Mmabun—Monkɔ So Nnya Nkɔso Wɔ Mo Asubɔ Akyi

 1. Nneɛma pa bɛn na mmabun pii ayɛ dedaw?

AFE biara, Kristofo mmabun mpempem bɔ asu. Woatu saa anammɔn yi anaa? Sɛ saa a, ɛyɛ Yehowa ne wo nuanom Kristofo nyinaa dɛ sɛ woabɔ asu! (Mmeb. 27:11) Wo de, susuw nneɛma pii a woatumi ayɛ dedaw no ho hwɛ. Woayere wo ho asua Bible no. Ebi mpo a, wode mfe bebree na ayɛ saa. Nea woasua no ama woabegye adi sɛ Bible yɛ Onyankopɔn Asɛm. Ɛno da nkyɛn a, Onii a ɔma wɔkyerɛw Bible no, woabehu no, na woanya ɔdɔ ama no. Ɔdɔ a wunya maa Yehowa no kɔɔ so nyinii, enti seesei woahyira wo ho so abɔ asu abɛyɛ ne somfo. Hwɛ ne fɛ!

 2. Dɛn na yebesusuw ho wɔ adesua yi mu?

² Yegye di sɛ, ansa na worebɔ asu no, wuhyiaa wo gyidi ho sɔhwɛ pii. Nanso worenyin yi, wubehyia sɔhwɛ afoforo. Ɔdɔ a wowɔ ma Yehowa no, Satan bɛbɔ mmɔden sɛ ɔbɛma ano adwo, sɛnea ɛbɛyɛ a wubegyae Yehowa som. (Efe. 4:14) Nanso mma biribi a ɛte saa nto wo. Woahyɛ Yehowa bɔ sɛ wobɛsom no. Enti dɛn na ɛbɛboa wo ma woakɔ so adi no nokware? Ɛsɛ sɛ wokɔ so nya nkɔso bɛyɛ Kristoni a ne ho akokwaw. (Heb. 6:1) Wobɛyɛ dɛn ayɛ saa?

 3. Nkɔso bɛn na ɛsɛ sɛ Kristofo nyinaa nya wɔ wɔn asubɔ akyi?

³ Yɛn asubɔ akyi no, afotu a ɔsomafo Paul de kɔmaa ne mfɛfo gyidifo a na ɛwɔ Efeso no, ɛsɛ sɛ yɛn nyinaa de yɛ adwuma. Ɔhyɛɛ wɔn nkuran sɛ wɔmmɛyɛ Kristofo “mua.” (Efe. 4:13) Yɛbɛka no kwan foforo so a, ‘wonnya nkɔso’ mmɛyɛ Kristofo a wɔn ho akokwaw. Yebetumi ate nea na Paul reka no ase, efisɛ ɔde sɛnea abofra nyin no totoo nkɔso a ɛsɛ sɛ Kristofo nya ho. Awarefo wo a, wɔn ani gye paa na wonsi abofra no fam. Nanso, ɛnsɛ sɛ abofra no yɛ abofra daa; ɛsɛ sɛ onyin. Edu baabi a, ɛsɛ sɛ oyi ‘mmofra suban no fi hɔ.’ (1 Kor. 13:11) Saa ara na ɛte wɔ Kristofo fam. Yɛn asubɔ akyi no, ɛsɛ sɛ yɛkɔ so nya nkɔso. Ɛno nti, momma yɛnhwɛ nyansahyɛ ahorow bi a ɛbɛboa yɛn ama yɛatumi ayɛ saa.

