Obi a N’adwuma Afi Ne Nsa Dɛn Ne Ano Aduru?

“It’s going to be brutal. Many businesses are broke, but “Ɛbɛyɛ den. Nnwuma pii nni sika, nanso wonnye ntom.” U.S sikasɛm mu ɔbenfo.

NIPA pii ahu asɛm a wɔka siei wɔ 1990 awiei yi mmamu a ɛyɛ yaw no. Nnwuma bi mu nnwumayɛfo a “wɔaka” nhu sɛ wɔn na wodi hɔ a wɔbɛpam wɔn anaa.

Sɛ w’adwuma fi wo nsa nnɛ a, dɛn na wobɛyɛ? Nyansa wom sɛ wubesiesie wo ho. Sɛnea ɛdaa adi wɔ asɛm a edi kan no mu no, sɛ w’adwuma fi wo nsa a ɛka wo sikasɛm ne wo nkate nyinaa. Enti, ɛkɔ akyiri sen ka ahorow a wubetua ara kwa. Nea edidi so yi yɛ akwankyerɛ ahorow a ɛboaa afoforo ma wɔanhinhim wɔ sikasɛm ne nkate mu bere a wɔn adwuma fii wɔn nsa no.

1. Mmɔ Hu

Bere a Dominick adwuma fii ne nsa no, ɔde ne fie san maa sikakorabea no na ɔne n’abusua no kɔtraa ne maame nkyɛn. N’afotu ne sɛ, sɛ tebea no mu yɛ den sɛ dɛn ara a mpere wo ho. Ose: “Sɛ wowɔ adwuma anaa wunni adwuma no, worenyera. Na ɛsɛ sɛ mifi nokwaredi mu hu sɛ na yɛn nyinaa rennwu.” Hwehwɛ ano aduru a mfaso wɔ so mmom sen sɛ wode tebea bɔne ahorow ho nsusuwii bɛhyɛ w’adwenem.

2. Nya Adwempa

Jim ne Donna wɔ nnwuma anan a wɔde wɔn bere fa yɛ. Nanso, sika a wɔn baanu nyinaa nya no sua sen nea anka Jim nkutoo nya fi ne kan adwuma a na ɔde ne bere nyinaa yɛ mu no. Eyi nyinaa akyi no, wɔafa no sɛ osuahu a wɔde kyerɛkyerɛ wɔn mma baanum no. Donna kae sɛ: “Sɛ ɛnyɛ asɛnnennen no a, anka wobenya wɔn ho wɔ honam fam. Nanso anka wonhu asiane ahorow a ɛkyerɛ wo sɛnea ɛsɛ sɛ wotra ase no.”

3. Bue W’adwenem Ma Nnwuma Afoforo

Wɔn a wokura nnwuma atitiriw no mpo betumi asakra wɔn nnwuma na wɔafi foforo ase. Laura a n’adwuma fii ne nsa no kae sɛ: “Nnipa nhwehwɛ ade foforo a wobetumi ayɛ kosi sɛ ɛbɛyɛ ɔhyɛ ansa.” Ɔkae sɛ: “Wɔ ‘90 mfe yi mu no, ɛsɛ sɛ nnipa sua sɛnea wɔbɛyɛ fakaa.” Adwuma a wunim yɛ no ara a wobɛbɔ mmɔden ahwehwɛ​—anaa- sɛ akatua koro no ara​—no betumi ama ayɛ den sɛ wubenya adwuma. Ebia eyi nti na wɔn a wɔyɛ krakyedwuma nnya adwuma ntɛm te sɛ wɔn a wɔn adwuma ba fam no. Enti bue w’adwenem wɔ adwuma foforo a ɛho kwan bebue no ho. Nnipa pii adi yiye wɔ adwuma a wɔyɛ ma afoforo no mu, te sɛ fie asiesie.

4. Tra Ase Ma Ɛne Nea Wowɔ Nhyia ​—Ɛnyɛ Sɛnɛa Obi Foforo De Te

Adwinnade a ɛyɛ den wɔ adetɔn mu dawurubɔ ho ne sɛ wɔbɛma woanya “ahiade” bi a na anka enni hɔ. Wɔtaa ma wote nka sɛ obiara nim saa ahiade no na wɔredi ho dwumadi (gye wo nkutoo) . ‘Eyi yɛ atade a obiara hyɛ bi [gye wo].’ ‘Sini a obiara ka ho asɛm [nti dɛn nti na wonkɔhwɛe?].‘ ‘Kar a obiara wɔ bi [bere bɛn na wobɛtɔ bi?].’

