Bɛboro Mfe 50 Ni a ‘Mitwa Kɔe’

SƐNEA EMMANUEL PATERAKIS KA KYERƐE

Mfeha dunkron a atwam ni no, wɔtoo nsa frɛɛ ɔsomafo Paulo wɔ ɔkwan soronko so sɛ: “Twa bra Makedonia bɛboa yɛn!” Paulo fi komam gyee hokwan foforo yi so ‘kɔkaa asɛmpa no.’ (Asomafo no Nnwuma 16:9, 10) Ɛwom sɛ nsa a wɔto frɛɛ me no nkyɛe saa de, nanso bɛboro mfe 50 ni na mepenee so de Yesaia 6:8 honhom a ɛne sɛ: “Mini, soma me!” no ‘twa kɔɔ’ nsasesin foforo mu. Akwan pii a mitui no ma minyaa mmeran sɛ Daa Nsrahwɛfo, nanso na me dwumadi no mfa kwan a mitu kogye m’ani ho hwee. Mpɛn pii na miduu m’ahɔhodan mu a mibuu nkotodwe daa Yehowa ase wɔ n’ahobammɔ ho.

WƆWOO me January 16, 1916, wɔ Hierápetra, wɔ Crete, too Ortodɔks abusua a wɔpɛ nyamesom mu. Efi bere a na meyɛ abofra no, na Maame de me ne me nuabeanom baasa kɔ asɔre Kwasida. Me papa de, na n’ani gye ho sɛ ɔbɛtra fie akenkan Bible no. M’ani gyee me papa—a na ɔyɛ ɔbarima nokwaredifo, onipa pa, na ɔyɛ timmɔbɔ no ho—na wu a owui bere a na madi mfe akron no kaa me yiye.

Mekae sɛ bere a midii mfe anum no, mekenkan asɛm bi wɔ sukuu a ɛka sɛ: “Biribiara a atwa yɛn ho ahyia no kyerɛ sɛ Onyankopɔn wɔ hɔ.” Bere a minyinii no, migyee eyi dii koraa. Enti, bere a midii mfe 11 no, mekyerɛw asɛm bi a mede Dwom 104:24 yɛɛ asɛmti: “Awurade, wo nnwuma dɔɔso dɛn ara, nyansa mu na woyɛɛ ne nyinaa, w’abɔde ahyɛ asase so ma.” Abɔde mu nneɛma a ɛyɛ nwonwa no maa me ho dwiriw me, nneɛma nketenkete te sɛ aba a ntaban nketewa wɔ ho na ama mframa atumi afa afi dutan no nwini ase mpo no yɛɛ me saa. Mede asɛm a mekyerɛwee no kɔmae dapɛn akyi no, me kyerɛkyerɛfo no kenkan kyerɛɛ adesuakuw no mufo nyinaa, ne afei sukuufo no nyinaa. Saa bere no, na akyerɛkyerɛfo no reko tia Komunis adwene, na wɔn ani gyei sɛ wobetiee kyerɛ a mekyerɛe sɛ Onyankopɔn wɔ hɔ no. Mede, m’ani gyei kɛkɛ sɛ mada gyidi a mewɔ wɔ Ɔbɔadeɛ no mu adi.

Me Nsɛmmisa Ho Mmuae

Meda so ara kae bere a edi kan a me ne Yehowa Adansefo hyiae wɔ 1930 mfe no mu no yiye. Na Emmanuel Lionoudakis reka asɛm no wɔ Crete nkurow ne nkuraase nyinaa mu. Migyee nhomawa pii fii ne hɔ, nanso biako a na n’asɛmti ne Where Are the Dead? no na ɛtwee m’adwene ankasa. Na misuro owu yiye araa ma na mempɛ sɛ mɛkɔ ɔdan a me papa wuu wɔ mu no mpo mu. Bere a mekenkanee nhoma yi mpɛn pii, na mihuu nea Bible kyerɛkyerɛ wɔ tebea a awufo wom ho no, metee nka sɛ me gyidihunu no atu ayera.

