Henanom Ankasa Na Wɔanya Ɔsoro Frɛ?

YEHOWA dɔ adesamma abusua no. Ɔdɔ yi yɛ kɛse araa ma ɔde ne Ba, Yesu Kristo mae sɛ agyede na ɔde asan agye nea yɛn nana Adam hweree no! Ɛyɛ dɛn ade? Ɔdesani nkwa a ɛyɛ pɛ ne ne hokwan ne ho anidaso ahorow nyinaa. (Yohane 3:16) Na agyede no yɛ Yesu dɔ ma adesamma a oyii adi kyerɛe.​—Mateo 20:28.

Wɔayi ɔsoro dɔ adi akyerɛ denam anidaso abien a egyina bo a Yesu agyede afɔrebɔ som so a Onyankopɔn de ama no hokwan a wɔabue no so. (1 Yohane 2:1, 2) Ansa na Yesu rewu sɛ onipa no, na anidaso biako pɛ a abue ama wɔn a wɔanya ɔsoro dom no ne asetra wɔ asase so paradise so. (Luka 23:43) Nanso, Pentekoste wɔ 33 Y.B. mu akyi no, Yehowa de ɔsoro anidaso bi maa “kuw ketewaa” bi. (Luka 12:32) Nanso dɛn na asi nnansa yi? Efi 1931 reba no, Ahenni nkrasɛm no atwe adwene asi “nguan foforo” no so kɛse, na efi 1935 reba no, Onyankopɔn nam Kristo so retwe saafo a wɔte sɛ nguan no aba ne nkyɛn. (Yohane 10:16; Adiyisɛm 7:9) Onyankopɔn de daa nkwa wɔ asase so paradise ho anidaso ahyɛ wɔn komam. Wɔpɛ sɛ wodi aduan pa, wodi mmoa so tumi wɔ ɔdɔ mu, na wɔne wɔn mfɛfo nnipa atreneefo bɔ fekuw daa.

Asɔfo ne Ahene Mmɔborɔhunufo

Esiane sɛ ɔdɔ kanyan Yesu ma ɔde ne nkwa mae sɛ agyede nti, akyinnye biara nni ho sɛ ɔbɛyɛ ɔsoro Hene mmɔborɔhunufo. Nanso, ɛnyɛ Yesu nkutoo na ɔbɛpɛgyaw adesamma aba pɛyɛ mu wɔ ne Mfirihyia Apem Ahenni no mu. Yehowa ayɛ nsiesiei na wɔanya ahene mmɔborɔhunufo afoforo wɔ ɔsoro. Yiw, “wɔbɛyɛ Onyankopɔn ne Kristo asɔfo, na wɔne no bedi ahene mfirihyia apem.”​—Adiyisɛm 20:1-6.

Yɔnko sodifo baahe na Kristo benya, na wɔpaw wɔn dɛn ma hokwan kɛse a ɛte sɛɛ yi? Wiɛ, ɔsomafo Yohane huu 144,000 ne Oguammaa, Yesu Kristo wɔ ɔsoro Bepɔw Sion so. Esiane sɛ “wɔatɔ wɔn afi asase no” nti, ɛbɛyɛ nea wonim sɛnea sɔhwɛ a wohyia, sintɔ ɔhaw ahorow ano a wogyina, amane a wobehu na wɔawu sɛ nnipa no te. (Adiyisɛm 14:1-5; Hiob 14:1) Enti, hwɛ sɛnea wɔbɛyɛ ahene mmɔborɔhunufo!

Honhom no Adanse

Nnipa 144,000 no ‘anya ɔsra afi ɔkronkronni no,’ Yehowa “hɔ.” (1 Yohane 2:20) Ɛyɛ ɔsra a ɛma wonya ɔsoro anidaso. Onyankopɔn ‘asɔ wɔn ano, na wama wɔn honhom no de ayɛ guaha ama wɔn wɔ wɔn koma mu.’​—2 Korintofo 1:21, 22.

Yiw, wɔn a wɔanya ɔsoro frɛ no wɔ adanse a efi Onyankopɔn honhom no hɔ a ɛkyerɛ sɛ ɛte saa. Paulo kyerɛw eyi ho asɛm wɔ Romafo 8:15-17 sɛ: “Na moannya akoayɛ honhom a mode besuro bio, na mmom moanya abagye honhom a ɛno mu na yɛteɛm sɛ: Abba, agya! Honhom no ara ne yɛn honhom di adanse sɛ yɛyɛ Onyankopɔn mma. Na yɛyɛ mma a, yɛyɛ adedifo nso, Onyankopɔn adedifo ne Kristo yɔnkodifo, nanso gye sɛ yɛne no hu amane ansa na wɔahyɛ yɛn ne no anuonyam bi.” Onyankopɔn honhom anaasɛ adeyɛ tumi so na wɔn a wɔasra wɔn no nam teɛm sɛ “Abba, Agya!”

