Bible No​—Onyankopɔn Aboɔden Bo Afã Horow Mu A Yɛbɛhwehwɛ!

WƆ 1867 mu no, na South Africa okuafo bi a wɔfrɛ no Schalk van Niekerk rehwɛ mmofra a wɔde abo di agoru. Ohuu ɔbo soronko bi a ɛhyerɛn na ɛyɛ fɛ. Mmofra no maame kae sɛ: “Sɛ wopɛ a, wubetumi afa.” Nanso, Van Niekerk de ɔbo no kɔɔ aboɔden abo ho ɔdenimfo bi hɔ kɔhwɛɛ ɔbo ko a ɛyɛ. Mmofra no anhu sɛ na wɔde adɛnkyɛmmo kɛse bi a ne bo yɛ £500 na edi agoru!

So ebetumi aba sɛ wo nso wowɔ ɔbohene bi a ne bo yɛ den a wunnim? Sɛ nhwɛso no, nnipa pii wɔ Bible, efisɛ ɛne nhoma a wɔatɔ sen biara, na ne nyinaa anaa n’afã horow bi wɔ kasa horow bɛboro 1,900 mu. Nanso, nnipa pii nkenkan Bible no da, ma enti emu nsɛm kakraa bi na wonim.

Bible no kyerɛ sɛ efi “Onyankopɔn home mu,” ma enti ɛyɛ Onyankopɔn Asɛm. (2 Timoteo 3:16; fa toto 1 Tesalonikafo 2:13 ho.) Ɛyɛ adesamma agyapade a ɛsom bo sen biara. Yɛnam so sua sɛnea yebenya nea eye sen biara afi asetra mu mprempren, na nea ɛho hia titiriw no, sɛnea yebenya daa nkwa! (Yohane 17:3, 17) So biribi wɔ hɔ a ɛsom bo kɛse sen saa?

Nanso, sɛ obi bɛkyerɛ aboɔden bo yi ne n’afã horow nyinaa ho anisɔ a, ɛsɛ sɛ ohu mu nsɛm. Sɛ wudi kan hwɛ a, ɛbɛyɛ te sɛ nea ɛyɛ den yiye. Anyɛ yiye koraa no, Bible no yɛ nhoma ahorow 66 a wɔaka abom. Dɛn na ɛwɔ saa nhoma ahorow no mu? So biribi nti na wɔahyehyɛ no sɛnea ɛte no? Sɛ saa a, ɛbɛyɛ dɛn na obi atumi ahu nkrasɛm atitiriw bi wɔ Bible no mu?

Bible no mu nsɛm a wubehu no gye adwumaden. Nanso te sɛ abohene ankasa no, Bible no afã horow ne wɔn ho hyia pɛpɛɛpɛ. Sɛ yesusuw emu nsɛm ho kakra a, yebehu sɛ ɛte saa.

Hebri Kyerɛwnsɛm No​—Ɛtwe Adwene Si Kristo So

Wɔakyɛ Bible no mu ayɛ no “Apam Dedaw” ne “Apam Foforo.” Nanso eyi yɛ nsɛmfua a wɔde adi dwuma wɔ ɔkwan a ɛnteɛ so, ɛma wonya adwene sɛ “Apam Dedaw” no atwam, na mfaso kakraa bi na ɛwɔ so. Edin a ɛfata kɛse ma Kyerɛwnsɛm no fã yi ne Hebri Kyerɛwnsɛm no, efisɛ Hebri kasa titiriw na wodii kan de kyerɛw ɔfã yi. Wɔde Hela kasa na ɛkyerɛw “Apam Foforo” no wɔ afeha a edi kan Y.B. mu, enti, ɛfata yiye sɛ yɛbɛfrɛ no Kristofo Hela Kyerɛwnsɛm.

Bible no nhoma a edi kan a ɛne Genesis no, ka mfe pii a atwam bere a Onyankopɔn bɔɔ ɔsoro ne asase, na ofii ase siesie asase na ɔde ama onipa atra so no ho asɛm. Wɔbɔɔ nnipa baanu a wodi kan no a na wɔyɛ pɛ; nanso wɔpaw bɔne kwan, na ɛde amanehunu brɛɛ wɔn asefo. Nanso, te sɛ aboɔden bo a wohu wɔ hann wisiwisi mu no, Bible no de anidaso hann bi ma adesamma a wɔayɛ bɔne no: ‘aseni’ bi a awiei koraa no obesiesie nea bɔne ne owu de aba no. (Genesis 3:15) Aseni yi bɛyɛ hena? Genesis fi ase hwehwɛ Aseni a ɔbɛba yi abusua, na ɛtwe adwene si Aseni no nananom anokwafo binom so, te sɛ Abraham, Isak, ne Yakob.

