Ti Aduonu Biako

Yehowa Ma Ne Nsa So

Yesaia 25:1–27:13

 1. Dɛn nti na Yesaia kyerɛ Yehowa ho anisɔ?

YESAIA wɔ ɔdɔ a emu yɛ den ma Yehowa, na n’ani gye ho sɛ obeyi no ayɛ. Ɔteɛm sɛ: “[Yehowa, “NW”], me Nyankopɔn ne wo, mɛma wo so makamfo wo din.” Dɛn na ɛboa odiyifo no ma onya ne Bɔfo no ho anisɔ a edi mu saa no? Ade titiriw ne Yehowa ne ne nnwuma ho nimdeɛ a ɔwɔ no. Yesaia nsɛm a edi hɔ no da saa nimdeɛ yi adi: “Sɛ woayɛ anwonwade; tete beeme agyinatu atim ayɛ nokware.” (Yesaia 25:1) Te sɛ Yosua a odii kan traa ase no, Yesaia nim sɛ Yehowa yɛ ɔnokwafo ne obi a wotumi de ho to ne so, ne sɛ ‘n’agyinatu’—nneɛma a ɔbɔ ne tirim sɛ ɔbɛyɛ—nya mmamu.—Yosua 23:14.

 2. Yehowa afotu bɛn na Yesaia ka ho asɛm seesei, na ɛbɛyɛ sɛ kurow bɛn na agyinatu yi tia no?

² Nea ɛka Yehowa agyinatu ho ne n’atemmu a etia Israel atamfo no. Yesaia ka eyi mu biako ho asɛm seesei sɛ: “Woadan kurow afabo kuw, woama abannennen ayɛ abansin; ananafo aban afɛfɛ nyɛ kurow bio, na wɔrento bio da biara da.” (Yesaia 25:2) Dɛn ne kurow a wɔmmɔ din yi? Ebia na Yesaia reka Ar a ɛwɔ Moab—Moab a atan Onyankopɔn nkurɔfo fi tete—no ho asɛm.a Anaasɛ ebetumi aba sɛ na ɔreka kurow foforo a ɛyɛ den—Babilon—ho asɛm.—Yesaia 15:1; Sefania 2:8, 9.

 3. Ɔkwan bɛn so na Yehowa atamfo hyɛ no anuonyam?

³ Ɔkwan bɛn so na Yehowa atamfo bɛyɛ wɔn ade bere a n’agyinatu a etia wɔn kurow a ɛyɛ den no nya mmamu no? “Ɔman a ɛyɛ den bɛhyɛ wo anuonyam, amanaman ahoɔdenfo kurow besuro wo.” (Yesaia 25:3) Ntease wom sɛ, ade nyinaa so tumfoɔ Nyankopɔn no atamfo besuro no. Nanso, ɔkwan bɛn so na wɔhyɛ no anuonyam? So wobegyaw wɔn atoro anyame no akyidi aba nokware som mu? Dabida! Mmom no, te sɛ Farao ne Nebukadnesar no, wɔhyɛ Yehowa anuonyam bere a wɔhyɛ wɔn ma wohu ne tumi kɛse no.—Exodus 10:16, 17; 12:30-33; Daniel 4:37.

 4. “Amanaman ahoɔdenfo kurow” bɛn na ɛwɔ hɔ nnɛ, na ɔkwan bɛn so na ɛsɛ sɛ ɛhyɛ Yehowa anuonyam mpo?