Ebia adeyɛ a ɛte saa benya su a yɛwɔ wɔ sika ho ne sɛnea yedi no so nkɛntɛnso. W’adamfo tu kwan bi a egye sika pii. Enti mpofirim ara wo nso wuhia sɛ wokɔ akwamma. Adamfo foforo bi nso atɔ kar foforo. Mpofirim ara ɛyɛ wo sɛ wo kar no anyin dodo na ennye. Nea obiara yɛ a wobɛma w’ani abere no bɛma wasɛe sika a wunni, de atotɔ nneɛma a wunhia ankasa. Kwati ntotoho a ɛte saa a ɛbɛbrɛ wo ase no. .

Jim a n’adwuma fii ne nsa a yɛadi kan aka ne ho asɛm no kae sɛ: “Sɛ nnipa ntumi nkura asetra kwan a wosusuw sɛ wɔpɛ no mu a, wodi yaw. Nea ɛsɛ sɛ ɛho hia wo ne aduan ne dabere. Nokwarem no nea aka no ho nhia.” Bible hyɛ nyansa wɔ 1 Timoteo 6:8, sɛ ‘yɛmma aduan ne nea yɛde kata yɛn ho nnɔɔ yɛn so.’

5. Hwɛ Yiye wɔ Adefiri Ho

Adefiri betumi ayɛ mmoa de nanso ebetumi ayɛ ade a ɛsen biara a ɛbɛma woade ka. Ebinom de adefiri di dwuma sɛ mmoa. Wɔde di dwuma de bu ani gu asemmisa a ɛne sɛ ‘so metumi atɔ?’ no so koraa. Ɛyɛ te sɛ ade a ekum yaw ano a ɛma wo sɛe sika a wonnwen ho anaasɛ wonte nka.

Wɔ nnansa yi mfe mu no, adefiri atrɛw wɔ aman pii mu. Dɛn na afi mu aba? Obi a ɔtɔn komputa a ofi Korea a ofirii kar foforo kae sɛ: “Bere nyinaa sɛ edu bere a ɛsɛ sɛ mitua me ka no a na ɛyɛ me yaw. Ɛte sɛ nea mede saa sika no akyɛ.” Wɔ Japan no, wɔn a wɔhwehwɛ sikasɛm mu afotu nyinaa no mu bɛyɛ fã wɔ wɔn mfe 20 mfe no mu. Saa ɔman no mu adefiri nkrataa ɔpepem 140 no titiriw na ama mmofra de ka kɛse no.

Enti hwɛ yiye wɔ adefiri ho. Fa di dwuma, nanso mma ɛmfa wo nni dwuma. Mma emfura w’ani wɔ wo sikasɛm gyinabea ho. Eyi bɛma adwuma a afi wo nsa no ho adwenwene no ayɛ kɛse.

6. Ma Abusuam Biakoyɛ Ntra Hɔ

Nnipa 86,000 a wobisabisaa wɔn nsɛm no mu bɛboro nkyem abiɛsa mu biako kae sɛ sikane wɔn aware mu asɛnnennen a ɛsen biara. Nhwehwɛmu foforo daa no adi sɛ sika na ɛde ntɔkwaw ahorow no mu pii ba. Grace Weinstein a ɔyɛ sikasɛm ho ɔfotufo no kae sɛ: “Su a ɛsononsonoe wɔ sika ho no tumi de ntɔkwaw ba.”

Awarefo a ɛte sɛ nea wɔyɛ biako no mpo su betumi ayɛ soronko wɔ sika ne sɛnea ɛsɛ sɛ wodi no ho. Obiako betumi ayɛ pɛpɛe yiye, ɔfoforo no betumi ayɛ sikasɛefo kɛse.

Sɛ wɔanhwɛ anka a, sikasɛm betumi de abusua mu ntɔkwaw aba. Bible ka wɔ Mmebusɛm 15:22 sɛ: “Wɔkwati agyinakɔ a, atirimpɔw yɛ ɔkwa.” Sɛ moreka sika ho asɛm a, bɔ mmɔden gye wo hokafo no nso nsusuwii tom.

7. Kɔ So Nya Obu Ma Wo Ho

Grace Weinstein kae sɛ: “Ɔbarima anaa ɔbea a onnye akatua bio no te nka sɛ ne gyinabea ne ahofadi aba fam, na ne nyinaa ma obu a ɔwɔ ma ne ho no yera.”

