Wɔahyira Wɔn ho So—Ama Hena?

“Nea [Yehowa] aka no nyinaa, yɛbɛyɛ na yebetie.”—EXODUS 24:7.

1, 2. (a) Nnipa binom hyira wɔn ho so ma dɛn? (b) Wɔn a wɔwɔ ɔsom bi mu nkutoo na wohyira wɔn ho so?

FEBRUARY 1945 mu no, wɔn a wɔka Japan Yatabe Flying Corps wim akohyɛn a wɔfrɛ no Zero-fighter no bɔɔ gua wɔ nhyiam asa bi so. Wɔde kratasin bi maa obiara sɛ ɔnkyerɛw so sɛ ebia ɔde ne ho bɛma ayɛ kamikaze ntua dɔm no muni. Asraafo panyin bi a na ɔwɔ hɔ saa bere no ka sɛ: “Misusuwii sɛ na wɔreto nsa afrɛ me sɛ memfa me ho mmɔ afɔre bere a ɔman no wɔ ɔhaw mu no. Esiane sɛ metee nka sɛ ɛsɛ sɛ mitu me ho ma nti, mede me ho mae sɛ mɛyɛ saa.” Wɔtetee no sɛ ɔnka Ohka (wimhyɛn a nea ɔka no de ne nkwa bɔ afɔre) mfa nkɔhwe atamfo no po so akohyɛn bi mu. Nanso, wannya hokwan anyɛ saa anwu amma ne man ne ne hempɔn ansa na ɔko no reba awiei. Bere a Japan dii nkogu wɔ ɔko no mu no, gyidi a na ɔwɔ wɔ ɔhempɔn no mu no sɛee.

² Bere bi na nnipa a wɔwɔ Japan no mu pii ahyira wɔn ho so ama ɔhempɔn no, a na wogye di sɛ ɔyɛ onyame teasefo bi. Wɔ nsase afoforo so no, nneɛma afoforo a wɔsom da so ara wɔ hɔ. Ɔpepem pii som Maria, Buddha, ne anyame afoforo—a wɔtaa de ahoni na egyina hɔ ma wɔn no. Esiane sɛ adɔkɔdɔkɔsɛm frenkyemm anya ebinom so nkɛntɛnso nti, wofi wɔn koma nyinaa mu yi sika a wɔbrɛe ansa na wɔrenya no ma TV so asɛnkafo de boa wɔn a ɛte sɛ nea wɔsom wɔn ara pɛ. Ɔko no akyi no, Japanfo a wɔn aba mu abu no hwehwɛɛ biribi foforo a wobetumi ahyira wɔn nkwa so ama no. Wɔ ebinom fam no, adwuma bɛyɛɛ saa ade no. Wɔ Apuei anaa Atɔe Fam no, nnipa pii hyira wɔn ho so de boaboa ahonyade ano. Mmofra de nnwontofo a wosuasua wɔn asetra kwan yɛ ade titiriw wɔ wɔn asetra mu. Nnipa pii a wɔwɔ hɔ nnɛ no abɛyɛ wɔn a wɔsom wɔn ankasa ho, na wɔama wɔn akɔnnɔ ayɛ ade a wɔsom. (Filipifo 3:19; 2 Timoteo 3:2) Nanso ɛfata sɛ obi fi ne kra nyinaa mu som nneɛma anaa nnipa a wɔtete saa no?

 3. Ɔkwan bɛn so na ada adi sɛ mfaso nni nneɛma bi a wɔsom so?

