‘Gu Anansesɛm Huhuw No’

NNIPA ho osuahu ahorow ne wɔn ho nsɛm pii wɔ Bible no mu. Ɛnyɛ n’akenkan nko na yɛn ani gye ho na mmom yenya mu mfaso nso. Ɔsomafo Paulo kyerɛw kɔmaa Kristofo asafo a na ɛwɔ Roma no sɛ: “Biribiara a wɔakyerɛw ato hɔ no, wɔakyerɛw ama yɛn kyerɛkyerɛ sɛ yɛmfa boasetɔ ne kyerɛw nsɛm no mu awerɛkyekye so nnya anidaso.”—Romafo 15:4.

Paulo ankasa kaa osuahu ahorow no bi kyerɛe. Bible no ka Paulo ne Barnaba asɛmpatrɛw akwantu a edi kan no awiei ho asɛm sɛ: “Na wɔbae [Siriafo kurow Antiokia mu] na wɔfrɛɛ asafo no boaa ano no, wɔkaa nea Onyankopɔn de wɔn akɔyɛ nyinaa.” (Asomafo no Nnwuma 14:27) Akyinnye biara nni ho sɛ saa osuahu ahorow yi hyɛɛ anuanom no nkuran kɛse.

Nanso, ɛnyɛ osuahu ahorow nyinaa na ɛhyɛ nkuran. Paulo fi honhom mu bɔɔ Timoteo kɔkɔ sɛ: “Mmerewa anansesɛm huhuw no de, gu.” (1 Timoteo 4:7) Na ɔkyerɛw kɔmaa Tito sɛ ɛnsɛ sɛ Kristofo anokwafo yɛ ‘aso ma Yudafo anansesɛm ne nnipa a wɔdan wɔn ho fi nokware ho no ahyɛde.’—Tito 1:14.

Na dɛn ne saa anansesɛm huhuw anaa anansesɛm yi? Nsɛm abien yi fi Hela asɛmfua myʹthos (“atetesɛm”) mu. The International Standard Bible Encyclopaedia ka sɛ asɛmfua yi ka “(nyamesom) ho anansesɛm a ɛnyɛ nokware.”

Ná anansesɛm a ɛtete saa abu so wɔ Paulo nna no mu. Ɛho nhwɛso bi ne Tobit atoro nhoma no a ebia wɔkyerɛwee bɛboro mfe ahaanu ansa na Paulo mmere no reba no. Saa asɛm yi ka Tobit, Yudani bi a na ɔpɛ nyamesom a n’ani furae bere a anomaa bin tɔɔ n’ani so no ho asɛm. Ɛno akyi, ɔsomaa ne babarima Tobias sɛ ɔnkɔdan ne ka bi mma no. Wɔ ɔsoro bɔfo bi akwankyerɛ ase no, Tobias nya apataa bi koma, ne mmerɛbo, ne ne bɔnwoma wɔ kwan so. Nea edi hɔ no, ohyia okunafo bi a na waware mmarima baason nanso ɔda so ara yɛ ɔbaabun esiane sɛ honhommɔne bi kunkum ne kununom no mu biara anadwo a wɔyɛɛ no ayeforo nti. Ɔbɔfo no hyɛ Tobias nkuran ma ɔware okunafo no, na ɔhyew apataa no koma ne ne mmerɛbo no de pam honhommɔne no. Akyiri yi Tobias de bɔnwoma no bue ne papa ani.

Ɛda adi sɛ asɛm yi yɛ atosɛm. Sɛ yɛde nsɛnhuhuw ne gyidihunu a ɛyɛ to nkyɛn a, mfomso nso wom. Sɛ nhwɛso no, kyerɛwtohɔ no ka sɛ Tobit huu kusuu fam mmusuakuw no atuatew ne nnommum mu a Israelfo no kɔe wɔ Niniwe no, Israelfo abakɔsɛm mu nsɛm a mfe 257 na ɛda ntam no. Nanso, asɛm no ka sɛ Tobit wui no na wadi mfe 112.—Tobit 1:4, 11; 14:1, The Jerusalem Bible.

Anansesɛm a ɛtete sɛɛ nni “nsɛm pa a eye” a Onyankopɔn asomfo anokwafo kae no mu. (2 Timoteo 1:13) Ɛyɛ nsusuwii hunu, nsɛm a ɛne nokwasɛm bɔ abira, nsɛm a mmerewa a wonsuro Onyankopɔn kekae. Eyinom ne anansesɛm ahorow a ɛsɛ sɛ Kristofo gu no.

