Dɛn Ne Nusu Bebree Yi?

BERE bɛn ne bere a etwa to a wusuu yiye a wunsuu bio? So ɛyɛ anigye na ɛmaa wo suui anaa ɛyaw? Wusuu wɔ nkonim bi a wudii ho anaa nkugudi bi a eye hu ho? Wufi ahotɔ mu anaasɛ abasamtu mu? Abawo ho anaa ɔhokafo wu, dɔfo bi a wokae no anaa nkae bi a ɛyɛ yaw, ɔdamfo pa bi a wuhyia no kwan anaasɛ ɔdamfo pa bi a wugyaw no kwan? Tebea horow a ɛbɔ abira, nkate a egu ahorow, nanso ɔkwan koro so na wɔtaa fa da wɔn nkate adi wɔ ho​—nusu a wɔtew.

Dɛn nti koraa na yɛsu wɔ nkate a emu yɛ den ho? So edi dwuma bi? Anaasɛ yebetumi atra a yɛntew nusu?

Dɛn Nti na Yesu

Obiara nni hɔ a onim. Nnipa ne mmoa tew nusu horow abien: Basal nusu a ɛma aniwa no tumi hu ade, anaa daa de, nusu a ɛfow aniwa no, ne reflex nusu a ɛba ntɛm so bere a biribi tɔ anaa aka aniwa no. Na ɛyɛ nusu a nnipa fi nkate mu tew, osu, na ɛyɛ biribi soronko ma nnipa​—na wɔnte ase.

Abɔrehufo William Frey susuw sɛ osu a wofi nkate mu su no ma nnipadua no tumi de ne fi nneɛma horow bi a etumi pira nipadua no sɛnea asaabo, nsono kɛse, ahurututu, ne honam mu ntokuru di dwuma no ara pɛ. Ne nhoma Crying​—The Mystery of Tears kyerɛkyerɛɛ n’adesua a ɔde nusu a biribi te sɛ (gyeene a ɛkɔ aniwam) ma obi tew nusu totoo nusu a wofi nkate mu tew sɛ (sini a eye awerɛhow a obi hwɛ) mu tew no ho. Protein a ɛwɔ nusu a wofi nkate mu tew no kɔ soro bɛyɛ​—ɔha mu nkyekyem 24 sen nea wɔtew fi biribi a ɛtɔ anaa ɛkɔ aniwa no so no. Ntease a ɛwɔ eyi ho no mu nya nnaa hɔ, nanso adanse wɔ hɔ sɛ nipadua no ma nusu ahorow abien a nea efi nkate mu ba no yɛ soronko fi nea efi biribi a ɛhaw aniwa no de ba no ho.

Odiyifo Yeremia kerɛwee sɛ, “Misu te sɛ ɔbea. M’aniwam, m’aniwam kyĩ nsu gu fam.” (Kwadwom 1:16; New World Translation) So ɛyɛ nokwasɛm sɛ mmea su sen mmarima? Akontabu kyerɛ saa​—wɔtaa su sen mmarima mmɔho anan (mpɛn 5.3 ɔsram, sɛ wɔde toto mmarima de 1.4 ho a) Sɛnea Frey kyerɛ no, bere a wɔyɛ nkokoa no de mmarimaa ne mmeawa su pɛ, ɛwom sɛ fi awo so no nnafua anaa adapɛn bi twam ansa na mmofra afi nkate mu atew nusu. Nanso, nsonsonoe no fi ase wɔ wɔn mpanyin mfe no mu. Eyi betumi afi asetra mu nkɛntɛnso ahorow mu. Nanso harmone prolactin (ade a ɛkanyan nufusu no) a ɛwɔ mmofra nyinaa, mmarima ne mmeawa mu no yɛ pɛ ara kosi wɔn mpanyin mfe so. Efi bɛyɛ mfe 13 ne 16 ntam no, mmea de no nya nkɔanim.

