Kyerɛwnsɛm mu Asuade Ahorow: Nahum 1:1–3:19

Wobetumi Anya Nkwagye Bere A Onyankopɔn Di Were

“AKA kakraa sɛ na ɔbɔnefo nni hɔ.” (Dwom 37:10) Wɔda nokwasɛm a ɛyɛ sɛ saa nsɛm yi benya ne mmamu no adi wɔ ɔkwan a tumi wom so wɔ Bible nhoma ahorow a Nahum ne Habakuk kyerɛwee no mu. Saa akokodurufo yi wiee wɔn nkɔmhyɛ ahorow no kyerɛw wɔ Yuda ahemman no mu wɔ afeha a ɛto so ason A.Y.B. no awiei mu hɔ. Nea edi kan no, susuw Onyankopɔn nkɔmhyɛ a Nahum bɔɔ no dawuru no ho. Asuade bɛn na ɛwom?

Onyankopɔn Aweredi Bɛba Ampa Ara

Yehowa hwehwɛ ahofama a wɔde ma ɔno nkutoo. (Exodus 20:5) Wɔ Asiria ahenkurow Niniwe ho atemmusɛm mu no, Nahum kyerɛ sɛ Onyankopɔn aweredi bɛba atamfo a wɔmmfa ahofama a ɛte saa mma No no so. Ɛdɛn, mmepɔw wosow n’anim, nkoko hono, na asase ma ne ho so! Hena na obetumi agyina n’abufuhyew no ano?​—1:1-6.

Yebetumi de yɛn ho ato Yehowa so sɛ guankɔbea. Yiw, Onyankopɔn bɔ wɔn a wɔhwehwɛ ne nkyɛn guankɔbea no ho ban. Bere a wɔahyew n’atamfo ase no, ɔhaw rensɔre ne mprenu so. Asomdwoe asɛmpa wɔ hɔ ma Yuda, efisɛ wɔrenka nokware som hwee.​—1:7-2:2.

Wɔn a wɔnteɛ rennyina. Eyi da adi wɔ nea ɛbaa Niniwe so no mu. Atirimɔdenne a ɛde yɛɛ nnommumfo no ma ɛbɛyɛɛ “mogya kurow.” Te sɛ gyata tũ no, na saa kurow yi a ɛwɔ aban dennen no te sɛ nea ɛwɔ ahobammɔ wɔ n’afasu kɛse no akyi. Nanso ɛdenam Onyankopɔn ahyɛde so no, na Niniwe behu nea ɛde baa tete No-Amon anaa Tebes a ɛwɔ asubɔnten Nil so no so no ara mu amane. Esiane Asiria ahenkurow no bɔne nti, na wɔbɛyɛ no amamfõ. Saa nkɔmhyɛ yi baa mu bere a Babilon hene Nabopolasar ne Mediani Siasares dɔm a wɔaka abom faa Niniwe wɔ 632 A.Y.B. mu no.​—2:3-3:19.

Kyerɛwnsɛm mu Asuade Ahorow: Habakuk 1:1​—3:19

HABAKUK hui sɛ wɔ Yehowa ankasa bere a ɛsɛ mu no, obedi dwuma atia nhyɛsofo atirimɔdenfo. Nanso, ‘ɔtreneeni de, ne gyidi mu na obenya nkwa.’ (2:4) Nanso asuade foforo bɛn bio na yebetumi anya afi saa nkɔmhyɛ yi mu?

Wɔn a Wɔwɔ Gyidi Nkwagye

Yehowa tie ne nkoa adesrɛ. Habakuk bisa sɛ: “[Yehowa], mateɛm makyɛ dɛn ara, na wuntie?” Yiw, atɛntrenee biara nni hɔ, na abɔnefo twa atreneefo ho hyia. Nanso Onyankopɔn tie, na sɛ́ nea ɔnam so de asotwe ba no, ‘ɔrehwanyan Kaldeafo.’ Nanso, ɔkwan bɛn so na obetumi de tumi a wɔpɛ akodi adi dwuma? Odiyifo no twɛn Onyankopɔn mmuae, na na ɔrehwɛ animka kwan.​—1:1-2:1.

Atreneefo ne anokwafo nkutoo na wɔbɛkɔ so atra ase. Yehowa ma Habakuk eyi ho awerɛhyem. Ɛwom sɛ ɛbɛyɛ te sɛ nea ɛtwentwɛn ase de, nanso wɔ Onyankopɔn bere a wahyɛ mu no, nkɔmhyɛ anisoadehu no “bɛba.” Ɔtamfo a obu ne ho a ɔfow amanaman no rennu ne botae no ho. Ampa ara, Kaldeafo no remmfa wɔn ho nni.​—2:2-5.

Abɔnefo Nnue!

Kwati ahonya a ɛnteɛ, basabasayɛ, ne abosonsom. Dɛn ntia? Efisɛ ɛda adi sɛ due bɛba wɔn a wɔma ade a ɛnyɛ wɔn de dɔɔso, wɔnam nsɛmmɔne so ma afoforo nom nkogudi a ɛyɛ aniwu, na wɔde wɔn ho to anyame a nkwa nni wɔn mu so no so. Onyankopɔn bɛsɛe saafo no nnwuma. Wɔbɛma asase nyinaa ahu Yehowa a ɛsɛ sɛ obiara de obu kɛse yɛ komm wɔ n’anim no anuonyam.​—2:6-20.

