Ahintasɛm—Hena Ne Aguaman “Babilon Kɛsɛ No”?
WƆAKUM ɔbea bi, aguaman a ɔwɔ dimmɔne a wanya nnipa ɔpepepem pii asetra so nkɛntɛnso no. Nanso ne kum no yɛ soronko. Dɛn na ɛma ɛyɛ soronko? Nea okum no no yɛ aboa, akekaboa a ɔma ɔda adagyaw, ɔwe ne nam, na ogyaw nea aka no sɛnea ɛbɛyɛ a wɔde ogya bɛhyew. Hena ne ɔbea a ɔwɔ afoforo so nkɛntɛnso yi? Dɛn nti na akekaboa bi tow hyɛ no so? Dɛn na wayɛ ma enti a ɔfata awiei a ɛyɛ yaw yi?*—Adiyisɛm 17:16, 17.
Eyi betumi ayɛ nnyinaso ama ahintasɛm bi a ɛyɛ nwonwa—nea ɛyɛ soronko wom ara ne sɛ ɛnyɛ ayɛsɛm. Ɛyɛ abakɔsɛm mu nokwasɛm a ɛrebenya mmamu. Ɛfa wo ho efisɛ ebia aguaman a ɔwɔ dimmɔne yi renya w’asetra so nkɛntɛnso nnɛ. Afei nso, sɛ ebia wode wo ho bɔ no anaa wotwe wo ho fi no ho no bɛkyerɛ nkwa anaasɛ owu ama wo. Enti ɔne hena?
Wɔn a Ɔbea Nwonwafo no Ne Wɔn Bɔ Aguaman
Yohane ka saa femme fatale, ɔdaadaafo a n’ani nwu ade yi ho asɛm wɔ Bible nkɔmhyɛ nhoma a ɛne Adiyisɛm no mu, faako a yɛkenkan eyi no: “Na [ɔbɔfo no] de me nam honhom mu kɔɔ sare so. Na mihuu ɔbea bi a ɔte aboa kɔkɔɔ a abususɛm din ahyɛ no ma na ɔwɔ ti ason ne mmɛn du so. Na ɔbea no hyɛ atade afasebiri ne nkra nhoma, na ɔde sika ne aboɔden abo ne nhene pa ahyehyɛ ne ho, na okura sika kuruwa a akyide ne n’aguamammɔ fĩ ayɛ no ma. Na wɔakyerɛw edin bi ne moma so sɛ: Ahintasɛm. Babilon kɛse no, asase so nguaman ne akyide nã.”—Adiyisɛm 17:3-5.
Afei ɛbɛyɛ sɛ “Babilon Kɛse” yi yɛ ɔbea a ɔyɛ den, efisɛ kyerɛwtohɔ no ka wɔ nkyekyem 1 sɛ ‘ɔte nsu pii so.’ Ɛno kyerɛ dɛn? Onyankopɔn bɔfo no kyerɛkyerɛɛ mu kyerɛɛ Yohane sɛ: “Nsu a wuhui a aguaman no te so no yɛ nkurow ne nkurɔfo akuwakuw ne aman ne ɔkasa horow.” (Adiyisɛm 17:15) Akyinnye biara nni ho sɛ ɔyɛ aguaman a ɔwɔ nkɛntɛnso wɔ wiase nyinaa. Nanso ɔnyɛ aguaman hunu bi kɛkɛ. Ɔyɛ ‘nguaman na,’ aguamammɔ adwuma no panyin. Sɛ edu aguamammɔ so a, ɔno na ɔde ahyɛde horow ma. Nanso ɔwɔ nnipa atitiriw a ɔne wɔn bɔ aguaman.
Ɔbɔfo no da nnipa ko a wɔn a wɔne aguaman kɛse a wɔanya n’anim dom bɔ aguaman no yɛ. Ɔyɛ dɛn hu wɔn? Ɔka sɛ Babilon Kɛse no ne nea ‘asase so ahene ne no abɔ aguaman, na n’aguamammɔ nsa no abobow wɔn a wɔtete asase so no.’ (Adiyisɛm 17:2) Oyi bɛyɛ aguaman ɔdaadaafo a onim nnipa atitiriw na ama watumi atwetwe wiase no amammui sodifo ahorow, ‘asase ahene.’ Enti ɔne hena?
Ɔbɔfo no ka sɛ ɔwɔ din bi, din a ɛyɛ ahintasɛm a ɛne “Babilon Kɛse.” Afei nnyinasode abien a ɛma wotumi hu onii ko a ɔyɛ ni—biako ne wɔn a wɔne no bɔ aguaman a wɔwɔ n’anim dom, na foforo a ɛka ho ne ne din, Babilon Kɛse no. Adwene bɛn na saa nnyinasode no ma yenya?
[Ase hɔ asɛm]
Eyi ne Ɔwɛn-Aban anan a ebebua nsemmisa yi ne afoforo a ɛfa saa ɔbea nwonwafo yi ho no mu nea edi kan.