Nteɛso a Ebetumi Asow Asomdwoe Aba

“Nteɛso biara nteɛso nnyɛ nea ɛyɛ sɛ anigye wom mprempren, na mmom ɛyɛ awerɛhow; na akyiri no ɛsow asomdwoe aba, ɛne trenee.”​—HEBRIFO 12:11, NEW WORLD TRANSLATION.

 1, 2. (a) Sɛnea Hebrifo 12:9-11 kyerɛ no, dɛn na Onyankopɔn fi ɔdɔ mu de ma? (b) Nteɛso ho nhwɛso biako ne dɛn, na dɛn na ebetumi afi eyi mu aba?

SUSUW bere a na woyɛ abofra no ho. So wubetumi akae sɛ w’awofo teɛɛ wo so? Yɛn mu pii betumi akae. Ɔsomafo Paulo de ɛno dii dwuma sɛ mfatoho bere a ɔreka nteɛso a efi Onyankopɔn hɔ ho asɛm sɛnea yɛkenkan wɔ Hebrifo 12:9-11 no.

² Onyankopɔn nteɛso a ɔde ma sɛ agya a ebetumi anya yɛn honhom mu asetra so tumi no betumi ayɛ nea egu ahorow. Biako ne nhyehyɛe a wayɛ sɛ wonyi obi a ɔmpɛ sɛ ɔde Onyankopɔn gyinapɛn ahorow tra ase bio anaa ɔpow sɛ ɔde bɛtra ase no mfi Kristofo asafo no mu no. Ɛdenam saayɛ so no obi a wɔde asotwe anaa nteɛso a emu yɛ den ma no no betumi anu ne ho na wadan ne ho. Wɔ eyi yɛ mu no, wɔteɛ anokwafo asafo no nso so, kyerɛ sɛ wohu sɛnea Onyankopɔn gyinapɛn ahorow a ɛkorɔn a wobedi so no ho hia no.​—1 Timoteo 1:20.

 3. Ebinom yɛ wɔn ade dɛn wɔ obi a wotu no ho?

³ Ebia obi bebisa sɛ, ‘So ɛnyɛ atirimɔdensɛm sɛ wobetu obi na afei wɔapow sɛ wɔne onipa a wɔatu no no bɛkasa?’ Adwene a ɛte sɛɛ daa adi wɔ asennibea asɛm bi a ɛfa ɔbea bi a n’awofo a na wɔyɛ Yehowa Adansefo tetee no no mu. Na wɔatu n’awofo afi asafo no mu. Ɔno de wɔantu no bi nanso ofi ne pɛ mu twee ne ho fii asafo no ho denam krataa a ɔkyerɛwee so. Enti wɔbɔɔ asafo no amanneɛ ara kwa sɛ ɔnyɛ Yehowa Adansefo mu biako bio. Otu kɔtraa baabi nanso akyiri yi ɔsan bae na obehui sɛ Adansefo a wɔwɔ hɔ no ne no remmɔ nkɔmmɔ. Enti ɔde asɛm no kɔɔ asennibea. Dɛn na efii mu bae, na eyi betumi aka wo dɛn? Sɛnea ɛbɛyɛ a yɛbɛte asɛm no ase yiye no, momma yɛnhwɛ nea Bible no ka wɔ obi a wotu no ho asɛm no ho.

Dɛn Nti na Wɔpaw Gyinabea Pintinn Yi?

 4. Dɛn na ɛtɔ bere bi a ɛto ebinom wɔ asafo no mu? (Galatifo 6:1; Yuda 23)

⁴ Nokware Kristofo pii de nokwaredi gyina Onyankopɔn ne ne trenee mmara ahorow akyi. (1 Tesalonikafo 1:2-7; Hebrifo 6:10) Nanso, ɛtɔ bere bi a obi twe ne ho fi nokware kwan no ho. Sɛ nhwɛso no, wɔ mmoa a Kristofo mpanyimfo de bɛma nyinaa akyi no, ebia ɔbɛkɔ so abu Onyankopɔn mmara ahorow so a ɔrenkyerɛ ahonu. Anaasɛ ebia ɔnam atoro nkyerɛkyerɛ anaasɛ ne ho a ɔbɛtwe afi asafo no ho no so bɛpa gyidi. Ɛnde dɛn na ɛsɛ sɛ wɔyɛ? Nsɛm a ɛtete saa sisii bere a na asomafo no te ase no mpo; enti momma yɛnhwɛ nea wɔkyerɛw faa eyi ho no.