 4. Suban bɛn na ɛbɛboa yɛn ma yɛanya nkɔso wɔ Onyankopɔn som mu? Kyerɛkyerɛ mu. (Filipifo 1:9)

⁴ Ma ɔdɔ a wowɔ ma Yehowa no nnyin. Yɛrekasa yi, wodɔ Yehowa paa. Nanso wubetumi adɔ no bi aka ho. Wobɛyɛ no sɛn? Paul kaa ɔkwan baako a wobɛfa so ayɛ saa ho asɛm wɔ Filipifo 1:9. (Kenkan.) Paul bɔɔ mpae sɛ ɔdɔ a Filipifo no wɔ no “nkɔ so nyɛ kɛse.” Wei kyerɛ sɛ, ɔdɔ a yɛwɔ ma Yehowa no betumi anyin. Yebetumi ayɛ saa a, etwa sɛ yenya “nokware nimdeɛ ne ntease a ɛkɔ akyiri.” Bere a yɛreyere yɛn ho hu Yehowa yiye no, na ɔdɔ a yɛwɔ ma no no reyɛ kɛse. Ɛno nso bɛma yɛakyerɛ ne su ne ɔkwan a ɔfa so yɛ nneɛma no ho anisɔ kɛse. Ɛba saa a, daa yɛbɛpɛ sɛ yɛyɛ nneɛma a ɛsɔ n’ani, na ɛnyɛ nneɛma a ɛbɛma wadi yaw da. Yɛyere yɛn ho paa sɛ yebehu nea ɔpɛ sɛ yɛyɛ ne sɛnea yɛbɛyɛ no.

5-6. Yɛbɛyɛ dɛn ama ɔdɔ a yɛwɔ ma Yehowa no ayɛ kɛse? Kyerɛkyerɛ mu.

⁵ Sɛ ɔdɔ a yɛwɔ ma Yehowa no betumi ayɛ kɛse a, ɛsɛ sɛ yehu ne Ba no yiye, efisɛ ɔdaa n’Agya su adi pɛpɛɛpɛ. (Heb. 1:3) Ɔkwan titiriw a yɛbɛfa so ahu Yesu yiye ne sɛ yebesua Nsɛmpa nnan no. Bible no a wobɛkenkan no da biara no yɛ suban pa. Enti sɛ wunnya mfii ase a, ɛnde adɛn na wonhyɛ ase seesei ara? Sɛ worekan Yesu ho asɛm a, ɛyɛ a bɔ mmɔden ma w’adwene nkɔ ne su ahorow no so kɛse. Ná obiara tumi bɛn no; ɔyɛɛ mmofra nkumaa mpo atuu. (Mar. 10:13-16) Ɔmaa n’asuafo no ho dwoo wɔn; ná wonsuro sɛ wɔbɛkyerɛ wɔn adwene wɔ n’anim. (Mat. 16:22) Yesu yɛɛ saa de suasuaa ne soro Agya no. Yehowa nso, obiara tumi bɛn no. Enti yetumi bɔ no mpae. Sɛ yɛrebɔ no mpae a, yebetumi aka yɛn koma mu asɛm biara akyerɛ no, a yɛwɔ awerɛhyem paa sɛ ɔremmu yɛn animtiaa da. Ɔdɔ yɛn, na odwen yɛn ho.—1 Pet. 5:7

⁶ Yesu nyaa tema maa nkurɔfo. Ɔsomafo Mateo kaa sɛ: “Bere a ohuu nnipadɔm no, wɔyɛɛ no mmɔbɔ, efisɛ na wɔayɛ sɛ nguan a wɔapirapira wɔn agyaw wɔn agu hɔ a wonni hwɛfo.” (Mat. 9:36) Yehowa nso ɛ, ɔte nka sɛn? Yesu kaa sɛ: “M’Agya a ɔwɔ soro no ani nnye ho sɛ nkumaa yi mu baako mpo bɛyera.” (Mat. 18:14) Hwɛ sɛnea asɛm yi ka koma! Sɛ yehu Yesu yiye a, ɔdɔ a yɛwɔ ma Yehowa no nso yɛ kɛse.

