Bible a Yɛbɛkenkan no Daa so Mfaso
“Nhyira ne onipa a . . . [Yehowa] mmara sɔ n’ani, na odwen ne mmara [ho] awia ne anadwo.”—DWOM 1:1, 2.
1. (a) Nkyerɛwee akɛse bɛn na ɛwɔ nhoma tintimbea dan bi a ɛwɔ Ɔwɛn Aban Asafo no adwumayɛbea ti ho? (b) Sɛ yɛn ankasa yɛde afotusɛm no di dwuma a, mfaso bɛn na yebenya?
“KENKAN ONYANKOPƆN ASƐM KYERƐW KRONKRON BIBLE NO DAA.” Wɔakyerɛw saa nsɛm no akɛse wɔ ɔdan bi ho wɔ Brooklyn, New York, faako a Ɔwɛn Aban Asafo no tintim Bible ne Bible ho nhoma ahorow no. Ɛnyɛ wiasefo a wohu nkyerɛwde no nko na wɔkyerɛw saa afotusɛm no maa wɔn. Yehowa Adansefo hu sɛ ɛsɛ sɛ wɔn nso wɔde di dwuma. Wɔn a wɔkenkan Bible daa, na wɔde bɔ wɔn bra no nya ne nkyerɛkyerɛ, animka, ateɛteɛ, ne nteɛso a ɛde ma wɔ trenee mu no so mfaso.—2 Timoteo 3:16, 17.
2. Ɔkwan bɛn so na Onua Russell sii hia a Bible akenkan hia so dua?
2 Yehowa Adansefo nni nhoma ahorow a wɔde sua Bible, a Ɔwɛn-Aban ka ho no ho agoru koraa, na wɔde di dwuma daa. Nanso wonim sɛ emu biara nni hɔ a wobetumi de asi Bible ananmu. Wɔ 1909 mu no, Charles Taze Russell, Ɔwɛn Aban Asafo no titrani a odi kan, kyerɛw Ɔwɛn-Aban nsɛmma nhoma no akenkanfo sɛ: “Mommma mo werɛ mmfi da sɛ Bible no ne yɛn Gyinapɛn, na ɛmfa ho sɛ nhoma a ɛboa yɛn wɔ ne sua mu no fi Onyankopɔn hɔ no, ɛyɛ ‘nhoma a ɛboa,’ na ɛnyɛ Bible no nsiananmu.”
3. (a) Tumi bɛn na “Onyankopɔn asɛm” nya wɔ wɔn a wohu emu nsɛm no so? (b) Ná edi bere tenten bɛn ansa na Beroiafo no akenkan Kyerɛwnsɛm no na wɔasua?
3 Kyerɛwnsɛm a wɔde honhom kyerɛwee no mu dɔ na tumi wom sen nhoma foforo biara. “Onyankopɔn asɛm wɔ nkwa, na ahoɔden wɔ mu, na ano yɛ nnam sen nkrante anofanu biara, na ehwirew mu kodu sɛ ɛpaapae ɔkra ne honhom, akwaa ne hon mu, na ɛyɛ koma nsusuwii ne adwene temmufo.” (Hebrifo 4:12) Osuani Luka fi ayamye mu kamfoo Beroiafo, kaa wɔn ho asɛm sɛ ‘woye.’ Ɛnyɛ sɛ woyii wɔn yam gyee asɛm a ɔsomafo Paulo ne ne yɔnko Silas kae no nko, na mmom ‘daa na wɔhwehwɛ Kyerɛwnsɛm no mu’ nso hwɛ sɛ nea wɔrekyerɛkyerɛ wɔn no gyina Kyerɛwnsɛm so anaa.—Asomafo no Nnwuma 17:11.