 5, 6. (a) Afotu a nyansa wom a ɛfa sɛnea ɛsɛ sɛ wɔne wɔn a wɔyɛ bɔne a anibere wom na wɔnkyerɛ ahonu di ho bɛn na yɛwɔ? (Mateo 18:17) (b) Nsemmisa bɛn na ɛda yɛn anim?

⁵ Bere a ɔbarima bi a ɔwɔ Korinto kɔɔ so buu ɔbra bɔne na wankyerɛ ahonu no, Paulo ka kyerɛɛ asafo no sɛ: “Sɛ obi a wɔfrɛ no onua yɛ aguaman anaa oniberefo anaa ɔbosonsonni anaa ɔmaanefo anaa ɔsabofo anaa omimfo a, mo ne no mmmɔ; saa onipa no, mo ne no nnidi mpo.” (1 Korintofo 5:11-13) Saa ara na na ɛsɛ sɛ wɔyɛ awaefo te sɛ Himeneo: “Nkyekyem farebae a woakasa akyerɛ no pɛnkoro ne ne mprenu no, pa no! Na hu sɛ, nea ɔte sa no, ne ti asɛe, na ɔyɛ bɔne.” (Tito 3:10, 11; 1 Timoteo 1:19, 20) Ɛbɛyɛ nea ɛfata sɛ wɔtwe wɔn ho fi obiara a ɔpow asafo no ho nso: “Wofi yɛn mu na ɛkɔe de, nanso wɔnka yɛn ho, na sɛ wɔka yɛn ho a, anka wɔne yɛn traa hɔ. Na ɛyɛɛ saa na wɔada adi sɛ wɔn nyinaa nka yɛn ho.”​—1 Yohane 2:18, 19.

⁶ Yɛwɔ anidaso sɛ obi a ɔte saa no benu ne ho na ama wɔatumi agye no atom bio. (Asomafo no Nnwuma 3:19) Nanso, bere a onnuu ne ho no, so Kristofo betumi ne no abɔ fekuw kakra, anaasɛ ɛho hia sɛ wɔpow no koraa? Sɛ saa a, dɛn ntia?

Wɔntwe Wɔn Ho Koraa?

 7. Yɛn abrabɔ bɛyɛ soronko wɔ abɔnefo akuw horow abien no ho dɛn?

⁷ Kristofo ntwe wɔn ho mfi nnipa ho. Yɛne afipamfo, mfɛfo adwumayɛfo, mfɛfo sukuufo, ne afoforo di nkitaho, na sɛ ebinom yɛ ‘nguaman, aniberefo, abosonsomfo anaa amimfo’ mpo a, yedi wɔn adanse. Paulo kyerɛw sɛ yɛrentumi nkwati wɔn koraa, ‘ɛno de, na anka ɛsɛ sɛ yefi wiase kɔ.’ Ɔkae sɛ ɛsɛ yɛyɛ yɛn ade soronko wɔ “onua” a ɔbɔ ne bra saa no ho: ‘Mo ne obi a wɔfrɛ no onua [a wasan akɔfa akwan a ɛte saa so] no mmmɔ, mo ne no nnnidi mpo.’​—1 Korintofo 5:9-11; Marko 2:13-17.

 8. Afotu bɛn na ɔsomafo Yohane de mae wɔ obi ho a wɔtwe wɔn ho fi no ho?

⁸ Wɔ ɔsomafo Yohane nkyerɛwee no mu no, yehu afotu a ɛte saa ara a esi sɛnea ɛsɛ sɛ Kristofo kwati saafo no koraa no so dua: “Obiara a ɔfom so na ɔntra Kristo kyerɛ no mu no, onni Nyankopɔn . . . Sɛ obi ba mo nkyɛn na onkura kyerɛ yi a, munnnye no nnkɔ mo fi, nso munnkyia no! Na nea okyia no [Hela, khaiʹro] no yɛ ne nnwuma bɔne fafafo.”a​—2 Yohane 9-11.