Adanse titiriw a ɛkyerɛ sɛ wɔasra obi ma wanya ɔsoro frɛ no ne ɔba a ɔyɛ honhom anaasɛ su titiriw no. (Galatifo 4:6, 7) Onipa a ɔte saa no gye di pefee sɛ Onyankopɔn awo no sɛ honhom mu ɔba sɛ ɔsoro Ahenni no yɔnko adedifo 144,000 no mu biako. Obetumi adi adanse sɛ ne soro anidaso no mfi akɔnnɔ a n’ankasa nyae anaasɛ ne nsusuwii ara kwa; mmom no efi Yehowa esiane ade a Onyankopɔn honhom ayɛ wɔ ne ho nti.​—1 Petro 1:3, 4.

Onyankopɔn honhom kronkron nkɛntɛnso ase no, wɔn a wɔasra wɔn no honhom, anaasɛ su titiriw no yɛ ade sɛ tumi a ɛkanyan wɔn. Ɛkanyan wɔn ma wɔyɛ nea Onyankopɔn Asɛm ka wɔ ɔsoro anidaso ho no ho ade wɔ ɔkwan pa so. Wɔyɛ sɛnea Yehowa nam ne honhom kronkron no so ne wɔn di no ho ade ɔkwan pa so nso. Enti, wogye di pefee sɛ wɔyɛ Onyankopɔn honhom mu mma anaasɛ adedifo.

Sɛ wɔn a wɔasra wɔn no kenkan nea Onyankopɔn Asɛm ka wɔ ne honhom mu mma ne ɔsoro anidaso no ho a, adwene a wonya ntɛm ara ne sɛ wɔka wɔ wɔn komam sɛ ‘Ɛfa me ho!’ Yiw, wobua anigye so bere a wɔn Agya Asɛm no de ɔsoro akatua bi ho bɔhyɛ ma no. Wɔka sɛ, ‘Ɛno fa me ho!’ bere a wɔkenkan sɛ: “Adɔfo, afei yɛyɛ Onyankopɔn mma” no. (1 Yohane 3:2) Na sɛ wɔn a wɔasra wɔn no kenkan sɛ Onyankopɔn awo nnipa sɛ ‘wɔnyɛ n’abɔde no adekan’ a, adwene a wonya ne sɛ wobegye so sɛ ‘Yiw, atirimpɔw yi nti na ɔwoo me.’ (Yakobo 1:18) Wonim sɛ “wɔbɔɔ [wɔn] asu kɔɔ Kristo Yesu mu” ne ne wu mu. (Romafo 6:3) Enti wɔwɔ gyidi pintinn sɛ wɔyɛ Kristo honhom mu nipadua no fã, na wɔwɔ anidaso sɛ wobewu sɛnea owui no, na wɔanyan wɔn ma wɔanya ɔsoro asetra.

Sɛ wɔn a wɔasra wɔn no benya ɔsoro Ahenni no adi a, ɛsɛ sɛ ‘wɔbɔ mmɔden hyɛ wɔn frɛ ne wɔn paw no mu den.’ (2 Petro 1:5-11) Wɔnam gyidi mu, na wɔkɔ so nyin honhom mu, te sɛ nea wɔn a wɔwɔ asase so anidaso no nyin no. Enti dɛn bio na ɛwɔ hɔ ka adanse a honhom no di no ho?

Nea Enti a Wodi

Ɛnyɛ nnɛyi asase so asetra ho anigye a Kristofo a wɔasra wɔn no nni nti na wɔpɛ sɛ wɔkɔ soro. (Fa toto Yuda 3, 4, 16 ho.) Mmom no, honhom kronkron no di wɔn honhom adanse sɛ wɔyɛ Onyankopɔn mma. Wogye di nso sɛ wɔde wɔn aka apam foforo no ho. Wɔn a wɔyɛɛ apam yi ne Yehowa Nyankopɔn ne honhom mu Israel. (Yeremia 31:31-34; Galatifo 6:15, 16; Hebrifo 12:22-24) Apam yi a Yesu mogya a ohwie gui na ɛma ɛyɛɛ adwuma no paw nkurɔfo bi ma Yehowa din, na saa Kristofo a wɔasra wɔn yi yɛ Abraham “asefo” mufo. (Galatifo 3:26-29; Asomafo no Nnwuma 15:14) Apam foforo no bɛkɔ so ayɛ adwuma akosi sɛ wobenyan honhom mu Israelfo nyinaa akɔ asetra a owu nnim mu wɔ ɔsoro.

