuwii toto wɔn ho ano, anaasɛ nso eyiyi wɔn ho ano.”​—Rom. 2:14, 15.

Mpɛɛpɛɛmu bi a wɔyɛe a ɛfa asotwe a wɔde ma wɔ nsɛmmɔnedi mu no ho da adi sɛ nniso horow a ɛwɔ wiase nyinaa no bu nsɛmmɔne a ɛyɛ awudi no sɛ ɛyɛ aniberesɛm sen biara na wɔtwe obi aso kɛse wɔ ho. Aman horow a wɔyɛɛ mpɛɛpɛɛmu wɔ mu no mu kakraa bi na ɛyɛ a wɔma wɔhyɛ nea wɔawia n’ade no ananmu. Sɛ polisifo hu biribi a wɔawia a wɔsan de nea wowiaa n’ade no ade ma no. Nsase horow bi mpo wɔ hɔ a wɔhwehwɛ sɛ odwowtwani anaasɛ ɔkorɔnfo no tua ka; afoforo nso de nea wawia ade no kɔ asenniibea na wɔhwɛ kwan sɛ wobebu atɛntrenee ama wɔn. Asotwe no sonosonoe na eyinom gyina bɔne ko a wɔayɛ no so, te sɛ ebia mfe a nea ɔyɛɛ bɔne no adi ne nea ɛfa sikasɛm ho, amanne, abrabɔ ne afoforo ho. Wɔ nsase horow a wokum wɔn a wodi awu, kum nnipa wɔ mu mu no, wotumi fa sɛn a wɔsɛn obi, obi menewa a womia anaasɛ tuo a wɔtow so kum wɔn.

Mose Mmara No mu Nneɛma Horow Bi

Bere a ɔman bi nni Mose mmara no ase nnɛ, te sɛ nea na Israel man no te no, sɛ yɛhwɛ asotwe a mmara horow no de ma no yiye a, yebetumi ahu sɛnea Onyankopɔn te nsɛmmɔnedi nka fa no ase yiye. Yehu sɛ mmara horow no nyinaa mu da hɔ pefee. Nanso, wɔma atemmufo no kwan ma wɔde mmara no di dwuma sɛnea tebea no te. Wobetumi atwe obi aso denneennen anaasɛ wobegow mu, ayi mmɔborohunu adi akyerɛ bere a wɔte nka sɛ ɛfata. (Fa to Exodus 21:28-32 ho.) Ɛsɛ sɛ adanse no da adi pefee. Wɔ nea ɛfa nsɛm a ɛsɛ sɛ wokum obi wɔ mu mu no, ɛsɛ sɛ wonya adansefo baanu anaasɛ nea ɛboro saa ansa na wɔasi gyinae.​—Deut. 17:6.

Ɛsɛ sɛ wokum owudifo a wahyɛ da akum obi no wɔ ɔkwan biara so. (Num. 35:16-18, 20, 21, 30, 31) Ɔkwan a wɔfa kum onii ko a ɔte saa no ne denam abo a wosiw no no so; sɛ wohu sɛ awudi no fi nitan a ɛnde bere a wɔasiw no abo awie no, wɔhyew funu no nso ka ho, anaasɛ sɛ wosiw no abo kum no wie a, wɔde ne funu no sɛn dua so awia sɛnea ɛbɛyɛ na obiara ahu asua ade afi mu. (Lev. 20:14; 21:9; Deut. 21:22, 23) Wɔayɛ guankɔbea nkurow ho nhyehyɛe ama wɔn a wɔanhyɛ da na wokum obi anaasɛ wɔn nsa apa wɔ obi so no na wɔaguan akɔ hɔ agye wɔn akra nkwa afi mogya ho werefo a ɔyɛ nea wawu no busuani no nsam. (Num. 35:22-25) Wɔyɛ adwuma wɔ saa nkurow no mu de hwɛ wɔn ankasa ho.

Wokum awaresɛefo nso. (Lev. 20:10) Saa ara nso na wɔn a wɔne wɔn mmusuafo da anaasɛ wɔne mmoa da anaa mmarima a wɔne wɔn ho da no nso de owu asotwe ba. (Lev. 20:11-13, 16) Aguaman a wɔne abeawa a obi agye no aware bɔ no nso de owu ba nnipa baanu no nyinaa so, gye sɛ abeawa no teɛteɛɛm ansa. (Deut. 22:23-27) Sɛ ɔbarima bi ne abeawa bi bɔ aguaman a ɛnde wɔbɛhwɛ ama ɔbarima no aware abeawa no (gye sɛ abeawa no agya mpene so sɛ ɔde abeawa no bɛma no ma waware no) , na ɔbarima no rentumi nnyaa abeawa no da. (Ex. 22:16, 17; Deut. 22:28, 29) Saa mmara yi siw Israel mmeawa no kwan na wɔannan aguamammɔfo anaa ahohwibɔfo. Afei nso mmara horow a ɛsɔre tia awaresɛe, obi busuani a ɔne no da ne aguamammɔ no siw aguaman mma a wɔbɛwo wɔn ara kwa no ano.