³ Sɛ wɔn a wɔsom ahoni hu sɛnea nsɛm te ankasa a, wɔn aba mu taa bu. Sɛ wɔn a wɔsom ahoni hu sɛ wɔn ahoni no yɛ “nnipa nsa ano adwuma” ara kwa a, ahonisom no de abasamtu ba. (Dwom 115:4) Sɛ wɔma asɛnkafo a wɔagye din animguasede no da adi a, nnipa komapafo te nka sɛ wɔadi wɔn huammɔ. Sɛ sikasɛm nhyehyɛe a “enni nnyinaso pa” no ba awiei a, adwumayɛfo nya adwenemhaw bere a wohu sɛ wɔka wɔn a wɔreyi wɔn adi afi adwuma mu ho no. Sikasɛm a ɛyɛɛ basaa nnansa yi dii wɔn a wɔsom Mammon awu kɛse. Ɛka a wɔbɔe bere a na wɔwɔ anidaso sɛ wobenya sika pii no bɛdan ɛka a na wonni anidaso kɛse sɛ wobetumi atua. (Mateo 6:24, NW ase hɔ asɛm) Sɛ rock nnwontofo ne wɔn a wogye afoforo ani a wɔayɛ wɔn anyame wuwu anaasɛ wɔnte wɔn nka kɛse a, wɔn a wɔsom wɔn no te nka sɛ wɔapow wɔn. Na wɔn a wɔadi ahopɛ asetra kwan akyi no taa hu amane.—Galatifo 6:7.

 4. Dɛn na ɛka nkurɔfo ma wohyira wɔn nkwa so ma nneɛma hunu?

⁴ Dɛn na ɛka nnipa ma wohyira wɔn ho so ma nneɛma hunu a ɛtete saa? Emu fã kɛse no ara fi wiase a Satan Ɔbonsam di so no honhom. (Efesofo 2:2, 3) Yehu honhom yi nkɛntɛnso wɔ akwan horow so. Abusua amanne a obi nya fi ne nananom hɔ betumi anya no so tumi. Nhomasua ne ntetee betumi anya obi nsusuwii so nkɛntɛnso kɛse. Adwumam tebea betumi ama “nnipa a wɔpɛ adwuma dodo” no ayɛ adwuma atra so ma ebia ɛde wɔn nkwa ato asiane mu. Wiase no honam fam ade dodowpɛ su no na ɛma obi kɔn dɔ sɛ obenya nneɛma pii. Nnipa pii koma asɛe, na ɛka wɔn ma wɔde wɔn biribiara di wɔn ankasa pɛsɛmenkominya akɔnnɔ ho dwuma. Wɔnyɛ nhwehwɛmu nhu sɛ ebia ɛfata sɛ wɔde ahofama a ɛte saa no ma saa nneɛma yi.

Ɔman a Wɔahyira Wɔn Ho So

 5. Ahosohyira bɛn na wɔyɛ maa Yehowa bɛboro mfe 3,500 ni?

⁵ Bɛboro mfe 3,500 ni, ɔman biako mu nnipa nyaa obi a ɛfata kɛse sɛ wɔsom no. Wohyiraa wɔn ho so maa Nyankopɔn tumfoɔ a ɔne Yehowa no. Sɛ kuw no, Israel man kae sɛ wɔahyira wɔn ho so ama Onyankopɔn wɔ Sinai sare so.

 6. Na Onyankopɔn din bɛkyerɛ dɛn ama Israelfo no?

⁶ Dɛn na ɛkaa Israelfo no ma wɔyɛɛ saa? Bere a na wɔwɔ nkoasom mu wɔ Misraim no, Yehowa paw Mose sɛ onkodi wɔn anim nkɔ ahofadi mu. Mose bisaa sɛnea ɛsɛ sɛ ɔda Onyankopɔn a wasoma no no adi, na Onyankopɔn daa ne ho adi sɛ “Mene nea mene.” Ɔhyɛɛ Mose sɛ ɔnka nkyerɛ Israel mma sɛ: “‘Mene’ na asoma me mo nkyɛn yi.” (Exodus 3:13, 14) Asɛm yi kyerɛe sɛ Yehowa bɛyɛ biribiara a ehia na wama n’atirimpɔw ahorow abam. Ná ɔbɛda ne ho adi sɛ Nea ɔma bɔhyɛ ahorow bam wɔ ɔkwan a Israelfo nananom anhu bi da so.—Exodus 6:2, 3.