Bio nso, wɔn a wɔanya ɔsoro frɛ ampa no gye di pefee sɛ wɔyɛ Ahenni apam no mufo nso. Yesu kaa n’ankasa ne n’akyidifo ntam apam yi ho asɛm bere a ɔkaa eyi no, sɛ: “Na mone wɔn a wɔda so ka me ho me sɔhwɛ mu. Na me nso sɛnea m’agya ayi ahenni ama me no, saa ara na meyi mama mo, na moadidi na moanom me pon so wɔ m’ahenni mu, na moatra nhengua so abu Israel mmusuakuw dumien no atɛn.” (Luka 22:28-30) Wobuee apam no ano maa Yesu asuafo no denam honhom kronkron a wɔde sraa wɔn Pentekoste da, 33 Y.B. mu no so. Ɛbɛkɔ so ayɛ adwuma daa wɔ Kristo ne ne mfɛfo ahene no ntam.​—Adiyisɛm 22:5.

Wɔn a wɔanya ɔsoro frɛ no nim pefee sɛ wɔyɛ apam foforo no ne Ahenni apam no mufo. Enti, wodi sɛnkyerɛnne kwan so abodoo no na wɔnom nsa no bi wɔ afe afe Awurade Anwummeduan nkaedi, anaasɛ Yesu Kristo wu Nkae no ase. Abodoo a mmɔkaw nnim no yɛ Yesu nipadua a bɔne nni ho no ho sɛnkyerɛnne, na bobesa no yɛ ne mogya a ɛyɛ pɛ a ohwie gui wɔ owu mu de hyɛɛ apam foforo no mu den no ho sɛnkyerɛnne.​—1 Korintofo 11:23-26.

Sɛ Yehowa de ɔsoro asetra ho nokware anidaso no ahyɛ wo mu a, wode wo ho to so. Wobɔ mpae de da saa anidaso no adi. Egye w’adwene nyinaa, na worentumi nyi mfi wo mu. Wowɔ honhom fam anidaso a ebunkam wo so. Nanso sɛ w’adwene yɛ wo ntanta ne naa a, ɛnde ɛnsɛ sɛ wudi Awurade Anwummeduan no nsɛnkyerɛnnede no bi.

Dɛn Nti na Wonya Adwene a Ɛnteɛ?

Ebia ebinom bedi mfomso adi Nkaedi nsɛnkyerɛnnede no bi efisɛ wonnye ntom ankasa sɛ saa ɔsra no ‘mfi nea ɔpɛ anaa nea otu mmirika no, na mmom efi Onyankopɔn a ohu mmɔbɔ no.’ (Romafo 9:16) Ɛnyɛ onii no na ɛsɛ sɛ osi gyinae sɛ ɔbɛpɛ sɛ wɔyɛ no apam foforo no muni na ama wayɛ Kristo yɔnko ɔdedifo wɔ ɔsoro Ahenni no mu. Nea Yehowa paw no na ehia. Wɔ tete Israel no, Onyankopɔn paw wɔn a wɔbɛsom sɛ n’asɔfo, na okum Kora wɔ ahomaso a ɔde hwehwɛɛ asɔfodi a wofi soro de maa Aaron abusua no ho. (Exodus 28:1; Numeri 16:4-11, 31-35; 2 Beresosɛm 26:18; Hebrifo 5:4, 5) Saa ara nso na sɛ obi da ne ho adi kyerɛ sɛ obi a wɔafrɛ no sɛ ɔmmɛka ɔsoro ahene ne ɔsɔfo no ho bere a Onyankopɔn mfrɛɛ no a, ɛrensɔ Yehowa ani.​—Fa toto 1 Timoteo 5:24, 25 ho.

Ebia obi bedi mfomso asusuw sɛ wanya ɔsoro frɛ no esiane nkate a ano yɛ den a ɔhaw a emu yɛ den ma onya nti. Obi hokafo wu anaasɛ asiane afoforo bi remma ɔnkyerɛ asetra wɔ asase so ho anigye bio. Anaasɛ ebia ne yɔnko a ɔne no bɔ paa bɛkyerɛ sɛ ɔka nkaefo no ho, na ebia ɔbɛpɛ sɛ onya anidaso koro no ara bi. Nneɛma a ɛte sɛɛ betumi ama wate nka sɛ obenya ɔsoro asetra. Nanso ɛnyɛ ɔkwan a Onyankopɔn fa so ma obiara abayɛ honhom nen. Sɛ tebea bɔne anaasɛ nkate mu ɔhaw a ɛfa asase so asetra ho nti, obi nya ɔpɛ sɛ ɔbɛkɔ ɔsoro a, ɛbɛkyerɛ sɛ ɔyɛ bonniayɛ wɔ Onyankopɔn atirimpɔw a ɛfa asase ho no ho.

