Nsoromma Mu Hwɛ​—So Ɛyɛ Anigyede A Asiane Nnim?

BRITANIANI ɔsoro abɔde ho ɔdenimfo Patrick Moore kae nnansa yi sɛ: “Ɛyɛ aseresɛm kɛse sɛ wobesusuw sɛ nsoromma ahorow kyerɛ yɛn asetra ne yɛn daakye kwan . . . [Nsoromma mu hwɛ] yɛ ade a asiane nnim, nanso te sɛ nyansahu biara no, enni nnyinaso biara.” Nanso sɛ obi de adwempa susuw asɛm no ho a, ɛma onya adwene sɛ asiane bi wɔ nsoromma mu hwɛ mu.

‘Fa Ɔhaw no To Nsoromma Ahorow no So!’

Asiane akɛse a ɛwɔ nsoromma mu hwɛ mu biako ne sɛ ɛmma nnipa nnye wɔn nneyɛe ho asodi ntom. Fa aware yɛ nhwɛso. Nsoromma mu hwɛfo bi a ɔwɔ South Africa kae wɔ awarefo a wɔn sɛnkyerɛnnede ahorow nhyia no ho sɛ: “Maka akyerɛ nnipa pii sɛ wɔn aware renyɛ yiye na ɛsɛ sɛ wogyae aware.”

Nanso susuw ho: So ntease wom sɛ wobegyae aware esiane sɛ wɔn nsoromma ne wɔn okyinsoromma nhyia koraa nti? So ɛrenyɛ papa sɛ awarefo a wɔrehyia ɔhaw no begye wɔn nneyɛe ahorow ho asodi atom na wɔahwehwɛ mmoa? Afotu pa pii wɔ Bible no mu a wɔde di aware mu ɔhaw ahorow ho dwuma. (Sɛ nhwɛso no, hwɛ Efesofo 5:22-25.) Nnipa pii a wɔde adi dwuma no ahu sɛ ɛne mmoa a eye no na amma wɔn aware ansɛe. Eyi ye sen sɛ obi de ne haw ahorow a ohyia no bɛto nsoromma ahorow no so!

Na mfomso pii a yedi wɔ yɛn asetra mu no nso ɛ? So eye sɛ yɛbɛdan akɔ nsoromma mu hwɛ so na ama yɛakyerɛ sɛ mfomso no mfi yɛn? Wɔ mfe bi a atwam no mu no, wɔbɔɔ ɔbarima bi a ofi Miami, Florida no sobo wɔ korɔnbɔ, mmonnaato, ne tow a ɔtow hyɛ nkurɔfo so no ho. Dɛn na ɔde yii ne ho ano? Ɔkasa tiaa nsoromma mu ahwɛfo baasa a wɔkyerɛe sɛ ɔrentumi mmu bra pa esiane ne kyinsoromma a ɛda adi a ɛne ne ho nhyia no nti.” Adwene a ɛte sɛɛ a obi nya no bɛma wakɔ so adi nsɛmmɔne.

Afei nso, susuw nea ɛbɛba no ho sɛ nnipa te sɛ aman akannifo a asɛyɛde hyɛ wɔn nsa fi ase hwehwɛ akwankyerɛ fi nsoromma ahorow hɔ a. Wɔ Gwyn Turner nhoma a wɔfrɛ no Human Destiny​—The psychology of Astrology mu no, ɔma yɛkae asɛm a ɛyɛ ahodwiriw yi: “Ná ahemfo ne sodifo a wɔtraa ase wɔ tete mmere no mu no ma wɔn nsoromma mu ahwɛfo tra wɔn nkyɛn bere nyinaa na bere a wiase nyinaa ko a ɛto so abien rebɛn awiei mpo no, Britania Asoɛe a ɛhwɛ ɔko ho nsɛm so no faa Hungaryni nsoromma mu hwɛfo a wɔfrɛ no Louis de Wohl wɔ kokoam.” Ɔhyɛɛ asraafo mpanyimfo binom ne ɔsa ahorow bi mu nkonimdi ho nkɔm kyerɛɛ Britaniafo no. Sɛnea na ne nsoromma mu hwɛ no kyerɛ no, otumi kaa afotu a na Hitler renya afi ne nsoromma mu ahwɛfo nkyɛn no nso kyerɛɛ Britania Asoɛe a ɛhwɛ ɔko ho nsɛm so no. Nnipa bi mpo ka sɛ amammuifo bi a wɔwɔ hɔ nnɛ hwehwɛ akwankyerɛ fi nsoromma ahorow no nkyɛn.