9, 10. (a) Na dɛn na ɛba mmaratofo a wɔnkyerɛ ahonu wɔ Isreal no so, na dɛn ntia? (b) Ɛsɛ sɛ yɛte nka dɛn wɔ nhyehyɛe a ɛwɔ hɔ nnɛ ma sɛnea wɔne nnipa a wɔatu wɔn wɔ bɔne a wɔnkyerɛ ahonu wɔ ho no ho? (2 Petro 2:20-22)

⁹ Dɛn nti na gyinabea pintinn a ɛte saa fata nnɛ mpo? Wiɛ, susuw afoforo a wokum wɔn koraa no ho asɛm a ɛwɔ Onyankopɔn Mmara a ɔde maa Israel no mu no ho. Wɔ nsɛm ahorow a anibere wom mu no, na wokum wɔn a wɔhyɛ da bu mmara so no. (Leviticus 20:10, Numeri 15:30, 31) Sɛ ɛba saa a, afoforo, abusuafo mpo rentumi ne mmaratofo a wawu no nkasa bio. (Leviticus 19:1-4; Deuteronomium 13:1-5; 17:1-7) Ɛwom sɛ na Israelfo anokwafo a wɔwɔ hɔ saa bere no yɛ nnipa a wɔwɔ nkate horow te sɛ yɛn ara de, nanso na wonim sɛ Onyankopɔn bu atɛntrenee na ɔwɔ ɔdɔ ne sɛ ne Mmara bɔɔ wɔn abrabɔ ne honhom fam ahotew ho ban. Enti na wobetumi agye atom sɛ ne nhyehyɛe a wayɛ sɛ wonkum abɔnefo no yɛ ade a eye na ɛteɛ.​—Hiob 34:10-12.

¹⁰ Yɛn nso yebetumi agye adi sɛ Onyankopɔn nhyehyɛe a ɛkyerɛ sɛ ɛsɛ sɛ Kristofo pow sɛ wɔne obi a wɔatu no esiane bɔne a wannu ne ho wɔ ho nti bɛbɔ no yɛ ahobammɔ a nyansa wom ma yɛn. “Munyi mmɔkaw dedaw no, na moayɛ mmɔre foforo, sɛ moyɛ apiti no.” (1 Korintofo 5:7) Ɛdenam kwati a Kristofo kwati nnipa a wɔhyɛ da twe wɔn ho no so no, wonya ahobammɔ fi awaefo adwenkyerɛ a wɔde kasa tia na ɛnkyerɛ anisɔ no mpo ho.​—Hebrifo 12:15, 16.

Abusuafo Nso Ɛ?

11, 12. (a) Sɛ wokum ɔbɔnefo bi a, tumi bɛn na na enya wɔ abusuafo a wɔyɛ Israelfo no so. (b) Yɛ osetie mu mfaso horow ho nhwɛso.

¹¹ Ɛda adi sɛ Onyankopɔn nim sɛ ɛtaa yɛ nea ne mmara a ɛfa abɔnefo a wɔbɛtwe wɔn ho afi wɔn ho a wobedi so no fa abusuafo ho na ɛka wɔn nso. Sɛnea yɛaka wɔ atifi hɔ no, sɛ wokum ɔbɔnefo a ɔyɛ Israelni a, n’abusua rentumi ne no mmɔ fekuw bio. Nokwarem no, sɛ ɔbabarima bi yɛ ɔsabofo ne odidifo a, ɛsɛ sɛ n’awofo de no kɔ atemmufo no anim, na sɛ wankyerɛ ahonu a, ɛsɛ sɛ n’awofo nya ne kum a ɛteɛ no mu kyɛfa na ama ‘wɔayi bɔne no afi Israel mu.’ (Deuteronomium 21:18-21) Wubetumi ahu sɛ na eyi renyɛ mmerɛw mma wɔn. Susuw sɛnea abɔnefo no nuanom anaasɛ ne nananom tee nka no nso ho. Nanso nokwaredi ma wɔn trenee Nyankopɔn no a wɔde bedi ɔdɔ a wɔwɔ ma abusua no anim kan no betumi agye wɔn nkwa.