Kan a Wɔbɛkan no Da Biara
4. Dɛn na Kyerɛwnsɛm no kyerɛ wɔ mpɛn dodow a ɛsɛ sɛ yɛkenkan Bible no ho?
4 Bible no nhyɛ da nka mpɛn dodow a ɛsɛ sɛ yɛkenkan. Nanso, kyerɛwtohɔ a ɛfa afotu a Yehowa de maa Yosua sɛ ‘onnwen mmara nhoma no ho awia ne anadwo’ na ama wayɛ ade nyansam, na watumi ayɛ adwuma a Onyankopɔn de ama no no ho wom. (Yosua 1:8) Ɛka kyerɛ yɛn sɛ na ɛsɛ sɛ obiara a odi tete Israel so hene no kenkan Kyerɛwnsɛm no “ne nkwa nna nyinaa.” (Deuteronomium 17:19) Ɛka nso sɛ: “Nhyira ne onipa a ɔnnantew abɔnefo agyina mu, . . . na mmom [Yehowa] mmara sɔ n’ani, na odwen ne mmara [ho] awia ne anadwo.” (Dwom 1:1, 2) Afei nso Mateo Asɛmpa no ka kyerɛ yɛn sɛ bere a Yesu Kristo ampene mmɔden a Satan bɔe sɛ ɔbɛsɔ No ahwɛ so no, Ɔfaa Hebri Kyerɛwnsɛm a efi honhom mu no mu asɛm kae sɛ: “Wɔakyerɛw sɛ: Ɛnyɛ abodoo nko so na onipa nam bɛtra ase, na asɛm biara a efi Onyankopɔn anom so.” (Mateo 4:4) Mpɛn ahe na yehia honam fam aduan? Da biara! Honhom fam aduan a yebedi no daa ho hia mpo sen saa efisɛ ɛka daa nkwa anidaso a yɛwɔ no.—Deuteronomium 8:3; Yohane 17:3.
5. Ɔkwan bɛn so na da biara Bible akenkan bɛboa yɛn ma ‘yɛanantew sɛnea ɛfata Yehowa’ bere a yehyia gyidi ho sɔhwɛ ahorow no?
5 Ɛho hia sɛ Onyankopɔn Asɛm no hyɛ yɛn mu biara den da biara. Da biara—bere a yɛwɔ fie, adwumam, sukuu, abɔnten, bere a yɛredi gua, anaa yɛreyɛ yɛn som adwuma no—yehyia yɛn gyidi ho sɔhwɛ ahorow. Yebedi eyinom ho dwuma dɛn? Bible ahyɛde ne nnyinasosɛm ahorow bɛba yɛn adwenem ntɛm? Sɛ́ anka Bible bɛkamfo akyerɛ sɛ yɛmfa yɛn ho nto yɛn ankasa so no, ɛbɔ kɔkɔ sɛ: “Nea ɛyɛ no sɛ ogyina hɔ nhwɛ yiye, na wanhwe ase.” (1 Korintofo 10:12) Da biara Bible akenkan bɛboa yɛn ma ‘yɛanantew sɛnea ɛfata Yehowa na yɛasɔ n’ani koraa’ sen sɛ yɛbɛma wiase no anya yɛn so tumi.—Kolosefo 1:9, 10; Romafo 12:2.
Hia a Ɛho Hia sɛ Yɛkenkan Bible Mpɛn Pii
6. Dɛn nti na mfaso wɔ so sɛ yɛbɛkenkan Bible no mpɛn pii?
6 Bible a yɛkenkan no nte sɛ ayɛsɛm nhoma a yɛkenkan koraa. Ayɛsɛm nhoma a agye din dodow no ara na wɔyɛe sɛ wɔnkenkan no pɛnkoro; sɛ obi hu asɛm no ne nea ɛkowie a, ɛno ara ne no. Nea ɛne no bɔ abira no, ɛmfa ho mpɛn dodow a yɛakenkan Bible no, sɛ yɛkenkan bio a, yenya mfaso kɛse. (Mmebusɛm 9:9) Obi a ɔwɔ nhumu nya Kyerɛwnsɛm no mu ntease foforo bere nyinaa. Nea wahu, wate, ne nea n’ankasa anya mu suahu asram kakra yi mu no ma nna a edi akyiri ho nkɔmhyɛ ahorow bedi mũ kɛse ma no. (Daniel 12:4) Bere a Bible ɔkenkanfo a ɔwɔ nhumu ma asetra mu suahu a n’ankasa wɔ yɛ kɛse na odi nsɛnnennen ho dwuma no, onya afotu a ebia kan no na ɔkenkan fa so kɛkɛ ho anisɔ kɛse. (Mmebusɛm 4:18) Sɛ ɔyare a emu yɛ den yɛ no a, Bible bɔhyɛ ahorow a ɛfa ɛyaw a wobeyi afi hɔ ama akwahosan pa asan aba no bɛkyerɛ pii ama no asen bere biara a atwam. Sɛ ne nnamfo pa ne n’abusuafo wuwu a, owusɔre bɔhyɛ no bɛyɛ nea ɛsom bo ma no kɛse.