Ná Adansefo no ba yɛn kurom pɛnkoro afe biara wɔ ahohuru bere mu brɛ me nhoma pii ma mekenkan. Ntease a minyae wɔ Kyerɛwnsɛm no mu no nyaa nkɔanim nkakrankakra, nanso mekɔɔ so kɔɔ Ortodɔks Asɔre no. Nanso, nhoma a ɛne Deliverance no de nsakrae kɛse bae. Ɛkyerɛɛ nsonsonoe a ɛwɔ Yehowa ahyehyɛde ne Satan de no mu pefee. Efi saa bere no reba no, mifii ase suaa Bible ne Ɔwɛn Aban Asafo no nhoma biara a me nsa kae no bere nyinaa. Esiane sɛ na wɔabara Yehowa Adansefo wɔ Greece nti, na misua ade kokoam anadwo. Nanso, na m’ani gye nea meresua no ho araa ma na mintumi nka m’ano ntom a menka ho asɛm nkyerɛ obiara. Ankyɛ biara na polisifo fii ase de wɔn ani sii me so, na wɔbɛsraa me mpɛn pii awia ne anadwo dɔnhwerew biara mu de bɛhwehwɛɛ nhoma.

Wɔ 1936 mu no, mitwaa akwansin 75 kɔɔ asafo nhyiam nea edi kan wɔ Iráklion. M’ani gyei kɛse sɛ mihyiaa Adansefo no. Na wɔn mu dodow no ara yɛ awiɛmfoɔ, akuafo ankasa, nanso wɔboaa me ma mihui sɛ eyi ne nokware no. Mihyiraa me ho so maa Yehowa wɔ hɔ ara.

M’asubɔ no yɛ adeyɛ a me werɛ remfi da. Da koro anadwo, wɔ 1938 mu no, Onua Lionoudakis de me ne me Bible adesuafo baanu faa sum mu kɔɔ mpoano. Bere a ɔbɔɔ mpae wiei no, ɔde yɛn hyɛɛ nsu no mu.

Wɔkyeree Me

Da a edi kan a mekɔɔ asɛnka no, asɛnkɛse bi sii, sɛ menka ngugu mu a. Mihyiaa me sukuu bere mu adamfo bi a na wabɛyɛ ɔsɔfo, na yɛbɔɔ nkɔmmɔ a na ɛyɛ anigye. Nanso yewiei no, ɔkyerɛkyerɛ mu sɛ sɛnea ne sɔfo panyin akwankyerɛ kyerɛ no, ɛsɛ sɛ ɔma wɔkyere me. Bere a yɛtwɛnee wɔ kurow no sohwɛfo adwumayɛdan mu sɛ polisifo no befi akuraa bi a ɛbɛn hɔ ase aba no, nnipadɔm bi betwa hyiae wɔ abɔnten hɔ. Enti mefaa Greece kasa mu Apam Foforo a na ɛwɔ adwumayɛdan no mu, na mifii ase maa ɔkasa a na egyina Mateo ti 24 so. Mfiase no na nkurɔfo no mpɛ sɛ wotie, nanso ɔsɔfo no de ne ho gyee mu. Ɔkae sɛ: “Momma ɔnkasa. Ɛyɛ yɛn Bible.” Mitumi kasae dɔnhwerew biako ne fã. Enti, me da a edi kan wɔ ɔsom adwuma no mu no bɛyɛɛ ɛda a memaa baguam kasa a edi kan nso. Esiane sɛ bere a miwiei no na polisifo no mmae nti, kurow no sohwɛfo no ne ɔsɔfo no sii gyinae sɛ nnipakuw bi mpam me mfi kurow no mu. Mifii ase tuu mmirika denneennen sɛnea metumi biara wɔ ɔkwan no so beae a edi kan a akuntun no na amma abo a wɔtotowee no ammɔ me.

Ɛda a edi hɔ no, polisifo baanu a ɔsɔfo panyin no ka ho bɛkyeree me wɔ adwumam. Wɔ polisifo adwumayɛbea hɔ no, mitumi de Bible no dii wɔn adanse, nanso esiane sɛ ɔsɔfo panyin no tumi ho agyiraehyɛde nsi me Bible ho nhoma no so sɛnea mmara hwehwɛ nti, wɔbɔɔ me sobo sɛ obi a ɔma nkurɔfo sakra wɔn som, na ɔkyekyɛ nhoma a mmara mma ho kwan. Woyii me de twɛnee bere a wobedi m’asɛm.