⁴ Ɛnnɛ, “amanaman ahoɔdenfo kurow” no ne “kurow kɛse a edi asase so ahene so hene,” a ɛne “Babilon kɛse,” wiase nyinaa atoro som ahemman no. (Adiyisɛm 17:5, 18) Saa ahemman yi fã titiriw ne Kristoman. Ɔkwan bɛn so na Kristoman nyamesom akannifo no hyɛ Yehowa anuonyam? Denam ɛyaw a wodi wɔ anwonwade a wayɛ ama N’adansefo ho no so. Wɔ 1919 mu titiriw, bere a Yehowa yii n’asomfo fii Babilon Kɛse no honhom fam nnommumfa mu san de dwumadi kɛse hyɛɛ wɔn nsa akyi no, saa akannifo yi “suroe, na wɔhyɛɛ ɔsoro Nyankopɔn anuonyam.”—Adiyisɛm 11:13.b

 5. Ɔkwan bɛn so na Yehowa bɔ wɔn a wɔwɔ ne mu ahotoso kɛse no ho ban?

⁵ Ɛwom sɛ Yehowa ho yɛ n’atamfo hu de, nanso ɔyɛ guankɔbea ma ahobrɛasefo ne wɔn a wodwo a wɔpɛ sɛ wɔsom no no. Nyamesom ne amammui mu atirimmɔdenfo bɛbɔ mmɔden sɛ wɔbɛyɛ nea wobetumi nyinaa de asɛe nokware asomfo yi gyidi, nanso wodi nkogu efisɛ nokware asomfo yi wɔ Yehowa mu ahotoso koraa. Awiei koraa no, ɔma n’asɔretiafo yɛ dinn koraa, na ɔyɛ saa te sɛ nea ɔde omununkum kata anhwea pradada so owia a ɛrebɔ anim anaa te sɛ nea ɔde ɔfasu siw osu ahoɔden kwan no.—Kenkan Yesaia 25:4, 5.

‘Ɔtow Amanaman Nyinaa Pon’

 6, 7. (a) Ɔpon bɛn na Yehowa tow, na ɔtow ma henanom? (b) Dɛn na apontow a Yesaia hyɛɛ ho nkɔm no yɛ ho mfonini?

⁶ Te sɛ agya a ɔwɔ dɔ no, ɛnyɛ sɛ Yehowa bɔ ne nkoa ho ban kɛkɛ, na mmom, ɔma wɔn aduan nso, titiriw wɔ honhom fam. Bere a ogyee ne nkurɔfo wɔ 1919 mu akyi no, ɔtow wɔn nkonimdi pon, a na honhom fam nnuan pii wɔ ase: “Asafo [Yehowa, “NW”] bɛtow aman nyinaa pon bepɔw yi so: sradeduan, nsã a akyɛ, srade ne hon, nsã a wɔasɔn so.”—Yesaia 25:6.

⁷ Wɔtow pon no wɔ Yehowa “bepɔw” so. Dɛn ne saa bepɔw yi? Ɛyɛ ‘Yehowa fie bepɔw’ a aman nyinaa sen yuu ba ho “nna a edi akyiri no mu no.” Ɛyɛ Yehowa “bepɔw kronkron,” baabi a n’asomfo anokwafo nhaw adwene na wɔnsɛe ade no. (Yesaia 2:2; 11:9) Beae a ɛkorɔn a wɔsom yi na Yehowa tow pon kɛse ma anokwafo. Na honhom fam nneɛma pa a wofi ayamye mu de ma yɛn seesei no yɛ honam fam nneɛma pa a yɛn nsa bɛka bere a Onyankopɔn Ahenni abɛyɛ adesamma nniso koro pɛ no ho sunsuma. Afei ɔkɔm remma bio. “Asase no so aburofuw bedu mmepɔw atifi.”—Dwom 72:8, 16.

 8, 9. (a) Adesamma atamfo akɛse abien bɛn na wobeyi wɔn afi hɔ? Kyerɛkyerɛ mu. (b) Dɛn na Onyankopɔn bɛyɛ de ayi ne nkurɔfo ahohora afi hɔ?

