Mmofra Bisa Sɛ . . .

Onyankopɔn Adamfo a Mɛyɛ no Bɛboa Me?

ƐNNƐ, mmofra pii nyin wɔ nhyɛso ahorow a anka wontumi nsusuw ho sɛ ɛbɛba wɔ awo ntoatoaso a etwaam no mu. Ɔman nhwehwɛmu bi a wɔyɛe wɔ mmofra 160,000 mu no so ahwɛfo kyerɛkyerɛɛ mu sɛ: “Mmofra a wonnii mfe aduonu ka kyerɛ yɛn sɛ wɔn haw no pii fi nhyɛso a wɔte nka sɛ wontumi nni ho dwuma; efi abasamtu ne awerɛhow a ɛka wɔn ahotoso hyɛ; na efi awofo a wɔmfa wɔn nsɛnnennen nyɛ asɛm.” Ebia wo nso wote nka sɛ afoforo nte sɛnea ɛtɔ da bi a asetra tumi yɛ den ma abofra no ase koraa.

Nokwarem no, ebia wowɔ adamfo pa bi a wutumi kɔ ne nkyɛn kɔhwehwɛ nkuranhyɛ, na eyi betumi ama wo ho atɔ wo kakra. Nanso ɛnyɛ nokware sɛ ɔhaw ahorow a emu yɛ den bi wɔ hɔ a ɛsɛ sɛ wo nkutoo na wugyina ano? Hwɛ nokwasɛm a ɛyɛ sɛ ɛtɔ da bi a wo nkutoo na wo “koma nim [wo] kra awerɛhow.” (Mmebusɛm 14:10) Nanso Obi wɔ hɔ a ɔte wo ase korakora, na ɔpɛ sɛ ɔfa wo adamfo. Mmofra pii ahu sɛ n’adamfofa yɛ mmoa kɛse wɔ awerɛhow bere a ɛsen biara mpo mu.

Onyankopɔn a Yɛbɛfa No Adamfo

Wobisaa abofra bi sɛ dɛn na ɔde ho aseda maa Yehowa Nyankopɔn sen biara. Ne mmuae ne sɛ: “Ɛne hokwan a ɛma yetumi hu no na yɛbɛyɛ ne nnamfo a yɛne no di atirimsɛm.” Yiw, wubetumi anya adamfofa a ɛsen biara wɔ amansan yi mu! Odwontofo no kyerɛwee sɛ: “Awurade yi ne tirim asɛm kyerɛ wɔn a wosuro no.”—Dwom 25:14.

‘Yehowa atirimsɛm a oyi adi kyerɛ obi’—hokwan a ɛsom bo bɛn ni! Adwene a ɛwɔ Hebri asɛmfua a wɔde dii dwuma mfiase no akyi ne nkɔmmɔ a obi yi ne yam ne n’adamfo pa bi bɔ a ɔmfa nsɛm nsuma. Enti, ɛyɛ abusuabɔ a emu yɛ den a egyina ɔdɔ so, hokwan a wonya ne obi di atirimsɛm esiane obiara yɔnko mu ahotoso a ɔwɔ nti. Sɛ́ Onyankopɔn adamfo no, wubehu sɛ ɔno na ɔte wo ase yiye na ɔkyerɛ ɛbo a wosom ankasa sɛ onipa. Nanso mfaso horow bɛn na ɛwɔ saa adamfofa yi mu?

“Nea Mifi Me Mmofraase Mede Me Ho Metoo No So”

Ɛmfa ho sɛ mmofra pii yɛ wɔn ho sɛ wonsuro ade no, wonni wɔn ho mu ahotoso. Judy a wadi mfe 13 no de awerɛhow kae sɛ: “Sɛ mekyerɛ m’adwene a, afoforo nso bɛka wɔn de de bɔ me de no gu koraa. Minni me mu ahotoso kɛse.” Nanso, yɛn Adamfo a ɔwɔ soro no de akwankyerɛ pɔtee a ɛbɛma asetra asi yɛn yiye ma wɔ n’Asɛm a wɔakyerɛw a ɛne Bible no mu. Nokwarem no, afotu a wɔde ama wɔ Bible nhoma a ɛne Mmebusɛm mu no yɛ nea wɔakyerɛw sɛ ɛmma ‘aberante nimdeɛ ne adwempa’ na ama watutu n’anammɔn yiye. (Mmebusɛm 1:1-4; 3:1-6) Eyi betumi ama woanya ahotoso! Wubetumi ahu ɔkwan a eye sen biara a wobɛfa so atra ase.

