ADESUA 26
Adɛn Nti Na Bɔne Wɔ Wiase Na Nnipa Rebrɛ Saa?
Sɛ awerɛhosɛm bi si a, asɛm baako a nkurɔfo taa bisa ne sɛ “Adɛn?” Ɛyɛ a wonhu nea enti a aba saa. Nanso anigyesɛm bi wɔ hɔ. Ɛne sɛ, Bible ma yenya saa asɛm yi ho mmuae a ɛtɔ asom paa!
1. Dɛn na Satan yɛe a ɛkɔfaa bɔne baa wiase?
Satan Ɔbonsam yɛɛ Onyankopɔn so asoɔden. Ná ɔpɛ sɛ odi afoforo so tumi, enti ɔmaa Adam ne Hawa nso tew Yehowa so atua. Nea Satan yɛe ne sɛ, ɔdaadaa Hawa. (Genesis 3:1-5) Ɔmaa Hawa nyaa adwene sɛ Yehowa de biribi papa bi asie no. Ná ɔpɛ sɛ ɔkyerɛ sɛ, sɛ nnipa antie Onyankopɔn a wɔn ani begye paa. Satan ka kyerɛɛ Hawa sɛ ɔrenwu. Saa asɛm no, ɛno ne atosɛm a edi kan koraa. Ɛno nti, Bible ka sɛ Satan yɛ “ɔtorofo ne atoro agya.”—Yohane 8:44.
2. Gyinae bɛn na Adam ne Hawa sii?
Nea na Adam ne Hawa hia nyinaa, Yehowa yii ne yam de maa wɔn. Nnuaba a na ɛwɔ Eden turom hɔ nyinaa, ɔka kyerɛɛ wɔn sɛ wobetumi adi nea wɔpɛ biara. Nanso dua baako bi de, ɔka kyerɛɛ wɔn sɛ mma wonni. (Genesis 2:15-17) Nea ɔkae nyinaa akyi no, wodii aduaba no. Hawa na odii kan ‘tew aduaba no bi dii,’ ɛnna akyiri yi, Adam nso ‘dii bi.’ (Genesis 3:6) Wɔn mmienu nyinaa yɛɛ Onyankopɔn so asoɔden. Ná ɛnyɛ den koraa sɛ Adam ne Hawa bɛyɛ nea ɛteɛ, efisɛ na bɔne nni wɔn ho, nanso wɔhyɛɛ da yɛɛ Onyankopɔn so asoɔden. Nea wɔyɛe no, na ɛyɛ bɔne, na na wɔrepɛ akyerɛ sɛ Onyankopɔn nni hokwan sɛ ɔkyerɛ wɔn nea eye ne nea enye. Nea wɔyɛe no kɔfaa amanehunu bebree brɛɛ wɔn.—Genesis 3:16-19.
3. Nea Adam ne Hawa yɛe no, dɛn na akɔfa abrɛ yɛn?
Bere a Adam ne Hawa yɛɛ asoɔden no, wɔbɛyɛɛ abɔnefo, na wɔde bɔne woo wɔn asefo nyinaa. Bible ka Adam ho asɛm sɛ: “Ɛnam onipa baako so na bɔne baa wiase, na owu nam bɔne so bae, na ɛmaa owu trɛw kaa nnipa nyinaa.”—Romafo 5:12.
Nneɛma a ɛma yehu amane no gu ahorow. Ɛtɔ da a, amane a yehu no, ɛyɛ yɛn ara yɛn mfomso na ɛkɔfa ba. Ebi wɔ hɔ nso a, mfomso a afoforo di no na ɛkɔfa ɔhaw brɛ yɛn. Ɛtɔ da nso a, biribi a yɛnhwɛ kwan tumi to yɛn ma yehu amane.—Kenkan Ɔsɛnkafo 9:11.
SUA PII KA HO
Bɔne ne amanehunu a ɛrekɔ so nnɛ no, adɛn nti na yɛrentumi mfa ɛho asodi nto Onyankopɔn so? Afei nso sɛ yehu amane a, ɛyɛ a ɔte nka sɛn? Ɔfã yi bɛma yɛanya nsɛmmisa yi ho mmuae.
4. Amane a nnipa rehu nnɛ no, hena na ɔhyɛ akyi?
Nnipa pii adwene yɛ wɔn sɛ Onyankopɔn na odi wiase yi so. Nanso wohwɛ a, saa asɛm yi yɛ nokware? Hwɛ VIDEO yi.
Monkenkan Yakobo 1:13 ne 1 Yohane 5:19. Muwie a munsusuw asɛmmisa yi ho:
Bɔne ne amanehunu a ɛrekɔ so no, Onyankopɔn na ɔhyɛ akyi anaa?