⁸ Wɔn a wonya honhom fam pon a Onyankopɔn tow yi mu kyɛfa seesei no wɔ akwanhwɛ a ɛyɛ anigye. Tie Yesaia nsɛm a edi hɔ no. Bere a ɔde bɔne ne owu retoto “nkataso” anaa “anim ntama” a wɔde tim amene ho no, ɔka sɛ: “Bepɔw yi so na [Yehowa] beyi anim ntama a ɛkataa aman nyinaa anim, ne nkataso a ɛkataa amanaman nyinaa so no. Ɔbɛmene owu akosi daa, na [Yehowa, “NW”] bɛpopa ani nyinaa so nusu.”—Yesaia 25:7, 8a.

⁹ Yiw, bɔne ne owu nni hɔ bio! (Adiyisɛm 21:3, 4) Bio nso, wobeyi ahohorabɔ a emu yɛ den a Yehowa asomfo agyina ano mfe mpempem pii no nso afi hɔ. “Na wayi ne man ahohora afi asase nyinaa so akɔ, efisɛ [Yehowa, “NW”] na waka.” (Yesaia 25:8b) Eyi bɛyɛ dɛn aba? Yehowa beyi nea ɔde saa ahohorabɔ no ba, Satan ne n’asefo afi hɔ. (Adiyisɛm 20:1-3) Ɛnyɛ nwonwa sɛ ɛbɛka Onyankopɔn nkurɔfo ma wɔaka sɛ: “Hwɛ, yɛn Nyankopɔn a yɛn ani daa no so sɛ obegye yɛn no ni; [Yehowa, “NW”] a yɛn ani daa no so no ni. Momma yenni ahurusi, na yɛn ani nnye ne nkwagye no mu.”—Yesaia 25:9.

Wɔbrɛ Ahantanfo Ase

10, 11. Asotwe a emu yɛ den bɛn na Yehowa de reba Moab so?

¹⁰ Yehowa gye ne nkurɔfo a wɔda ahobrɛase adi no. Nanso, ɔman a ɛbɛn Israel, Moab, yɛ ahantan, na Yehowa kyi ahantan. (Mmebusɛm 16:18) Enti, wɔka Moab ho asɛm sɛ wɔbɛbrɛ no ase. “[Yehowa, “NW”] nsa besi bepɔw yi so, na wobetiatia Moab so, n’afa, sɛ wotiatia nwura dodow so wɔ sumina so; na ɔbɛtrɛw ne nsam wɔ mu, sɛnea osuguarefo trɛw ne nsam guare no, na ɔbɛbrɛ n’ahantan ase, ɛne ne nsa adeyɛ no. Na w’afasu a ɛyɛ den a ɛkorɔn no, ɔbɛbrɛ no ase adwiriw agu fam, mfutuma mu.”—Yesaia 25:10-12.

¹¹ Yehowa nsa “besi” Moab bepɔw so. Dɛn na ebefi mu aba? Wobedwiriw Moab a ɛyɛ ahantan no agu atiatia ne so sɛ wotiatia “sumina so” no. Yesaia bere so no, na wotiatia nwura so ma ɛdan sumina na wɔde yɛ ɔyɛ-asase-yiye; enti Yesaia ka Moab a wɔbɛbrɛ no ase, ɛmfa ho n’afasu a ɛkorɔn na ɛte sɛ nea ɛyɛ den no ho asɛm.

12. Dɛn nti na Yehowa ka atemmu soronko tia Moab?

¹² Dɛn nti na Moab nkutoo na Yehowa tu agyina a emu yɛ den saa tia no? Moabfo no yɛ Abraham wɔfase Lot a na ɔyɛ Yehowa somfo no asefo. Enti, ɛnyɛ sɛ na wɔbɛn ɔman a Onyankopɔn ne wɔn ayɛ apam no kɛkɛ, na mmom, na wɔyɛ wɔn abusuafo nso. Eyi nyinaa akyi no, wɔsom atoro anyame, na wɔdaa nitan a emu yɛ den adi kyerɛɛ Israel. Nea ɛbaa wɔn so no fata wɔn. Eyi mu no, Moab te sɛ wɔn a wɔtan Yehowa asomfo nnɛ no. Titiriw no, ɛte sɛ Kristoman a ɛkyerɛ sɛ enyaa ne mfiase fii afeha a edi kan mu Kristofo asafo no mu no, nanso sɛnea yɛadi kan ahu no, ɛyɛ Babilon Kɛse no fã titiriw.

