Nsoromma Mu Hwɛ, Awodadi, ne Bible No

Sɛnea akyerɛwfo Rauph ne Adelin Linton kyerɛ no, abusuabɔ pɔtee bi wɔ nsoromma mu hwɛ ne awodadi ntam. Wɔka wɔ wɔn nhoma a wɔfrɛ no The Lore of Birthdays no mu sɛ: “Ná Mesopotamia ne Egypt a ɛhɔ na anibuei fii ase no nso a nsase a nnipa dii kan kaee na wodii wɔn awoda wɔ so. Na awoda ho kyerɛwtohɔ a wɔde sie ho hia titiriw wɔ tete mmere no mu efisɛ na obi awoda ho hia wɔ nsoromma mu hwɛ mu.” Ampa, Israelfo nso de obi awo ho kyerɛwtohɔ ahorow siei. Nanso wɔyɛɛ eyi sɛnea ɛbɛyɛ a wobetumi ahu mmarima mfe a wɔadi na ama wɔatumi ayɛ asɔfo, asraafo, ne nnwuma afoforo. (Numeri 1:2, 3; 4:2, 3; 2 Ahene 11:21) Nanso Bible no nka da ankasa a wɔde woo nnipa atitiriw te sɛ Noa, Abraham, Mose, Dawid​—anaasɛ Yesu Kristo no! Akyerɛwfo a yɛaka wɔn ho asɛm wɔ atifi hɔ no gye tom sɛ, “Ɛyɛ nokware sɛ wɔaka awodadi ho asɛm wɔ Bible no mu de, nanso na wɔde kae da a wɔwoo atuatewfo atirimɔdenfo te sɛ Farao ne Herode. Bere a na Kristofo a wodii kan no rebɔ mmɔden sɛ wɔbɛpaw da ankasa a wɔde woo Kristo no, Asɔre no Agyanom no mu pii buu no sɛ ɛyɛ abusude . . . Wɔkae sɛ ɛnsɛ sɛ wɔbɔ mmɔden biara sɛ wobedi n’awoda esiane sɛ na eyi yɛ abosonsom amanne nti.”