7. Sɛ yenya asetram asɛyɛde foforo bi a, dɛn na ebetumi aboa yɛn, na dɛn ntia?
7 Ebetumi aba sɛ w’ankasa woakenkan Bible no de emu afotu adi dwuma mfe bi. Nanso ebia seesei worebenya asetram asɛyɛde afoforo. Woreyɛ nhyehyɛe aware? Worebɛwo? Wɔama wo asɛyɛde wɔ asafo no mu sɛ ɔpanyin anaa asafo mu ɔsomfo? Woabɛyɛ bere nyinaa ɔsɛmpakafo, anya hokwan pii a wode bɛka asɛm no akyerɛkyerɛ? Hwɛ mfaso ara a wubenya sɛ wobɛkenkan Bible mũ no bio bere a saa asɛyɛde afoforo no wɔ w’adwene mu!—Efesofo 5:24, 25; 6:4; 2 Timoteo 4:1, 2.
8. Ɔkwan bɛn so na yɛn tebea a ɛsakra betumi ama ada adi sɛ ehia sɛ yesua nneɛma a na yesusuw sɛ yenim dedaw no ho ade pii?
8 Ebia bere bi a atwam no, na woda honhom aba no adi yiye. (Galatifo 5:22, 23) Nanso wo tebea betumi asakra ma ɛho abehia sɛ wusua saa su pa ahorow no ho ade pii. (Fa toto Hebrifo 5:8 ho.) Obi a bere bi a atwam no na ɔyɛ ɔhwɛfo kwantufo a ɛho behiae sɛ ogyae ne som titiriw no kɔhwɛ n’awofo a wɔn mfe akɔ anim kae sɛ: “Ná metaa susuw sɛ merebɔ mmɔden sɛnea ɛsɛ wɔ honhom aba a meda no adi no mu. Seesei mete nka te sɛ nea merefi ase bio koraa.” Ɔkwan a ɛte saa ara so no, ebia okununom ne ɔyerenom behu sɛ bere a wɔrehwɛ wɔn ahokafo a ɔyare anaa nkate fam ɔhaw a emu yɛ den bi haw wɔn no, ɛtɔ da bi a ɔbrɛdwen bɛma wɔn nso wɔayɛ nneɛma bi a ebu abam. Bible a wɔkenkan no daa ma awerɛkyekye ne mmoa kɛse.
Bere a Wobetumi Akenkan Bible
9. (a) Dɛn na ebetumi aboa obi a onni adagyew koraa ma wanya bere de akenkan Bible da biara? (b) Dɛn nti na Onyankopɔn Asɛm no kenkan ho hia mpanyimfo titiriw?
9 Nokwarem no, nnipa a wonni adagyew dedaw fam no, sɛ́ wobenya bere de ayɛ biribi foforo aka nea wɔyɛ daa ho no nna fam. Nanso, Yehowa nhwɛso no betumi ayɛ yɛn mfaso. Bible da no adi sɛ ɔyɛ nneɛma ‘bere a ɔhyɛ’ mu. (Genesis 21:2; Exodus 9:5; Luka 21:24; Galatifo 4:4) Hia a ɛho hia sɛ yɛkenkan Onyankopɔn Asɛm daa no ho anisɔ betumi aboa yɛn ma yɛde bere bi asi hɔ wɔ yɛn da biara da bere nhyehyɛe mu de ayɛ saa. (Efesofo 5:15-17) Mpanyimfo titiriw na ɛsɛ sɛ wotu bere bi si hɔ de kenkan Bible daa, sɛnea ɛbɛyɛ a afotu a wɔde ma no begyina Bible nnyinasosɛm so pɛpɛɛpɛ, na afei nso esu a woyi no adi no ada “nyansa a efi soro” adi.—Yakobo 3:17; Tito 1:9.