Wɔhwɛ sɛ ɔkorɔnfo tua nea owiae no mmɔho abien (wɔ nsɛm bi mu no nea ɛboro saa) ma nea owiaa n’ade no. Sɛ wantumi antua esiane sɛ onni sika nti a, wɔtɔn no ma obi a ɔte asase no so de no yɛ akoa, (titiriw no nea owiaa n’ade no) na wayɛ adwuma de akosi sɛ obetua nea wɔde too no so no. (Ex. 22:3b, 4, 7) Wɔ ɔkwan a ɛte sɛɛ so no, ɛnyɛ sɛ wotua nea wowiaa n’ade no ka nko, na mmom ne nsa ka ne nneɛma a wowiae no, ne afei nso ne bere a wɔsɛee no, ne nneɛma a ɔhweree no ne ɔhaw horow a ɛtoo no wɔ saa korɔnbɔ yi nti no.

Na afiase nna ho nhyehyɛe biara nni hɔ. Enti, obi a wɔabu no fɔ sɛ wayɛ bɔne bi no mmmɛyɛ nea ne ho ka da ɔmanfo so. Wɔmmfa no nnka nsɛmmɔnedifo kuw bi a esiane abasamtu ne ahofadi a wahwere no ne animguase nti obefi ase asua nsɛmmɔnedi afi ne mfɛfo nneduafo hɔ no ho. Wɔmmrɛ obi ase, wonngu obi anim ase, nneduadan a emu ayɛ fi ne nneduafo so ahwɛfo a wɔn tirim yɛ den nni hɔ na wɔayɛ obi ayayade. Eyi nti nea wayɛ bɔne no nya hokwan sakra ma wosiesie no.

Nea Enti a Mmara Bi a Wɔahyehyɛ Rentumi Mfa Adetreneeyɛ Mma

Bere a mmara a Onyankopɔn de maa Israel no ye, mfaso wɔ so, ɛteɛ, ɛkorɔn kyɛn mmara horow a ɛwɔ amanaman no mu nnɛ no, so eyii nsɛmmɔnedi fii Israel koraa anaa? Dabi. So eyi kyerɛ sɛ mmara horow bi a wɔahyehyɛ no rentumi nyi nsɛmmɔnedi mfi hɔ​—sɛ́ wɔrentumi mfa osetie anaasɛ adetreneeyɛ nhyɛ nnipa mu? Anaasɛ mmara so a wɔhwɛ ma wodi denneennen anaa wogow mu no rentumi mfa wiase bi a nsɛmmɔnedi nni mu mma? Yiw. Ɛda adi pefee sɛ sɛ mmara a Onyankopɔn de mae (a ɔde n’ankasa “nsa” kyerɛw Mmaraa nsɛm Du) no ntumi mfa adetreneeyɛ mma a, mmara a onipa bɛyɛ biara rentumi mfa biribi a ɛte saa mma. (Ex. 31:18) Ɛnde so anidaso bi wɔ hɔ ma wiase bi a nsɛmmɔnedi nni mu?

Sɛnea ɛbɛyɛ na yɛatumi asusuw saa asemmisa no ho no, momma yenni kan nhwɛ atirimpɔw a ɛwɔ Mose mmara no akyi no mu. Ansa na ɔsomafo Paulo rebɛdan Kristoni no na ɔyɛ obi a osua mmara wɔ Israel mmaranimfo akɛse no mu biako nkyɛn na ɔyɛ obi a ɔyɛ nnam wɔ mmara no sodi mu. Ɔkyerɛw kɔmaa Kristofo sɛ: “Na afei mmara no ne dɛn? Mmara atotoatoto nti na wɔde kaa ho de kosii sɛ aseni a wɔhyɛɛ bɔ maa no no bɛba.” (Gal. 3:19) Esiane sɛ Mmara no kyerɛkyerɛɛ bɔne horow a nnipa nyinaa yɛ nti, ɛma ɛbɛdaa adi sɛ nnipa nyinaa yɛ abɔnefo na wɔrentumi nni mmara a ɛyɛ pɛ so. Sɛnea Paulo kɔɔ so kae no: “Sɛ ɛnyɛ Mmara no nti a, anka minnim bɔne, na sɛ Mmara no anka sɛ: Mma w’ani mmmere a, anka minnim akɔnnɔ.”​—Rom. 7:7; Ex. 20:17.

