Ti 20

So Wopɛ sɛ Wudi Kan Bere Nyinaa?

SO WUNIM obi a ɔpɛ sɛ odi kan bere nyinaa?— Ebia obepia obi akɔ nkyɛn sɛnea ɛbɛyɛ a obedi anim wɔ santen a wɔato mu. So woahu bi saa pɛn?— Ɔkyerɛkyerɛfo Kɛse no huu mpanyimfo mpo a na wɔpɛ sɛ wodi kan, anaa wonya dibea a ɛkorɔn sen biara. Na n’ani annye ho. Ma yɛnhwɛ nea esii.

Bible ka kyerɛ yɛn sɛ wɔtoo nsa frɛɛ Yesu kɔɔ adidi kɛse bi ase wɔ Farisini a na ɔyɛ nyamesom kannifo titiriw bi fie. Bere a Yesu duu hɔ no, ofii ase hwɛɛ afoforo a wɔato nsa afrɛ wɔn a na wɔba bɛpɛ beae a eye sen biara tra no. Enti ɔkaa asɛm bi faa wɔn a na wɔato nsa afrɛ wɔn no ho. So wobɛpɛ sɛ wutie?—

Yesu kae sɛ: ‘Sɛ obi to nsa frɛ wo ayeforohyia apontow ase a, mpaw beae anaa trabea a ɛkorɔn no.’ So wunim nea enti a Yesu kaa saa?— Ɔkyerɛkyerɛɛ mu sɛ ebia na wato nsa afrɛ obi a n’anim yɛ nyam kɛse. Enti sɛnea wuhu wɔ mfonini no mu no, nea ɔreto pon no ba bɛka sɛ: ‘Ma oyi kwan, na sɔre kɔ akyiri hɔ.’ Sɛ ɛba saa a, nea wato nsa afrɛ no no bɛte nka dɛn?— N’ani bewu efisɛ ɔbɛsɔre akɔ beae a ɛba fam no wɔ afoforo a wɔahyia wɔ hɔ no nyinaa anim.

Ná Yesu rekyerɛ sɛ ɛnteɛ sɛ yɛbɛpɛ beae a ɛkorɔn sen biara. Enti ɔkae sɛ: ‘Sɛ wɔto nsa frɛ wo ayeforohyia ase a, kɔtra beae a ɛba fam. Ɛno na nea ɔtoo nsa frɛɛ wo no bɛka akyerɛ wo sɛ “Damfo, sɔre kɔ anim hɔ.” Na bere a worekɔtra beae a ɛkorɔn no, wubenya nidi wɔ wɔn a wɔne wo te adidii no anim.’—Luka 14:1, 7-11.

So wotee Yesu asɛm no ase?— Ma yɛnyɛ mfatoho bi nhwɛ sɛ ebia wotee ase anaa. Fa no sɛ woreforo bɔs bi a emu nnipa akyere so. So ɛsɛ sɛ woyɛ ntɛm kɔtra ase ma obi a wanyin gyina hɔ?— So anka Yesu bɛpɛ sɛ woyɛ saa anaa?—

Ebia obi bɛka sɛ nea yɛyɛ no mfa Yesu ho koraa. Nanso wugye di saa?— Bere a na Yesu wɔ apontow kɛse no ase wɔ Farisini no fie no, ɔhwɛɛ trabea horow a na nkurɔfo repaw no. So wunnye nni sɛ n’ani wɔ nea yɛyɛ nnɛ so saa ara?— Mprempren a Yesu wɔ soro no, ɛda adi pefee sɛ ɔwɔ gyinabea a ɛbɛma wahu yɛn yiye.

Sɛ obi bɔ mmɔden sɛ obedi kan a, ebetumi de ɔhaw aba. Mpɛn pii no, akasakasa ba ma nkurɔfo bo fuw. Ɛtɔ mmere bi a eyi si bere a mmofra bom fa bɔs no. Sɛ wonya bue bɔs no pon pɛ a, mmofra no yɛ ntɛm sɛ wobedi kan aforo. Wɔpɛ trabea a eye sen biara, nea ɛbɛn mfɛnsere no. Dɛn na ebetumi asi?— Wɔn bo betumi afuw wɔn ho wɔn ho.

Pɛ a wopɛ sɛ wudi kan no betumi de ɔhaw pii aba. Ɛmaa ɔhaw sɔree wɔ Yesu asomafo no mpo mu. Sɛnea yesuae wɔ nhoma yi Ti 6 no, wogyee nea ɔyɛ kɛse wɔ wɔn mu no ho akyinnye. Dɛn na Yesu yɛe?— Ɔteɛɛ wɔn so. Nanso akyiri yi wogyee akyinnye bio. Ma yɛnhwɛ sɛnea efii ase.