Wohu Prolactin wɔ nusu mu. Ɛkɔ soro bere a nipadua no wɔ ɔhaw mu. Eyi kyerɛ sɛ, mmea nnipadua mu ahommoa no bɛkɔ soro kɛse mpo asen mmarima de bere a wɔahaw no. So ebetumi aba sɛ eyi nti na ɛyɛ mmerɛw ma mmea sɛ wosu na wɔtaa su ntɛmntɛm sen mmarima no? Dr. Frey gye di sɛ osu a efi nkate mu ba no yɛ mmɔden a nipadua bɔ sɛ ɛbɛsan ama nipadua mu nsu no akari pɛ. Ahommoa no na ɛkanyan osu no, na ɔkyerɛkyerɛ mu sɛ ɛno nti na sɛ yesu wie a yɛn ho taa tɔ yɛn no.

Nhwehwɛmu foforo a Oduruyɛfo biako, Margaret Crepeau yɛe no huu twaka bi a ɛda osu ano a wosiw ne “nokwasɛm kɛse a ɛyɛ sɛ ɛne nipadua mu nyarewa te sɛ ayamkuru ne nsono mu kuru na ɛnam.” (Seventeen, May 1990) Abɔredehufo afoforo ahu adanse a ɛne eyi bɔ abira. Health nsɛmma nhoma bɔ amanneɛ sɛ Drs. Susan Labott ne Randall-Martin yɛɛ nhwehwɛmu wɔ wɔn a wɔtaa su ne wɔn a wɔntaa nsu mu. Nea wohui daa adi sɛ osu ntew ɔhaw so na wɔn a wosu bebree no “taa nya dadwen ne haw.” Wɔde ba awiei sɛ mfaso nni osu so sɛ “eyi yɛadwen fi ɔhaw bi so ara kwa” a. Nanso, osu betumi akyerɛ gye a yɛgye tebea bɔne bi tom titiriw, sɛ nhwɛso no, ɔdɔfo bi wu.

Eye sɛ yɛbɛka sɛ, nea ɛma wofi nkate mu tew nusu ne n’atirimpɔw yɛ nea yennya nhuu mu.

Nusu Afoforo

Yenim pii fa sɛnea nusu a ɛwɔ hɔ daa no di dwuma, nea ɛwɔ w’aniwam mprempren no. Edi dwuma pii sen fɔw ara a ɛfɔw w’aniwa so no. Ma yɛnhwɛ sɛnea nsu a ɛyɛ nwonwa yi di dwuma ne sɛnea ɛba, ɛtrɛtrɛw, na efi adi fi beae ɛnam hwiegu no.

Nea nusu no gyina mu no ankasa no wɔ w’aniwa bon no mu wɔ w’ani akyi hono no soro pɛɛ. Saa ade yi a ɛte sɛ saw no, ne afoforo 60 na ɛde nsu a emu duru yɛ pɛ a ɛfam so abiɛsa no ba​—ahorɔ, nsu, ne ngo.

Nea ɛfam ase no, ahorɔ no, ma aniwa no so yɛ toromtorom na ama aniwa akyi hono no atumi atrɛw afa aniwa kesuwa a epue abonten no so. Nsu no ne nea emu yɛ duru wɔ abiɛsa no nyinaa mu, na ekura nneɛma pa bebree a oxygen, a ehia ma aniwa kesuwa no a nhoma a ɛkata kurutiayisi no so no ka ho. Nea ɛka ho nso ne aduru te sɛ Lysozyme ne enzymes afoforo 11 a wohu no nusu mu no. Lysozyme tumi ko tia nyarewa yiye. Ɛma aniwa no yɛ fitaa na ɛso da hɔ.

Nea ɛma nusu yi wie n’adwumayɛ wɔ pɛyɛ mu no befi apowapow 30 a ɛte sɛ akokɔ srade a ato santen wɔ aniwa hono baanu no soro de ne ase de nyinaa ase hɔ na ɛba. Apowapow no na ɛde ngo no fa so, na ɛde kakraa bi na ɛfa so sɛnea ɛbɛyɛ a ɛremma w’aniwa so nyɛ wo wisiwisi, nanso ɛkɔ so bɔ nusu a afɔw w’aniwa kesuwa so no ho ban na ɛso anwo amma wo ho anyera wo wɔ bere a ɛda anibu ntam no mu. Nokwarem no, nnipa binom aniso ngo sua, na wɔn ani so nsu wo ntɛm sen sɛnea anka ɛsɛ sɛ ɛwo.