 7, 8. Adanse ahorow bɛn na na Israelfo no wɔ sɛ Yehowa yɛ Onyankopɔn a ɔfata sɛ wɔsom no?

⁷ Israelfo no huu amanehunu a Ahaw Du no de baa Misraim asase ne nnipa a wɔte so no so. (Dwom 78:44-51) Afei, nnipa a ebetumi aba sɛ wɔdɔɔso sen ɔpepem abiɛsa a mmea ne mmofra ka ho, sesaw wɔn nneɛma na wotu fii Gosen asase so anadwo biako, a ɛno ankasa yɛ anwonwade. (Exodus 12:37, 38) Afei, Yehowa daa ne ho adi wɔ Po Kɔkɔɔ no mu sɛ “dɔmmarima” bere a ogyee ne nkurɔfo fii Farao asraafo dɔm no nsam denam po no a ɔpaee mu abien maa Israelfo no faa mu kɔe na ɔka boom akyiri yi ma ɛfaa Misrifo a na wɔretiw wɔn no so no. Ɛno maa “Israel huu nsa kɛse a [Yehowa] de kyerɛɛ Misraim so no, na ɔman no suroo [Yehowa] na wogyee [Yehowa] . . . dii.”—Exodus 14:31; 15:3; Dwom 136:10-15.

⁸ Israelfo no nwiinwii hyɛɛ Yehowa ne n’akoa Mose sɛ ɔkɔm ne sukɔm de wɔn, te sɛ nea wɔda so ara nni nea Onyankopɔn din kyerɛ ho adanse. Yehowa maa mmoko bae, ɔtɔɔ mana fii soro guu fam, na ɔmaa nsu pue fii ɔbotan mu bae wɔ Meriba. (Exodus 16:2-5, 12-15, 31; 17:2-7) Yehowa gyee Israelfo no fii Amalekfo ntua nso mu. (Exodus 17:8-13) Ná Israelfo ntumi nka wɔ ɔkwan biara so sɛ nea Yehowa ka kyerɛɛ Mose akyiri yi nyɛ nokware: “[Yehowa], [Yehowa], Onyankopɔn mmɔborohunufo ne ɔdomfo, nea n’abodwo kyɛ na n’adɔeyɛ ne ne nokware dɔɔso pii, nea ɔkora adɔeyɛ ma mpem mpem, na ɔde amumɔyɛ ne mmarato ne bɔne firi.” (Exodus 34:6, 7) Nokwarem no, Yehowa daa ne ho adi sɛ ɔyɛ obi a ɔfata sɛ wɔsom no.

 9. Dɛn nti na Yehowa de hokwan no maa Israelfo sɛ wɔnkyerɛ sɛ wɔahyira wɔn ho so sɛ wɔbɛsom no, na wɔyɛɛ wɔn ade dɛn wɔ ho?

⁹ Ɛwom sɛ na Yehowa wɔ hokwan sɛ ɔfa Israelfo no yɛ ne de esiane sɛ na wagye wɔn afi Misraim nti de, nanso ɔno, sɛ Onyankopɔn yamyefo ne mmɔborohunufo no, maa wɔn hokwan sɛ womfi wɔn pɛ nna no adi sɛ wɔpɛ sɛ wɔsom no. (Deuteronomium 7:7, 8; 30:15-20) Ɔno nso na ɔkyerɛɛ nneɛma a ɔne Israelfo no gyinaa so yɛɛ apam no. (Exodus 19:3-8; 20:1–23:33) Bere a Mose kaa nneɛma yi ho asɛm no, Israelfo no kae sɛ: “Nea [Yehowa] aka no nyinaa, yɛbɛyɛ na yebetie.” (Exodus 24:3-7) Wofi wɔn ankasa pɛ mu bɛyɛɛ ɔman a wɔahyira so ama Amansan Hene Yehowa.

