‘Fa W’ahonyade Hyɛ Yehowa Anuonyam’—Ɔkwan Bɛn So?

“FA W’AHONYADE hyɛ [Yehowa, NW] anuonyam, ne wo nnɔbae mu adekan nyinaa.” Nea ɛwɔ nyansasɛm a efi honhom mu a wɔkyerɛw no bɛyɛ mfe 2,600 a atwam ni yi mu no ne hokwan a ɛbɛma obi anya Yehowa nhyira abu so no, efisɛ ɔkyerɛwfo no kɔ so da no adi sɛ: “Ɛnna ade dodow bɛyɛ w’asan amaama, na wo nsa-kyĩ-amoa mu nsã foforo bebu so.”—Mmebusɛm 3:9, 10.

Nanso dɛn na Nyankopɔn a yɛbɛhyɛ no anuonyam no kyerɛ? Dɛn ne ahonyade a ɛsɛ sɛ yɛde hyɛ Yehowa anuonyam no? Na ɔkwan bɛn so na yebetumi ayɛ eyi?

‘Hyɛ Yehowa Anuonyam’

Wɔ Kyerɛwnsɛm no mu no, nea Hebri asɛmfua titiriw a wɔde di dwuma ma anuonyam, ka·vohdhʹ, no kyerɛ ankasa ne “duruduru.” Enti sɛ́ yɛbɛhyɛ obi anuonyam no kyerɛ sɛ yebebu no sɛ n’anim yɛ duru, ɔkorɔn, anaasɛ ɔsom bo. Wɔkyerɛ Hebri asɛmfua foforo a wɔde di dwuma ma anuonyam, yeqarʹ, nso ase “som bo” ne “nneɛma a ɛsom bo.” Saa ara na Hela asɛmfua ti·meʹ, a wɔkyerɛ ase “anuonyam” wɔ Bible mu no kura adwene a ɛne nidi, bo a biribi som. Enti obi hyɛ obi anuonyam denam obu ne nidi a emu dɔ a ɔbɛkyerɛ ama no so.

Anuonyam a yɛbɛhyɛ obi no wɔ ntease foforo nso. Susuw kyerɛwtohɔ a ɛfa Yudani nokwafo Mordekai a bere bi oyii atirisopam bi a na ɛde tete Persia hene Ahasweros nkwa bɛto asiane mu adi ho no ho. Akyiri yi, bere a ɔhene no hui sɛ ɔnyɛɛ biribiara nhyɛɛ Mordekai anuonyam wɔ saa adeyɛ no ho no, obisaa ne soafo panyin, Haman, ade pa a ɛsɛ sɛ wɔde hyɛ onii a ɔhene pɛ no nidi no anuonyam. Ná Haman susuw sɛ ɔno na wɔbɛhyɛ no anuonyam no, nanso hwɛ sɛnea odii mfomso! Sɛnea ɛte biara no, Haman kae sɛ wɔmfa “ahenni atade” nhyɛ saa nipa no, na ɔntra “ɔpɔnkɔ a ɔhene tra so” no so. Ɔde baa awiei sɛ: “Wɔmma ɔntra ɔpɔnkɔ no so mfa kurow no abɔnten so, na wɔmpae nni n’anim sɛ: Sɛɛ na wɔyɛ onipa a ɔhene pɛ no nidi no!” (Ester 6:1-9) Ɛha yi, nea na ɛka anuonyam a wɔbɛhyɛ obi ho ne sɛ wɔbɛkamfo no baguam ama nnipa nyinaa de nidi a ɛkorɔn ama no.

Saa ara na Yehowa a yɛbɛhyɛ no anuonyam no wɔ afã abien: sɛ yɛn ankasa bɛkyerɛ obu a ɛkorɔn ama no, na yɛnam adwuma a ɛne sɛ yɛbɛbɔ ne din dawuru wɔ baguam no mu kyɛfa a yebenya na yɛaboa no so akamfo no baguam.

“W’ahonyade”—Ɛne Dɛn?