¹² Kae Kora a na ɔyɛ ɔkannifo wɔ atua a wɔtew tiaa Onyankopɔn akanni denam Mose so no asɛm no. Wɔ Yehowa atɛntrenee a ɛyɛ pɛ mu no, ɔhwɛ maa Kora wui. Nanso wotuu anokwafo nyinaa fo sɛ: “Montwe mo ho mfi nnipa abɔnefo yi ntamadan ho ɛ, na monnka wɔn biribiara, na wɔampra mo ne wɔn bɔne nyinaa ankɔ.” Abusuafo a wɔannye Onyankopɔn kɔkɔbɔ antom no ne atuatewfo no wui. Nanso Kora abusuafo no mu binom fi nyansa mu paw sɛ wobedi Yehowa nokware, ade a egyee wɔn nkwa na ɛma wonyaa nhyira akyiri yi.​—Numeri 16:16-33; 26:9-11; 2 Beresosɛm 20:19.

13. Sɛ wotu Kristofo anokwafo abusua muni bi anaasɛ ɔtwe ne ho a, wɔbɛyɛ wɔn ade dɛn wɔ ho?

¹³ Tu a wotu obi fi Kristofo asafo no mu no nkyerɛ sɛ obewu ntɛm ara, enti ɔne n’abusua ntam abusuabɔ kɔ so. Enti ɔbarima bi a wɔatu no anaasɛ watwe ne ho no betumi akɔ so ne ne yere a ɔyɛ Kristoni ne ne mma anokwafo no akɔ so atra fie. Obu a ne yere ne ne mma wɔ ma Onyankopɔn atemmu ahorow ne nea asafo no ayɛ no bɛka wɔn ma wɔahu sɛ ɔnam ɔkwan a ɔfaa so no so asakra honhom mu abusuabɔ a ɛwɔ ɔne wɔn ntam no. Nanso, esiane sɛ tu a wɔatu no no mma wɔn honam fam abusuabɔ anaasɛ aware no mma awiei nti, abusua mu ɔdɔ a wɔwɔ ne nneyɛe betumi akɔ so.

14. Ɔsoro afotu bɛn na ɛsɛ sɛ ɛka nkitaho a obusuani a omfi abusua kɔntɔnkrɔn no mu a wɔatu no anaasɛ watwe ne ho no?

¹⁴ Ɛsono tebea no sɛ nea wɔatu no anaasɛ watwe ne ho no ne abusua no nte faako ne ofi biako mu a. Ebetumi aba sɛ wɔne obusuani no renni nkitaho koraa. Sɛ abusuasɛm bi wɔ hɔ a ɛsɛ sɛ wɔne no di nkitaho wɔ ho a, ɛda adi sɛ wɔrenyɛ eyi nkɔ akyiri na ama ɛne ɔsoro nnyinasosɛm yi ahyia: “Sɛ obi a wɔfrɛ no onua yɛ aguaman anaa oniberefo [anaa wadi bɔne a anibere wom foforo ho fɔ a],. . . mo ne no mmɔ. . .mo ne no nnnidi mpo.”​—1 Korintofo 5:11.

15. Ɔkwan bɛn so na abusuafo betumi adi wɔn nkate horow so wɔ tebea horow a ɛte saa no mu? (Dwom 15:1-5; Marko 10:29, 30)

¹⁵ Ntease wom sɛ ɛyɛ nea eyi betumi ayɛ den esiane nkate ne abusua ntam abusuabɔ, te sɛ ɔdɔ a nananom wɔ ma wɔn nenanom no nti. Nanso, eyi yɛ nokwaredi ma Onyankopɔn ho sɔhwɛ, sɛnea onuawa a yɛafa n’asɛm aka wɔ kratafa 27 no aka no. Obiara a ɔte awerɛhow ne ɛyaw a obusuani a wɔatu no ama aba no nka no betumi anya awerɛkyekye na wama nhwɛso a Kora abusuafo binom yɛe no ahyɛ ne nkuran.​—Dwom 84:10-12.b

Asennibea no Gyinaesi

16-18. Gyinae bɛn na wosii wɔ asennibea asɛm a yɛadi kan aka ho asɛm no mu, na adwene foforo bɛn na asennibea no de mae de kaa ho?

¹⁶ Ebia wobɛpɛ sɛ wuhu nea efii asɛm a wodii wɔ asennibea a ɛfa ɔbea bi a na wahaw esiane sɛ ne kan amannifo ne no remmɔ nkɔmmɔ bere a ɔpaw sɛ ɔbɛpa gyidi na ɔtwee ne ho fii asafo no ho no mu bae no.

