Akode A Ɛsen Biara No Ne Ahobammɔ A Wɔrehwehwɛ No

“WƆREYƐ akode bi a ahoɔden a ɛwɔ no so bi mmae da a ɛbɛsakra ɔkwan a wɔfa so ko daakye . . . Ɛwom, gye sɛ wɔyɛ nhyehyɛe bi de siw nneɛma afoforo a wɔde bedi dwuma no ano wɔ bere a ɛsɛ mu, anyɛ saa a asiane a ɛyɛ daa ma adesamma abusua no remma wonhu bere tiaa mu mfaso a wobenya no, ɛmfa ho sɛnea ne kɛse te.”​—Nuklea ho nyansahufo Neils Bohr a ofi Denmark. Ɔkyerɛwee wɔ 1944 mu.

Amanaman Nkabom no nhwehwɛmu bi ka sɛ: “Baabiara nni hɔ a . . . nuklea akode rentumi nsɛe hɔ na nnipa rentumi nnya ahobammɔ a edi mũ wɔ nuklea ntua kɛse mu . . . Enti adesamma reko atia akode a ɛsen biara no.”

Nkurɔfo tumi huu ntɛm ara sɛ ɛnyɛ sɛ nkurow akɛse betumi asɛe wɔ simma kakraa bi mu nko na mmom ebetumi aba saa wɔ ɔkwan a ɛyɛ mmerɛw nso so​—ɛho renhia sɛ wodi kan di asraafo dɔm bi so nkonim ansa. Ɛdenam nuklea akode so no, wobetumi de da koro asɛe ɔman bi mu nnipa ne ne sikasɛm nhyehyɛe a wɔrenko mpo.

Hu a wohui sɛ wɔrentumi nnya ahobammɔ a edi mũ wɔ nuklea akode ho no ma wonyaa adwene sɛ wɔbɛboaboa nuklea akode pii ano. Wɔ November 1945 mu no. United States asraafo a wɔde wimhyɛn ko no panyin, Henry H. Arnold kae wɔ amanneɛbɔ bi a ɔde kɔmaa ɔkyerɛwfo a ɔhwɛ ɔko ho nsɛm so no mu sɛ: “Ahobammɔ ankasa a yebenya daakye wɔ nuklea akode ho begyina tow a yebetumi atow ahyɛ ɔtamfo bi so kɛse ntɛm ara no so. Ɛsɛ sɛ yɛma obi a obetumi atow ahyɛ United States so no hu sɛ, sɛ ɔyɛ saa a, yɛde wimhyɛn bɛtow atomik ɔtopae pii agu no so ntɛm ara.”

Nnipa pii nnye ntom sɛ akode a ɛte saa pii ano a wɔaboaboa no ma wonya ahobammɔ ankasa. Robert J. Oppenheimer a ɔyɛ ɔbenfo a ɔyɛ wɔn a wɔyɛɛ atomik ɔtopae no mu dikanfo no de aman a wɔwɔ nuklea akode a wɔsɔre tia wɔn ho no totoo “akekantwɛre abien a wɔhyɛ tumpan bi mu a wɔn mu biara betumi akum ne yɔnko nanso ɔno nso bewu” no ho. Ɔmampanyin Roland Reagan kae nnansa yi sɛ United States ne Rusia ntam asɛm te sɛ nnipa baanu a wɔn mu biara de akodiawuo akyerɛ ne yɔnko ti.

Mmɔden a Wɔbɔ Sɛ Wɔde Atom No Bɛhyɛ Amanaman No Tumi Ase

Wɔ June 1946 mu no, United States kaa nhyehyɛe bi ho asɛm kyerɛɛ Amanaman Nkabom ahyehyɛde a na wɔatew no foforo no. Nhyehyɛe no daa no adi sɛ wɔntew amanaman ntam ahyehyɛde bi a ebenya tumi a ɛde bɛhwɛ atom ahoɔden a wɔde di dwuma wɔ wiase nyinaa no so. Bere a wɔatew ahyehyɛde a ɛte sɛɛ akyi no, United States de atom ho ahintasɛm a ɛwɔ no nyinaa bɛma ahyehyɛde no na asɛe atom ɔtopae a ɛwɔ no a ɛrenyɛ bio.