Fa ntoboase twɛn Yehowa ma onnye wo nkwa. Wɔ mpaebɔ mu no, Habakuk kaakae sɛnea Onyankopɔn tumi ada adi mmere a atwam mu. Nea ɛka nneɛma afoforo ho no, Yehowa faa asase no so, na ɔposaw amanaman wɔ n’abohuru mu. Ofii adi sɛ ɔrekogye ne man nso. Bere a Habakuk ho adwiriw no no, osi ne bo sɛ ‘ɔbɛtra ase atwɛn ahohia da no.’ Ɛmfa ho sɛ ɔrehyia mmere bɔne no, obedi Yehowa mu ahurusi na ne ho asɛpɛw no ne nkwagye Nyankopɔn mu.​—3:1-19.

[Adaka wɔ kratafa 24]

BIBLE MU NSƐM A WƆAHWEHWƐ MU

○ Nahum 1:4​—Ná Basan, Karmel, ne Lebanon yɛ mmeae a ɛyɛ fɛ, asase no ye na ɛsow aba pii. Ná twintwam a wobetwintwam no bɛkyerɛ asiane ama wɔn a wɔde wɔn ho to saa nsase no so no. Eyi si sɛnea Yehowa abufuhyew mu yɛ den no so dua.

○ 1:10​—Ná Niniwe bu ne ho sɛ wɔrentumi nhyɛn ne mu te sɛ nguare a ɛtõatõa mu, na na anuonyampɛ abow no. Nanso na wɔbɛhyew no dwerɛbee sɛnea ogya hyew sakran guanguan. Saa ara nso na Onyankopɔn nnɛyi nkurɔfo atamfo rentumi nnyina Yehowa atemmu ahorow a ɛte sɛ ogya no ano.

○ 2:6​—Esiane osu a ɛtɔe kɛse bere a wotuaa Niniwe no nti, Asubɔnten Tigris yiri bu faa so. Eyi maa nsu yiri faa kurow no fã bi na ebubuu ɔfasu no fã bi. Enti, na ɛyɛ mmerɛw ma nkonimdifo no sɛ wɔbɛfa Asiria ahenkurow no.

○ 2:11-13​—Te sɛ mmoa a wɔyɛ keka no, Asiriafo haw aman afoforo na wɔfow wɔn. Afei nso ɛte sɛ nea na gyata yɛ wɔn ɔman no sɛnkyerɛnne. Wohuu gyata ahoni pii wɔ Niniwe amamfo so.

○ 3:3, 4​—Te sɛ aguaman no, Niniwe de adamfofa ne mmoa ho bɔhyɛ dɛfɛdɛfɛ amanaman. Nanso wɔn a osum wɔn afiri saa no tee yaw wɔ ne kɔndua a ɛyɛ nhyɛso no ase, sɛnea ɛda adi wɔ Yuda hene Ahas asɛm no mu no.​—2 Beresosɛm 28:16, 20, 21

[Adaka wɔ kratafa 25]

BIBLE MU NSƐM A WƆAHWEHWƐ MU

○ Habakuk 1:2-4​—Habakuk gyidi a ɔwɔ wɔ Yehowa mu sɛ Onyankopɔn a ɔmpene bɔneyɛ so no kaa no ma obisaa nea enti a nsɛmmɔnedi kɔ so no. Ná ɔwɔ ɔpɛ sɛ ɔbɛma wɔateɛteɛ ne nsusuwii no. (2:1) Sɛ nea enti a wɔma nneɛma bi ho kwan no yɛ yɛn nwonwa a, ɛsɛ sɛ ahotoso a yɛwɔ wɔ Yehowa adetreneeyɛ mu no ma yɛhwehwɛ mmoa saa ara na ama yɛakari pɛ na yɛatwɛn no.​—Dwom 42:5, 11.

○ 2:5​—Babilonfo na na wɔte sɛ ɔbarima biako a ɔde n’akodi nhyehyɛe di aman so no. Te sɛ Sheol ne owu a wɔmmee da no, ɔhwehwɛe sɛ ɔkɔ so nya asraafo nkonimdi. (Fa toto Mmebusɛm 30:15, 16 ho.) Te sɛ nea asanom pii anya ne so nkɛntɛnso no, nkonimdi dii ne ti. Nanso ne nkonimdi akodi no baa awiei bere a Babilon hwee ase wɔ 539 A.Y.B. mu no.

○ 3:13​—Ná Onyankopɔn man a wapaw wɔn asra wɔn a wɔne Israel man no taa hu ne nkwagye tumi no. (Dwom 28:8, 9) Bere bi akyi no, ɛde Mesia, Onyankopɔn ɔsoro “ɔbea” no “aseni” no bae. (Genesis 3:15) Yehowa begye “aseni” no mufo a wɔaka, Yesu asuafo a wɔde honhom asra wɔn no nkaefo no nso afi Satan ne amanaman no ntua mu.​—Adiyisɛm 12:17.

[Mfonini wɔ kratafa 24]

Asiriafo ahemfi ho mfonini bi a fam tutufo A. H. Layard yɛe

[Mfonini Fibea]

Courtesy of the Trustees of the British Museum, London