10. Bere bɛn na wɔn a wɔkenkan Bible daa no nya kwan kenkan?
10 Nnipa pii a wotumi yɛ wɔn ankasa Bible akenkan ho nhyehyɛe pa kenkan no anɔpatutuutu ansa na wɔayɛ biribiara. Afoforo nso hu sɛ wotumi yɛ no yiye bere foforo. Bible akenkan ho kasɛt (bere a ebi wɔ hɔ no) boa wɔn a wotutu akwan ma wotumi de bere a wɔde retwa kwan no di dwuma yiye, na Adansefo bi tie bere a wɔreyɛ fie nnwuma daa no. Wɔakyerɛ nhyehyɛe ahorow bi a adi aboa Adansefo binom a wɔwɔ Europa, Afrika, Amerika Kusuu Fam, Amerika Kesee Fam, ne Apuei Fam wɔ nkratafa 20 ne 21 hɔ asɛm a ɛne sɛ “Bere a Wɔkenkan ne Sɛnea Wonya Mfaso” no mu.
11. Sɛ ɛbere a yɛwɔ no sua mpo a, yɛbɛyɛ dɛn atumi akenkan Bible daa?
11 Ɛnyɛ bere tenten a wode bɛkenkan Bible no bere biara ne ade a ɛho hia titiriw, na mmom sɛnea wobɛyɛ no daa no. Wubetumi anya mfaso bere a wode dɔnhwerew biako anaa nea ɛboro saa kenkan, na woyɛ nhwehwɛmu ka ho, ma adesua no gye w’adwene nyinaa no. Nanso wo bere nhyehyɛe bɛma kwan ma woayɛ saa daa? Sɛ́ anka wobɛma nna pii atwam a wonyɛ Bible akenkan biara no, ɛrenyɛ papa sɛ wobɛkenkan no simma 15 anaa simma 5 mpo da biara? Fa yɛ wo botae sɛ wobɛkenkan Bible da biara da. Afei sɛ ɛbɛyɛ yiye a, yɛ nhwehwɛmu a ɛkɔ akyiri ka saa akenkan no ho.
Akwan Horow a Wɔfa so Kenkan Bible
12. Bible akenkan ho nhyehyɛe bɛn na Betel abusua mufo ne Gilead adesuafo wɔ?
12 Akwan pii wɔ hɔ a yebetumi afa so akenkan Bible. Mfaso wɔ so sɛ yɛbɛkenkan afi Genesis akosi Adiyisɛm. Ɛyɛ ahwehwɛde ma Betel abusua mufo a wɔwɔ wiase nyinaa a wɔsom wɔ wiase adwumayɛbea ti hɔ anaa Asafo ti no baa dwumadibea bi no nyinaa sɛ wɔkenkan Bible mũ no wɔ wɔn Betel som adwuma no afe a edi kan mu. (Mpɛn pii no, ɛno hwehwɛ sɛ wɔkenkan atiri abiɛsa kosi anum, a egyina ne tenten so, da biara, anaa nkratafa anan kosi anum.) Ɛyɛ ahwehwɛde sɛ Ɔwɛn Aban Gilead Bible Sukuu adesuafo nso bɛkenkan Bible no afi mfiase akosi awiei ansa na wɔawie adesua no. Yɛhwɛ kwan sɛ eyi bɛboa wɔn ma da biara Bible akenkan aka wɔn hɔ.