Wodii m’asɛm wɔ ɔsram biako akyi. Miyii me ho ano sɛ ɛyɛ ahyɛde a Kristo de mae sɛ yɛnka asɛm no na meredi so kɛkɛ. (Mateo 28:19, 20) Obuae wɔ fɛwdi kwan so sɛ: “Me ba, wɔbɔɔ Onii a ɔde saa ahyɛde no mae no asɛndua mu. Nea ɛyɛ yaw ne sɛ minni tumi a ɛbɛma matumi de asotwe a ɛte saa ara ama wo.” Nanso, mmaranimfo kumaa bi a minnim no sɔre gyinae di maa me, kae sɛ bere a Komunis nniso ne Onyankopɔn mu gyidi a wonni ho nsɛm abu so no, ɛsɛ sɛ asɛnnibea no hoahoa ne ho sɛ mmerante a wɔasiesie wɔn ho sɛ wobegyina Onyankopɔn Asɛm akyi wɔ hɔ. Afei ɔsɔre bae bɛmaa me amo anigye so wɔ m’anom asɛm a mekyerɛwee a na ɛwɔ me ho kyerɛwtohɔ mu no ho. Abofra a na meyɛ no nyaa ne so tumi ma ogyinaa m’akyi a wannye hwee. Sɛ anka wɔde me bɛto afiase, anyɛ yiye koraa asram abiɛsa no, wɔde me too afiase dadu, na wɔbɔɔ me ka drakma 300. Ɔsɔretia a ɛte saa no hyɛɛ me bo a na masi sɛ mɛsom Yehowa na magyina nokware no akyi no mu den mmom.

Bere foforo a wɔkyeree me no, ɔtemmufo no huu sɛnea mede abotɔyam twee adwene sii Bible no so no. Ɔka kyerɛɛ ɔsɔfo panyin no sɛ omfi n’adwumayɛdan no mu, na ɔkae sɛ: “Woawie w’adwuma. Mɛhwɛ ayɛ ne ho adwuma.” Afei ɔfaa ne Bible, na yɛkaa Onyankopɔn Ahenni ho asɛm awia no nyinaa. Nsɛm a esisii saa no hyɛɛ me nkuran ma mekɔɔ so a nsɛnnennen mfa ho.

Kumfɔ

Wɔ 1940 mu no, wɔfrɛɛ me wɔ sraadi mu, na mekyerɛw krataa de kɔkyerɛkyerɛɛ nea enti a mintumi mpene so sɛ mede me ho bɛhyɛ mu. Nnanu akyi no, polisifo kyeree me hwee me pasaa. Afei wɔde me kɔɔ akono wɔ Albania, baabi a wodii m’asɛm esiane sɛ manko nti. Asraafo mpanyimfo no ka kyerɛɛ me sɛ ɛho nhia wɔn sɛ wobehu sɛ m’asɛm yɛ dɛ anaasɛ ɛnyɛ dɛ, na mmom nkɛntɛnso a me nhwɛso no benya wɔ asraafo no so na ehia wɔn. Wobuu me kumfɔ, nanso esiane mmara mu mfomso bi nti, wɔdanee atemmu yi yɛɛ no mfe du afiasenna a adwumaden wom, na ɛma minyaa abotɔyam kɛse. Midii me nkwa nna mu asram kakra a edii hɔ no wɔ asraafo afiase wɔ Greece, wɔ tebea horow a emu yɛ den mu a me da so ara hu ho amane wɔ honam fam.

Nanso, afiasenna amma mannyae asɛnka. Dabida! Na ɛnyɛ den sɛ mefi nkɔmmɔbɔ ase, bere a na nea enti a obi a ɔnyɛ ɔsraani da asraafo afiase yɛ nnipa pii nwonwa no. Nkɔmmɔ a ɛte saa yi mu biako a me ne aberante komapafo bi bɔe no kowiee Bible adesua mu wɔ afiase hɔ. Mfe aduasa awotwe akyi no, mihyiaa saa barima yi bio wɔ ɔmansin nhyiam bi ase. Ná wagye nokware no, na na ɔresom sɛ asafo sohwɛfo wɔ Lefkás supɔw no so.