Sɛnea obi bebu ne bra afa mfa ho​—sɛ́ ɔyɛ obi a onwia ade, ɔnsɛe aware anaa onkum nnipa anaasɛ ɔnyɛ bɔne a wɔabɔ din no mu biara​—rentumi nka da sɛ n’ani mmmeree biribi anaasɛ ne kɔn nnɔɔ biribi a enye da. Enti, onim sɛ ɔyɛ ɔbɔnefo, nanso Mmara no yɛɛ no yiye efisɛ ɛma ohui anaasɛ ɛmaa ɔfoforo biara hui sɛ ɔrentumi nni apam no so.​—Rom. 3:10-20.

Enti wɔ nokware a ɛyɛ sɛ bɔne wɔ adesamma nyinaa mu no ma adesamma nyinaa yɛ wɔn a wɔnyɛ pɛ, wɔn a wɔyɛ asoɔdenfo awo mu. Nanso, obi bɛka sɛ, ‘ɛwom sɛ yɛn nyinaa yɛ abɔnefo de, nanso ebinom di mmara so sɛnea ɛfata, enti ɛbɛyɛ dɛn na eyi akyerɛ sɛ wɔrentumi nyi mmarato mfi hɔ?’ Bɔne a ɛwɔ yɛn mu a yɛde wo yɛn mma no yɛ nea enye koraa sen sɛnea yesusuw. Bible no a ɛwɔ adanse ankasa​—a ɛfa ɔman a na ɛwɔ Mose mmara no ase mfeha 15 ho no​—ka kyerɛ yɛn. Bere a ɔsomafo no rekasa akyerɛ ne mfɛfo Kristofo no ɔkae sɛ: “Na yɛwɔ ɔhonam mu no, nnebɔne nhyɛsode nam mmara no so yɛɛ adwuma wɔ yɛn honam akwaa mu, sɛ yɛnsow aba mma owu.” (Rom. 7:5; 1 Kor. 15:56) Sɛnea asɛm yi kyerɛ no, Mmara no mu ahyɛde ahorow, a esiw nnebɔneyɛ ahorow bi ano no yɛɛ adwuma wɔ nnipa mu ma wɔyɛɛ saa nneɛma no ankasa.

Enti so Mmara no nye? Anaasɛ enye sɛ yebenya mmara nnɛ? Ɛnkyerɛ saa! Ɔsomafo no kyerɛkyerɛɛ mu: “Ɛnde na nea ɛyɛ papa no adan owu ama me anaa? Dabida, na ɛyɛ bɔne no mmom, na ada adi sɛ bɔne a ɛnam nea ɛyɛ papa no so po de owu aba me so, na bɔne no nam mmara asɛm no so ayɛ bɔne atra so. Na yenim sɛ mmara no yɛ honhom mu ade, na me de, meyɛ ɔhonam muni a wɔatɔn me ahyɛ mmara ase.” (Rom. 7:13, 14) So eyi nkyerɛ sɛnea bɔne ahyɛ yɛn mu ma? So eyi nyɛ adanse a ɛkyerɛ sɛnea yɛyɛ abɔnefo fa a ɛno nti asoɔden na yɛyɛ, yiw, yɛtew atua, a ɛkyerɛ sɛ bere a tumidi no aka akyerɛ yɛn sɛ ɛnsɛ sɛ yɛyɛ biribi a ɛbɛdan bɔne ama yɛn no, na eyi ara ne nea yɛpɛ sɛ yɛyɛ, ɛwom sɛ ebia na yensusuw ho da mpo?

Jerome H. Skolnick a ɔpɛɛpɛɛ nsɛmmɔnedi mu wɔ University of California wɔ Berkeley no sii su a adesamma kura yi so dua bere a ɔkae sɛ: “Ɛnyɛ obiara na ɔde obu ma nsɛmmɔnedi ho mmara wɔ ɔkwan biako so. Sɛ yɛyɛ mmara bara biribi a, ɛma nea wɔabara no mpo gye din.”

Eyi kyerɛ nea enti a wiase nniso horow rentumi mmfa mmara so nyi nsɛmmɔnedi mfi hɔ no. Ɛnde na anidaso no wɔ he?

[Kratafa 13 mfoni]

MOSE mmara no dii adanse kyerɛe sɛ ɔdesani biara a ɔnyɛ pɛ rentumi nni mmara a wɔahyehyɛ so wɔ pɛyɛ mu