13. Botae bɛn na wɔhyɛ nyansa sɛ Adansefo a wɔabɔ wɔn asu foforo mfa nsi wɔn ani so?
13 Mfaso wɔ so sɛ Adansefo a wɔabɔ wɔn asu foforo de botae no si wɔn anim sɛ wɔbɛkenkan Bible mũ no nyinaa. Bere a na aberante bi a ɔwɔ France resiesie ne ho ama asubɔ wɔ 1975 mu no, ɔpanyin bi bisaa no sɛ ɔwɔ nhyehyɛe pɔtee bi a ɔde kenkan Bible anaa. Efi saa bere no, afe biara ɔkenkan Bible mũ no nyinaa, na ɔtaa kenkan no anɔpa ansa na wakɔ adwuma. Ɔka wɔ nea afi mu aba no ho sɛ: “Mabehu Yehowa yiye. Mitumi hu sɛnea biribiara a ɔyɛ no ne n’atirimpɔw hyia ne sɛnea ɔyɛ n’ade bere a akwanside ahorow sɔre no. Mihu sɛ Yehowa teɛ, na ne nneyɛe nyinaa yɛ papa.”
14. (a) Dɛn na ehia na ama woatumi afi w’ankasa wo Bible akenkan ho nhyehyɛe a ɛbɛkɔ so daa ase? (b) Dɛn na ebetumi aboa yɛn ma yɛakae Bible nhoma biara mu nsɛntitiriw bere a yɛkenkan no?
14 Woakenkan Bible mũ no nyinaa? Sɛ ɛnte saa a, bere pa a wubetumi afi ase ni. Yɛ nhyehyɛe pɔtee bi, na afei di akyi. Hyɛ nkratafa anaa atiri dodow a wobɛkenkan no da biara, anaa bere tenten a wode bɛkenkan ne bere a wubefi ase kɛkɛ to hɔ. Ɛnyɛ obiara na ɔde afe biako bɛkenkan Bible no awie, nanso nea ɛho hia ne sɛ wobɛtaa akenkan Onyankopɔn Asɛm no, na sɛ ɛbɛyɛ yiye a, yɛ no daa. Bere a wokenkan Bible no, wubetumi de nhoma ahorow bi adi dwuma na aboa wo ma emu nsɛntitiriw no aka w’dwene mu. Sɛ Insight on the Scriptures wɔ kasa a wutumi kenkan mu a, ɛnde ansa na wubefi ase akenkan Bible nhoma pɔtee bi no, susuw emu nsɛntitiriw a wɔde ama wɔ Insight* mu no ho. Anaa fa “All Scripture Is Inspired of God and Beneficial nhoma no mu nkyerɛkyerɛmu a ɛkɔ akyiri no di dwuma koro no ara.a
15. (a) Nyansahyɛ bɛn na wɔde ama wɔ nkratafa 16 ne 17 a ebetumi aboa wo Bible akenkan? (b) Sɛ́ anka yɛbɛkenkan nkratafa dodow bi kɛkɛ no, ade titiriw bɛn na ɛsɛ sɛ yɛde yɛn adwene si so kɛse?
15 Bible a wɔkenkan no ntoatoaso so wɔ mfaso, nanso nkenkan mfa so kɛkɛ. Nkenkan nkratafa dodow bi da biara sɛnea ɛbɛyɛ a wubetumi aka kɛkɛ sɛ afe biara wokenkan Bible no wie. Sɛnea yɛakyerɛ wɔ adaka a ɛne “Nyansahyɛ Ahorow a Ɛbɛma Wo Bible Akenkan Atu Mpɔn” (nkratafa 16 ne 17) mu no, akwan pii wɔ hɔ a wubetumi afa so akenkan Bible anya mu anigye. Ɔkwan biara a wobɛfa so ayɛ no, hwɛ hu sɛ wode biribi rehyɛ w’adwene ne wo koma nyinaa mu.