Anisɔ De Ahosohyira Ba

10. Ɛsɛ sɛ yɛde yɛn ho a yehyira ma Yehowa no gyina dɛn so?

¹⁰ Ɛda so ara fata sɛ yefi yɛn kra nyinaa mu som Yehowa, Ɔbɔadeɛ no. (Malaki 3:6; Mateo 22:37; Adiyisɛm 4:11) Nanso, ɛnsɛ sɛ yɛde yɛn ahosohyira no gyina gyidi a enni nnyinaso, bere tiaa mu nkate, anaa ɔhyɛ a efi afoforo hɔ—awofo mpo so. Ɛsɛ sɛ ɛyɛ nea egyina Yehowa ho nokware nimdeɛ ne nea Yehowa ayɛ ama yɛn ho anisɔ so. (Romafo 10:2; Kolosefo 1:9, 10; 1 Timoteo 2:4) Sɛnea Yehowa de hokwan no maa Israelfo sɛ womfi wɔn pɛ mu nyɛ wɔn ahosohyira no, saa ara na ɔma yɛn kwan sɛ yemfi yɛn pɛ mu nhyira yɛn ho so na yɛnna saa ahosohyira no adi wɔ baguam.—1 Petro 3:21.

11. Dɛn na Bible no a yɛasua no ada no adi wɔ Yehowa ho?

¹¹ Yɛnam Bible no sua so behu Onyankopɔn sɛ ɔteasefo. N’Asɛm boa yɛn ma yehu ne su horow a ɛda adi wɔ abɔde mu no. (Dwom 19:1-4) Yetumi hu fi n’Asɛm mu sɛ ɔnyɛ Baasakoro bi a ɛyɛ ahintasɛm a yentumi nte n’ase. Onni nkogu wɔ akodi mu, na ama waka sɛ ɔnyɛ Onyankopɔn bio. (Exodus 15:11; 1 Korintofo 8:5, 6; Adiyisɛm 11:17, 18) Esiane sɛ wama ne bɔhyɛ ahorow abam nti, ɛkae yɛn nea ne din Yehowa a eye kyɛn so no gyina hɔ ma. Ɔne Atirimpɔw Wura Kunini no. (Genesis 2:4, NW ase hɔ asɛm; Dwom 83:18; Yesaia 46:9-11) Yɛnam Bible no sua so bɛte ase pefee sɛ ɔyɛ ɔnokwafo ne nea yetumi de yɛn ho to no so.—Deuteronomium 7:9; Dwom 19:7, 9; 111:7.

12. (a) Dɛn na ɛtwe yɛn bɛn Yehowa? (b) Ɔkwan bɛn so na asetra ankasa mu osuahu ahorow a wɔakyerɛw wɔ Bible no mu no kanyan obi ma onya ɔpɛ sɛ ɔbɛsom Yehowa? (d) Wote nka dɛn wɔ Yehowa a wobɛsom no no ho?

¹² Ade titiriw a ɛtwe yɛn bɛn Yehowa ne ɔdɔ a ɔwɔ no. Bible no kyerɛ sɛnea oyi ɔdɔ, fafiri ne mmɔborohunu adi kyerɛ bere a ɔne nnipa redi no. Susuw sɛnea ɔmaa Hiob dii yiye bere a Hiob de nokwaredi kuraa ne mudi mu no ho. Hiob suahu no si so dua sɛ “[Yehowa] ayamye dɔɔso, na ɔyɛ timmɔbɔ.” (Yakobo 5:11; Hiob 42:12-17) Susuw sɛnea Yehowa ne Dawid dii bere a ɔsɛee aware na odii awu no ho. Yiw, Yehowa ayɛ krado sɛ ɔde bɔne a anibere wom mpo befiri bere a ɔdebɔneyɛfo no de “koma a abubu” ba ne nkyɛn no. (Dwom 51:3-11, 17) Susuw ɔkwan a Yehowa faa so ne Saulo a ofi Tarso, a mfiase no na ɔyɛ Onyankopɔn nkurɔfo taafo a ɔyɛ den no dii no ho. Nhwɛso ahorow yi si Onyankopɔn mmɔborohunu ne ɔpɛ a ɔwɔ sɛ obefi ne komam de wɔn a wɔanu wɔn ho adi dwuma no so dua. (1 Korintofo 15:9; 1 Timoteo 1:15, 16) Paulo tee nka sɛ obetumi de ne nkwa ankasa abɔ afɔre de asom ɔdɔ Nyankopɔn yi. (Romafo 14:8) Wote nka saa?