Mpere wo ho nka sɛ wommu wo sɛ odwumayeni nti na woyii wo adi no. Woyii Rani a wadi mfe aduonu akron no adi wɔ bere a onyaa abasobɔde a ɛsen biara no akyi dapɛn abiɛsa pɛ. Bere a ebia odwumayeni nokwaredifo a wotumi de ho to no so a obi yɛ no remma wonyi no adi no, ɛnyɛ bere nyinaa na ɛba saa. Enti ɛnsɛ sɛ obi fa yi a wɔayi no adi no sɛ esiane sɛ ɔmfra nti. Ebetumi aka adwumayɛfo a wɔn ho hia na wotumi de ho to wɔn so no nso.

8. Yɛ Sikasɛm Ho Nhyehyɛe

Nnipa pii mpɛ nneɛma a wɔbɛtɔ ho sikasɛm ho nhyehyɛe yɛ. Wɔte nka sɛ ɛyɛ nhyɛso, biribi a esiw wɔn nea wɔhwehwɛ sɛ wɔtɔ ho kwan. Ɛnte saa. Sikasɛm ho nhyehyɛe yɛ adwinnade a ɛma wudu wo botae ho, ensiw wo kwan. Ɛyɛ nhyehyɛe a wɔde ma akwankyerɛ, ɔkwan a ɛkyerɛ wo beae a wo sika rekɔ ne sɛnea wobɛma akɔ beae a wopɛ sɛ ɛkɔ.

Nea ɛyɛ nwonwa ne sɛ, nnipa pii nnim nea wɔde wɔn sika yɛ. Mmom no, wofi nkate mu totɔ nneɛma na afei wɔka sɛ: “Na ne nyinaa faa he‘.”‘ Bere a ɛsɛ sɛ wɔkwati sika a wɔsɛe no saa ne mmere a sikasɛm mu ayɛ den no. Bible ka no nyansam wɔ Mmebusɛm 21:5 sɛ: “Fa ahwɛyiye yɛ nhyehyɛe na wubenya adedodow; sɛ wopere wo ho a, worennya nneɛma pii da.”​—Today’s English Version.

Sɛ wubedi afotu yi akyi a, yɛ kyerɛwtohɔ. Kyerɛw sika biara a wuyi ɔsram mũ no nyinaa, kyerɛ nea wode tɔ. Afei, yɛ sika dodow a ɛba ho kyerɛwtohɔ. Sɛ wuhu sɛ nea ɛkɔ no dɔɔso sen nea ɛba no a, fa kyerɛwtohɔ no hwehwɛ nea enti a ɛba saa. Sɛ wuhu nea wuyi ne nea wode yɛ a, wubetumi adi wo sikasɛm so.

Ma sikasɛm ho nhyehyɛe no nyɛ fakaa. Asram kakraa a edi kan no, wubehu mfomso ahorow na ebia wubebu ani agu sika a wuyi no bi so. Yɛ nsakrae ne nsiesiei kosi sɛ sikasɛm ho nhyehyɛe no ne nea wuhia no behyia. Enti sikasɛm ho nhyehyɛe pa no bɛyɛ w’akoa ɛnyɛ wo wura.a

Ebia akwankyerɛ a ɛwɔ atifi hɔ no bɛboa obi ma watumi agyina bere a onni adwuma no ano. Nanso sɛ nsɛm no bɛyɛ adwuma a, ɛsɛ sɛ ɛne sɛnea sika ho hia ankasa no ho adwene a ɛteɛ kari pɛ. Nokwarem no, ɛho hia dɛn? So ɛsɛ sɛ biribi foforo biara di sika anim, bere a obi adwuma afi ne nsa mpo no?Yɛbɛhwehwɛ nsemmisa yi mu wɔ asɛm a edi hɔ no mu.

[Ase hɔ nsɛm]

[Box on page 26]

Senea Wɔyɛ Sikasɛm Ho Nhyehyɛe:

1. Bu sika dodow a ɛba no ano.

2. Yɛ ɔsram mũ nyinaa ho kyerɛwtohɔ na hu nea ɛsɛe wo sika.

3. Gyina akwan abien a edi kan no so bu nkontaa. Hwɛ sika a ɛsɛ sɛ wuyi wɔ emu biara ho.

4. Yɛ nsakrae sɛnea ɛho hia wɔ wo sikasɛm ho nhyehyɛe no mu.

[Kratafa 25 mfoni]

Ɛsɛ sɛ awarefo di nkitaho na sikasɛm annan ntɔkwaw wo abusua no mu