Afei Exodus ka Mose awo ho asɛm. Mose asetra yɛ Aseni a ɔbɛba no ho mfonini wɔ akwan pii so. Ɔhaw du akyi no, Israel fi Misraim na wɔhyehyɛ wɔn sɛ Onyankopɔn man a wapaw wɔn wɔ Bepɔw Sinai so. Leviticus da Onyankopɔn ahyɛde horow ma Israel Lewifo asɔfokuw no adi. Numeri ka mmere a wɔkan Israelfo no (denam nnipakan so) ne nsɛm a esisii wɔ Israelfo sare so akwantu no mu ho asɛm. Na afei, bere a na Israelfo no ayɛ krado sɛ wɔrebɛhyɛn Bɔhyɛ Asase no so no, wɔn nsa ka Mose afotu ahorow a etwa to no. Eyi na Deuteronomium ka ho asɛm. Mose retwe adwene asi Aseni no so no, ɔhyɛ ɔman no sɛ wontie ‘odiyifo a Onyankopɔn bɛma no so’ no.​—Deuteronomium 18:15.

Nea edi hɔ ne abakɔsɛm nhoma ahorow no. Wɔahyehyɛ eyinom mu pii nnidiso nnidiso sɛnea bere a emu nsɛm sisii no te. Yosua ka Bɔhyɛ Asase no so nkonimdi ne emu kyekyɛ ho asɛm. Atemmufo ka nsɛm a ɛyɛ nwonwa a esisii bere a na atemmufo ahorow di Israel so no. Rut ka ɔbea bi a osuro Onyankopɔn, a ɔtraa ase wɔ atemmufo mmere no mu, na onyaa hokwan bɛyɛɛ Yesu Kristo nanabea ho asɛm.

Nanso, bere a atemmufo no de dii hene no baa awiei. Samuel Nhoma a Edi Kan ka Israel hene a odi kan a ɔne Saul ahenni a ɛyɛ awerɛhow no ho asɛm, sɛnea odiyifo Samuel hui. Samuel Nhoma a Ɛto so Abien ka Dawid, Saul ɔdedifo nniso pa no ho asɛm. Ahene Nhoma a Edi Kan ne Nea Ɛto so Abien no ka efi Salomo anuonyam nniso no so kosi nnommumfa a ɛyɛ awerɛhow mu a Israel kɔe wɔ Babilon wɔ 607 A.Y.B. mu no so ho asɛm kyerɛ yɛn. Beresosɛm Nhoma a Edi Kan ne Nea Ɛto so Abien san ka abakɔsɛm yi sɛ ɔman a afi nnommumfa mu aba ho asɛm. Awiei koraa no, Esra, Nehemia, ne Ester ka sɛnea wɔsan de Israelfo no baa wɔn man mu, ne wɔn abakɔsɛm a esii wɔ ɛno akyi no mu binom ho asɛm.

Anwensɛm nhoma ahorow no na edi hɔ, na ekura anwensɛm a eye dɛ yiye a wɔakyerɛw pɛn no mu binom. Hiob de mudi mu kura wɔ amanehunu mu ne n’akatua ho asɛm a ɛyɛ anigye ma. Nnwom nhoma no kura ayeyi nnwom ma Yehowa, ne mpaebɔ a wɔde bisa mmɔborohunu ne mmoa. Eyinom akyekye Onyankopɔn nkoa bebree werɛ. Afei nso, Nnwom nhoma no kura nkɔmhyɛ pii a ɛma yenya Mesia no ba mu ntease foforo. Mmebusɛm ne Ɔsɛnkafo nam mmebusɛm ntiantiaa so da ɔsoro nyansa afã horow adi, na Nnwom mu Dwom yɛ ɔdɔ ho anwensɛm a ɛyɛ dɛ yiye a ekura nkɔmhyɛ nsɛm a emu dɔ yiye.

Nhoma 17 a edi hɔ no​—fi Yesaia kosi Malaki​—yɛ nkɔmhyɛ titiriw. Akyerɛwfo no din da ne nyinaa so gye Kwadwom nkutoo. Nkɔmhyɛ no mu pii anya mmamu a ɛyɛ nwonwa dedaw. Ɛtwe adwene si nsɛm a ebesisi wɔ yɛn nna yi mu ne daakye nso no so.