Obi kan nyamesom mu adwenhorow nso betumi ama wadi mfomso aka sɛ wanya ɔsoro frɛ. Ebia na bere bi ɔyɛ atoro som bi a ɛkyerɛ sɛ ɔsoro asetra ne anokwafo anidaso biako pɛ no muni. Enti, ehia sɛ Kristoni hwɛ yiye na nkate ne kan adwenhorow a ɛnteɛ amma wanhinhim.

Nhwehwɛmu a Wɔtɔ Wɔn Bo Ase Yɛ ho Hia

Ɔsomafo Paulo kaa asɛm a ɛho hia titiriw bi bere a ɔkyerɛw eyi no: “Enti nea obedi abodoo yi anaasɛ ɔbɛnom Awurade kuruwa yi ano sɛnea ɛnsɛ no, obedi Awurade nipadua ne ne mogya ho fɔ. Na ma onipa nsɔ ne ho nhwɛ, na ɔmfa so nni abodoo no bi, na ɔnnom kuruwa no ano bi. Na nea odi na ɔnom [sɛnea ɛnsɛ] no, odi nom de atemmu ba n’ankasa ne ho so, efisɛ wammu nipadua no yiye.” (1 Korintofo 11:27-29) Enti, ɛsɛ sɛ Kristoni a wɔabɔ no asu, a nnansa yi mfe no mu no wafi ase susuw sɛ wanya ɔsoro frɛ no de ahwɛyiye ne mpaebɔ susuw asɛm no ho yiye.

Onipa a ɔte sɛɛ betumi abisa ne ho sɛ: ‘So afoforo adaadaa me ma misusuw ɔsoro asetra ho?’ Eyi bɛyɛ nea ɛmfata, efisɛ Onyankopɔn mpaw obiara sɛ ɔnhwehwɛ afoforo mma saa hokwan no. Ɛnyɛ nea nsusuwii hunu bɛkyerɛ sɛ Onyankopɔn asra no, na ɔnsra Ahenni adedifo denam te a ɔma wɔte nne ahorow a ɛka nkrasɛm a ɛkyerɛ sɛ wapaw wɔn no so.

Ebinom betumi abisa wɔn ho sɛ: ‘Ansa na merebɛyɛ Kristoni no, so na mede nnuru di dwuma ɔkwammɔne so? So mede nnuru a enya nkate so tumi di dwuma? So wɔasa me yare wɔ adwene ne nkate mu ɔhaw ho?’ Ebinom aka sɛ mfiase no wɔko tiaa nea wosusuwii sɛ ɛyɛ ɔsoro anidaso no. Afoforo aka sɛ Onyankopɔn gyee wɔn asase so anidaso bere bi, na awiei koraa no, ɔmaa wɔn ɔsoro anidaso. Nanso eyi ne ɔsoro nneyɛe nhyia. Afei nso, gyidi mma adwenem naayɛ; ɛyɛ nokware.​—Hebrifo 11:6.

Obi betumi abisa ne ho nso sɛ: ‘So mepɛ dibea? So m’ani bere dibea mprempren, anaa sɛ ahene ne asɔfo a wɔka Kristo ho no mu biako?’ Bere a na wɔhwehwɛ wɔn a wɔbɛkɔ ɔsoro Ahenni no mu wɔ afeha a edi kan Y.B. mu no, na ɛnyɛ Kristofo a wɔasra wɔn nyinaa na wɔwɔ gyinabea a asɛyɛde wom sɛ sodikuw no mufo anaa mpanyimfo anaa asafo mu asomfo. Na wɔn mu pii yɛ mmea, na na wonni tumi titiriw biara; saa ara nso na honhom a wɔde sra no amma wɔannya Onyankopɔn Asɛm mu ntease soronko bi, efisɛ Paulo hui sɛ ehia sɛ ɔkyerɛkyerɛ na otu wɔn a wɔasra wɔn no mu binom fo. (1 Korintofo 3:1-3; Hebrifo 5:11-14) Wɔn a wɔanya ɔsoro frɛ no mmu wɔn ho sɛ nnipa atitiriw, na wɔntwe adwene nsi yɛ a wɔyɛ wɔn a wɔasra wɔn no so. Mmom no, wɔda ahobrɛase a wɔhwehwɛ fi wɔn a wɔwɔ “Kristo adwene” hɔ no adi ma ɛfata. (1 Korintofo 2:16) Wonim nso sɛ ɛsɛ sɛ Kristofo nyinaa, sɛ ebia wɔn anidaso yɛ ɔsoro de anaasɛ asase so de no du Onyankopɔn trenee ahwehwɛde ahorow no.