¹⁷ Ɔmantam asennibea bi buu atɛn tiaa no. Wɔde saa atemmu no gyinaa adwene a ɛne sɛ asennibea ahorow mfa wɔn ho nhyɛ asɔre nteɛso ho nsɛm mu no so. Ɔde asɛm no kɔdan asennibea foforo. Asennibea a wɔde nsɛm kɔdan no atemmu a atemmufo no nyinaa penee so no yɛ nea na egyina ntease a emu trɛw a ɛwɔ hokwan ahorow no mu Nsakrae a Edi Kan (a ɛwɔ U.S. Amammui Nhyehyɛe no mu) no so: “Esiane sɛ adeyɛ a ɛne obi a wɔtwe wɔn ho fi ne ho yɛ Yehowa Adansefo gyidi no fã nti, yehu sɛ nsiesiei a ɛne ‘ahofadi’ a ɛwɔ United States Amammui Nhyehyɛe no mu no. . . . mma [no] kwan sɛ ɔne wɔn bɛtwe. Wɔn a ɔne wɔn di asɛm no wɔ mmara mu hokwan a wɔabɔ ho ban sɛ wɔde wɔn ho bɛhyɛ adeyɛ a ɛne afoforo a wɔtwe wɔn ho fi wɔn ho no mu. Enti yesi” ɔmantam asennibea atemmu a edi kan no so dua.

¹⁸ Asennibea no adwenkyerɛ no toaa so sɛ: “Obi a wɔtwe wɔn ho fi ne ho yɛ ade a Yehowa Adansefo yɛ sɛnea kyerɛwsɛm mu nkyerɛkyerɛmu a wɔde ma no kyerɛ no, na yɛnne yɛn ho sɛ yɛbɛsan akyerɛkyerɛ saa kyerɛwsɛm no mu . . . Wɔn a ɔne wɔn redi asɛm no wɔ hokwan sɛ wodi wɔn nyamesom mu gyidi ahorow akyi a obiara rensiw wɔn kwan . . . Asennibea ahorow ntaa nhwehwɛ abusuabɔ a ɛwɔ asɔre bi mufo (anaasɛ wɔn a anka wɔyɛ emufo) ntam no mu nkɔ akyiri. Wɔama asɔre ahorow no ahofadi kɛse bere a wɔde nteɛso ma emufo anaasɛ wɔn a anka wɔyɛ emufo no. Yegye [kan U.S. Asennibea Kunini] no temmufo Jackson adwene a ɛne sɛ ɛnsɛ sɛ wɔde wɔn ho hyehyɛ ‘nyamesom dwumadi ahorow a ɛfa gyidi no mufo nkutoo ho no mu no tom​—ɛde ne ho korakora te sɛ biribi foforo biara pɛ.’ . . . Asɔre a osii gyinae sɛ ɔbɛtwe ne ho afi ho no mufo kae sɛ wɔmpɛ sɛ wɔne no bɛbɔ bio. Yɛpene so sɛ wɔwɔ ahofadi sɛ wɔyɛ saa.”

19, 20. Dɛn nti na obi a asafo no atwe ne ho afi no ho no rentumi mmɔ asafo no ka wɔ asennibea?

¹⁹ Asennibea a wɔde nsɛm kɔdan no kae sɛ sɛ ɔbea no te nka sɛ wahaw esiane sɛ ne kan amannifo apaw sɛ wɔne no mmɔ nkɔmmɔ a, ɔkwan a wɔbɛma no ma wanya ahotɔ wɔ nkate mu haw no mu no besiw Yehowa Adansefo no kwan wɔ ɔsom mu ahofadi a wɔde di dwuma no mu wɔ mmara kwan so . . . Mmara no mu bɔhyɛ a ɛfa ɔsom mu ahofadi a wɔde di dwuma ho no hwehwɛ sɛ nnipa gye amane a [ohu] no tom sɛ akatua a ɛfata na abɔ ɔsom mu nsonsonoe hokwan a obiara wɔ no ho ban.” Wɔ ɔkwan bi so no, wɔasi gyinaesi no so dua kɛse fi bere a wɔde mae no. Ɔkwan bɛn so? Akyiri yi ɔbea no de adesrɛ kɔtoo asennibea a ɛkorɔn sen biara wɔ ɔman no mu no anim sɛ entie asɛm no na wommu no bem. Nanso wɔ November 1987 mu no, United States Asennibea Kunini no powee sɛ ɛbɛyɛ saa.