 7. Sɛ wo ne Kristofo a wɔn ho akokwaw bɔ a, sɛn na ɛbɛboa wo?

⁷ Anuanom a ɛwɔ asafo no mu a wɔn ho akokwaw no, sɛ wo ne wɔn bɔ na wuhu wɔn yiye a, ebetumi aboa ama woada ɔdɔ kɛse adi akyerɛ anuanom nyinaa, na woanya nkɔso. Ɛyɛ a hwɛ anigye a wɔwɔ no. Wonnuu wɔn ho sɛ wosii gyinae sɛ wɔbɛsom Yehowa. Osuahu a wɔanya wɔ Yehowa som mu no, ma wɔnka bi nkyerɛ wo. Sɛ wopɛ sɛ wusi gyinae bi a ɛho hia a, kogye wɔn hɔ afotu. Ade yi, “afotufo dodow na ɛma nneɛma kɔ yiye.”—Mmeb. 11:14.

 8. Sɛ w’adwene mu yɛ wo naa wɔ Bible nkyerɛkyerɛ bi ho a, dɛn na wubetumi ayɛ?

⁸ Sɛ w’adwene mu yɛ wo naa a, mmu w’ani ngu so. Sɛnea yɛkaa ho asɛm wɔ nkyekyɛm 2 no, Satan bɛbɔ mmɔden sɛ ɔbɛma wo gyidi ayɛ mmerɛw sɛnea ɛbɛyɛ a wubegyae Yehowa som. Ɔkwan baako a ebia ɔbɛfa so ayɛ saa ne sɛ, ɔbɛma w’adwene mu ayɛ wo naa wɔ Bible nkyerɛkyerɛ bi ho. Sɛ yɛbɛyɛ nhwɛso a, ebia ɛrenkyɛ ebinom de nkyerɛkyerɛ a ɛnhyɛ Onyankopɔn anuonyam bepuapua wo. Ebia wɔbɛka akyerɛ wo sɛ, ɛnyɛ Onyankopɔn na ɔbɔɔ ade, na mmom ɛnam adannandi so na ɛbae. Ebia wusua no, na wunnwen saa asɛm no ho, nanso seesei a woanyin yi, ebia wɔde saa asɛm no reguan wo ho wɔ sukuu. Nea w’akyerɛkyerɛfo ka fa adannandi ho no, ebia ɛbɛyɛ sɛ nea ɛtɔ asom na ntease wom. Nanso, adanse a ɛkyerɛ sɛ Ɔbɔadeɛ bi wɔ hɔ no, ebia wɔntoo wɔn bo ase nsusuw ho da. Kae nnyinasosɛm a ɛwɔ Mmebusɛm 18:17 no. Ɛhɔ ka sɛ: “Nea odi kan ka n’asɛm no, anhwɛ a wobɛka sɛ n’asɛm yɛ dɛ, kosi sɛ nea ɔne no anya asɛm no bɛba na wabebisabisa no nsɛm.” Sɛ́ anka wubegye biribiara a wɔbɛkyerɛ wo wɔ sukuu adi no, nea Onyankopɔn Asɛm Bible no nso ka fa ho no, to wo bo ase hwehwɛ mu. Yɛ nhwehwɛmu wɔ asafo nhoma mu. Anuanom a kan no na wogye adannandi di no, wo ne wɔn mmɔ nkɔmmɔ. Bisa wɔn nea ɛma wobegye dii sɛ Ɔbɔadeɛ bi a ɔdɔ yɛn wɔ hɔ. Nkɔmmɔ a ɛte saa betumi aboa wo ma woahwehwɛ adanse no mu.