Bere a Hitler asraafo tuu Yugoslavia so sa wɔ 1941 mu no, wɔde yɛn kɔɔ kesee fam akyirikyiri koguu Preveza afiase. Wɔ kwan so no, German asraafo totoo aprɛm guu yɛn so, na wɔamma yɛn a yɛyɛ nneduafo no aduan. Bere a paanoo ketewaa bi a mewɔ sae no, mebɔɔ Onyankopɔn mpae sɛ: “Sɛ ɛyɛ wopɛ sɛ ɔkɔm bekum me bere a woagye me afi kumfɔ mu a, wopɛ nyɛ hɔ.”

Ɛda a edi hɔ no, ɔsraani bi frɛɛ me kɔɔ nkyɛn bere a na yɛato santen a wɔrebobɔ yɛn din, na bere a ohuu baabi a mifi, m’awofo, ne nea enti a meda afiase no, ɔkae sɛ minni n’akyi. Ɔde me kɔɔ asraafo adidibea a ɛwɔ kurow no mu kyerɛɛ me pon bi a paanoo, kyiis, ne guanam a wɔatoto wɔ so, na ɔkae sɛ minni. Nanso mekyerɛkyerɛɛ mu sɛ esiane sɛ nneduafo 60 a aka no nni biribi a wodi nti, m’ahonim mma me kwan sɛ minni. Ɔsraani no kae sɛ: “Mintumi mma obiara aduan! Na wo papa yam ye ma me papa. Mewɔ abrabɔ fam asɛyɛde wɔ wo ho na ɛnyɛ afoforo no.” Mibuae sɛ: “Sɛ saa a mɛsan akɔ.” Ɔdwenee ho kakra, na afei ɔmaa me kotoku kɛse bi sɛ memfa aduan dodow biara a metumi.

Mesan baa afiase hɔ no, mede kotoku no sii hɔ kae sɛ: “Mmarima, eyi yɛ mo dea.” Ɔkasa ne n’awerɛfiri, ɛda a etwaam anwummere no, na wɔabɔ me sobo sɛ me na mama nneduafo no rehu amane efisɛ me ne wɔn mmom mmɔ Ɔbaabun Maria mpae no. Nanso, na Komunisni bi agyina m’akyi. Afei bere a ohuu aduan no, ɔka kyerɛɛ wɔn a aka no sɛ: “Mo ‘Baabun Maria’ no wɔ he? Mokae sɛ esiane saa barima yi nti yebewuwu, nanso ɔno na ɔde aduan brɛ yɛn.” Afei ɔdan baa me so kae sɛ: “Emmanuel! Bɛbɔ mpae.”

Ɛno akyi bere tiaa bi no, German asraafo no a wɔbɛnee yɛn no ma afiase ahwɛfo no guanee, na ɛno ma yenyaa ahofadi. Mekɔɔ Patras sɛnea ɛbɛyɛ a mehu Adansefo foforo a wɔrekɔ Athens wɔ 1941 May awiei no. Minyaa ntade ne mpaboa wɔ hɔ, na miguaree nea edi kan bɛboro afe mu. Ɛde besi bere a Germanfo no atumisɛm no baa awiei wɔ hɔ no, na wɔtaa gyinagyina me wɔ asɛnka mu, nanso wɔankyere me da. Wɔn mu biako kae sɛ: “Yɛtow Yehowa Adansefo tuo wɔ Germany. Nanso ɛha de, yɛn yam a anka yɛn atamfo nyinaa yɛ Adansefo!”

Ɔko Akyi Dwumadi Ahorow

Te sɛ nea akodi mmee Greece no, efi 1946 kosi 1949 no, ɔmanko san paapaee wɔn mu ma wokunkum nnipa mpempem pii. Ná anuanom hia nkuranhyɛ pii a ɛbɛma wɔakɔ so ayɛ den wɔ bere a na asafo nhyiamkɔ kɛkɛ mpo bɛma wɔatumi akyere obi no mu. Wobuu anuanom pii kumfɔ wɔ afã biara a wonni ho. Nanso eyi nyinaa akyi no, nnipa pii gyee Ahenni asɛm no, na yɛbɔɔ nipa biako anaa baanu asu dapɛn biara. Efi 1947 no, mifii ase yɛɛ adwuma wɔ Asafo ti no adwumayɛbea a ɛwɔ Athens no awia, na mesrasraa asafo ahorow no sɛ ɔhwɛfo kwantufo anadwo.