5. Efi bere a Satan fii ase sɛ ɔredi tumi no, dɛn na akɔfa aba?
Monkenkan Genesis 3:1-6. Muwie a munsusuw nsɛmmisa yi ho:
Atosɛm bɛn na Satan kae?—Hwɛ nkyekyɛm 4 ne 5.
Ná Satan pɛ sɛ ɔkyerɛ sɛ Yehowa de biribi asie nnipa. Dɛn na ɔkae a ɛkyerɛ saa?
Dɛn na Satan kae a ɛkyerɛ sɛ enhia sɛ Yehowa di nnipa so Hene ansa na wɔn ani agye?
Monkenkan Ɔsɛnkafo 8:9. Muwie a munsusuw asɛmmisa yi ho:
Esiane sɛ ɛnyɛ Yehowa na odi wiase yi so nti, nneɛma te sɛn wɔ wiase yi mu?
A. Ná bɔne biara nni Adam ne Hawa ho, na na wɔte Paradise. Nanso wokodii Satan akyi yɛɛ Yehowa so asoɔden
B. Bere a Adam ne Hawa yɛɛ asoɔden no, ɛkɔfaa bɔne, amanehunu, ne owu baa wiase
D. Yehowa beyi bɔne, amanehunu, ne owu afi hɔ. Nnipa bɛde wɔn ho afi bɔne ho, na wɔatena ase daa wɔ Paradise
6. Sɛ yehu amane a, ɛhaw Yehowa
Sɛ yehu amane a, ɛyɛ a ɛmfa Onyankopɔn ho anaa? Hwɛ nea Ɔhene Dawid ne ɔsomafo Petro kae. Monkenkan Dwom 31:7 ne 1 Petro 5:7. Muwie a munsusuw asɛmmisa yi ho:
Kyerɛwnsɛm yi ma yehu sɛ, sɛ yehu amane a, Yehowa hu, na ɛhaw no nso. Wei ma wote nka sɛn?
7. Amane a nnipa rehu no, Onyankopɔn beyi ne nyinaa afi hɔ
Monkenkan Yesaia 65:17 ne Adiyisɛm 21:3, 4. Muwie a munsusuw asɛmmisa yi ho:
Kyerɛwnsɛm yi ma yehu sɛ ateetee ne ɔbrɛ a nnipa refa mu no, ɛrenkyɛ Yehowa beyi ne nyinaa afi hɔ. Wei ma wote nka sɛn?
Wunim biribi?
Bere a Satan kaa atosɛm a edi kan no, oguu Yehowa din ho fĩ, kyerɛ sɛ ɔsɛee Yehowa din. Ná ɔpɛ sɛ nkurɔfo nya adwene sɛ Onyankopɔn nyɛ Sodifo papa, na ɔnnɔ nnipa. Ɛrenkyɛ biara, Yehowa beyi amane a nnipa rehu nyinaa afi hɔ na ɔbɛtew ne din ho. Anaa yɛbɛka a, ɔbɛma obiara ahu sɛ ɔno na ɔfata sɛ odi nnipa so. Yehowa din a ɛho bɛtew ho hia sen biribiara wɔ amansan yi mu.—Mateo 6:9, 10.
EBINOM KA SƐ: “Amane a yehu no, ne nyinaa yɛ Onyankopɔn nhyehyɛe.”
Obi ka saa a, dɛn na wobɛka?
NEA YƐASUA
Bɔne a abu so wɔ wiase no, ne nyinaa fi Satan Ɔbonsam ne nnipa mmienu a wodi kan no. Amane a yɛrehu no haw Yehowa paa, na ɛrenkyɛ obeyi ne nyinaa afi hɔ.
Ntimu
Atosɛm bɛn na Satan Ɔbonsam ka kyerɛɛ Hawa?
Dɛn na Adam ne Hawa asoɔden no akɔfa abrɛ yɛn?
Yɛyɛ dɛn hu sɛ amane a yɛrehu no haw Yehowa?
YƐ NHWEHWƐMU
Yɛka bɔne a ɛkyerɛ sɛn? Hwɛ nea Bible no ka.
Atosɛm a Satan ka faa Onyankopɔn ho wɔ Eden turo no mu no, kenkan saa asɛm yi, na wubehu ɛho nsɛm pii.
“Adɛn Nti na Onyankopɔn Ama Kwan Ma Amanehunu Rekɔ So?” (Ɔwɛn-Aban, January 1, 2014)
Bere bi awerɛhosɛm bi sii, na ebesi nnɛ nyinaa, nnipa pii nhu nea enti a ɛbaa saa. Kenkan saa asɛm yi, na wubenya mmuae a ɛbɛma wo koma atɔ wo yam.
Ɔbarima bi behuu nea enti a nnipa rehu amane. Hwɛ video yi, na wubehu sɛnea ɛboaa no.