Rusia nso kae sɛ ɛsɛ sɛ wodi kan sɛe atomik ɔtopae ahorow nyinaa ansa. Bere a wɔayɛ eyi no, wobetumi ayɛ hwɛ a wobɛkɔ akɔhwɛ ne ano a wobesiw ho nhyehyɛe. Wɔantumi anni asɛm no ho dwuma na anidaso a wɔwɔ sɛ Amanaman Nkabom no besiw atomik ɔtopae a wɔyɛ no ano no sɛee wɔ ɔko nwinwini a ɛbae wɔ ɛno akyi no mu.

Akodeyɛ ho Akansi: Nea Wɔyɛ Wɔ Ho

Wɔ 1949 mu no, Rusiafo tow wɔn ɔtopae a edi kan. Gye a na Apuei Fam ne Atɔe Famfo no nnye wɔn ho nni no mu no yɛɛ den na akodeyɛ ho akansi no fii ase kɛse. Nea United States yɛe wɔ ɔtopae a Rusiafo yɛe no ho ne sɛ ɛyɛɛ akode foforo a ano yɛ den kɛse a wɔfrɛ no haidrogen ɔtopae. Nea wodii kan tow hwɛe (wɔ 1952 mu) no ano yɛ den kɛse sen atom ɔtopae a wodii kan towee no bɛyɛ mpɛn 800. Wɔ asram akron akyi no, na Rusiafo atumi ayɛ wɔn ankasa haidrogen ɔtopae.

Nea edi hɔ a wɔyɛe ne aprɛm mmɛmma a wotumi tow fi asasepɔn biako so kɔ foforo so no. Rusiafo na wodii kan yɛɛ eyi wɔ 1957 mu. Afei na wobetumi atow nuklea ɔtopae agu ɔman bi so wɔ simma kakraa bi mu na ɛnyɛ wɔ nnɔnhwerew mu bio. United States nso yɛɛ ntɛm sɛ ɛbɛyɛ bi na wɔ afe a edi hɔ no mu no, na United States nso ayɛ ɔprɛm bɛmma a wotumi tow fi asasepɔn biako so kɔ foforo so no bi.

Wɔ saa bere no mu no, na aman afoforo nso reyɛ wɔn ankasa atom ɔtopae. Esiane eyi nti, United Kingdom ne France ne aman afoforo nso bɛyɛɛ aman a wɔwɔ nuklea akode.

Adeyɛ yi kɔɔ so kɛse wɔ 1960 mfe no mu. United States ne Rusia nyinaa sɔɔ aprɛm mmɛmma hwɛe. Wɔn nyinaa suaa sɛnea wotumi tow aprɛm fi nsu ase akohyɛn mu. Wɔn nyinaa yɛɛ nea ekura aprɛmmoba pii.

Akodeyɛ ho akansi no kɔɔ so koduu 1970 mfe no mu na wɔyɛɛ MIRV afiri a ɛsoa aprɛm mmɛmma a wotumi tow kɔ baabiara no. Na aprɛm bɛmma betumi ayɛ nea ekura aprɛmmoba pii. Sɛ nhwɛso no, nnɛyi Amerikafo MX, anaasɛ Peacekeeper aprɛm no kura mmoba a ɛte saa du; na saa ara na Rusiafo SS-18 no nso te. Enti ɔprɛm bɛmma biako betumi asɛe nkurow akɛse du.