Nokwasɛm a Wɔsɔ Hwɛ

Anansesɛm a ɛtete saa abu so nnɛ. Paulo kyerɛwee sɛ: “Ɛbere bi bɛba a [nnipa rentie] ɔkyerɛ pa a eye no, na . . . wobeyi wɔn aso afi nokware ho, na wɔadan akotie anansesɛm.” (2 Timoteo 4:3, 4) Anansesɛm a ɛfa anwonwade ahorow ho abu so wɔ asase yi afã bi na agye din yiye. Enti, eye sɛ Kristofo fi nyansam ‘sɔ hwɛ’ sɛ nsɛm a ɛfa ɔsom ho no ne Bible no hyia anaa.—Hiob 12:11.

Ɛda adi pefee sɛ nsɛm no mu pii ne Bible no nhyia. Sɛ nhwɛso no, wɔ wiase no afã pii no, wɔtaa te nsɛm a ɛhyɛ onipa kra a enwu da ho nkuran. Saa nsɛm yi ka sɛnea onipa bi wu na wɔsan wo no sɛ honhom bi, aboa bi, anaa onipa wɔ baabi foforo ho asɛm.

Nanso, Onyankopɔn Asɛm kyerɛ sɛ onipa kra nyɛ nea entumi nwu, akra wuwu. (Hesekiel 18:4) Afei nso, Bible no ka sɛ awufo nte nka biara wɔ adamoa mu, wontumi nsusuw nsɛm ho, wɔnkasa, anaasɛ wontumi nyɛ biribiara. (Ɔsɛnkafo 9:5, 10; Romafo 6:23) Enti, nnipa a anansesɛm huhuw a ɛkyerɛ sɛ ɔkra ntumi nwu daadaa wɔn no bɛyɛ nkurɔfo a Paulo kaa wɔn ho asɛm sɛ, “wɔadan” afi Bible no ‘kyerɛ pa’ ho no.

Ahonhom ho Anansesɛm

Anansesɛm afoforo twe adwene kɔ abayifo ne ntafowayifo nneyɛe so. Sɛ nhwɛso no, wɔ Afrika mmeae bi no wɔka sɛ abayifo ne asumanfo yi wɔ tumi a ɛyɛ hu, ma wotumi dan wɔn ho yɛ mmoa a wɔwea fam, asoroboa, ne nnomaa; wotumi tu fa wim kodi dwuma ahorow; wotumi yi wɔn ho adi na wotumi san yera; na wotumi hu nneɛma a wɔde asie fam.

Esiane sɛ anansesɛm a ɛtete saa abu so ara yiye, na nnipa pii gye di nti, ebia ɛbɛka ebinom a wɔwɔ Kristofo asafo no mu nso ma wɔagye adi sɛ ɛyɛ nokware. Ebia wobesusuw sɛ ɛwom sɛ nnipa a wonni tumi biara ntumi nyɛ nneɛma a ɛtete saa de, nanso nnipa a wonya tumi soronko bi fi ahonhom abɔde, adaemone honhom hɔ no betumi ayɛ nneɛma a ɛtete saa. Ebia nea wogyina so ka eyi ne asɛm a ɛwɔ 2 Tesalonikafo 2:9, 10, nea ɛka sɛ: “Ɔno nso na né ba no, ɔ́bà no Satan adwumayɛ so, atoro tumi ne sɛnkyerɛnne ne ahodwiride nyinaa mu ne nea ɛnteɛ nnaadaa nyinaa mu, wɔn a wɔyera no mu, efisɛ wɔannye nokware dɔ na wɔde agye wɔn nkwa.”

Bere a ɛyɛ nokware sɛ saa kyerɛwsɛm yi kyerɛ sɛ Satan tumi yɛ anwonwade no, ɛka nso sɛ Satan ne “atoro tumi ne sɛnkyerɛnne,” ne “nea ɛnteɛ nnaadaa” farebae. Bible da no adi pefee sɛ Satan yɛ ɔdaadaafo kɛse a “ɔdaadaa amanaman nyinaa.” (Adiyisɛm 12:9) Waben wɔ atosɛm a ɔma nnipa gye di mu.

Esiane eyi nti, adanse ne nsɛm a wɔn a wɔde wɔn ho ahyɛ ahonhonsɛm ne abayisɛm mu ka no mpo ntaa nyɛ nokware. Ebia nnipa a wɔte saa no begye adi yiye sɛ wɔahu, wɔate, anaasɛ nneɛma bi atoto wɔn, nanso nokwarem no, na ɛnte saa. Sɛ nhwɛso no, nnipa bi wɔ hɔ a wosusuw sɛ wɔne nnipa a wɔawuwu ahonhom akasa. Nanso wɔyɛ nkurɔfo a wɔagye Satan atoro nnaadaa adi. Bible no ka sɛ awufo ‘sian kɔ kommyɛ mu.’—Dwom 115:17.