Akyinnye biara nni ho sɛ, yɛn ahonyade no bi ne yɛn nkwa, yɛn bere, yɛn dom akyɛde, ne yɛn ahoɔden. Na yɛn honam fam nneɛma nso ɛ? Susuw nsɛm a Yesu kae bere a ohui sɛ okunafo hiani bi de dwetɛ sika nketewa abien regu asɔrefie hɔ tow adaka no mu no ho. Ɔkae sɛ: “Okunafo hiani yi de bebree abegu mu sen wɔn nyinaa. Na eyinom nyinaa [afoforo a woyii ntoboa no] fi nea wɔwɔ na aboro wɔn so no mu na wɔde bi abegu mu, na oyi de, ofi ne hia mu de n’asetrade a ɔwɔ nyinaa na abegu mu.” (Luka 21:1-4) Yesu kamfoo okunafo yi sɛ ɔde ne honam fam nneɛma maa Yehowa som nyaa nkɔso.

Enti, ɛda adi pefee sɛ nea ɛka ahonyade a Salomo kaa ho asɛm no ho bio ne honam fam nneɛma biara a ebia yɛwɔ. Na asɛm “wo nnɔbae mu adekan nyinaa” no kura adwene a ɛne sɛ yɛde yɛn ahonyade a edi mũ sen biara no bɛma Yehowa.

Nanso, ɔkwan bɛn so na honam fam nneɛma a yɛde ma no betumi ahyɛ Onyankopɔn anuonyam? So nneɛma nyinaa nni wɔ no dedaw? (Dwom 50:10; 95:3-5) Ɔhene Dawid kae wɔ mpae a ofi komam bɔɔ Yehowa no mu sɛ: “Wo nkyɛn na [nneɛma] nyinaa fi.” Na ɛdefa ntoboa kɛse a Dawid ne ne nkurɔfo yi maa asɔrefie no si ho no, Dawid kae sɛ: “Wo nsam na yenyae na yɛde ama wo yi.” (1 Beresosɛm 29:14) Enti sɛ yɛde akyɛde rema Yehowa a, na nea ɔno fi ne komam papayɛ mu de ama yɛn no na yɛresan de ama no kɛkɛ. (1 Korintofo 4:7) Nanso, sɛnea yɛadi kan ahu no, nea ɛka Yehowa a yɛbɛhyɛ no anuonyam ho ne sɛ yɛbɛkamfo no wɔ afoforo anim. Na akyɛde a yeyi ma nokware som nya nkɔso no hyɛ Onyankopɔn anuonyam. Bible no kura saa kwan yi a wɔfa so yi Yehowa ayɛ no ho nhwɛso ahorow a ɛkyɛn so.

Tete Nhwɛso Ahorow

Bɛyɛ mfe 3,500 a atwam ni, bere a bere dui sɛ Yehowa ma Israelfo nya ntamadan wɔ sare so hɔ sɛ baabi a wɔbɛsom no, ɛho behiae sɛ wonya nneɛma a ɛsom bo ahorow pii na wɔde asi ɔdan no sɛnea Onyankopɔn kyerɛe no. Yehowa hyɛɛ Mose sɛ ‘ɔmma obiara a ne koma ka no mfa ntoboa mmrɛ Yehowa.’ (Exodus 35:5) Kyerɛwtohɔ no kɔ so ka sɛ: “Wɔbae, obiara a ne koma kanyan no, ne obiara a ne honhom kaa no, na wɔde [Yehowa, NW] somã afɔrebɔde bae sɛ wɔmfa nyɛ ahyiae ntamadan no ne ɛho som nneɛma nyinaa ne ntade kronkron no.” (Exodus 35:21) Nokwarem no, ayɛyɛde a wofi wɔn pɛ mu mae no dɔɔso sen nea na ɛbɛso adwuma no araa ma na ɛsɛ sɛ ‘wɔhyɛ’ nkurɔfo no sɛ ‘wɔmmfa bi mmma bio’!—Exodus 36:5, 6.