Enti Hebri Kyerɛwnsɛm no da sɛnea wɔkyerɛw no mu nsonoe adi. Nanso, ne nyinaa kura asɛmti biako. Emu nkɔmhyɛ ahorow, anato ahorow, ne anwonwasɛm a esisii de nyansa ne nkɔmhyɛ hyerɛn.

Kristofo Hela Kyerɛwnsɛm No​—Aseni no Pue

Efi bere a onipa tɔɔ bɔne mu no, mfe mpem anan atwam. Mpofirim ara Aseni a wɔahwɛ no kwan akyɛ, Mesia no a ɔne Yesu no pue wɔ asase so! Kristofo Hela Kyerɛwnsɛm no kyerɛw onipa abakɔsɛm mu onipa titiriw yi som adwuma ho asɛm wɔ nhoma ahorow anan a ɛfoa wɔn ho wɔn ho nsɛmmoa a wɔfrɛ no Nsɛmpa no mu. Eyi ne Mateo, Marko, Luka, ne Yohane.

Hwɛ sɛnea Nsɛmpa anan kyerɛwtohɔ ahorow no som bo ma Kristofo! Ɛka Yesu anwonwade ahorow, ne mmebu a ntease wom, ne Bepɔw so Asɛnka, ahobrɛase ho nhwɛso a ɔyɛe, n’ayamhyehye ne osetie kɛse a ɔyɛ maa n’Agya, ne dɔ ma ne “nguan,” ne awiei koraa no, n’afɔrebɔ wu ne n’anuonyam wusɔre ho asɛm kyerɛ yɛn. Nsɛmpa no sua ma yenya ɔdɔ ma Onyankopɔn Ba no wɔ yɛn mu. Nea ɛsen ne nyinaa no, ɛtwe yɛn bɛn nea ɔsomaa Kristo​—Yehowa Nyankopɔn. Ɛfata sɛ yɛkenkan Asɛmpa kyerɛwtohɔ yi mpɛn pii.

Asomafo no Nnwuma fi ase fi faako a Asɛmpa no de asɛm no sii no. Ɛka Kristofo asafo no mfe a edi kan fi Pentekoste nna no mu besi Paulo afiasenna wɔ Roma wɔ 61 Y.B. mu ho asɛm. Saa nhoma yi mu na yɛkenkan Kristoni mogya dansefo a odi kan a ɔne Stefano, Saulo a akyiri yi ɔbɛyɛɛ Paulo no adwensakra, Amanaman Mufo Kristofo a wodi kan a wɔde wɔn baa Kristosom mu, ne Paulo asɛmpaka akwantu a ɛyɛ anigye no ho asɛm. Kyerɛwtohɔ ahorow yi yɛ anigye na ɛhyɛ gyidi den nso.

Afei nhoma anaa nkrataa aduonu biako di so. Wɔde Kristofo anaa asafo ahorow a wɔde nhoma no kɔmaa wɔn no din na ɛtoo emu 14 a edi kan a Paulo kyerɛwee no so; na wɔde akyerɛwfo no din too nea aka no so​—Yakobo, Petro, Yohane, ne Yuda. Afotu ne nkuranhyɛ pii a nhoma yi kurae bɛn ara ni! Ɛkyerɛkyerɛ nkyerɛkyerɛ ne nkɔmhyɛ ahorow mmamu mu. Ɛboa Kristofo ma wɔtwe wɔn ho fi wiase bɔne a ɛsɛ sɛ wɔbɔ wɔn bra wom no ho. Esi sɛnea ehia sɛ wonya onuadɔ ne Onyankopɔn su afoforo so dua. Ɛde asafo mu nhyehyɛe pa wɔ honhom mu mpanyimfo akanni ase ma.

Sɛnea Hebri Kyerɛwnsɛm no de nkɔmhyɛ na ewiei no, saa ara na Hela Kyerɛwnsɛm no nso yɛ. Adiyisɛm a ɔsomafo Yohane kyerɛwee bɛyɛ 96 Y.B. no ka nkɔmhyɛ ne Bible asɛmti titiriw no bom​—Yehowa din ho tew denam ne Mesia Ahenni no so. Anisoadehu a ɛtoatoa so da Satan wiase bɔne no nyamesom, sraadi, ne amammui tumi horow no sɛe adi pefee. Wɔde Kristo ahenni kurow, a ɛtwe n’adwene si asase so nneɛma sohwɛ so no si eyi ananmu. Wɔ Ahenni yi nniso ase no, Onyankopɔn hyɛ bɔ sɛ “ɔbɛpopa . . . nusu nyinaa. Na owu nni hɔ bio.”​—Adiyisɛm 21:4.