Aprɛm mmɛmma a wobetumi atow akɔto baabi a ɛsɛ sɛ ɛtɔ pɛpɛɛpɛ no ne afiri a ɛsoa aprɛm mmɛmma a wotumi tow kɔ baabiara no maa ehu san kaa nkurɔfo. Sɛ anka wɔde saa atuo yi ano bɛkyerɛ nkurow akɛse so mmom no, wɔde kyerɛɛ baabi a aman afoforo de wɔn akode ahorow ne ho nneɛma sie no so. Afei ebinom nyaa adwene sɛ wobetumi adi nkonim wɔ nuklea ɔko mu. Pii a wobedi kan atow no betumi asɛe ɔtamfo no de anaasɛ ɔrentumi ntow ne de.

Wɔn mu biara tee nka sɛ ɛsɛ sɛ otumi di asiane a ɛte sɛɛ ho dwuma denam tumi a ɔno nso betumi atow ne de no so, sɛ ɛba mpo sɛ ɔfoforo no tumi di kan tow hyɛ no so a. Wosusuwii sɛ sɛ ɛnyɛ nea wɔn nso wobetumi atow wɔn de a, ɛnde wonni biribiara a ɛbɛma ɔtamfo no asuro sɛ ɛnsɛ sɛ ɔtow hyɛ wɔn so; ɛwom, ɛbɛma wɔanya adwene sɛ wɔbɛtow ahyɛ afoforo so. Enti​—ɛsɛ sɛ wɔyɛ akode pii.

Mprempren wɔ 1980 mfe yi mu no, akodeyɛ ho akansi no rekɔ so ntɛmntɛm. Akode foforo a wɔayɛ nnansa yi ne neutron ɔtopae no​—haidrogen ɔtopae ketewaa bi a wɔayɛ sɛ wɔnam ne mframa bɔne so bekunkum nnipa a ɛrensɛe adan ne mfiri ahorow. Foforo nso ne cruise ɔprɛm bɛmma no​—ebetumi atow ɔtopae akɔto baabi a ɛwɔ akwansin 1,500 a ɔtamfo no mfiri rentumi nhu sɛ ɛreba. Nea aba foforo a wɔfrɛ no Nsoromma Mu Ɔko no nso ama ahunmu abɛka akono no

Mmɔden a Wɔbɔ Sɛ Wobesiw Akodeyɛ Ano

Ɛwom sɛ akode a wɔyɛ ho abakɔsɛm betumi ada no adi sɛ nuklea akodeyɛ ho akansi no akɔ so a anohyeto biara nnim de, nanso wɔatumi ayɛ ho apam ahorow bi. Eyinom bi to ne tow a wɔbɛtow ahwɛ ne akode ahorow bi a wɔbɛyɛ no anohye bere a afoforo nso siw nuklea akode a wɔbɛma aman a wonni bi no anya bi no ho kwan.

Wɔatumi ayɛ apam ahorow yi denam mmɔdenbɔ kɛse a egyee bere pii no so. Na apam no mu biara nni hɔ a ama wɔatew akode a ɛwɔ hɔ no so kɛse.

Eyi na ɛde ɔhaw no ba: “Aman a wɔwɔ tumi kɛse no nnye wɔn ho nni na wosuro wɔn ho wɔn ho. Ehu a eyi ama aka wɔn no ma akode a wɔbɛyɛ no pii no ho hia. Na akode pii a wɔyɛ no nso ma wosuro wɔn ho wɔn ho kɛse; enti nkurɔfo te nka sɛ wonni ahobammɔ sen bere biara

[Asɛm a wɔafa aka wɔ kratafa 12]

“Sɛ asono abien nya ntɔkwaw a, ɛhɔ nwura no nso hu amane

[Kratafa 12 mfoni]

(For fully formatted text, see publication.)

Bɛmma biako a wɔfrɛ no MX no ano den te sɛ ɔtopae a wɔtow too Hiroshima so no 300 a ɛyɛ nea ebetumi asɛe baabi a ne kɛse ne ne trɛw yɛ akwansin 240

MX ɔprɛm bɛmma a atow

Nea ɛtowee wɔ Hiroshima