So ɛte sɛ nea asiane nnim sɛ wubehu sɛ gyinaesi ahorow a ɛfa nkwa ne owu ho betumi ayɛ nea egyina faako a okyinsoroma ahorow no wɔ no so?

Nea Ɛhyɛ Tumi a Wɔde Hyɛ Nkɔm No Akyi

Ɛtɔbere bi a, nsoromma mu hwɛ mu nkɔmhyɛ ahorow no ba mu. Nanso so ɛyɛ nsoromma mu a wɔhwɛ no nti? Wɔ mfe kakraa bi a atwam no mu no, Adwenemyare ho Ɔbenfo Vernon Clark a wawu no soo nsoromma mu ahwɛfo binom hwɛe. Ɔkaa nsɛm a esisii du ho asɛm kyerɛɛ nsoromma mu ahwɛfo no na ɔka kyerɛɛ wɔn sɛ wɔnka emu biara ho asɛm wɔ nsoromma mu hwɛ mu. Nsoromma mu ahwɛfo no bɔɔ mmɔden kɛse! Wɔn mu baasa mpo tumi kaa ne nyinaa ho asɛm pɛpɛɛpɛ!

Amerikani nsoromma mu hwɛfo Dal Lee tumi kaa nsɛm du no mu ason ho asɛm pɛpɛɛpɛ. Nanso dɛn na ɛma otumi yɛɛ saa? Ɛda adi sɛ na ɛyɛ biribi a ɛsen nsoromma mu a otumi hwɛe ara kwa. Lee kae sɛ, “anyɛ yiye koraa no, na ɛsɛ sɛ egye nsoromma mu hwɛfo bi dɔnhwerew fã na watumi de ayɛ asɛmti no mu biara ho nhwehwɛmu, kyerɛ sɛ ɛsɛ sɛ ɔde nnɔnhwerew du yɛ ne nyinaa.” Nanso esiane sɛ na Lee nni adagyew wɔ saa bere no mu nti, “ɔde simma biako pɛ na esusuw asɛmti no mu biara ho.” Ogye toom sɛ yɛ a otumi yɛe no nnyina “nsoromma mu hwɛ ankasa so.” Lee kae sɛ: “Migye di sɛ na efi ‘tumi a ɛkorɔn sen onipa de’ a mede dii dwuma no nti.”

Nea ɛyɛ anigye no, nsoromma mu ahwɛfo pii nso agye atom saara sɛ wɔde adaemone tumi na edi dwuma. Eyi yɛ asɛm a ɛhaw nnipa a wɔn ani gye ho sɛ wɔbɛsɔ Onyankopon ani no. Efisɛ Onyankopon ka wɔ Yesaia 1: 13, NW pefee sɛ: “Merentumi mmu m’ani ngu adaemone tumi a wɔde di dwuma no so.” Dɛn ntia? Bible no da no adi sɛ mpɛn pii nnipa a wɔwɔ nkɔmhyɛ tumi no wɔ adaemone tumi anaa nkɛntɛnso ase. (Fa toto Asomafo no Nnwuma 16:16-18 ho.) Enti ɛtɔ bere bi a, nsoromma mu hwɛ mu nkɔmhyɛ ahorow betumi ayɛ asɛm a adaemone​—Onyankopon ne n’asomfo atamfo ka. Amanehunu nkutoo na ɛbɛba obi a ɔhwehwɛ akwankyerɛ fi adaemone ho no so!

Nsoromma Mu Hwɛ​—So Ɛyɛ Ɔsom?