Susuw nhwɛso foforo ho. Bere a na ntamadan no adi n’atirimpɔw ho dwuma awie na wɔreyɛ ahoboa asi asɔrefie no, Dawid ankasa yii ntoboa kɛse maa asɔrefie a na ne ba Salomo besi no. Ɔka kyerɛɛ afoforo nso sɛ wonyi ntoboa no bi, na nkurɔfo no tiei ma wɔde akyɛde a ɛsom bo brɛɛ Yehowa. Ná dwetɛ ne sika no nkutoo bedu dɔla ɔpepepem 50 wɔ ɛnnɛyi sika mu. “Na ɔman no ani gyei nea woyii wɔn yam de mae no ho.”—1 Beresosɛm 29:3-9; 2 Beresosɛm 5:1.

‘Sɛnea Woyi Wɔn Yam Ma’

Yɛbɛyɛ dɛn atumi anya anigye wɔ nneɛma a yeyi yɛn yam de ma wɔ yɛn bere yi so no ho? Adwuma a ɛho hia sen biara a ɛrekɔ so wɔ wiase mu saa bere yi ne Ahenni asɛnka ne asuafoyɛ adwuma no. (Mateo 24:14; 28:19, 20; Asomafo no Nnwuma 1:8) Na Yehowa ahu sɛ ɛfata sɛ ɔde Ahenni no ho nneɛma a ɛwɔ asase so no hyɛ N’adansefo nsa.—Yesaia 43:10.

Ɛda adi sɛ adwuma a Yehowa Adansefo reyɛ nnɛ no gye sika. Ahenni Asa, Nhyiam Asa, baa dwumadibea, nnwinnan ne Betel fie ahorow a yebesisi na yɛasiesie no gye sika. Bible ne Bible ho nhoma a yebetintim wɔ kasa ahorow mu na yɛakyekyɛ no nso gye sika. Wɔyɛ dɛn di ɛka a ɛte saa a ahyehyɛde no bɔ ho dwuma? Ɛdenam ntoboa a efi ɔpɛ mu nkutoo so!

Ntoboa no mu dodow no ara fi ankorankoro a—te sɛ okunafo a Yesu huu no no—asetrade kakraa bi na wɔwɔ no hɔ. Esiane sɛ wɔmpɛ sɛ wɔbɛhwere hokwan a ɛne sɛ wɔbɛhyɛ Yehowa anuonyam wɔ saa kwan yi so nti, woyi ntoboa kakra “sɛnea wobetumi,” na ɛtɔ mmere bi mpo a, “ɛboro wɔn ahoɔden so.”—2 Korintofo 8:3, 4.

Ɔsomafo Paulo ka kyerɛɛ Korinto Kristofo no sɛ: “Sɛnea obiara asusuw ne komam no, ɔmma, ɛnyɛ amemmenemfe anaa ɔhyɛ mu; efisɛ nea ɔtew n’anim ma no na Onyankopɔn dɔ no.” (2 Korintofo 9:7) Ɔma a efi komam no hwehwɛ sɛ wɔyɛ nhyehyɛe pa. Paulo ka kyerɛɛ Korintofo sɛ: “Daa nnawɔtwe mu da a edi kan no, mo mu biara mfa nea ebesi no yiye ama wanya no nsie, na mamma ansa na wɔayi tow no.” (1 Korintofo 16:2) Saa ara na wɔ kokoam ne ɔpɛ mu no, wɔn a wɔpɛ sɛ woyi ntoboa ma Ahenni adwuma nya nkɔso nnɛ no betumi de sika a wonya no bi asie ama saa atirimpɔw no.

Yehowa Hyira Wɔn a Wɔhyɛ no Anuonyam No

Bere a honam fam yiyedi kɛkɛ mfa honhom fam yiyedi mma no, ayamye mu a yebefi de yɛn ahonyade—yɛn bere, yɛn ahoɔden, ne yɛn honam fam nneɛma—ahyɛ Yehowa anuonyam no de nhyira pii ba. Eyi te saa efisɛ Onyankopɔn a biribiara wɔ no no ma yɛn awerɛhyem sɛ: “Ɔyamyefo bɛdɔ srade, na nea ɔma ebinom mee nso bɛmee.”—Mmebusɛm 11:25.