Asomafo no ne afoforo ne Yesu retu kwan a etwa to akɔ Yerusalem kurow mu. Na Yesu keka N’ahenni no ho asɛm kyerɛ wɔn, enti na Yakobo ne Yohane susuw di a wɔne no bedi ade sɛ ahemfo no ho. Ná wɔne wɔn maame, Salome aka ho asɛm mpo. (Mateo 27:56; Marko 15:40) Enti bere a na wɔnam kwan so rekɔ Yerusalem no, Salome behyiaa Yesu, na obuu nkotodwe wɔ Yesu anim srɛɛ ne hɔ biribi.

Yesu bisae sɛ: “Dɛn na wopɛ?” Obuae sɛ ɔpɛ sɛ Yesu ma ne mmabarima baanu no tra ne benkum ne ne nifa wɔ N’ahenni mu. Wiɛ, bere a asomafo du foforo no tee sɛ Yakobo ne Yohane ama wɔn maame akobisa no, wususuw sɛ wɔbɛte nka dɛn?—

Yiw, wɔn bo fuw Yakobo ne Yohane paa. Enti Yesu de afotu pa bi maa n’asomafo no nyinaa. Yesu ka kyerɛɛ wɔn sɛ wiase sodifo na wɔpɛ sɛ wobu wɔn sɛ nnipa a wɔwɔ tumi na wɔn ho hia. Wɔpɛ sɛ wonya dibea a ɛkorɔn na ama obiara atie wɔn. Nanso Yesu ka kyerɛɛ n’akyidifo no sɛ ɛnsɛ sɛ wɔyɛ saa. Mmom no, Yesu kae sɛ: “Obiara a ɔpɛ sɛ odi mo kan no, ɔnyɛ mo akoa.” Susuw ho hwɛ!—Mateo 20:20-28.

So wunim adwuma a akoa yɛ?— Ɔsom nnipa foforo, na ɔnhwɛ kwan sɛ afoforo bɛsom no. Ɔmpaw beae a edi kan, na mmom nea ɛba fam koraa. Ɔyɛ n’ade sɛ nea ne ho nhia koraa, ɛnyɛ sɛ nea ne ho hia sen biara. Na kae sɛ Yesu kae sɛ nea ɔpɛ sɛ odi kan no nyɛ ne ho akoa mma afoforo.

Afei, dɛn na wususuw sɛ ɛkyerɛ ma yɛn?— So akoa ne ne wura begye kyim wɔ nea ɔbɛtra akongua pa so ho? Anaasɛ ɔne no begye nea obedi kan adidi ho akyinnye? Wususuw ho dɛn?— Yesu kyerɛkyerɛɛ mu sɛ akoa de ne wura di n’anim kan bere nyinaa.—Luka 17:7-10.

Enti sɛ anka yɛbɛbɔ mmɔden sɛ yebedi kan no, dɛn na ɛsɛ sɛ yɛyɛ?— Ɛsɛ sɛ yɛyɛ yɛn ho sɛ akoa ma afoforo. Na ɛno kyerɛ sɛ yɛde afoforo bedi yɛn anim. Ɛkyerɛ sɛ yebebu afoforo sɛ wɔn ho hia koraa sen yɛn. So wubetumi asusuw akwan a wubetumi ama afoforo adi w’anim ho?— Dɛn nti na wonsan nkɔ kratafa 40 ne 41 nkɔhwɛ akwan a wubetumi afa so ama afoforo adi w’anim no bio denam som a wobɛsom wɔn so.

Wobɛkae sɛ Ɔkyerɛkyerɛfo Kɛse no de afoforo dii n’anim kan denam som a ɔsom wɔn no so. Anadwo a etwa to a ɔne n’asuafo no trae no, ɔkotow hohoroo n’asomafo no anan ho mpo. Sɛ yɛn nso yɛde afoforo di kan denam som a yɛbɛsom wɔn so a, yɛbɛsɔ Ɔkyerɛkyerɛfo Kɛse no ne N’agya Yehowa Nyankopɔn ani.

Ma yɛnkenkan Bible kyerɛw nsɛm ahorow bi a ɛhyɛ yɛn nkuran sɛ yɛmfa afoforo nni kan no bi: Luka 9:48; Romafo 12:3; ne Filipifo 2:3, 4.

[Mfonini wɔ kratafa 107]

So woahu sɛ nkurɔfo bɔ mmɔden sɛ wobedi kan?

[Mfonini ahorow wɔ kratafa 108, 109]

Asuade bɛn na na Yesu rekyerɛ bere a ɔkaa wɔn a wɔpaw beae a eye anaa beae a edi kan ho asɛm no?

[Mfonini wɔ kratafa 110]

Dɛn na Salome bisa fii Yesu hɔ, na dɛn na efii mu bae?