Wɔ 1948 no, m’ani gyei sɛ wɔtoo nsa frɛɛ me sɛ menkɔ Ɔwɛn Aban Gilead Bible Sukuu wɔ United States. Nanso na ɔhaw bi wɔ hɔ. Esiane sɛ na wɔde me ato afiase mpɛn ahorow nti, na mintumi nnye akwantu tumi krataa. Nanso, na me Bible suani bi yɛ ɔsahene bi adamfo. Esiane saa suani yi nti, me nsa kaa m’akwantu tumi krataa no adapɛn kakraa bi mu. Nanso mehawee, bere a aka kakra ma makɔ no wɔkyeree me sɛ merekyekyɛ Ɔwɛn-Aban no. Polisini bi de me kɔɔ Ɔman Bammɔ Polisifo panyin anim wɔ Athens. Nea ɛyɛɛ me nwonwa kɛse no, na ɔyɛ m’afipamfo no mu biako! Polisini no kyerɛkyerɛɛ nea enti a wakyere me no mu, na ɔde nsɛmma nhoma boaa no maa no. Me fipamfo no yii Ɔwɛn-Aban nsɛmma nhoma pii fii ne pon ase bae, na ɔka kyerɛɛ me sɛ: “Minni nea aba foforo no bi. So metumi ayi biako?” Hwɛ sɛnea me bo tɔɔ me yam sɛ mihuu sɛnea na Yehowa nsa wɔ nsɛm a ɛtete saa no mu!

Ná Gilead adesuakuw a ɛto so 16 wɔ 1950 mu no yɛ anigye. Yewiei no, wɔmaa me dwumadi wɔ Cyprus, baabi a ankyɛ na mihui sɛ asɔfo sɔretia mu yɛ den te sɛ Greece ara pɛ. Mpɛn pii na yehyiaa nnipakuw a wɔyɛ nyamesomfo a wɔyɛ katee a Ortodɔks asɔfo ahyɛ wɔn nkuran ma wɔreyɛ basabasa. Wɔ 1953 no, wɔanyɛ me tumi krataa a me de tra Cyprus no foforo, na wɔsan maa me dwumadi wɔ Istanbul, Turkey. Ɛha nso, mankyɛ. Amammuisɛm mu basabasayɛ a na ɛrekɔ so wɔ Turkey ne Greece ntam no hwehwɛe sɛ, ɛmfa ho nneɛma pa a na afi asɛnka adwuma no mu aba no, na ɛsɛ sɛ mifi hɔ kɔyɛ adwuma wɔ baabi foforo—Egypt.

Bere a na mewɔ afiase no, na Dwom 55:6, 7 taa ba me tirim. Ɛhɔ na Dawid kae sɛ ɔpɛ sɛ otu kɔtra anhweatam so. Mansusuw da sɛ da bi baabi a ɛte saa pɛpɛɛpɛ na mɛkɔ. Wɔ 1954 mu no, bere a mede keteke ne Nile so ahyɛmma tuu kwan bi a ɔbrɛ wom nna pii no, awiei koraa no miduu baabi a merekɔ no—Khartoum, wɔ Sudan. Nea na mepɛ sɛ meyɛ ara ne sɛ meguare na makɔda. Nanso na me werɛ afi sɛ ɛyɛ owigyinae. Nsu a na ɛwɔ ankora bi mu wɔ ɔdan no atifi no wɔteree me ho ma mehyɛɛ kyɛw bi a emu yɛ tofoo asram pii ansa na me kuru no rewu.