13. Ɔdɔ kɛse a Yehowa yii no adi bɛn na ɛkanyan nnipa komapafo ma wohyira wɔn ho so ma no?

¹³ Israelfo de, Yehowa gyee wɔn fii nkoasom mu wɔ Misraim, na wasiesie ɔkwan bi a ɔbɛfa so agye yɛn afi bɔne ne owu mu—Yesu Kristo agyede afɔrebɔ no. (Yohane 3:16) Paulo ka sɛ: “Onyankopɔn yi ne dɔ a ɔdɔ yɛn no kyerɛ, efisɛ yɛda so yɛ nnebɔneyɛfo no Kristo wu maa yɛn.” (Romafo 5:8) Nhyehyɛe a ɔdɔ wom yi kanyan nnipa komapafo ma wɔfa Yesu Kristo so hyira wɔn ho so ma Yehowa. “Na Kristo dɔ no hyɛ yɛn; efisɛ yebu atɛn sɛ, obiako wu maa wɔn nyinaa, enti na wɔn nyinaa awu. Na owu maa wɔn nyinaa na wɔn a wɔte ase no antra ase amma wɔn ho bio, na mmom wɔatra ase ama nea owui na ɔsɔre maa wɔn no.”—2 Korintofo 5:14, 15; Romafo 8:35-39.

14. So sɛnea Yehowa ne yɛn di ho nimdeɛ kɛkɛ dɔɔso sɛ ɛbɛkanyan yɛn ma yɛahyira yɛn ho so ama no? Kyerɛkyerɛ mu.

¹⁴ Nanso, Yehowa nipasu ne sɛnea ɔne adesamma di ho nimdeɛ a yebenya no nnɔɔso. Ɛsɛ sɛ yɛn ankasa nya anisɔ ma Yehowa. Yɛbɛyɛ dɛn atumi ayɛ saa? Ɛdenam Onyankopɔn Asɛm a yɛde bedi dwuma wɔ yɛn asetra mu na yɛn ankasa ahu sɛ ne nnyinasosɛm ahorow no tu mpɔn ankasa no so. (Yesaia 48:17) Ɛsɛ sɛ yɛte nka sɛ Yehowa agye yɛn afi wiase bɔne a Satan di so hene yi dontori no mu. (Fa toto 1 Korintofo 6:11 ho.) Bere a yɛbɔ mmɔden sɛ yɛbɛyɛ nea ɛteɛ no, yesua sɛ yɛde yɛn ho bɛto Yehowa so, na yɛn ankasa hu sɛ Yehowa ne Nyankopɔn Teasefo, “mpaebɔ tiefo” no. (Dwom 62:8; 65:2) Ɛnkyɛ yɛbɛte nka sɛ yɛabɛn no pɛɛ na yetumi ka sɛnea yɛte nka wɔ yɛn mu tɔnn kyerɛ no. Ɔdɔ a emu yɛ den a yɛwɔ ma Yehowa no nyin wɔ yɛn mu. Akyinnye biara nni ho sɛ eyi bɛma yɛahyira yɛn nkwa so ama no.