 9. Dɛn na wusua fi Melissa suahu no mu?

⁹ Bere a onuawa bi a ne din de Melissa yɛɛ adebɔ ho nhwehwɛmu no, ɛboaa no paa.b Ɔka sɛ: “Sukuu mu no, sɛnea akyerɛkyerɛfo ka adannandi ho asɛm no, anhwɛ a wubegye adi. Mfiase no, na mempɛ sɛ meyɛ nhwehwɛmu, efisɛ na misuro sɛ anhwɛ a na abɛda adi sɛ adannandi nkyerɛkyerɛ no yɛ nokware. Nanso mibehui sɛ, Yehowa mpɛ sɛ yɛsom no kɛkɛ a yenni nnyinaso biara. Ɛno nti meyɛɛ nhwehwɛmu. Mekenkan nhoma a yɛato din, Is There a Creator Who Cares About You? ne nhomawa Was Life Created? ne The Origin of Life—Five Questions Worth Asking no. Wei ara na na mihia. Ɛyɛ me yaw sɛ mamfi ase ntɛm.”

10-11. Dɛn na ɛbɛboa wo ma woakɔ so abɔ bra pa? (1 Tesalonikafo 4:3, 4)

¹⁰ Kwati ɔbrabɔne. Sɛ wudu wo mpanyin mfe so a, nna ho akɔnnɔ a wowɔ no mu betumi ayɛ den, na ebia ebinom bepiapia wo sɛ bu brabɔne. Satan yam a anka woagyaagyaa wo ho adi w’akɔnnɔ akyi. Dɛn na ɛbɛboa wo ma woakɔ so abɔ bra pa? (Kenkan 1 Tesalonikafo 4:3, 4.) Worebɔ mpae a, ka sɛnea wote nka paa no kyerɛ Yehowa, na srɛ no sɛ ɔnhyɛ wo den. (Mat. 6:13) Kae sɛ, Yehowa pɛ sɛ ɔboa wo, na ɛnyɛ sɛ ɔpɛ sɛ ɔtwe w’aso. (Dw. 103:13, 14) Bible nso betumi aboa wo. Melissa a yɛadi kan aka ne ho asɛm no, na ɛyɛ den ma no sɛ obeyi ɔbrafĩ ho adwene afi ne tirim. Ɔka sɛ: “Bible a na mekan no daa no nti mampa abaw. Ɛkaee me sɛ, meyɛ Yehowa dea, na ɛnsɛ sɛ miyi no fi m’abrabɔ mu.”—Dw. 119:9.

¹¹ Mmɔ mmɔden sɛ wo nko ara wobɛkyekyere wo haw asoa. Nea ɛhaw wo no, ka ho asɛm kyerɛ w’awofo. Ɛnyɛ mmerɛw sɛ nsɛm a ɛte saa no, wobɛka ho asɛm, nanso ɛho hia sɛ woyɛ saa. Melissa ka sɛ: “Mebɔɔ Yehowa mpae sɛ ɔmma me akokoduru. Ɛno akyi no, mekaa ɔhaw a na merefa mu no kyerɛɛ me papa. Meyɛɛ saa no, metee nka sɛ adesoa bi afi me so. Mihui sɛ na mama Yehowa koma atɔ ne yam.”

12. Wobɛyɛ dɛn asisi gyinae pa?

¹² Ma Bible nnyinasosɛm nkyerɛ wo kwan. Sɛ woma Bible nnyinasosɛm kyerɛ wo kwan a, nkakrankakra w’awofo bɛma wo ahofadi pii a wode besisi gyinae. Nanso ɛno nkyerɛ sɛ wunim biribiara. Dɛn na ɛbɛboa wo na woanni mfomso a ɛbɛsɛe wo ne Yehowa ntam? (Mmeb. 22:3) Onuawa bi a ne din de Kari ma yehu nea ɛboaa no ma otumi sisii gyinae pa. Obehui sɛ Kristofo a wɔn ho akokwaw no, ɛnyɛ biribiara mu na wohia mmara pɔtee bi. Ɔka sɛ: “Ná ehia sɛ mete Bible nnyinasosɛm ase sen sɛ medi mmara so kɛkɛ.” Sɛ worekan Bible a, bisa wo ho sɛ: ‘Dɛn na saa asɛm yi ma mihu fa adwene a Yehowa wɔ ho? Nnyinasosɛm bi wom a metumi de abɔ me bra anaa? Sɛ ebi wom na mede yɛ adwuma a, ɛbɛboa me sɛn?’ (Dw. 19:7; Yes. 48:17, 18) Sɛ wokenkan Bible na wudwinnwen nnyinasosɛm a ɛwom no ho a, ɛbɛyɛ mmerɛw ama wo sɛ wubesisi gyinae a ɛbɛsɔ Yehowa ani. Bere a worenya nkɔso no, wubehu sɛ ɛnyɛ tebea biara na wuhia mmara pɔtee bi, efisɛ wobɛba abɛte Bible nnyinasosɛm ase.