Mpɛn pii na metee ankonamyɛ nka wɔ hɔ, a na aka menko wɔ Sahara mfinimfini a na efi hɔ rekɔ asafo a ɛbɛn yɛ akwansin apem, nanso Yehowa wowaw me na ɔmaa me ahoɔden a mede bɛtoa so. Ɛtɔ mmere bi a na minya nkuranhyɛ fi mmeae bi a menhwɛ kwan koraa. Da bi mihyiaa Khartoum Tete Nneɛma Akorae hɔ panyin no. Na ɔwɔ adwempa, na yɛbɔɔ nkɔmmɔ bi a na ɛyɛ anigye. Bere a ohui sɛ meyɛ Greeceni no, obisaa me sɛ ebia mɛpene so ne no akɔ tete nneɛma akorae hɔ akɔkyerɛ nkyerɛwee a ɛwowɔ nneɛma a wohui wɔ afeha a ɛto so asia asɔredan bi mu no ase a. Bere a yekodii nnɔnhwerew anum wɔ asase ase dan bi a mframa nni hɔ papa mu no, mihuu ntaase bi a wɔakyerɛw Yehowa din wɔ Tetragrammaton mu wɔ ho. Hwɛ sɛnea m’ni gyei! Ɛnyɛ na sɛ wubehu Onyankopɔn din wɔ asɔredan ahorow mu wɔ Europa, nanso ɛnte saa koraa wɔ Sahara mfinimfini!

Wɔ amanaman ntam nhyiam wɔ 1958 akyi no, wɔmaa me dwumadi sɛ dantaban sohwɛfo sɛ mensrasra anuanom wɔ aman ne nsase 26 a ɛwɔ Mediterranea Supɔw so ne nea Ɛbɛn Mediterranea Supɔw no ne nea atwa Mediterranea Po no ho ahyia mu. Mpɛn pii na na minnim ɔkwan a mɛfa so afi tebea bi a na ɛyɛ den mu, nanso Yehowa bɔɔ kwan maa me bere nyinaa.

Sɛnea Yehowa ahyehyɛde no dwen Adansefo a wɔwowɔ mmeae a atew ne ho wɔ aman bi mu no maa me ho dwiriw me bere nyinaa. Bere bi, mihyiaa onua Indiani bi a ɔyɛ adwuma wɔ baabi a wotu fam ngo. Ɛda adi sɛ na ɔno nkutoo ne Ɔdansefo wɔ ɔman no mu. Na ɔwɔ nhoma wɔ kasa horow 18 mu wɔ n’adaka mu a na ɔde ma ne mfɛfo adwumayɛfo. Ɛha mpo a na wɔabara ananafo som nyinaa katee no, yɛn nua no werɛ amfi n’asɛyɛde a ɛne sɛ ɔbɛka asɛmpa no. Ne mfɛfo no ho dwiriw wɔn sɛ wohui sɛ wɔasoma ne som mu nanmusini bi ma wabɛsra no.

Mekɔsraa Spain ne Portugal wɔ 1959 mu. Asraafo katabaakofo na na wodi aman abien no nyinaa so saa bere no, a na wɔabara Yehowa Adansefo denneennen. Mitumi yɛɛ nhyiam ahorow bɛboro ɔha wɔ ɔsram biako mu hyɛɛ anuanom den sɛ mma wɔmpa abaw, ɛmfa ho nsɛnnennen no.

Menyɛ Ankonam Bio

Na masom Yehowa sɛ bere nyinaa somfo bɛboro mfe 20 a na meyɛ ɔhokwafo, nanso metee ɔbrɛ nka mpofirim ara wɔ akwan a metaa tu a na minni atrae no mu. Saa bere yi na mihyiaa Annie Bianucci, ɔkwampaefo titiriw bi a ɔwɔ Tunisia. Yɛwaree 1963 mu. Ɔdɔ a na ɔwɔ ma Yehowa ne nokware no, ahofama a na ɔwɔ ma ɔsom adwuma no ne sɛnea onim ɔkyerɛkyerɛ, ɛne kasa horow ho nimdeɛ a na ɔwɔ no ma ɔyɛɛ mmoa ankasa wɔ yɛn asɛmpatrɛw ne ɔmansin adwuma no mu wɔ Afrika kusuu fam ne atɔe fam ne Italy.

Wɔ August 1965 mu no, wɔmaa me ne me yere dwumadi wɔ Dakar, Senegal, baabi a minyaa hokwan hyehyɛɛ ɛhɔ baa dwumadibea no. Na Senegal yɛ ɔman a wɔma ɔsom ho kwan wɔ hɔ kɛse, na akyinnye biara nni ho sɛ efi ne mampanyin, Léopold Senghor, a ɔyɛ Afrika Amampanyin kakraa bi a wɔkyerɛw Malawi Mampanyin Banda krataa de gyinaa Yehowa Adansefo akyi wɔ ɔtaa a na ɛyɛ hu a ɛkɔɔ so wɔ Malawi wɔ 1970 mfe no mu biako no.