Nkwagye Dwom

13, 14. “Kurow a ɛyɛ den” bɛn na Onyankopɔn nkurɔfo wɔ nnɛ, na henanom na wɔma wɔn kwan ma wɔhyɛn mu?

¹³ Na Onyankopɔn nkurɔfo nso ɛ? Esiane anigye a wɔwɔ sɛ wɔanya Yehowa anim dom ne n’ahabammɔ nti, wɔma wɔn nne so to dwom. “Ɛda no na wɔbɛto dwom yi Yuda asase so sɛ: Kurow a ɛyɛ den wɔ yɛn, ɔde nkwagye ayɛ afasu ne mpempe. Munhiɛ apon no na ɔman trenee nhyɛn mu, ɔman a wɔkora nokwaredi no.” (Yesaia 26:1, 2) Bere a akyinnye biara nni ho sɛ, saa nsɛm yi nyaa mmamu tete mmere mu no, enya mmamu pefee nnɛ nso. Yehowa ‘man trenee,’ honhom fam Israel, yɛ ahyehyɛde a ɛyɛ den sɛ kurow. Ade a ɛsɛ sɛ ɛma wodi ahurusi na wɔto dwom bɛn ara ni!

¹⁴ Nnipa bɛn na wɔba saa “kurow” yi mu? Dwom no de mmuae no ma sɛ: “Nea n’adwene tim wo so na wobɛkora no asomdwoe a ewie pɛyɛ mu, efisɛ wo so na ɔde ne ho to. Momfa mo ho nto [Yehowa, “NW”] so daa daa, efisɛ Yah [Yehowa, “NW”] ne daa botan.” (Yesaia 26:3, 4) ‘Adwene’ a Yehowa foa so ne ɔpɛ a obi wɔ sɛ obedi ne trenee nnyinasosɛm akyi na wanya ne mu ahotoso, na ɛnyɛ sɛ ɔde ne ho bɛto wiase aguadi, amammui, ne ɔsom nhyehyɛe a aporɔw no so. “Yah [Yehowa, NW]” nkutoo ne Ɔbotan a obi betumi de ne ho ato no so na wanya ahobammɔ. Wɔn a wɔwɔ Yehowa mu ahotoso koraa no nya n’ahobammɔ, na wonya ‘asomdwoe daa.’—Mmebusɛm 3:5, 6; Filipifo 4:6, 7.

15. Ɔkwan bɛn so na wɔabrɛ “kurow a ɛkorɔn” no ase nnɛ, na ɔkwan bɛn so na ‘mmɔborɔfo ne ahiafo’ tiatia so?

¹⁵ Hwɛ abira ara a ɛne nea ɛto Onyankopɔn nkurɔfo atamfo no bɔ! “Ɔde wɔn a wɔtete soro ahwe fam, kurow a ɛkorɔn no, wabrɛ no ase; wabrɛ no ase ama adu fam, wama aka fam mfutuma; wɔde nan tiatia so, mmɔborɔfo anan, ahiafo anammɔn.” (Yesaia 26:5, 6) Bio nso, ebia nea Yesaia reka ho asɛm wɔ ha ne “kurow a ɛkorɔn” wɔ Moab, anaasɛ ebia ɔrepɛ akyerɛ kurow foforo, te sɛ Babilon, a ɛkorɔn wɔ ahantan mu no. Sɛnea ɛte biara no, Yehowa de adwene asi “kurow a ɛkorɔn” so, na ‘mmɔborɔfo ne ahiafo’ tiatia so. Ɛnnɛ, saa nkɔmhyɛ yi fata Babilon Kɛse ankasa, titiriw Kristoman. Wɔ 1919 no, wɔhyɛɛ saa “kurow a ɛkorɔn” yi ma wogyaee Yehowa nkurɔfo—asehwe ankasa—na wɔn nso atiatia wɔn a wɔfaa wɔn nnommum no so. (Adiyisɛm 14:8) Ɔkwan bɛn so? Ɛdenam Yehowa abufuw a ɛreba nnommumfafo no so ho dawuru a wɔbɔ no baguam no so.—Adiyisɛm 8:7-12; 9:14-19.

