Nsɛm a Ɛma Denhyɛ a Yɛde Besi Nea Epira Ananmu

“Owu ne nkwa wɔ tɛkrɛma nsam.”—MMEBUSƐM 18:21.

NSOPA—kasafĩ a wɔboa pa de didi obi atɛm—yɛ nea wɔkasa tia wɔ Bible mu pefee. Wɔ Mose Mmara ase no, sɛ na obi sopa n’awofo a, wotumi bu no kumfɔ. (Exodus 21:17) Enti, Yehowa Nyankopɔn mmu asɛm no adewa. N’asɛm, Bible, no mfoa adwene a ɛne sɛ, bere tenten a obi kyerɛ sɛ ɔsom Onyankopɔn no, biribiara a ɔyɛ wɔ ‘kokoam’ no ho nhia kɛse. Bible ka sɛ: “Sɛ obi susuw sɛ ɔyɛ onyamesomfo, na wanto ne tɛkrɛma nnareka, na mmom ɔdaadaa ne koma a, saa onipa yi nyamesom yɛ ɔkwa.” (Yakobo 1:26; Dwom 15:1, 3) Enti sɛ ɔbarima bi yɛ obi a odidi ne yere atɛm a, ne Kristofo nnwuma nyinaa betumi ayɛ nea ɛnsɔ Onyankopɔn ani.a—1 Korintofo 13:1-3.

Bio nso, wobetumi atu Kristoni a ɔyɛ ɔmaanefo afi asafo no mu. Obetumi ahwere Onyankopɔn Ahenni mu nhyira ahorow no mpo. (1 Korintofo 5:11; 6:9, 10) Ɛda adi pefee sɛ, ehia sɛ onipa a ɔde ne nsɛm pira no yɛ nsakrae kɛse. Nanso ɔbɛyɛ dɛn atumi ayɛ eyi?

Ɔhaw no a Wɔda no Adi

Ɛda adi sɛ, ɔdebɔneyɛfo rensakra gye sɛ ɔte ase pefee sɛ ɔwɔ ɔhaw a anibere wom. Sɛnea ɔfotufo bi kae no, awerɛhosɛm ne sɛ, mmarima a wɔka kasafĩ no pii “mmu wɔn nneyɛe no sɛ ɛyɛ ayayade koraa. Wɔ saa mmarima yi fam no, nneyɛe a ɛte saa no yɛ nea asɛm biara nni ho koraa, na ɛyɛ ɔkwan ‘pa’ a okununom ne ɔyerenom fa so ne wɔn ho di nsɛm.” Enti nnipa pii renhu hia a ehia sɛ wɔsesa kosi sɛ wɔde asɛm no besi wɔn anim pi.

Mpɛn pii no, bere a ɔyere no de mpaebɔ asusuw ne tebea ho awie no, ɔbɛte nka sɛ ɛsɛ sɛ ɔda asɛm no adi—n’ankasa ne ne mma yiyedi ne ne kunu gyinabea wɔ Onyankopɔn anim a osusuw ho nti. Ɛyɛ ampa, ebetumi aba bere nyinaa sɛ asɛm no a wɔda no adi no betumi asɛe asɛm no ma wɔagye ɔbea no asɛm ho kyim bebree. Ebia ɔyere no betumi asiw eyi ano denam susuw a obedi kan asusuw sɛnea obefi asɛm no ase ho. Bible ka sɛ: “Asɛm a wɔka a ɛfata te sɛ sika aduaba wɔ dwetɛ kyerɛnkyɛ mu.” (Mmebusɛm 25:11) Odwo a ɔde bɛka asɛm no nokwaredi mu no betumi ama adu ɔbarima no koma mu.—Mmebusɛm 15:1.

Sɛ́ anka ɔyere no bɛbɔ sobo mmom no, ɛsɛ sɛ ɔbɔ mmɔden sɛ ɔbɛkyerɛ sɛnea kasa a epira no haw no. “Me” a wɔde ka asɛm no taa di dwuma yiye sen biara. Sɛ nhwɛso no, ‘Midi yaw efisɛ . . . ’ anaa ‘Sɛ woka kyerɛ me sɛ . . . a, ɛhaw me.’ Ɛda adi sɛ nsɛm a ɛte saa no betumi adu koma no mu, efisɛ edi ɔhaw no ho dwuma sen sɛ anka ɛbɛkasa atia onipa no.—Fa toto Genesis 27:46–28:1 ho.