Ɛnde, so sɛnea Bible no yɛ aboɔden bo a edi mũ a ɛda ɔsoro hann adi no ho asemmisa bi wɔ hɔ? Sɛ wonkenkan ne nyinaa a, dɛn nti na wumfi ase nyɛ saa mprempren ara? Sɛnea emu nsɛm ne wɔn ho hyia bɛtwetwe wo, ne hyerɛn bebue w’ani, ne fɛ bɛkanyan wo, na emu nsɛm bɛma w’ani agye. Nokwarem no, ɛyɛ ‘akyɛde a ɛyɛ pɛ a efi hann Agya no nkyɛn.’​—Yakobo 1:17.

[Nsɛm a wɔahyehyɛ wɔ kratafa 28, 29]

BIBLE NO MU NHOMA AHOROW

Ɛkyerɛ ɔkyerɛwfo no, baabi a wɔkyerɛwee, bere a wɔkyerɛw wiei, ne bere a nhoma no mu nsɛm sisii wom no tenten.

Wontumi nhu nhoma no bi akyerɛwfo ankasa ne baabi pɔtee a wɔkyerɛw no yiye. Mmere no pii bɛn ho kɛkɛ, sɛnkyerɛnnede a. kyerɛ “wɔ akyi,” b. kyerɛ “ansa na ɛreba,” na c. kyerɛ “circa,” anaa “bɛyɛ”.

Hebri Kyerɛwsɛm no mu Nhoma Ahorow (A.Y.B)

Exodus Mose Sare so 1512 1657-1512

Leviticus Mose Sare so 1512 ɔsram 1 (1512)

Deuteronomium Mose Moab sare so 1473 asram 2 (1473)

Yosua Yosua Kanaan c. 1450 1473-c. 1450

Atemmufo Samuel Israel c. 1100 c. 1450-c. 1120

2 Samuel Gad; Natan Israel c. 1040 1077-c. 1040

2 Beresosɛm Esra Yerusalem (?)  c. 460 1037-537

Ezra Esra Yerusalem c. 460 537-c. 467

Nehemia Nehemia Yerusalem 443 akyi 456–443 akyi

Ɔsɛnkafo Solomon Yerusalem b. 1000

Yesaia Yesaia Yerusalem a. 732 c. 778-a. 732

Hesekiel Hesekiel Babilon c. 591 613-c. 591

Daniel Daniel Babilon c. 536 618-c. 536

Yoel Yoel Yuda c. 820 (?)

Amos Amos Yuda c. 804

Obadia Obadia c. 607

Yona Yona c. 844

Mika Mika Yudah b. 717 c. 777-717

Nahum Nahum Yudah b. 632

Habakuk Habakuk Yudah c. 628 (?)

Sefania Sefania Yudah b. 648

Kristofo Hela Kyerɛwnsɛm no mu Nhoma Ahorow (A.Y.B)

Mateo Mateo Palestina c. 41 2 A.Y.B.–33 Y.B

Marko Marko Roma c. 60-65 29-33 Y.B.

Luka Luka Kaesarea c. 56-58 3 A.Y.B.–33 Y.B.

Asomafo Nnwuma Luka Roma c. 61 33–c. 61 Y.C.

Romafo Paulo Korinto c. 56

1 Korintofo Paulo Efeso c. 55

2 Korintofo Paulo Makedonia c. 55

Efesofo Paulo Roma c. 60-61

Filipifo Paulo Roma c. 60-61

Kolosefo Paulo Roma c. 60-61

1 Tesalonikafo Paulo Korinto c. 50

2 Tesalonikafo Paulo Korinto c. 51

1 Timoteo Paulo Makedonia c. 61-64

2 Timoteo Paulo Roma c. 65

Tito Paulo Makedonia (?) c. 61-64

Filemon Paulo Roma c. 60-61

Hebrifo Paulo Roma c. 61

1 Petro Petro Babilon c. 62-64

2 Petro Petro Babilon (?) c. 64