Wɔn Ani Gyina Trenee ne Yehowa “Nkae”

16. Ahofama ho nhwɛso pa bɛn na Yesaia yɛ?

¹⁶ Wɔ saa nkonimdi dwom yi akyi no, Yesaia da sɛnea n’ankasa ahofama mu dɔ ne akatua a ɛwɔ trenee Nyankopɔn som mu no adi. (Kenkan Yesaia 26:7-9.) Odiyifo no yɛ ‘Yehowa mu ahotoso a wonya’ ne ɔpɛ kɛse a wonya ma Yehowa “din” ne ne “nkae” no ho nhwɛso fɛfɛ. Dɛn ne Yehowa nkae no? Exodus 3:15 ka sɛ: ‘Yehowa ne me din de kosi daa, na eyi na wɔmfa nkae me awo ntoatoaso nyinaa mu.’ Yehowa din ne nea ɛkyerɛ nyinaa, a nea ɛka ho ne ne trenee gyinapɛn ne n’akwan, no som bo ma Yesaia. Wɔn a wonya ɔdɔ a ɛte saa ma Yehowa no benya ne nhyira ɔkwan biara so.—Dwom 5:8; 25:4, 5; 135:13; Hosea 12:5.

17. Hokwan ahorow bɛn na abɔnefo bɛhwere?

¹⁷ Nanso, ɛnyɛ obiara na ɔdɔ Yehowa ne ne gyinapɛn a ɛkorɔn no. (Kenkan Yesaia 26:10.) Sɛ wɔto nsa frɛ abɔnefo mpo a, wɔde mpi po sɛ wobesua adetrenee na wɔahyɛn “nsɛntrenee asase so,” asase a Yehowa asomfo a wodi asɛntrenee wɔ abrabɔ fam ne honhom fam te so no. Enti, abɔnefo ‘renhu Yehowa kɛseyɛ.’ Wɔrentra ase nhu nhyira a adesamma benya bere a wɔatew Yehowa din ho no. Wɔ wiase foforo no mu mpo, bere a asase nyinaa adan “nsɛntrenee asase” no, ebinom renyɛ Yehowa ayamye ho biribiara. Wɔrenkyerɛw saafo no din wɔ nkwa nhoma no mu.—Yesaia 65:20; Adiyisɛm 20:12, 15.

18. Ɔkwan bɛn so na Yesaia bere sofo no boapa fura wɔn ani, na bere bɛn na wɔbɛhyɛ wɔn ma ‘wɔahu’ Yehowa?

¹⁸ “[Yehowa, “NW”], womaa wo nsa so, nanso wɔanhwɛ; wobehu, na wɔn ani awu, ɔman ho ninkuntwe no; yiw, w’atamfo no, ogya bɛhyew wɔn.” (Yesaia 26:11) Wɔ Yesaia bere so no, Yehowa maa ne nsa so bere a Ɔbɔɔ ne nkurɔfo ho ban denam wɔn atamfo a ɔyɛɛ ade tiaa wɔn so no. Nanso wɔn mu dodow no ara anhu eyi. Awiei koraa no, wɔbɛhyɛ saafo yi a wɔboapa afura wɔn ani wɔ honhom fam no ma ‘wɔahu,’ anaasɛ wɔagye Yehowa atom bere a ne ninkuntwe gya hyew wɔn no. (Sefania 1:18) Onyankopɔn ka kyerɛ Hesekiel akyiri yi sɛ: ‘Wobehu sɛ me ne Yehowa.’—Hesekiel 38:23.