Wɔ Ɔhene Dawid wu akyi no, ne ba Salomo de ntoboa a efi ɔpɛ mu a na n’agya agyigye no sii asɔrefie fɛfɛ bi sɛnea Yehowa hyɛe no. Na bere tenten a na Salomo som Onyankopɔn nokwaredi mu no, “Yuda ne Israel traa ase dwoodwoo . . . efi Dan kosi Beer-Seba, Salomo nna nyinaa.” (1 Ahene 4:25) Adekora adan yeyɛɛ mã, na nsa-kyi-amoa mu nsa yeyɛɛ mã buu so—bere tenten a Israel ‘de wɔn ahonyade hyɛɛ Yehowa anuonyam no.’

Akyiri yi, Yehowa nam odiyifo Malaki so kae sɛ: “Momfa eyi nsɔ me nhwɛ ɛ, asafo [Yehowa, NW] na ose, sɛ meremmue ɔsoro mfɛnsere memma mo, na merenhwie nhyira memma mo mma ɛmmoro so anaa?” (Malaki 3:10) Honhom fam yiyedi a Yehowa asomfo wɔ nnɛ no yɛ adanse a ɛkyerɛ sɛ Onyankopɔn adi ne bɔhyɛ so.

Akyinnye biara nni ho sɛ, sɛ yɛyɛ yɛn fam de ma Ahenni nneɛma nya nkɔso a, Yehowa ani gye. (Hebrifo 13:15, 16) Na ɔhyɛ bɔ sɛ sɛ ‘yɛkɔ so hwehwɛ ahenni no ne ne trenee kan’ a, ɔbɛwowaw yɛn. (Mateo 6:33) Ɛmmra sɛ yɛde komam ahurusidi kɛse ‘de yɛn ahonyade bɛhyɛ Yehowa anuonyam.’

[Adaka wɔ kratafa 28, 29]

Akwan A Ebinom Fi Wɔn Pɛ Mu Yi Ntoboa Ma Wiase Nyinaa Adwuma No

Pii yi sika bi to hɔ a wɔde kɔto ntoboa nnaka a wɔakyerɛw ho sɛ: “Ntoboa ma Asafo ti no Wiase Nyinaa Adwuma No—Mateo 24:14,” mu. Ɔsram biara, asafo ahorow de sika yi mena wiase nyinaa adwumayɛbea ti wɔ Brooklyn, New York, anaa wɔn man mu baa dwumadibea.

Wubetumi de sika ntoboa a wufi wo pɛ mu de ma nso amena Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483 tẽẽ, anaa Asafo ti no baa dwumadibea a ɛhwɛ wo man no dwumadi so. Wubetumi de agude anaa nneɛma foforo a ɛsom bo nso ama. Ɛsɛ sɛ wode krataa tiawa bi a ɛkyerɛ sɛ eyi yɛ akyɛde koraa ka ntoboa yi ho.

Ntoboa A Wɔde Ma Kosi Bere Bi Ho Nhyehyɛe

Obi betumi de sika ama Ɔwɛn Aban Asafo no, na wɔayɛ nhyehyɛe soronko bi wɔ ho sɛ sɛ ɛba sɛ ehia nea ɔde mae no a, wɔbɛsan de n’ade ama no. Sɛ wopɛ ho nsɛm pii a, yɛsrɛ sɛ wo ne Treasurer’s Office no nni nkitaho denam address a yehu wɔ atifi hɔ no so.

Tirimbɔ

Nea ɛka sika a wɔde kyɛ koraa ne ntoboa a nhyehyɛe bi bata ho ho no, akwan foforo wɔ hɔ a wubetumi afa so ayi bi ama de aboa wiase nyinaa Ahenni adwuma no. Nea ɛka eyi ho ni:

Insurance: Obi betumi ayɛ nhyehyɛe na sɛ owu a, wɔde ne insurance sika anaa sika a sɛ ogyae adwuma anaa ɔkɔ pɛnhyen a, wɔde bɛma no no ama Ɔwɛn Aban Asafo no. Ɛsɛ sɛ wɔbɔ Asafo ti no amanneɛ wɔ nhyehyɛe a ɛte sɛɛ biara ho.