Bible no, ne nhoma a wɔde sua Bible, te sɛ nsɛmma nhoma yi, de afotu a ɛkame ayɛ sɛ ɛfa asetra mu biribiara ho ma—efi sɛnea wobɛpaw nnamfo so kosi su pa a wubeyi adi akyerɛ w’awofo so. (Mmebusɛm 1:8, 9; 13:20) Ne saa nti wɔn a wotie akwankyerɛ a ɛte saa no tumi “fi owu afiri mu.” (Mmebusɛm 14:27) Sɛ nhwɛso no, abeawa bi a wɔfrɛ no Mae hui sɛ ne honam fam nua bi bu Bible nnyinasosɛm ahorow so. Ne nuabea no wuu ɔpatuwu yayaaya esiane ne brasɛe nti. Mae kyerɛɛ nea ɛyɛe a otumi kwatii ɔbrasɛe a ɛte saa no: “Mitumi dwennwen Yehowa nnyinasosɛm ahorow a ɛfa abrabɔ ho no ho, na eyi hyɛ me den. Saa nnyinasosɛm ahorow yi boa me ma mihu sɛ Yehowa yɛ obi ankasa, na n’akwan ye sen biara.”

Nanso Yehowa a wode no bɛyɛ w’adamfo no sen ne gyinapɛn ahorow a wubesua ara kwa. Wutumi hu sɛ ɔkyerɛ w’asetra ho anigye. Bible ka Ɔhene Dawid ho asɛm sɛ Onyankopɔn kyerɛkyerɛɛ no fii ne mmofraase. Dawid bɛyɛɛ Onyankopɔn adamfo, na ɛmfa ho sɛ ohuu “amane bebree a ɛyɛ yaw” no, ohui ankasa sɛ Onyankopɔn nsa wɔ n’asetra mu. Dawid kaa Onyankopɔn ‘anwonwade’ a ɔde di maa no ne Yehowa “tumi,” anaa n’ahoɔden a edii dwuma wɔ n’asetra mu no ho asɛm. Dawid gyinaa osuahu a ɛtete saa a n’ankasa nyae so kyerɛwee sɛ: “Wo, AWURADE ne m’anidaso, nea mifi me mmofraase mede me ho metoo no so.” (Dwom 71:5, 17, 18, 20, yɛn na yɛasi ɔfã bi so dua no.) Wubetumi anya ahotoso a ɛte saa ara bere a wote Yehowa nhyira nka wɔ w’asetra mu no. Bere a woyere wo ho di n’akwankyerɛ akyi—a nsɛnnennen mfa ho—no, wo ne Onyankopɔn bɛnantew wɔ abusuabɔ a ɛsom bo mu ampa.—Fa toto Genesis 6:9 ho.

Onyankopɔn Boa Yɛn Ma Yɛfa Ɔkwan a Ɛfata So

Esiane asetram sɔhwɛ ne nhyɛso nyinaa nti, Onyankopɔn akwankyerɛ akyi a yebedi nyɛ mmerɛw. Na ɛte saa titiriw wɔ Peggy, a bere a ɔyɛ abofra no, ɔde nnubɔne dii dwuma ma ɛkaa ne hɔ, na osii tuutuu no fam. Ɔnam Bible a osuae so tumi tetew ne ho fii nnubɔne ho yɛɛ abrabɔ fam nsakrae, ma enti ɔbɛyɛɛ Onyankopɔn adamfo. Nanso Peggy kɔɔ so hyiaa nhyɛso koro no ara a ɛmaa ɔhwehwɛɛ ahotɔ fii nnubɔne mu no. Bere a wobisaa no nea ɛyɛe a otumi dii so no, obuae sɛ: “Nea metumi aka ara ne sɛ ɛyɛ Yehowa honhom.”

Na Peggy nim sɛ Onyankopɔn de ne honhom kronkron anaa n’adeyɛ tumi ma ne nnamfo, na eyi tumi hyɛ wɔn den ma wɔde ne gyinapɛn ahorow bɔ wɔn bra. (Asomafo no Nnwuma 5:32; 1 Korintofo 6:9-11) “Seesei ɛtɔ mmere bi a mesan nya saa nkate dedaw no, titiriw sɛ ɛka me nkutoo a,” Peggy gye tom saa, “nanso mifi ase bɔ mpae ntɛm ara. Ɔhaw ahorow a matumi adi so yi yɛ me anigye sen biribiara a matumi ayɛ pɛn wɔ m’asetra mu.” Hwɛ sɛnea ɛhyɛ nkuran sɛ yebehu sɛ, sɛ́ adamfo no, Onyankopɔn tumi boa yɛn “ma ɛtra ade nyinaa ma ɛboro so kyɛn nea yɛsrɛ anaasɛ yesusuw, sɛnea tumi a ɛyɛ yɛn mu adwuma no te no.”—Efesofo 3:20.

Onyankopɔn honhom boa yɛn ma yenya su horow te sɛ abodwokyɛre, odwo, ne ahosodi. (Galatifo 5:22, 23) Afei nso, Onyankopɔn de mpanyimfo anaa nguanhwɛfo a honhom kronkron paw wɔn, ma wɔ Yehowa Adansefo asafo ahorow no mu sɛ wɔmfa mmoa a mfaso wɔ so mma. Peggy de ka ho sɛ: “Minyaa mmoa pii fii asafo no mufo, titiriw mpanyimfo no, hɔ. Ná ɛyɛ mmoa kɛse.”