Esiane sɛ yɛwɔ Ɔbonsam nnaadaa ho kyerɛwtohɔ nti, yentumi nnye nokware a ahonhonsɛm bi yɛ no ntom ntɛm ara. Emu pii yɛ gyidihunu a wɔbɔ tirim ka, na wɔnam kɔ a wɔkɔ so tĩ mu ka so trɛw mu.

Anansesɛm a ɛtete saa a wɔkɔ so tĩ mu ka no hyɛ atoro agya, Satan Ɔbonsam dwumadi ho nkuran. (Yohane 8:44) Ɛkanyan afoforo ma wɔde wɔn ho hyɛ ahonhonsɛmdi a Yehowa kyi no mu. (Deuteronomium 18:10-12) Ɛma ehu ne gyidihunu sum nnipa afiri. Enti ɛnyɛ nwonwa sɛ Paulo tuu Kristofo fo sɛ “wonntie anansesɛm” no.—1 Timoteo 1:3, 4.

Adaemone Adansesɛm a Yɛbɛpow

Nanso, sɛ nsɛm no yɛ te sɛ nea ɛyɛ nokware nso ɛ? Ɛtɔ da bi a wɔka osuahu ahorow a ɛfa sɛnea ahonhom anaa abayifo ne asumanfo gye Yehowa kɛseyɛ ne anokwafo a n’Adansefo yɛ tom ho asɛm kyerɛ. So ɛsɛ sɛ Kristofo kɔ so tĩ nsɛm a ɛtete saa mu ka?

Dabi, ɛnsɛ sɛ wɔyɛ saa. Bible no ka sɛ bere a ahonhom fĩ teɛɛm sɛ Yesu ne Onyankopɔn Ba no, “ɔbaraa wɔn ketee sɛ wonnyi no adi.” (Marko 3:12) Saa ara na bere a akɔm honhom bi hyɛɛ abeawa bi maa ɔdaa Paulo ne Barnaba adi sɛ ‘Ɔsorosoroni Nyankopɔn no nkoa’ ne wɔn a wɔkyerɛ ‘nkwagye kwan’ no, Paulo tuu honhommɔne no fii abeawa no mu. (Asomafo no Nnwuma 16:16-18) Yesu, Paulo, anaa Bible akyerɛwfo no mu biara amma adaemone kwan ma wɔanni Onyankopɔn atirimpɔw anaa n’asomfo a wapaw wɔn no ho adanse.

Ɛsɛ sɛ yɛhyɛ no nsow nso sɛ, ná Yesu Kristo atra ahonhom atrae ansa na ɔreba asase so. Ná onim Satan ankasa. Nanso, Yesu anka Ɔbonsam dwumadi ho nsɛm amfa anye n’asuafo no ani, na saa ara nso na wankyerɛkyerɛ wɔn nea Ɔbonsam tumi yɛ ne nea ontumi nyɛ. Ná ɛnyɛ Yesu nnamfo ne Satan ne n’adaemone no. Wɔyɛ akobɔfo, atuatewfo, wɔn a wokyi akronkronne ne Onyankopɔn atamfo.

Bible no ka nea ɛho hia sɛ yehu kyerɛ yɛn. Ɛkyerɛkyerɛ yɛn nea ahonhommɔne yɛ, sɛnea wɔdaadaa nkurɔfo, ne sɛnea yebetumi atwe yɛn ho afi wɔn ho. Ɛkyerɛ sɛ Yehowa ne Yesu Kristo wɔ tumi kɛse sen ahonhommɔne no. Na ɛkyerɛkyerɛ yɛn sɛ sɛ yɛsom Yehowa nokwarem a, ahonhommɔne ntumi nyɛ yɛn biribi a ebetumi apira yɛn daa.—Yakobo 4:7.

Ɛnde, ntease wom sɛ Kristofo gu anansesɛm huhuw, nsɛm a nea ɛyɛ ara ne sɛ ɛhyɛ wɔn a wɔsɔre tia Onyankopɔn atirimpɔw ahorow ho nkuran no. Sɛnea Yesu ‘dii nokware no ho adanse’ no, saa ara na n’akyidifo a wɔwɔ hɔ nnɛ nso yɛ. (Yohane 18:37) Wofi nyansam yɛ osetie ma Bible afotu yi: “Nea ɛyɛ nokware . . . saa nneɛma yi ho na munnwen.”—Filipifo 4:8.

[Kratafa 31 mfonini]

Ɛsɛ sɛ nokware Kristofo twe wɔn ho koraa fi ahonhonsɛmdi nyinaa ho