²⁰ Enti, asɛm a ɛho hia yi kyerɛe sɛ obi a wɔatu no anaasɛ wɔatwe ne ho no rentumi mmɔ Yehowa Adansefo ka wɔ asennibea bi esiane sɛ wɔtwe wɔn ho fi ne ho nti.c Esiane sɛ na asafo no redi akwankyerɛ ahorow a edi mu a yɛn nyinaa betumi akenkan wɔ Onyankopɔn Asɛm mu na yɛde adi dwuma no ho dwuma nti, na onipa no te nka sɛ wahwere biribi a n’ankasa nneyɛe na ama aba saa.

Nteɛso​—Mfaso Pii

21. Dɛn nti na ɛho hia sɛ wɔkari pɛ wɔ sɛnea wobu obi a wotu no fi asafo no mu no mu?

²¹ Sɛ ebinom a wɔwɔ asafo no akyi te sɛ wɔatu obi a, wɔbɛpɛ sɛ woyi ayamhyehye adi kyerɛ ɔbɔnefo a Kristofo asafo no mufo rentumi ne no mmɔ nkɔmmɔ bio no. Nanso so ayamhyehye a ɛte saa no nyɛ nea ɛnteɛ? Susuw mfaso horow a ɔbɔnefo no ne afoforo betumi anya no ho.

22, 23. Kyerɛkyerɛ hia a Onyankopɔn a yebetie no wɔ sɛnea yesusuw nnipa a wɔatu wɔn no mu hia ne mfaso a ɛwɔ so no mu.

²² Sɛ nhwɛso no, yehuu asɛm a Lynette kae sɛ paw a ɔpaw sɛ ɔne ne nuabea Margaret a wotuu no no ‘remmɔ fekuw biara’ no wɔ kratafa 27. Ɔne n’abusuafo a wɔyɛ Kristofo ‘gye dii sɛ Yehowa kwan ye sen biara.’ Na saa na ɛte!

²³ Lynette nuabea no ka kyerɛɛ no akyiri yi sɛ: “Sɛ wammu tu a wotuu me no aniberesɛm a, anka minim sɛ merenyɛ gye a wɔbɛsan agye me no ho nhyehyɛe ntɛm te sɛ nea meyɛe no. Esiane sɛ na n’adɔfo atwe wɔn ho koraa na ontumi mmɛn asafo no kɛse nti, onyaa ɔpɛ a emu yɛ den sɛ ɔbɛkyerɛ ahonu. Mihuu sɛnea me kwan no yɛ bɔne fa ne sɛnea ɛyɛ aniberesɛm sɛ mɛdan m’akyi akyerɛ Yehowa no.”

24. Ɔkwan bɛn so na sɛnea onuawa bi dii obi a wotuu no ho dwuma no nyaa ɔne afoforo so tumi?

²⁴ Wɔ asɛm foforo mu no, wotuu Laurie awofo. Nanso ɔka sɛ: ‘Mene wɔn fekubɔ no annyae na mmom ɛkɔɔ so. Bere a bere kɔɔ so no, mebɛyɛɛ obi a ɔnkɔ asɛnka. Ebeduu baabi a na menkɔ adesua mpo.’ Afei ɔkenkan asɛm a ɛwɔ November 1, ne December 1, 1981 ne January 1, 1982 Ɔwɛn-Aban no mu a na esi afotu a ɛwɔ 1 Korintofo 5:11-13 ne 2 Yohane 9-11 so dua no. Ɔkyerɛw sɛ: “Na ɛte sɛ nea wɔasɔ me so kanea.” ‘Na minim sɛ ɛsɛ sɛ meyɛ nsakrae ahorow bi. Mprempren mete nea Mateo 10:34-36 kyerɛ no ase yiye. Na gyinae a misii no nyɛ mmerɛw mma m’abusua no sɛ wobegye atom efisɛ na me babarima a wadi mfe anum no nkutoo ne abarimaa na na wɔdɔ no yiye.’ Wɔhwɛ kwan sɛ fekubɔ a ɛte saa a wɔbɛhwere no bɛka awofo no koma te sɛ nea ɛyɛɛ Margaret no. Nanso nteɛso a na ɛwom no boaa Laurie: ‘Mekɔ asɛnka. M’aware ne m’abusua ayɛ den esiane nsakrae a meyɛe no nti, na me nso mayɛ den saa ara.’