Ebinom ka sɛ anigye a wɔwɔ wɔ nsoromma mu hwɛ ho no nyɛ kɛse. Nanso nea ɛtaa fi ase sɛ anigye ketewaa bi no betumi adan ayɛ sɛ ɔsom a wɔde ma biribi. Nyansahufo biako a ɔde ne nsa hyɛɛ mpaemuka a wɔyɛ de kasa tiaa nsoromma mu hwɛ a yɛadi kan aka ho asɛm no ase no kae sɛ: “Wɔ ebinom fam no, akyinnye biara nni ho sɛ nsoromma mu hwɛ te sɛ guankɔbea bi ma wɔn . . . Wɔ afoforo nso fam no, nsoromma mu hwɛ abɛyɛ ɔsoro adiyi, nokware ankasa​—kyerɛ sɛ ɛyɛ nokware som ankasa.” Aban mpanyimfo ka sɛ ebinom ama nsoromma mu hwɛ mu nkɔmhyɛ ahorow ayɛ nea enya mmamu wɔ wɔn ankasa so. Sɛ nsoromma mu hwɛ nya obi so tumi wɔ ɔkwan a ɛte sɛɛ so a, ɛnde na abɛyɛ te sɛ ɔsom ankasa ampa.

Nsoromma mu hwɛ danee tete Babilon ɔman no som no fã ankasa. Nanso so onyaa saa ɔsom yi mu mfaso? Dabi, saa asɛm yi a wɔka de tiaa tete Babilon no wɔ Bible no mu: “Woabrɛ w’agyinatu pii no mu: ma wɔnsɔre nnyina ɛ, na wonnye wo nkwa, ɔsoro ani mu kyekyɛfo no, nsorommahwɛfo a ɔsram foforo daa wɔkyerɛ nneɛma a ɛbɛba wɔ so no.” (Yesaia 47:13) Babilon nsoromma mu ahwɛfo nkɔmhyɛ ahorow no antumi annye kurow no amfi daa ɔsɛe mu.​—Yesaia 13:19, 20.

Nanso ɔsom a na ɛwɔ Babilon no angu. Nhoma a wɔfrɛ no A History of Astrology ka sɛ “Kaldeafo de nsoromma mu hwɛ fi Babilon kɔɔ Misraim, ne titiriw Hela.”

Enti asiane wom sɛ wode wo ho bɛhyɛ ɔsom a ɛne nsoromma mu hwɛ no mu. Dɛn ntia? Efisɛ sɛnea Bible kyerɛ no, wɔrebɛsɛe ɔsom ahorow a egyina Babilonfo gyidi ahorow so no nyinaa. Ampa, tete Babilon asehwe twe adwene si ɔsɛe a ɛbɛba daakye yi so. Wɔbɔ yɛn kɔkɔ wɔ Adiyisɛm 18:4 sɛ: “Me man mumfi [Babilon ahyehyɛde] no mu, na moanyɛ ne nnebɔne no bi, na moannya ne haw no bi.”

Enti wɔrentumi nka sɛ nsoromma mu hwɛ yɛ ‘anigyede a asiane nnim.’ (Fa toto Deuteronomium 18:10-12 ho.) Akyi a obi bedi no betumi ayɛ adeyɛ a edi kan a ɛbɛma waba adaemone nkɛntɛnso a asiane wom ase na ama adamfofa a ɔne Onyankopon wɔ asɛe! (2 Korintofo 6:17, 18) Ampa yɛn nyinaa hia akwankyerɛ. Nanso hwɛ sɛnea asiane nnim na eye kɛse sɛ yɛbɛdan akɔ Bible no so ma akyerɛ yɛn kwan. (Dwom 119:105) Wɔn a wogye Onyankopon Asɛm tom no nya mmoa pa a ɛma wotumi di asetra mu ɔhaw ahorow ho dwuma, ade a nsoromma mu hwɛ ntumi nyɛ.

[Kratafa 8 mfoni]

Nsoromma mo hwɛfo biako a ɔwɔ South Africa ka sɛ: “Maka akyerɛ nkurɔfo pii sɛ wɔn aware renyɛ yiye na ɛsɛ sɛ wogyae nware”

[Kratafa 9 mfoni]

Nsoromma mu hwɛ so a tete Babilon de ne ho toe no antumi annye no amfi ɔsɛe mu