Namibia Adwini a Ɛsesa Daa

EFI NYAN! KYERƐWFO A ƆWƆ SOUTH AFRICA HƆ

ADWINI a odwumfo no di no tumi sesa daa, nanso ɛsesa bɛyɛ biribi foforo a ɛyɛ fɛ. Anhwea na ɔde di adwini no. Hena ne odwumfo no? Mframa na ɛboaboa anhwea ano ma ɛyɛ siw soronko bi. Ebia nea agye din yiye ne nea ne yɛbea te sɛ ɔsram a ɛrepue no. “Adwini” no fã a ɛkyerɛ mframa no sian nkakrankakra. Mframa ntumi mmɔ wɔ ɔfã foforo a ɛnware pii no. Siw no atifi te sɛ oyiwan, nanso sɛ wode wo nan bɔ no kakraa bi a ebedwiriw agu.

Adwini yi pii wɔ Namib Anhweatam a ɛwɔ Afrika anafo fam atɔe no so. Ɛhɔ na anhwea siw a ɛwoware sen biara wɔ wiase, a ne sorokɔ boro mita 400, no bi wɔ. Nanso, sɛ wode Namib anhweatam no toto akɛse a ɛwowɔ wiase nyinaa ho a, na esua koraa. Efi ase wɔ Atlantic Po ho fa asase kilomita 160 so, na ne tenten yɛ bɛyɛ kilomita 1,900.

Adwumfo Afoforo

Ɛnyɛ mframa no ne odwumfo a ɔwɔ ‘adwinnan’ a atew ne ho yi. Siw ahorow no ho nhwehwɛmu a ɛkɔ akyiri no da adwini soronko ahorow ne adwumfo afoforo a wɔyɛe adi. Sɛ nhwɛso no, wubetumi ahu biribi a ɛte sɛ ntweaban a ɛware na ɛyɛ fɛ a wɔde asensan anhwea no so. Sɛ wugyina hɔ kyɛ kakra a, wubehu adwumfo no mpo sɛ wɔreyɛ adwuma. “Ntweaban” no yɛ amanku nan a ɛsensan anhwea no so bere a wɔfa so anadwo no. Ade a ɛka ‘sika ntweaban’ no ho ne nsensanee a ayɛ sɛ ntokuru nketenkete wɔ anhwea no mu no. Eyi yɛ asono kuw a wɔrekɔ wɔn atrae no nan ase nsensanee. Mpofirim ara nea wuhu ne sɛ saa adwinnan a atew ne ho a ɛte sɛ nea ɛda mpan no yɛ nea abɔde pii wɔ hɔ.

Wɔ atifi fam a wɔfrɛ hɔ Skeleton Coast no, wubetumi ahu adwumfo afoforo a wɔwɔ anhweatam no so dwumadi. Wohuruhuruw araa ma anhwea no yɛ basaa. Hwɛ! Wɔn na wɔreba a wɔrehuruhuruw wɔ siw no so no. Ade biako ne sɛ, wɔn ani gye wɔn dwumadi ho. Saa abɔde akɛse yi de mmirikatɛntɛ fa siw no so, na ɛma anhwea tu hura baabiara. Esiane sɛ mmirika a wotu no mmee wɔn nti, wɔda hɔ de wɔn nan a ɛwɔ akyiri no piapia anhwea no ma emu tutu ntokuru. Wɔde mmirika kɔ abura bi a ɛbɛn hɔ ho, huruw si mu di mu agoru te sɛ mmofra a wɔn ani agye. Saa adwumfo yi, a wɔne Afrika asono, no mu biara mu duru yɛ tɔn asia!

Anhweatam no so dwumfo foforo a n’ani atew nanso ɔnyɛ basabasa ne Péringuey ahurutoa. Sɛ ɔda sare no so a, ɔte sɛ duasin bi a wɔasensan ho. Sɛ ɔwɔ no twe ne ho ase a, ogya ne ho nsensanee no wɔ baabi a ɔfa no. Sɛ ɔtwe ne ho ase wie a, afei nsensanee no so twa, na wunhu ahurutoa no bio. Ɛhe na ɔkɔ? Sɛ wogyen w’ani hwɛ a, wubehu sɛ aniwa nketewa abien bi fi anhwea no mu rehwɛ wo. Ɔwɔ no honam a aka no nyinaa hyɛ anhwea no mu. Sɛ ohintaw saa a, na ɔretwɛn aduan—mpɛn pii no, ɔketew a ɔretwam.

Adwini foforo a ɛwɔ anhwea no so nyɛ nea ɛyɛ fɛ papa. Wuhu tae nsensanee akɛse, a moto a wɔhyɛ da yɛ de tu kwan wɔ saa beae yi ma ɛba hɔ no. Onipa nso agyaw n’ahyɛnsode wɔ hɔ.

Odwumfo a Onni Abotare

Mmoa foforo pii nso gyaw wɔn ahyɛnsode wɔ anhwea no so. Eyinom bi ne bɛnkoro, gyata, kɔntenten, ne sakraman, a wobetumi ahu wɔn wɔ mmoa akorae a ɛwɔ Skeleton Coast ne mmeae foforo no.

Nanso mframa ne odwumfo a ɔkorɔn sen wɔn nyinaa. Ɛno na ɛkyerɛ sɛnea adwinnan hɔ bɛyɛ, na ɛhyehyɛ ne yɛbea sɛnea n’ani gye ho. Ɛsakra adwini no bere nyinaa. Sɛ wufi adwinnan hɔ, na wosan kɔ hɔ afe akyi a, wubehu sɛ siw no bi akɔ soro bɛyɛ anammɔn 100! Ɛno yɛ ade a Namibia mframa no tumi yɛ.

[Asase mfonini wɔ kratafa 17]

(Wopɛ nsɛm a wɔahyehyɛ awie no a, hwɛ nhoma no mu)

AFRIKA

NAMIBIA

[Mfonini wɔ kratafa 16]

Ofiam

[Mfonini wɔ kratafa 16]

Des ne Jen Bartlett