13. Sɛ wofa nnamfo pa a, ɛbɛboa wo sɛn? (Mmebusɛm 13:20)

¹³ Fa nnamfo a wɔdɔ Yehowa. Sɛnea yɛadi kan aka no, nnamfo a wobɛfa no betumi aboa wo ama woanya nkɔso abɛyɛ Kristoni a ne ho akokwaw. (Kenkan Mmebusɛm 13:20.) Ná onuawa bi a ne din de Sara anigye so rehuan. Nanso biribi sii, na ɛmaa n’anigye no san yɛɛ kɛse. Sara ka sɛ: “Bere a na nneɛma nkɔ yiye no ara na minyaa nnamfo pa. Nnawɔtwe biara na me ne onuawa ababaa bi hyia sua Ɔwɛn-Aban no. M’adamfo foforo bi nso boaa me ma mifii ase maa mmuae wɔ adesua ase. Me nnamfo no mmoa nti, kokoam adesua ne mpaebɔ bɛyɛɛ biribi a na minni ho agorɔ koraa. Me ne Yehowa ayɔnkofa mu fii ase yɛɛ den, na nkakrankakra m’anigye no san bae.”

14. Dɛn na Julien yɛ de nyaa nnamfo pa?

¹⁴ Wobɛyɛ dɛn anya nnamfo pa a wɔbɛboa wo? Julien a seesei ɔyɛ asafo mu panyin no ka sɛ: “Misua no, asɛnka boaa me ma minyaa nnamfo pa. Ná me nnamfo no yere wɔn ho wɔ asɛnka adwuma no mu, na wɔma mihui sɛ asɛnka adwuma no yɛ dɛ. Enti mede sii m’ani so sɛ, daakye mɛyɛ bere nyinaa som adwuma no bi. Mibehui sɛ na nnamfo pa bebree abɔ me efisɛ m’atipɛnfo nko ara na na wɔyɛ me nnamfo. Akyiri yi, minyaa nnamfo pa nso wɔ Betel. Wɔn nhwɛso pa no ma mihuu nneɛma a ɛfata sɛ mede gye m’ani, na ama mabɛn Yehowa.”

15. Fekubɔ ho kɔkɔbɔ bɛn na Paul de maa Timoteo? (2 Timoteo 2:20-22)

¹⁵ Sɛ asafo no muni bi suban nti, wofa no adamfo na ɛbɛsɛe wo ne Yehowa ntam nso ɛ? Ná Paul nim sɛ tete Kristofo asafo no mu no, ebinom wɔ hɔ a na wɔn suban nye, enti ɔbɔɔ Timoteo kɔkɔ sɛ ɔntwe ne ho mfi wɔn ho. (Kenkan 2 Timoteo 2:20-22.) Yɛne Yehowa ayɔnkofa som bo ma yɛn paa. Enti, adwumaden a yɛayɛ ne yɛn soro Agya no anya ayɔnkofa a ɛte saa no, ɛnsɛ sɛ yɛma obiara sɛe no.—Dw. 26:4.