Anibu no Mu

Afei ani hono ba, ɛfa nusu no nea eye, na ɛde afa aniwa no so a atrɛw mu pɛpɛɛpɛ a ɛfam so abiɛsa. Aniwa ahono no hyiam pɛpɛɛpɛ ma aniwa kesuwa a epue abonten no nyinaa so fɔw wɔ adware a ahodwo wom yi mu.

Dɛn na ɛba nusu a awie n’adwuma yɛ no so? Sɛ wohwɛ w’aniwa yiye a wubehu tokuru ketewaa bi wɔ w’ani ntweaso ase, ɛno na ɛtwe nusu a aboro so no fa amoa bi a ɛkɔ nusu kotoku mu. Efi hɔ a nusu no san n’akyi kɔ ɛhwene ne menewa mu, ɛhɔ na ahohore a ɛwɔ hɔ no nonom no. Anibu ma nusu kotoku no yɛ adwuma te sɛ afiri a ɛtwe nsu, na ɛtwe nusu fa amoa no mu na ɛde siane.

Sɛ wofi ase su a, wobebu w’aniwa ntɛmntɛm, na ama afiri a ɛhwew nsu no ayɛ adwuma ntɛmntɛm atwe nusu a abu so no. Nanso, sɛ nusu no yiri ankasa a, ɛboro afiri a ɛhwew nsu no ahoɔden so, na nusu kotoku a ɛwɔ a ɛhwen mu no bu fa so, na wohwen mu sɔne nsu. Na ɛho behia sɛ wuyi wo duku saa bere yi efisɛ nusu no nkae no abu afa w’ani akyi hono no so asiane aba w’afono ho.

Enti nea ɛtwe nusu no ba biara no​—sɛ ɛyɛ anisɔ a ɛka koma anaasɛ ɛyaw bi a ɛyɛ nwene, aseresɛm bi, anaasɛ bere tiaa mu awerɛhowdi, nkonimdi kɛse bi anaasɛ huammɔdi kɛse bi no​—nusu asiesie ne ho retwɛn sɛ ɛbɛda wo nkate adi.

[Adaka wɔ kratafa 17]

Mmoa ma Aniwa a Ayɛ Kɔkɔɔ

W’aniwa so hyehye wo, na wotaa te nka sɛnea anwea agu so. Dɛn na ɛde ba? W’aniwa yɛ kɔkɔɔ bere a ntini a mogya fa mu a ɛwɔ w’aniwa kesua no fa a ɛyɛ fitaa no so no mu trɛw no.

Eyi befi nusu a ɛsa. Nnipa a wɔde nnɔnhwerew pii yɛ adwuma wɔ video anim denam hwɛ a wɔhwɛ so, anaasɛ wɔkenkan nhoma pii no mmu wɔn ani kɛse. Ɛfata sɛ sima koro biara no obi bu n’ani mpɛn 15. Bere a worekenkan ade, woreka afiri, anaasɛ woreyɛ biribi foforo a ehia sɛ wode adwen si so no, mpɛn dodow a ɛsɛ sɛ wobu w’ani no bɛkɔ fam akosi fi mpɛn abiɛsa kosi asia, na ɛno ma aniwa no so wo na ɛso hyehye. Nnuruyɛfo kamfo nea wɔfrɛ no anibu bere ne nnuru a wɔde gugu aniwa no so ma aniwa no so dwo.

Sɛ wo da nyan a wuhu sɛ w’aniwa ayɛ kɔkɔɔ efisɛ nusu adwumayɛ kɔ fam kɛse wɔ esum mu ne bere a obi ada no.

Nnuru horow bi a obi fa no betumi ama nea ɛde nusu ba aniwa no so no dwumadi abrɛ ase, sɛnea onyin yɛ no ara pɛ. Ani akyi hono no a ɔyare ka no esiane biribi a nipadua no mpɛ, ewiem nsakrae a ano yɛ den, anaa efĩ a ɛwɔ mframa mu nti no, tumi ma aniwa yɛ kɔkɔɔ.