“Me Koma Botan”

“Adamfo dɔ bere nyinaa, na ɔbɛyɛ onua wɔ ɔhaw bere mu.” Saa na Mmebusɛm 17:17 ka wɔ The Basic Bible no mu. “Ɔhaw bere mu” titiriw na wohia adamfo. Odwontofo Asaf hyiaa nkate fam haw a emu yɛ den, nanso otwiw bɛnee Onyankopɔn sɛ n’adamfo. Enti, ɛwom sɛ na nkate fam yaw ma odi ‘awerɛhow komam’ de, nanso ɔkae sɛ: “Onyankopɔn ne me koma botan.” (Dwom 73:21, 26, 28) Yehowa a na ɔte Asaf nkate no ase ankasa no maa no nkate fam mmoa. Yehowa gyinaa Asaf akyi sɛnea ɛbɛyɛ a ɔnhwere n’anidaso ne n’akokoduru.

Wo nso, yɛn Adamfo a ɔwɔ soro no betumi ayɛ nnyinaso a ɛte sɛ ɔbotan ama wo wɔ ahohia bere mu. Abofra bi a onnii mfe aduonu nam osuahu a n’ankasa nyae so huu eyi. Bere a na Bonnie adi mfe 13 no, mmeawa a wɔwɔ ne sukuu mu wɔ akuraa ketewaa bi a ɔte mu no ase no fii ase kekaa ne ho nsɛm de twirii no. Ɛyɛɛ Bonnie sɛ gyama obiara gyee atosɛm yi dii. Ne mfɛfo sukuufo bebree twee wɔn ho fii ne ho, na wɔtotoo no din mpo de buu no animtiaa. Bonnie kyerɛɛ mu sɛ: “Mpɛn pii no, na meba fie anadwo besu. Biribi yɛɛ me sɛ minkum me ho mpo, efisɛ midii yaw kɛse wɔ me mu.” Ɔdan kɔɔ ne nnamfo bi hɔ kɔhwehwɛɛ mmoa. “Mebɔɔ mmɔden sɛ me ne nkurɔfo bɛkasa, nanso ɛte sɛ nea wɔante ase. Wɔmaa me haw no yɛɛ te sɛ nea ɛho nhia. Ɛtɔ da bi a na mete nka sɛ mayɛ ankonam.” Dɛn na amma n’abam ammu wɔ ɔhaw a ɛte saa ho? Ɔtoa so sɛ: “Ɛnyɛ Yehowa a, anka mekum me ho. Medɔ no paa. Ɔyɛ m’adamfo a ɔsen biara.” Seesei onim sɛ ɛyɛ ɔne Onyankopɔn ntam ayɔnkofa no na ɛboaa no ma otumi gyinaa nkate fam ahohia no ano.

Hu a yebehu sɛ Yehowa te yɛn tebea no ase, na onim dekode pɔtee a aba no de awerɛkyekye kɛse ba bere a afoforo nte nka mma yɛn sɛnea ebia yɛbɛhwɛ kwan no. Afei nso, hu a yebehu sɛ yɛn Adamfo no ne “mmɔborohunu agya” no boa kɛse bere a afoforo ne yɛn nni no ayamye so, anaa wɔyɛ yɛn ayayade mpo no. Ɛtɔ da bi a yɛn ankasa koma bebu yɛn fɔ, nanso “Onyankopɔn sõ kyɛn yɛn koma na ohu ade nyinaa.” (2 Korintofo 1:3, 4; 1 Yohane 3:20) Yehowa adwene a yebenya wɔ asɛm bi ho no betumi de nokware awerɛkyekye aba. Sɛ nhwɛso no, mmarima baasa too abarimaa bi a wadi mfe 13 mmonnaa atirimɔden so. Ogye toom sɛ: “Ɛno akyi no, m’ani wui kɛse, na mede nea ɛtoo me no ho asodi too me so. Meyɛɛ basaa yiye.” Afei ofii ase yɛɛ nhwehwɛmu wɔ Ɔwɛn Aban Asafo no Bible nhoma ahorow mu faa mmonnaato ho. “Mekenkanee saa nsɛm yi akyi no, mituee su mu. Metee nka te sɛ nea wɔayi adesoa bi a emu yɛ duru afi me mmati so. Afoforo na wɔadi me asɛmmɔne. Menam me ho a mede too Yehowa, m’abusua, ne me nnamfo so no so tumi dii nkonim wɔ saa ɔhaw bere yi mu.” Hwɛ mmoa a saa nsɛm a egyina Bible so no de maa me!

Fa a yɛbɛfa Onyankopɔn adamfo no betumi aboa wɔ akwan pii so! Yebetumi anya asetra mu ahotoso ankasa, anya akokoduru de adi Onyankopɔn kwan akyi, na yɛanya mmoa a ɛte sɛ bepɔw wɔ ahohia mu. Nanso yɛbɛyɛ dɛn atumi anya adamfofa a ɛte saa? Asɛm bi a ɛbɛba ɔfã yi mu akyiri yi bɛkyerɛkyerɛ mu.

[Kratafa 21 mfonini]

Onyankopɔn betumi abɛyɛ ‘wo koma botan’