‘Nea Yehowa Dɔ No na Ɔtwe N’aso’

19, 20. Ɛyɛɛ dɛn na Yehowa twee ne nkurɔfo aso, na henanom na wonyaa asotwe a ɛte saa mu mfaso?

¹⁹ Yesaia nim sɛ asomdwoe ne nkɔso biara a ne man mufo nya no fi Yehowa nhyira. “[Yehowa, “NW”], wobɛhyehyɛ asomdwoe ama yɛn, na yɛn nneyɛe nyinaa nso, woawie ama yɛn.” (Yesaia 26:12) Eyi, ne hokwan a Yehowa de asi ne nkurɔfo anim sɛ wɔbɛyɛ “asɔfo ahemman ne ɔman kronkron” nyinaa akyi no, Yuda abakɔsɛm nyɛ papa. (Exodus 19:6) Mpɛn pii na wɔdan kɔsom atoro anyame. Ne saa nti, ɔtwee wɔn aso bere ne bere mu. Nanso, asotwe a ɛte saa no yɛ Yehowa dɔ ho adanse efisɛ ‘nea Yehowa dɔ no na ɔtwe n’aso.’—Hebrifo 12:6.

²⁰ Mpɛn pii no, na Yehowa twe ne nkurɔfo aso denam aman foforo, “awuranom,” a ɔma wodii wɔn so no so. (Kenkan Yesaia 26:13.) Wɔ 607 A.Y.B. mu no, ɔmaa Babilonfo faa wɔn kɔɔ nnommum mu. So wonyaa eyi so mfaso? Mfaso nni amane a obi hu ankasa so. Nanso, sɛ ɔmanehunufo no sua biribi fi nea esi no mu na ɔsakra, na ɔde ɔsom kronn ma Yehowa a, ɛnde onya mu mfaso. (Deuteronomium 4:25-31) So Yudafo no bi nya nokware adwensakra a ɛfata ankasa? Yiw! Yesaia ka no nkɔmhyɛ kwan so sɛ: “Wo nko na yɛkamfo wo din.” Bere a Yudafo no san fi nnommumfa mu bae wɔ 537 A.Y.B. mu no, na wohia asotwe mpɛn pii wɔ bɔne afoforo ho, nanso wɔansan ankɔsom abo anyame bio.

21. Dɛn na ɛbɛba wɔn a wɔahaw Onyankopɔn nkurɔfo no so?

²¹ Na wɔn a wɔfaa Yuda nnommum no nso ɛ? “Asamanfo rensɔre bio, ɛno nti na wobɛtwee wɔn aso na wosɛee wɔn, na womaa wɔn ho nkae nyinaa yerae.” (Yesaia 26:14) Babilon behu amane wɔ atirimmɔdenne a wɔde baa Yehowa man a wapaw wɔn so no ho. Yehowa nam Mediafo ne Persiafo so bɛdan Babilon a ɛyɛ ahantan no abutuw na wayi ne nkurɔfo a wɔwɔ nnommumfa mu no. Saa kurow kɛse no, Babilon, rensɔre bio, te sɛ nea wawu no. Awiei koraa no, ebefi hɔ koraa.