Te Nea Wokenkan no Ase
16. Dɛn nti na ɛho hia sɛ yegye bere de susuw nea yɛkenkan no ho?
16 Bere a Yesu rekyerɛkyerɛ n’asuafo no, osii hia a ɛho hia sɛ wɔte nea na ɔreka no ase so dua. Ná ɛnyɛ ade a ɛho hia ne sɛ wɔde wɔn adwene bɛte ase kɛkɛ, na mmom sɛ́ wɔde ‘wɔn koma bɛte ase’ na ama wɔde adi dwuma wɔ wɔn asetra mu. (Mateo 13:14, 15, 19, 23) Nea ehia Onyankopɔn ne sɛnea obi te ankasa wɔ ne mu, na koma no gyina hɔ ma eyi. (1 Samuel 16:7; Mmebusɛm 4:23) Enti, hwɛ a yɛbɛhwɛ ahu sɛ yɛte nea Bible no ka ase akyi no, ɛho hia sɛ yedwennwen ho, susuw nea ɛkyerɛ wɔ yɛn ankasa asetra mu no ho.—Dwom 48:9; 1 Timoteo 4:15.
17. Akwan bɛn na yebetumi afa so asusuw nea yɛkenkan fi Kyerɛwnsɛm mu no ho?
17 Bɔ mmɔden hu nnyinasosɛm ahorow a Bible mu nsɛm gyina so sɛnea ɛbɛyɛ a wubetumi de adi tebea horow a wuhyia ho dwuma. (Fa toto Mateo 9:13; 19:3-6 ho.) Bere a wokenkan Yehowa su horow a ɛyɛ nwonwa ho nsɛm na wudwennwen ho no, fa saa hokwan no hyɛ abusuabɔ a wo ne no wɔ no mu den, fa kanyan onyamesom pa a emu yɛ den wɔ wo mu. Sɛ wokenkan Yehowa atirimpɔw ho nsɛm a, susuw nea wubetumi ayɛ ma ɛne no ahyia ho. Sɛ wokenkan afotu a ɛyɛ tẽẽ a, sɛ́ anka wobɛka akyerɛ wo ho kɛkɛ sɛ, ‘Minim saa asɛm yi’ no, bisa sɛ, ‘Mereyɛ nea ɛka no?’ Sɛ ɛte saa a, bisa wo ho sɛ, ‘Akwan bɛn na metumi afa so ayɛ “ma aboro so?”’ (1 Tesalonikafo 4:1) Bere a wusua Onyankopɔn ahwehwɛde ahorow ho ade no, hyɛ asetra mu nsɛm a esisii ankasa a ɛwɔ Bible mu a ɛfa wɔn a wodii ahwehwɛde ahorow yi so ne wɔn a wɔanni so ho no nsow. Susuw nea enti a wɔpaw asetra kwan a wɔfaa so no ne nea efii mu bae ho. (Romafo 15:4; 1 Korintofo 10:11) Sɛ wokenkan Yesu Kristo asetra ho asɛm a, kae sɛ Yesu ne obi a Yehowa de asase nyinaa so tumidi ahyɛ ne nsa; fa hokwan no hyɛ Onyankopɔn wiase foforo no ho akɔnnɔ a wowɔ no mu den. Bio nso, susuw akwan a wubetumi afa so asuasua Onyankopɔn Ba no ho kɛse.—1 Petro 2:21.
18. Yɛbɛyɛ dɛn atumi ama Bible akenkan ne adesua nhoma a efi “akoa nokwafo ne ɔbadwemma” hɔ no sua akari pɛ?
18 Nokwasɛm ne sɛ, ɛnsɛ sɛ wode Bible akenkan si nhoma a etu mpɔn a wubesua a ɛnam “akoa nokwafo ne ɔbadwemma” no so ba no ananmu. Ɛno nso ka Yehowa nsiesie ahorow ho—nea ɛsom bo paa. (Mateo 24:45-47) Hwɛ hu sɛ Onyankopɔn Asɛm no ankasa a wobɛkenkan daa no yɛ w’asetram ade titiriw. Sɛ ebetumi ayɛ yiye a, “KENKAN ONYANKOPƆN ASƐM KYERƐW KRONKRON BIBLE NO DAA.”
[Ase hɔ asɛm]
a Watchtower Bible and Tract Society of New York, Inc., na wotintimii.
Wubebua Dɛn?
◻ Dɛn nti na mfaso wɔ so sɛ wobɛkenkan Bible da biara?
◻ Dɛn nti na ɛsɛ sɛ yɛkenkan Bible no mpɛn pii?