25. Adwene bɛn na na obi a wɔasan agye no no kura wɔ Onyankopɔn nteɛso ho?

²⁵ Anaa, susuw obi a wotuu no na akyiri yi wɔsan gyee no no nkate horow ho. Sandi kyerɛwee sɛ: ‘Mepɛ sɛ meda mo ase wɔ nsɛm a ɛboa yiye na afotu wom [a wɔaka ho asɛm wɔ atifi hɔ] a ɛfa nkaanim ne obi a wotu no ho no ho. Ɛyɛ me anigye sɛ Yehowa dɔ ne nkurɔfo araa ma ɔhwɛ sɛ n’ahyehyɛde no ho bɛtew. Nea ebetumi ayɛ te sɛ atirimɔdensɛm ama wɔn a wɔwɔ asafo no akyi no yɛ nea ɛho hia na ɔdɔ wom ankasa sɛ wɔbɛyɛ saa. Mede aseda ma sɛ yɛn soro agya no yɛ ɔdɔ ne fafiri Nyankopɔn.’

26. Trenee aba bɛn na ebetumi afi nteɛso a wobegye no mu aba? (Dwom 94:10, 12)

²⁶ Enti yɛn Nyankopɔn a ɔhwehwɛ sɛ wotu abɔnefo a wɔnkyerɛ ahonu fi asafo no mu no nso fi ɔdɔ mu kyerɛ sɛ wobetumi asan agye ɔbɔnefo a onu ne ho na ɔdan ne ho no aba asafo no mu bio. (Obi a watwe ne ho nso betumi abisa ma wabɛyɛ asafo no muni bio saa ara.) Ɛno akyi no Kristofo a wɔbɛsan asi ɔdɔ a wɔwɔ ma no so dua akyerɛ no betumi akyekye ne werɛ. (2 Korintofo 2:5-11; 7:8-13) Ampa ɛte sɛ nea Paulo kyerɛwee no: “Ampa, nteɛso biara nteɛso nnyɛ nea ɛyɛ sɛ anigye wom mprempren, na mmom ɛyɛ awerɛhow; na akyiri no ɛsow asomdwoe aba, a ɛne trenee.”​—Hebrifo 12:11. NW

[Ase hɔ nsɛm]

Nsɛntitiriw a Ɛsɛ sɛ Wokae

◻ Akwan horow bɛn so na tu a wotu obi no betumi ayɛ nteɛso bi?

◻ Dɛn nti na ɛsono Kristoni su wɔ nnipa a wɔatu wɔn ho wɔ su a oyi adi kyerɛ abɔnefo a wɔwɔ wiase no mu no ho?

◻ Kyerɛwnsɛm mu akwankyerɛ bɛn na ɛsɛ sɛ wɔma ɛtra adwene mu bere a wɔatu obusuani bi mpo no?

◻ Asennibea a wɔde asɛm kɔdan sii gyinae bɛn wɔ asɛm bi a obi a watwe ne ho de kɔɔ hɔ no mu?

◻ Dɛn na yebetumi asua afi nsɛm a ebinom ankasa aka wɔ tu a wotu obi ho no mu?

[Asɛm a wɔafa aka wɔ kratafa 26]

“Margaret [me nuabea a wotuu no no] ho a yɛbɛtew yɛn ho afi koraa no sɔɔ yɛn nokwaredi ma Yehowa nhyehyɛe no hwɛe. Ɛmaa yɛn abusua no nyaa hokwan de kyerɛɛ sɛ yegye di ampa sɛ Yehowa akwan na eye.”​—Lynette.

[Adaka wɔ kratafa 30]

Obi a Wotu No​—Dɛn na Efi Mu Ba?

Engiresini abakɔsɛm kyerɛwfo Edward Gibbon kyerɛw sɛnea obi a wotu no fata ne nea efi mu ba wɔ bere a na ɛbɛn bere a asomafo no traa ase no mu ho asɛm sɛ:

“Ɛyɛ hokwan a kuw biara wɔ sɛ eyi kuw no mufo a wobu ahyɛde horow a wɔn nyinaa de asi hɔ no so fi wɔn ntam. . . . Nea efi tu a wotu obi mu ba no ka no wɔ honam fam ne honhom fam. Wɔmma Kristoni biara a wotu no no nnya ɔsom a anokwafo no de ma no mu kyɛfa. Wotwa nyamesom no kokoam nnamfoyɛ mu.”