Ɔyere no ho a ɔde begye nsɛm mu pintinn wɔ anifere kwan so no betumi asow aba pa. (Fa toto Dwom 141:5 ho.) Ɔbarima bi a yɛbɛfrɛ no Steven hui sɛ eyi te saa. Ɔka sɛ: “Me yere huu kasafĩ su a ɛwɔ me mu a na mintumi nhu no, na onyaa akokoduru kaa ho asɛm kyerɛɛ me.”

Mmoa a Ɔbɛhwehwɛ

Nanso sɛ ɔyere bi kunu nnye ɔhaw no ntom a, dɛn na obetumi ayɛ? Ɛba saa a ɔyerenom bi hwehwɛ mmoa fi baabi foforo. Wɔ ahohia mmere a ɛte saa mu no, Yehowa Adansefo betumi akɔ wɔn asafo mu mpanyimfo nkyɛn. Bible no hyɛ saa mmarima yi nkuran sɛ wɔnna ɔdɔ ne ayamye adi bere a wɔrehwɛ Onyankopɔn honhom mu nguankuw no, na bere koro no ara, ‘wonyi’ Onyankopɔn Asɛm no kyerɛ pa no ho ‘akyinnyegyefo no ntɛn.’ (Tito 1:9; 1 Petro 5:1-3) Ɛwom sɛ ɛnyɛ mpanyimfo no asɛm sɛ wɔde wɔn ho begyigye awarefo kokoam nsɛm mu de, nanso sɛ awarefo no mu biako ka nsɛm a epira de teetee ɔfoforo a, ɛho asɛm hia wɔn ma ɛfata. (Mmebusɛm 21:13) Esiane Bible nnyinasosɛm a saa mmarima yi di akyi pɛpɛɛpɛ nti, wɔmmrabra kasafi so anaa wommu no adewa.b

Mpanyimfo no betumi ama nkitahodi abɛda okunu ne ɔyere no ntam. Sɛ nhwɛso no, ɔbea bi a na ɔkyerɛ sɛ ne kunu a ɔne no nyinaa som no de mfe pii dii no atɛm no, kɔɔ ɔpanyin bi nkyɛn. Ɔpanyin no yɛɛ nhyehyɛe sɛ ɔne wɔn baanu nyinaa behyiam. Sɛ wɔn mu biako rekasa a, na ɔpanyin no asrɛ ɔfoforo no sɛ ɔnyɛ komm ntie. Bere a eduu ɔbea no so no, ɔkae sɛ ɔrentumi nnya ne kunu bo a efuw ntɛmntɛm no ho koma bio. Ɔkyerɛkyerɛɛ mu sɛ wɔ mfe pii mu no, da no reba awiei a, na ne nsono gu gya mu, a onnim sɛ ebia ɔbarima no ba fie a ne bo befuw anaa. Sɛ ɔbarima no bo fuw a, ɔka animguasesɛm fa ɔbea no abusuafo, ne nnamfo, ne ne nipadua ankasa ho.

Ɔpanyin no ka kyerɛɛ ɔyere no sɛ ɔnkyerɛ sɛnea ɛyɛ a ne kunu nsɛm no ma ɔte nka. Obuae sɛ: “Metee nka sɛ meyɛ nipa bɔne araa ma obiara rentumi nnɔ me. Ɛtɔ da bi a mibisa me maame sɛ, ‘Maame, enti meyɛ onipa a m’asetra yɛ den? Meyɛ obi a wontumi nnɔ no?’” Bere a ɔkaa sɛnea ne kunu no nsɛm ma ɔtee nka no, ne kunu no fii ase sui. Ná ɛno ne bere a edi kan a watumi ahu sɛnea ɔde ne nsɛm repira ne yere kɛse saa.

Wubetumi Asesa

Ná afeha a edi kan mu Kristofo bi wɔ kasafĩ ho nsɛnnennen. Kristoni somafo Paulo tuu wɔn fo sɛ wonyi “abufuw, bobɔne, bɔnepɛ, abususɛm [kasafĩ, NW] ne aniwusɛm” ngu. (Kolosefo 3:8) Nanso, kasa a epira yɛ ɔhaw a efi koma no na ɛnyɛ tɛkrɛma no. (Luka 6:45) Ɛno nti na Paulo de kaa ho sɛ: “Munyi onipa dedaw no ne ne nneyɛe ngu, na monhyɛ onipa foforo” no. (Kolosefo 3:9, 10) Enti sesa a obi bɛsesa no nyɛ sɛ ne kasa bɛyɛ soronko nko, na mmom sɛ ne nkate nso bɛyɛ soronko.