15. Dɛn na ɛkanyan ɔbarima bi a kan na wahyira ne ho so ama n’adwuma no ma ɔsom Yehowa?

¹⁵ Pii abehu Onyankopɔn a ɔwɔ ɔdɔ yi a ɔne Yehowa no, na wɔahyira wɔn nkwa so resom no. Fa anyinam ahoɔden ho dwumayeni a na ɔwɔ adwuma a ɛrenya nkɔso no sɛ nhwɛso. Ɛtɔ da bi a, ofi adwuma ase anɔpa na ɔyɛ adwuma anadwo mũ no nyinaa, na ɔkɔ fie anɔpa nnɔnnum. Bere a wahome bɛyɛ dɔnhwerew biako akyi no, ɔkɔyɛ adwuma a edi hɔ no. Ɔka sɛ: “Na mede me ho ama m’adwuma no.” Bere a ne yere fii ase suaa Bible no, ɔkɔkaa ne ho. Ɔka sɛ: “Ná anyame a minim wɔn besi saa bere no nyinaa retwɛn kɛkɛ sɛ yɛbɛsom wɔn, na wɔnyɛ hwee a ɛho bɛba yɛn mfaso. Nanso Yehowa fii ne pɛ mu somaa ne Ba a ɔwoo no koro no baa asase so a na ɛyɛ afɔre kɛse a n’ankasa bɔe.” (1 Yohane 4:10, 19) Asram du ntam na ɔbarima yi ahyira ne ho so ama Yehowa. Ɛno akyi no, ɔde n’adwene sii Onyankopɔn Teasefo a ɔbɛsom no no so. Ɔde ne ho hyɛɛ bere nyinaa som adwuma no mu na otu kɔtraa baabi a wohia mmoa kɛse. Te sɛ asomafo no, ‘ogyaw ade nyinaa kodii Yesu akyi.’ (Mateo 19:27) Asram abien akyi no, wɔtoo nsa frɛɛ ɔne ne yere ma wɔkɔsomee wɔ ɔman a wɔte mu no Ɔwɛn Aban Asafo no baa dwumadibea, na watumi aboa ma wɔayɛ anyinam ahoɔden adwuma. Bɛboro mfe 20 ni no, wayɛ adwuma wɔ baa dwumadibea hɔ, na ɔreyɛ adwuma a n’ani gye ho—ma Yehowa na ɛnyɛ ne ho.

Da W’ahosohyira Adi wɔ Baguam

16. Nneɛma a ɛsɛ sɛ obi yɛ de hyira ne ho so ma Yehowa no bi ne dɛn?

¹⁶ Sɛ mmofra ne mpanyin nyinaa sua Bible no kakra a, wobehu Yehowa ne nea wayɛ ama wɔn no. Ɛsɛ sɛ eyi kanyan wɔn ma wohyira wɔn ho so ma Onyankopɔn. Ebia woyɛ eyinom mu biako. Wobɛyɛ dɛn atumi ahyira wo ho so ama Yehowa? Bere a woanya nokware nimdeɛ afi Bible no mu akyi no, ɛsɛ sɛ wode saa nimdeɛ no di dwuma na wokyerɛ Yehowa ne Yesu Kristo mu gyidi. (Yohane 17:3) Sakra na dan wo ho fi wo kan bra bɔne biara ho. (Asomafo no Nnwuma 3:19) Afei wubedu baabi a ɛsɛ sɛ wuhyira wo ho so, na wode mpaebɔ a emu yɛ den ka kyerɛ Yehowa. Akyinnye biara nni ho sɛ mpaebɔ yi bɛka w’adwenem daa, efisɛ ɛbɛyɛ wo ne Yehowa ntam abusuabɔ foforo mfiase.

17. (a) Dɛn nti na mpanyimfo ne wɔn a wɔahyira wɔn ho so foforo no susuw nsemmisa a wɔasiesie no ho? (b) Ade a ɛho hia bɛn na ɛsɛ sɛ obi yɛ wɔ n’ahosohyira akyi pɛɛ, na dɛn ntia?