Aniwa akyi hono anaa nea ɛde nusu ba no a ɛsɛe anaa ano siw esiane epira anaa awo mu sintɔ bi no betumi asiw nusu a ɛbɛfa aniwa kesua no so nyinaa no kwan, anaasɛ nusu no ankasa mu nneɛma renkari pɛ.

Nea etwa to no, nnipa ɔpepem pii hu amane wɔ nyarewa te sɛ Sjõgren’s syndrome, nnipadu mu mmoaa a wɔko tua nyarewa, a edi asi tia nkwaadɔm a ɛma wonya nusu, ntasu, ngo, ne nkwaadɔm afoforo, na ɛma aniwa, ano, ne were ho wo.

Dɛn na yebetumi ayɛ wɔ aniwa no a ɛso wo daa no ho? Nusu a nnipa ayɛ a ɛyɛ nsusu anaa nea akyene abu so yiye, na saa ara na ahwehwɛ aniwa soronko ahorow a etumi bɔ aniwa no ho ban ma ɛso nsu nwow ntɛm nso wɔ hɔ. Bere a tebea ahorow yi nyɛ anigye no, ɛntaa mma nnipa ani mfura. Nanso, sɛ wɔanhwɛ anye ho aduru a, aniwa a ɛso wo daa no betumi asɛe nhoma a ɛkata aniwa kesua no so no, enti ɛho hia sɛ wɔhwehwɛ mmoa fi nnuruyɛfo hɔ.

[Adaka wɔ kratafa 18]

“Fa Me Nusu Gu Wo Kotoku Mu”

Saa na odwontofo Dawid kyerɛwee bere a ɔsrɛɛ ne Nyankopɔn sɛ ɔnhwɛ ne haw a emu yɛ den no. (Dwom 56:8) Yiw, tebea horow a ɛma wodi awerɛhow kɛse a ɛba Onyankopɔn asomfo anokwafo mpo asetra mu no ama wɔasu.

Susuw ɛyaw a Ɔhene Dawid de suu ne mma Amnon ne Absalom wu ne n’adamfo nokwafo Yonatan, ne Ɔhene Saul nso de no ho hwɛ. (2 Samuel 1:11, 12; 13:29, 36; 18:33) Bere a Amalekfo fow Siklag kurow no na wɔkyeree Dawid ne ne mmarima atumfo yerenom ne wɔn mma kɔe no, ‘wɔmomaa wɔn nne so sui ara kosii sɛ wonnya ahoɔden nsũ bio.’​—1 Samuel 30:4.

Ɛbɛyɛ sɛ Yakob ne Mose, a aman mũ gyam wɔn nna pii no wu de osu kɛse bae. (Genesis 50:3; Deuteronomium 34:8) Nnommumfa ne ɔhaw nso ama Yehowa ate amanehunu su wɔ n’asom. (Hiob 3:24; Dwom 137:1; Ɔsɛnkafo 4:1) Bible mu nhoma a ɛne Kwadwom mũ no nyinaa yɛ abubuw a Yeremia a na ɔregu nusu no na ɔkyerɛwee.​—Kwadwom 1:16; 2:11, 18; hwɛ 1:1, New World Translation ase hɔ asɛm.

Osu nyɛ mmerɛwyɛ ho sɛnkyerɛnne koraa, na mmom wɔde da nkate a emu yɛ den adi. Enti, onipa a ɔyɛ pɛ Yesu mpo sui. Bere bi osuu Yerusalem kurow no, bere foforo nso osui, bere a ohuu Lasaro a na wawu no abusuafo ne ne nnamfo no. (Luka 19:41; Yohane 11:33-35) Nanso ankyɛ na abusuafo no ne ne nnamfo no awerɛhow su no dan anigye, bere a Yesu frɛɛ n’adamfo a ɔdɔ no no fii ɔdamoa mu no.​—Yohane 11:41-44.