Ebia okunu a ɔka nsɛm a epira no behia mmoa na wahu nea ɛma ɔyɛ saa.c Ɔbɛpɛ sɛ onya odwontofo no su no bi: “Onyankopɔn, hwehwɛ me mu, na hu me koma, sɔ me hwɛ, na hu m’adwene, na hwɛ sɛ amane kwan bi wɔ me hɔ.” (Dwom 139:23, 24) Sɛ nhwɛso no: Dɛn nti na ɔte nka sɛ ehia sɛ ɔhyɛ ne hokafo so anaa odi ne so? Dɛn na ɛma odidi no atɛm? So abufuw bi a ɛhyɛ ne mu na ɛma odidi no atɛm? (Mmebusɛm 15:18) Ɔte nka sɛ ne ho nni mfaso, a ebia nea ama aba saa ne sɛ wɔde kasa a epira na ɛtetee no anaa? Nsɛmmisa a ɛtete saa no betumi aboa ɔbarima bi ma wahu nea enti a ɔyɛ n’ade saa.

Nanso, ɛyɛ den sɛ wobeyi kasafĩ su afi hɔ, titiriw bere a yenya fii awofo a na wɔn ankasa didi wɔn ho atɛm hɔ anaa ɔman a ɛhyɛ nhyɛso ho nkuran mu no. Nanso, biribiara a yesua no—sɛ yegye bere ne mmɔdenbɔ a—yebetumi ayɛ nsakrae wom. Bible no yɛ mmoa a ɛsen biara wɔ eyi mu. Ebetumi aboa obi ma waburuw nneyɛe akɛse mpo. (Fa toto 2 Korintofo 10:4, 5 ho.) Ɔkwan bɛn so?

Asɛyɛde Ahorow a Onyankopɔn De Ama Ho Adwene a Ɛfata

Mpɛn pii no, mmarima a wodidi wɔn yerenom atɛm no kura asɛyɛde ahorow a Onyankopɔn de ama okunu ne ɔyere no ho adwene a ɛnteɛ. Sɛ nhwɛso no, Bible kyerɛwfo Paulo ka sɛ ɔyerenom ‘mmrɛ wɔn ho ase mma wɔn kununom’ ne sɛ “okunu yɛ ɔyere ti.” (Efesofo 5:22, 23) Ebia okunu bi bɛte nka sɛ tiyɛ no ma onya tumi koraa. Nanso eyi nte saa. Ɛwom sɛ ne yere hyɛ n’ase de, nanso ɔnyɛ n’akoa. Ɔyɛ ne “sɛso boafo.” (Genesis 2:18) Enti, Paulo de ka ho sɛ: “Ɛsɛ okununom sɛ wɔdɔ wɔn ankasa wɔn yerenom sɛ wɔn ankasa nipadua. Nea ɔdɔ n’ankasa ne yere no dɔ ne ho. Na obiara ntan n’ankasa honam, na mmom ɔyɛn no, na ɔhwɛ so yiye, sɛnea Kristo nso yɛ asafo no.”—Efesofo 5:28, 29.

Sɛ́ Kristofo asafo no ti no, Yesu ammrɛ n’asuafo no ase da, na ama wɔanya ayamhyehye wɔ da foforo a ɔbɛsan akasa atia wɔn no ho. Mmom no, na odwo, na ɔnam so dii wɔn ni. Ɔhyɛɛ wɔn bɔ sɛ: “Mɛma moahome.” “Midwo na mebrɛ me ho ase koma mu.” (Mateo 11:28, 29) Mpaebɔ a okunu de besusuw sɛnea Yesu dii ne tiyɛ ho no betumi aboa no ma wanya ne tiyɛ no ho adwene a ɛkari pɛ.

Bere a Abufuw Aba

Bible nnyinasosɛm a yebehu yɛ ade biako; dwuma a yɛde bedi bere a yɛwɔ nhyɛso ase nso yɛ ade foforo. Sɛ abufuw ba a, ɔkwan bɛn so na okunu no betumi akwati sɛ ɔbɛsan akɔka nsɛm a epira?

Sɛ okunu bo fuw a, ɛnyɛ atɛnnidi na ɛbɛkyerɛ ne maninyɛ. Bible ka sɛ: “Nea ne bo kyɛ fuw no yɛ sen dɔmmarima, na nea odi ne honhom so no sen nea ɔko fa kurow.” (Mmebusɛm 16:32) Obi a ɔyɛ ɔbarima ankasa no di ne honhom so. Ɔda timmɔbɔ adi denam nsɛmmisa yi a osusuw ho so: ‘Ɔkwan bɛn so na me nsɛm ka me yere? Sɛ me na mewɔ ne tebea no mu a, anka mɛte nka dɛn?’—Fa toto Mateo 7:12 ho.