¹⁷ Sɛnea Mose kyerɛkyerɛɛ nneɛma a wobegyina so ne Yehowa ayɛ apam mu kyerɛɛ Israelfo no, saa ara na Yehowa Adansefo asafo ahorow mu mpanyimfo boa wɔn a wɔahyira wɔn ho so nnansa yi ara no ma wɔhwehwɛ nea ɛkyerɛ ankasa no mu. Wɔde nsemmisa a wɔasiesie di dwuma de hwɛ hu sɛ wɔn mu biara te Bible mu nkyerɛkyerɛ atitiriw ase koraa, na onim nea Yehowa Dansefo a ɔyɛ no kyerɛ. Afei, adeyɛ a ɔde da n’ahosohyira adi wɔ baguam no fata sen biara. Sɛnea ɛte no, obi a wahyira ne ho so foforo no ho pere no sɛ ɔbɛma afoforo ahu sɛ ɔne Yehowa anya abusuabɔ a nidi wom yi. (Fa toto Yeremia 9:24 ho.) Ɔyɛ eyi wɔ ɔkwan a ɛfata so denam asu a wɔbɔ no wɔ nsu mu de yɛ n’ahosohyira ho sɛnkyerɛnne no so. Nsu mu a wɔde no hyɛ na afei wɔma no so no kyerɛ sɛ ɔrepow ne kan ahopɛ asetra kwan no na ɔresɔre ama asetra kwan foforo, nea ɛma ɔyɛ Onyankopɔn apɛde. Ɛnyɛ adommenade anaasɛ amanne te sɛ Shintofo misogi a wɔkyerɛ sɛ wɔde nsu tew obi ho wom no.a Mmom no, asubɔ yɛ ahosohyira a wɔayɛ no dedaw wɔ mpaebɔ mu a wɔda no adi baguam.

18. Dɛn nti na yebetumi anya ahotoso sɛ yɛn ahosohyira renyɛ kwa?

¹⁸ Adeyɛ a anibere wom yi yɛ osuahu a Onyankopɔn somfo foforo no werɛ remfi da a ɛkae no sɛ seesei ɔne Yehowa wɔ abusuabɔ a enni awiei. Esiane sɛ ɛnte sɛ ahosohyira a nea na ɔka kamikaze wimhyɛn no yɛ maa ne man ne ne hempɔn no nti, ahosohyira a wɔyɛ ma Yehowa yi renyɛ kwa, efisɛ ɔne Ade Nyinaa so Tumfoɔ Nyankopɔn a ɔwɔ hɔ daa a ɔma nea ɔka sɛ ɔbɛyɛ nyinaa bam. Ɔno nkutoo na ɔfata sɛ yefi yɛn kra nyinaa mu som no.—Yesaia 55:9-11.

19. Dɛn na yebesusuw ho wɔ asɛm a edi hɔ no mu?

¹⁹ Nanso, ahosohyira kyerɛ pii sen saa. Sɛ nhwɛso no, ahosohyira ka yɛn da biara da asetra dɛn? Yebesusuw eyi ho wɔ asɛm a edi hɔ no mu.

[Ase hɔ nsɛm]

Wokae?

◻ Dɛn nti na ahosohyira a wɔyɛ wɔ wiase no mu no de huammɔdi ba?

◻ Dɛn na ɛkanyan Israelfo no ma wohyiraa wɔn ho so maa Yehowa?

◻ Dɛn na ɛkanyan yɛn ma yehyira yɛn ho so ma Yehowa nnɛ?

◻ Ɔkwan bɛn so na yehyira yɛn ho so ma Onyankopɔn?

◻ Nsu mu asubɔ kyerɛ dɛn?

[Kratafa 10 mfonini]

Israel hyiraa wɔn ho so maa Yehowa wɔ Sinai