16. Botae bɛn saa na wubetumi de asisi w’ani so?

¹⁶ Fa botae papa sisi w’ani so. Fa botae a ɛbɛboa wo ma wo gyidi ayɛ den na woanya suban pa sisi w’ani so. (Efe. 3:16) Ebia wo kokoam adesua ne Bible akenkan a woyɛ no, wubetumi de asi w’ani so sɛ wobɛyere wo ho ayɛ no yiye. (Dw. 1:2, 3) Anaa wubetumi de asi w’ani so sɛ wobɛtaa abɔ mpae, na woama wo mpaebɔ no nso atu mpɔn. Nneɛma a wode gyigye w’ani ne sɛnea wode wo bere di dwuma no, ebia ebehia sɛ wohwɛ no yiye paa. (Efe. 5:15, 16) Sɛ Yehowa hu sɛ woreyɛ nea wubetumi biara de anya nkɔso a, n’ani begye paa.

17. Woboa nkurɔfo a, mfaso bɛn na wubenya?

¹⁷ Sɛ woboa nkurɔfo a, ɛma wobɛyɛ Kristoni a ne ho akokwaw. Yesu kaa sɛ: “Ɔma mu wɔ anigye pii sen ogye.” (Aso. 20:35) Sɛ wode wo bere no bi ne wo mmabunbere mu ahoɔden boa afoforo a, wubenya so mfaso paa. Anuanom a wɔn mfe akɔ anim ne wɔn a wɔyare wɔ w’asafo mu no, ebia wubetumi de asi w’ani so sɛ wobɛboa wɔn. Wohia biribi a, wubetumi akɔtotɔ abrɛ wɔn, anaa woaboa wɔn ama wɔahu sɛnea wɔde ɛlɛtrɔnik mfiri bedi dwuma. Sɛ woyɛ ɔbarima a, fa si w’ani so sɛ wobɛba abɛyɛ asafo mu somfo, na woatumi asom wo nuanom. (Filip. 2:4) Wɔn a wonni asafo no mu nso, sɛ woka Ahenni ho asɛmpa no kyerɛ wɔn a, ɛkyerɛ sɛ wodɔ wɔn. (Mat. 9:36, 37) Sɛ ɛbɛyɛ yiye a, fa si w’ani so sɛ wobɛyɛ bere nyinaa som adwuma no bi.

18. Sɛ woyɛ bere nyinaa som adwuma no bi a, sɛn na ɛbɛboa wo ama woanya nkɔso?

¹⁸ Bere nyinaa som adwuma no betumi aboa wo ma woanya hokwan de anya nkɔso. Sɛ wobɛyɛ ɔkwampaefo a, ebetumi ama woakɔ Ahenni Asɛmpakafo Sukuu no bi. Wubetumi akɔsom wɔ Betel anaa woaboa ma wɔasisi asafo adan. Onuawa ababaa kwampaefo bi a ne din de Kaitlyn ka sɛ: “M’asubɔ akyi no, ade baako a ɛboaa me ma minyaa nkɔso ne sɛ, na metaa ne anuanom a wɔn ho akokwaw kɔ asɛnka. Wɔn nhwɛso no ma mihui sɛ ɛsɛ sɛ meyere me ho sua Bible no yiye, na mema me nkyerɛkyerɛ tu mpɔn.”

19. Sɛ wokɔ so nya nkɔso a, nhyira bɛn na wubenya?

¹⁹ Sɛ wokɔ so nya nkɔso a, wubenya nhyira pii. Ɛremma womfa wo mmabunbere nkodi nneɛma hunu akyi. (1 Yoh. 2:17) Gyinae bɔne a nkurɔfo sisi ma egyaw wɔn tipae no, worennya bi. Mmom, ebesi wo yiye paa ama w’ani agye. (Mmeb. 16:3) Wo nhwɛso pa no bɛhyɛ wo nuanom mpanyimfo ne mmofra nyinaa nkuran. (1 Tim. 4:12) Ne kɛse paa no, sɛ yɛyɛ nea ɛsɔ Yehowa ani na yɛne n’ayɔnkofa mu yɛ den a, asomdwoe ne akomatɔyam a ɛde ba no, wo nso wubenya bi.—Mmeb. 23:15, 16.