Sika a Wɔasie Wɔ Sikakorabea: Obi betumi de sika a wasie wɔ sikakorabea, sika kɛse a ɛda sikakorabea ho adanse krataa, anaa sika a sɛ ogyae adwuma a wobetua ama no ato hɔ ma Ɔwɛn Aban Asafo no ahwɛ so anaa sɛ owu a wɔatua ama Ɔwɛn Aban Asafo no, sɛnea ɛne ɛhɔ sikakorabea ahwehwɛde horow hyia. Ɛsɛ sɛ wɔbɔ Asafo ti no amanneɛ wɔ nhyehyɛe a ɛte sɛɛ biara ho.

Adwuma mu Kyɛfa ne Sika a Wɔde Bɔ Bosea: Obi betumi de adwuma bi mu kyɛfa a ɔwɔ ne sika a ɔde abɔ bosea a wɔbɛsan atua ama no no ama Ɔwɛn Aban Asafo no sɛ akyɛde koraa anaa wɔayɛ ho nhyehyɛe bi a ɛbɛma wɔakɔ so atua mfaso a efi mu ba no nkutoo ama nea ɔde mae no.

Adan ne Nsase: Obi betumi de adan anaa nsase a wotumi tɔn ama Ɔwɛn Aban Asafo no sɛ akyɛde koraa anaasɛ wobetumi ayɛ ho nhyehyɛe wɔ ɔkwan a ɛbɛma nea ɔde mae no akɔ so atra mu bere a ɔte nkwa mu so. Ɛsɛ sɛ obi ne Asafo ti no di nkitaho ansa na ɔde adan ne nsase biara ama Asafo ti no.

Nsamansew ne Sika a Wɔde Sie Ma Wɔhwɛ So: Obi betumi de agyapade anaa sika ama Ɔwɛn Aban Asafo no denam mmara kwan so samansew so, anaa ɔbɛyɛ nhyehyɛe na sɛ owu a, wɔde sika bi a ɔde asie sɛ wɔnhwɛ so no ama Asafo ti no. Wɔtaa tew tow a wotua wɔ sika a wɔde sie sɛ wɔnhwɛ so a wɔde ma nyamesom ahyehyɛde bi ho no so. Ɛsɛ sɛ wɔde samansew no anaa sika a wɔde sie sɛ wɔnhwɛ so no ho nkrataa no biako mena Asafo ti no.

Sɛnea asɛm “tirimbɔ” no kyerɛ no, ntoboayi ahorow a ɛte saa yi hwehwɛ ankasa sɛ nea ɔde ma no yɛ nhyehyɛe. Nea ɛbɛyɛ na wɔaboa ankorankoro a wɔpɛ sɛ wɔboa Asafo ti no denam tirimbɔ bi so no, wɔasiesie nhomawa bi a wɔato din Planned Giving to Benefit Kingdom Service Worldwide. Wɔkyerɛw nhomawa no de dii nsɛmmisa pii a Asafo ti no anya fa akyɛde, nsamansew, sika a wɔde sie ma wɔhwɛ so ho no ho dwuma. Ɛsan kura nsɛm foforo a mfaso wɔ so a ɛfa adan ne nsase, sika, ne towtua ho nhyehyɛe ho, na wɔayɛ na aboa ankorankoro a wɔwɔ United States a wɔpɛ sɛ wɔboa wiase nyinaa Ahenni nneɛma no ma wɔapaw akwan a edi mũ a mfaso wɔ so sen biara a wɔbɛfa so ayɛ saa bere a wosusuw wɔn mmusua ne wɔn ankasa nsɛm tebea ho no. Pii nam nhomawa no a wɔakenkan ne nkitaho a wɔne wɔn a wɔyɛ adwuma wɔ Tirimbɔ Dwumadibea no adi so atumi aboa Asafo ti no, na bere koro no ara no, wɔanya saa a wɔyɛ no ho towtua a wɔtew so no so mfaso kɛse. Obi betumi afa nkrataa-kyerɛw anaa telefon so anya nhomawa no bi.

Ɛsɛ sɛ wɔn a wɔn ani gye tirimbɔ nhyehyɛe yi bi ho no hu Planned Giving Desk, Watch Tower Bible and Tract Society of Pennsylvania, 100 Watchtower Drive, Patterson, New York 12563-9204, telephone (914) 878-7000, anaa wɔne Asafo ti no baa dwumadibea a ɛhwɛ wɔn man no dwumadi so no di nkitaho.