◻ Wɔ w’ankasa wo bere nhyehyɛe mu no, bere bɛn na eye ma da biara Bible akenkan?
◻ Bere a wokenkan Bible no mpɛn pii no, dɛn na wubetumi ayɛ de asakra mu?
◻ Dɛn nti na ɛho hia sɛ yedwennwen nea yɛkenkan no ho?
[Adaka wɔ kratafa 16, 17]
Nyansahyɛ ahorow a ɛbɛma wo Bible akenkan atu mpɔn
(1) Nnipa pii kenkan Bible nhoma ahorow no nnidiso nnidiso sɛnea wɔahyehyɛ no no, efi Genesis kosi Adiyisɛm. Wubetumi nso akenkan adidi so sɛnea wɔkyerɛw no mfiase no. Ma ɛntra w’adwene mu sɛ Bible no yɛ nhoma 66 a wofi honhom mu kyerɛwee, nhoma ahorow a efi Onyankopɔn hɔ. Sɛ wopɛ sɛ wosesa mu a, wubetumi akenkan nhoma ahorow a ɛyɛ abakɔsɛm no bi, afei nea ɛfa nkɔmhyɛ ho titiriw, na wode nkrataa a afotusɛm wom bi atoa so, sen sɛ wobɛkenkan atoatoa so sɛnea wɔahyehyɛ no no. Hyɛ nea woakenkan no nsow, na hwɛ hu sɛ wobɛkenkan Bible mũ no nyinaa.
(2) Sɛ wokenkan Kyerɛwnsɛm no fã bi wie a, bisa wo ho nea ɛda no adi wɔ Yehowa, n’atirimpɔw, ne sɛnea ɔyɛ n’ade ho; sɛnea ɛsɛ sɛ ɛka w’ankasa asetra; ɔkwan a wubetumi afa so de aboa onipa foforo.
(3) Bere a worema Insight on the Scriptures mu kyerɛwtohɔ a ɛne sɛ “Yesu Asase so Asetra mu Nsɛntitiriw,” a ɛwɔ asɛmti “Yesu Kristo” ase (a ebi nso wɔ “All Scripture Is Inspired of God and Beneficial” mu) aboa wo no, kenkan Nsɛmpa no kyerɛwtohɔ ahorow a ɛfa nsɛm koro ho no biara nnidiso nnidiso. Kenkan Onipa a Ɔsen Biara a Watra Ase Pɛn nhoma no afã a ɛfa ho no ka eyi ho.
(4) Sɛ wokenkan Paulo asetra ne ne som adwuma ho asɛm wɔ Asomafo no Nnwuma a, kenkan nkrataa a wɔnam honhom so kyerɛwee a ɛne no bɔ abusua no nso. Enti, sɛ wɔbobɔ nkurow anaa mmeae bi a Paulo kaa asɛm wɔ hɔ din a, gyina na kenkan nkrataa a akyiri yi ɔkyerɛw kɔmaa mfɛfo Kristofo wɔ saa mmeae no. Mfaso wɔ so nso sɛ wobɛhwɛ akwan a otutui no wɔ asase ho mfonini bi so, te sɛ nea ɛwɔ New World Translation no nkratafa a etwa to no.
(5) Sɛ worekenkan Exodus akosi Deuteronomium a, kenkan krataa a wɔde kɔmaa Hebrifo no ka ho, na ama woanya nkɔmhyɛ mu nsɛm no pii ho nkyerɛkyerɛmu. Wodan kɔ Insight on the Scriptures no asɛmti a ɛne “Mmara” no ase a, hwɛ kyerɛwtohɔ “Mmara Apam no Afã Horow Bi” no so.
(6) Sɛ worekenkan nkɔmhyɛ nhoma ahorow a, gye bere susuw ɛho abakɔsɛm a ɛwɔ Bible mu no ho. Sɛ nhwɛso no, sɛ worekenkan Yesaia nhoma no a, kenkan ahene Usia, Yotam, Ahas, ne Hesekia a wɔbobɔ wɔn din wɔ Yesaia 1:1 no ho nsɛm fi mmeae afoforo. (2 Ahene, atiri 15-20; 2 Beresosɛm, atiri 26-32) Anaa sɛ worekenkan Hagai ne Sakaria a, gye bere susuw nea ɛwɔ Esra nhoma mu no ho.