Nanso, Bible no gye tom sɛ tebea horow bi betumi ahyɛ abufuw. Odwontofo no kyerɛwee wɔ saa tebea horow no ho sɛ: “Mo bo huru a, monnyɛ bɔne! Monkasa mo komam wɔ mo dabere, na monyɛ komm.” (Dwom 4:4) Wɔsan ka no saa kwan yi so sɛ: “Mfomso biara nni ho sɛ wo bo befuw, nanso ɛyɛ mfomso sɛ wobɛtow ahyɛ obi so denam atɛnnidi, hyɛ a wobɛhyɛ no aniwu, anaa brɛ a wobɛbrɛ no ase so.”

Sɛ okunu bi te nka sɛ ontumi nni ne kasa so a, obetumi asua sɛ obetwa nsɛm so. Ebia ɛbɛyɛ papa sɛ obefi dan mu hɔ akɔnenam, anaa wakɔtra kokoam baabi adwudwo ne koma. Mmebusɛm 17:14 ka sɛ: “Ɔham mu nnya nyɛɛ den no, gyae.” Sɛ abufuw no twa a, monsan mfi nkɔmmɔbɔ no ase.

Nokwarem no, obiara nyɛ pɛ. Okunu a na ɔwɔ kasa a epira ho haw no betumi afom bio. Sɛ ɛba saa a, ɛsɛ sɛ ɔpa kyɛw. “Nipasu foforo” no a wɔhyɛ no yɛ adeyɛ a ɛkɔ so, nanso ɛyɛ biribi a emu akatua dɔɔso.—Kolosefo 3:10, NW.

Nsɛm a Ɛma Denhyɛ

Yiw, “owu ne nkwa wɔ tɛkrɛma nsam.” (Mmebusɛm 18:21) Ɛsɛ sɛ yɛde nsɛm a ɛhyɛ aware den na ɛma egyina si nsɛm a epira ananmu. Bible abebusɛm bi ka sɛ: “Nsɛm a ɛyɛ dɛ yɛ ɛwokyɛm, ɔkra adɔkɔdɔkɔde ne nnompe akwahosan.”—Mmebusɛm 16:24.

Mfe bi a atwam no, wɔyɛɛ nhwehwɛmu bi de huu nneɛma a ɛma mmusua a wɔyɛ den yɛ wɔn ade ɔkwampa so. Aware ho ɔbenfo David R. Mace bɔ amanneɛ sɛ: “Nhwehwɛmu no daa no adi sɛ na saa mmusua yi mufo dodɔ wɔn ho, na wɔkɔɔ so ka kyerɛɛ wɔn ho sɛ wɔpɛ wɔn ho asɛm. Wɔkyerɛɛ obiara ho anisɔ, wɔmaa obiara tee nka sɛ ɔsom bo, na wɔde hokwan biara a wonyae no kasa yɛɛ wɔn ade wɔ ɔdɔ mu. Nea efi mu bae a na ɛnyɛ nwonwa koraa ne sɛ, wonyaa wɔn fekubɔ mu anigye, na wɔhyehyɛɛ wɔn ho wɔn ho den wɔ akwan a ɛmaa wɔn abusuabɔ no yɛɛ nea ɛma abotɔyam kɛse so.”

Okunu biara nni hɔ a osuro Onyankopɔn a obetumi aka no nokwarem sɛ ɔdɔ ne yere bere a ɔboapa de ne nsɛm pira no no. (Kolosefo 3:19) Nokwarem no, ɛno nso bɛyɛ nokware wɔ ɔyere a odidi ne kunu atɛm ho. Nokwasɛm ne sɛ, ɛyɛ awarefo baanu no nyinaa asɛyɛde sɛ wobetie Paulo afotu a ɔde maa Efesofo no: “Mommma asɛm a ɛmfra biara mmfi mo anom, na mmom asɛm a eye na ɛma nkɔso a ehia, na wɔde dom wɔn a wɔte no.”—Efesofo 4:29.

[Ase hɔ nsɛm]

[Kratafa 19 mfonini]

Kristoni panyin betumi aboa awarefo ma wɔadi nkitaho

[Kratafa 20 mfonini]

Ɛsɛ sɛ okununom ne ɔyerenom bɔ mmɔden ankasa sɛ wɔbɛte wɔn ho ase