Yehowa Nhyira Pii

Wɔ 1951 no, bere a mifii Gilead kɔɔ Cyprus no, mede nnaka ason na ɛkɔe. Merekɔ Turkey no, na aka anum. Nanso esiane sɛ na mitutu akwan pii nti, na ɛsɛ sɛ mede adaka a emu duru yɛ kilogram 20, a na me nkrataa ne me typewriter “ketewa” ka ho na edi dwuma. Da bi meka kyerɛɛ Onua Knorr, a na ɔyɛ Ɔwɛn Aban Asafo no titrani saa bere no sɛ: “Woabɔ me ho ban afi honam fam ade dodowpɛ ho. Woama mede nneɛma a emu duru yɛ kilogram 20 atra ase, nanso me ho tɔ me.” Mante nka da sɛ mahwere biribi esiane sɛ minni nneɛma pii nti.

Ɔhaw titiriw a mihyiae wɔ m’akwantu no mu ne sɛnea na mefi ɔman biako mu akɔ foforo mu. Da bi, wɔ asase bi a wɔabara adwuma no so no, odwumayɛni bi a ɔhwehwɛ nneɛma mu fii ase sɛ ɔrebuebue me nkrataa mu. Na eyi bɛyɛ asiane ama Adansefo a wɔwɔ ɔman no mu no, enti miyii krataa bi a me yere akyerɛw me fii m’atade nguguso bi mu, na meka kyerɛɛ odwumayɛni a ɔhwehwɛ nneɛma mu no sɛ: “Mihu sɛ wopɛ nkrataa kenkan. Wopɛ sɛ wokenkan krataa a efi me yere hɔ a ɛnka nkrataa yi ho no nso?” Ɔfɛree, na ɔpaa me kyɛw ma mekɔe.

Efi 1982 no, me ne me yere resom sɛ asɛmpatrɛwfo wɔ Nice, wɔ France kesee fam. Esiane akwahosan mu nsɛnnennen nti, mintumi nyɛ pii sɛ kan no. Nanso ɛno nkyerɛ sɛ yɛn anigye so ahuan. Yɛahu sɛ ‘yɛn brɛ renyɛ ɔkwa.’ (1 Korintofo 15:58) M’ani gye sɛ mihu nnipa pii a me ne wɔn suaa ade wɔ mfe a atwam no mu ne m’abusuafo bɛboro 40 a wɔresom Yehowa nokwaredi mu no.

Minnuu me ho ɔkwan biara so wɔ afɔre ahorow a mabɔ wɔ m’asetram wɔ nea afi ‘twa a mitwa kɔe’ no mu aba no ho. Sɛnea ɛte biara no, afɔre ahorow a yɛbɔ no mu biara nni hɔ a yebetumi de atoto nea Yehowa ne ne Ba, Kristo Yesu, ayɛ ama yɛn no ho. Sɛ mibu kɔmpɔ hwɛ m’akyi bɛboro mfe 60 ni a mihuu nokware no a, metumi aka sɛ Yehowa ahyira me kɛse. Sɛnea Mmebusɛm 10:22, NW, ka no, “Yehowa nhyira—na ɛma obi yɛ ɔdefo.”

Akyinnye biara nni ho sɛ, Yehowa ‘adɔe ye sen nkwa.’ (Dwom 63:3) Bere a onyin mu ɔhaw ahorow kɔ so dɔɔso no, mekɔ so ka odwontofo no nsɛm yi wɔ me mpaebɔ mu mpɛn pii: “Oo, wo Yehowa na maguan matoa wo. Oo, mma m’anim ngu ase da. Wo ne m’anidaso, Oo Amansan Hene Awurade Yehowa, nea mifi me mmofraase de me ho too ne so. Oo, Onyankopɔn, wo na wufi me mmofraase kyerɛkyerɛɛ me, na maka w’anwonwade abedu nnɛ. Oo, Onyankopɔn, nkwakoraabere ne dwen mu nso nnyaw me.”—Dwom 71:1, 5, 17-18, NW.

[Kratafa 25 mfonini]

Me ne me yere Annie nnɛ