Kyerɛ a obi kyerɛ sɛ wanya ɔsoro frɛ no mma onnya adiyi atitiriw. Onyankopɔn wɔ kaseɛbɔ kwan a ɔnam so de honhom mu aduan ma n’asase so ahyehyɛde no. (Mateo 24:45-47) Enti ɛnsɛ sɛ obiara susuw sɛ yɛ a ɔyɛ Kristoni a wɔasra no no ma onya nyansa a ɛkorɔn sen “nnipakuw kɛse” a wɔwɔ asase so anidaso no. (Adiyisɛm 7:9) Ɛnyɛ adansedi mu ahokokwaw, Kyerɛwnsɛm mu nsemmisa a wobua, anaasɛ Bible mu ɔkasa ahorow a wɔma no na ɛkyerɛ sɛ wɔde honhom asra obi, efisɛ Kristofo a wɔwɔ asase so anidaso no nso bɔ nneɛma yi mu mmɔden yiye. Te sɛ wɔn a wɔasra wɔn no, wɔn nso wobu ɔbra a ɛyɛ nhwɛso pa sɛ Kristofo. Enti, na Samson ne afoforo a wɔtraa ase ansa na Kristofo mmere no reba no wɔ Onyankopɔn honhom, na na wɔyɛ nsi na wɔwɔ ntease. Nanso, na saa ‘adansefo mununkum kɛse’ no mufo yi mu biara nni hɔ a ɔwɔ ɔsoro anidaso.​—Hebrifo 11:32-38; 12:1; Exodus 35:30, 31; Atemmufo 14:6, 19; 15:14; 1 Samuel 16:13; Hesekiel 2:2.

Kae Nea Ɔpaw Wɔn No

Sɛ mfɛfo gyidini bisa ɔsoro frɛ no ho asɛm a, ɔpanyin a wɔapaw no anaasɛ Kristofo afoforo a wɔn ho akokwaw betumi ne no asusuw asɛm no ho. Nanso obi rentumi nsi saa gyinae yi mma ɔfoforo, na Yehowa na ɔde ɔsoro anidaso no ma. Enhia da sɛ obi a wanya ɔsoro frɛ ampa no bisa ne mfɛfo Kristofo sɛ ɔwɔ anidaso a ɛte sɛɛ no anaa. Wɔn a wɔasra wɔn no ‘mfi aba a ɛporɔw mu, na mmom wɔafi nea ɛmporɔw mu, ɛne sɛ wɔnam Onyankopɔn asɛm a ɛte ase na ɛbɛtra hɔ no so awo wɔn foforo.’ (1 Petro 1:23) Onyankopɔn nam ne honhom ne n’Asɛm so dua “aba” a ɛma onipa no yɛ “abɔde foforo” a ɔwɔ ɔsoro anidaso. (2 Korintofo 5:17) Yiw, Yehowa na ɔpaw obi.

Enti, sɛ yɛne afoforo sua Bible no a, ɛnyɛ papa sɛ yɛde nyansahyɛ bɛma sɛ wɔmmɔ mmɔden nhwehwɛ mu nhu sɛ wɔwɔ ɔsoro frɛ no anaa. Nanso, sɛ Kristoni bi a wɔasra no anni nokware na wohia obi asi n’ananmu nso ɛ? Ɛnde ntease wom sɛ yɛbɛka sɛ Onyankopɔn de ɔsoro frɛ no bɛma obi a ɔde nhwɛso pa asom yɛn soro Agya no mfe pii wɔ nokwaredi mu no.

Ɛnnɛ, ɛnyɛ Onyankopɔn nkrasɛm no mu asɛntitiriw ne sɛ nnipa bɛba abɛyɛ Kristo ɔsoro ayeforo no mufo. Mmom no, “honhom no ne ayeforo no kɔ so ka sɛ: ‘Bra!’” Eyi yɛ nsa a wɔto frɛ obi sɛ ommenya nkwa wɔ asase so paradise mu. (Adiyisɛm 22:1, 2, 17, NW) Bere a wɔn a wɔasra wɔn no di adwuma yi anim no, wɔda “ahobrɛase adwene” adi, na wɔyere wɔn ho ‘hyɛ wɔn frɛ ne wɔn paw den.’​—Efesofo 4:1-3; 2 Petro 1:5-11.