(7) Paw Bible nhoma bi, kenkan ne fã bi (ebia eti biako), afei fa Watch Tower Publications Index anaa Watch Tower Library a ɛwɔ kɔmputa so yɛ nhwehwɛmu, sɛ ebi wɔ wo kasa mu a. Fa nsɛm no di dwuma wɔ w’ankasa w’asetram. Fa di dwuma wɔ ɔkasa ahorow ne asɛnka mu. Ɛno akyi no kɔ ɔfã foforo so.
(8) Sɛ Ɔwɛn Aban Asafo no nhoma bi wɔ hɔ a ɛde Bible nhoma bi anaa ne fã bi ho nkyerɛkyerɛmu ma a, taa yɛ mu nhwehwɛmu bere a worekenkan saa Bible nhoma no. (Sɛ́ nhwɛso no: Nnwom mu Dwom ho asɛm wɔ Engiresi Ɔwɛn-Aban, December 1, 1957, nkratafa 720-34; Hesekiel ho asɛm wɔ “The Nations Shall Know That I Am Jehovah”—How? mu; Daniel ho asɛm wɔ “Wo Pɛ Nyɛ Asase So” anaa Our Incoming World Government—God’s Kingdom mu; Hagai ne Sakaria ho asɛm wɔ Paradise Restored to Mankind—By Theocracy! mu; Adiyisɛm ho asɛm wɔ Adiyisɛm—N’awiei Koraa Abɛn! mu.)
(9) Bere a wugu akenkan no so no, hwehwɛ kyerɛw nsɛm afoforo a wɔdan adwene kɔ so no bi. Hyɛ Hebri Kyerɛwnsɛm no mu nsɛm 320 a Kristofo Hela Kyerɛwnsɛm no afa aka tẽẽ no ne nsɛm afoforo ɔhaha pii a ɛdan adwene kɔ so ne ɛho nkyerɛkyerɛmu a ɛde ma no nsow. Kyerɛwnsɛm afoforo a wɔdan adwene kɔ so no twe adwene si Bible nkɔmhyɛ a wɔakyerɛw ato hɔ mmamu, nnipa asetra ne nsase ho nsɛm, ne nsɛm a edi nsɛ a ebetumi ama nsɛm a ebia asete yɛ wo den mu ada hɔ so.
(10) Sɛ wode New World Translation a ɛboa nhwehwɛmu a wɔfrɛ no Reference Edition no redi dwuma a, hwɛ ase hɔ nsɛm ne nkekaho a ɛfa nea worekenkan ho no. Eyinom kyerɛ nea enti a wɔde nsɛm bi di dwuma ne akwan afoforo a wobetumi afa so akyerɛ nsɛm a ɛho hia ase. Wubetumi nso de Bible nkyerɛase afoforo ayɛ ntotoho wɔ nkyekyem ahorow bi ho.
(11) Sɛ wokenkan ti biara wie a, kyerɛw eti no mu nsɛntitiriw ho asɛm tiawa. Fa yɛ ntĩmu akyiri yi na dwennwen ho.
(12) Bere a worekenkan Bible no, hyɛ kyerɛw nsɛm bi a wobɛpɛ sɛ wokae paa no agyirae, anaa kyerɛkyerɛw gu nkrataa so fa gu baabi a wubehu daa. Kyere gu wo tirim; dwennwen ho; fa di dwuma. Mmɔ mmɔden nkyere nsɛm a ɛdɔɔso dodo ngu wo tirim prɛko pɛ, wubetumi ayɛ no biako anaa abien pɛ dapɛn biara; afei paw bi ka ho bere foforo a wobɛkenkan Bible no.
[Kratafa 15 mfonini ahorow]
Wokenkan Bible anaa wutie emu nsɛm a wɔakyere agu kasɛt so da biara?