22. Wɔ nnɛ mmere yi no, ɔkwan bɛn so na wɔahyira Onyankopɔn nkurɔfo?

²² Wɔ ne nnɛyi mmamu mu no, wogyee honhom fam Israel a wɔn ho tew no nkaefo fii Babilon Kɛse no nsam siesiee wɔn maa Yehowa adwuma wɔ 1919 mu. Kristofo a wɔasra wɔn yi a wɔahyɛ wɔn den no de wɔn ho hyɛɛ asɛnka adwuma no mu. (Mateo 24:14) Yehowa nso ama wɔanya nkɔanim, na ɔde “nguan foforo” nnipakuw kɛse abɛka wɔn ho ma wɔsom no. (Yohane 10:16) “[Yehowa, “NW”], woma ɔman no dɔ, woma ɔman no dɔ, w’anim aba nyam, wotrɛw asase no ahye nyinaa mu. [Yehowa, “NW”], ahohia mu wɔhwehwɛɛ wo, wosii wo nteɛso ano apini.”—Yesaia 26:15, 16.

‘Wɔbɛsɔre’

23. (a) Yehowa tumi ho ɔyɛkyerɛ a ɛda nsow bɛn na ɔda no adi wɔ 537 A.Y.B. mu? (b) Ɔyɛkyerɛ a ɛte saa bɛn na ɔdaa no adi wɔ 1919 Y.B. mu?

²³ Yesaia san de adwene si tebea a Yuda wom so bere a wɔda so ara wɔ nnommum mu wɔ Babilon no. Ɔde ɔman no toto ɔbea a awo aka no, nanso esiane mmoa a onnya nti, ontumi nwo ho. (Kenkan Yesaia 26:17, 18.) Saa mmoa no ba wɔ 537 A.Y.B. mu, na Yehowa nkurɔfo san ba wɔn asase so a wɔn ho pere wɔn sɛ wɔbɛsan asi asɔrefie no na wɔde nokware som asi hɔ bio. Enti, sɛnea yɛbɛka no no, wonyanee ɔman no fii awufo mu. “W’awufo benya nkwa, m’afunu bɛsɔre; munnyan nto ahurusi dwom, mo a mote mfutuma mu, na wo bosu yɛ hann bosu, na asase beyi asamanfo agu.” (Yesaia 26:19) Yehowa tumi a wɔda no adi bɛn ara ni! Bio nso, hwɛ ɔyɛkyerɛ kɛse a ɛyɛe bere a saa nsɛm yi nyaa mmamu wɔ honhom fam wɔ 1919 mu no! (Adiyisɛm 11:7-11) Na hwɛ sɛnea yɛhwɛ bere a saa nsɛm yi benya mmamu ankasa wɔ wiase foforo no mu, na wɔn a wɔawuwu ‘bɛte Yesu nne na wɔafi’ adi afi ɔdamoa mu no kwan!—Yohane 5:28, 29.

24, 25. (a) Ɔkwan bɛn so na Yudafo a na wɔwɔ hɔ wɔ 539 A.Y.B. mu no betumi adi Yehowa ahyɛde a ɛne sɛ wonhintaw no so? (b) Dɛn na “mpia” no kyerɛ nnɛ, na su bɛn na ɛsɛ sɛ yenya wɔ ho?

²⁴ Nanso, sɛ gyidifo no benya honhom fam nhyira a wɔnam Yesaia so hyɛɛ ho bɔ no a, ɛsɛ sɛ wodi Yehowa mmara so: “Me man, kɔ na kɔhyɛ wo mpia mu, na toto w’akyi apon mu; fa wo ho hintaw kakraa bi kosi sɛ abufuw no betwam akɔ. Na hwɛ, [Yehowa, “NW”] refi n’afã akɔtwe asase sofo aso, wɔn amumɔyɛ nti; na asase beyi ne mogya adi, na ɛrenkata wɔn a wɔakum wɔn ɛso no so bio.” (Yesaia 26:20, 21; fa toto Sefania 1:14 ho.) Ɛbɛyɛ sɛ asɛm no nyaa ne mmamu a edi kan bere a Mediafo ne Persiafo a na Ɔhene Kores di wɔn anim dii Babilon so nkonim wɔ 539 A.Y.B. mu no. Sɛnea Hela abakɔsɛm kyerɛwfo Xenophon kyerɛ no, bere a Kores hyɛnee Babilon no, ɔhyɛe sɛ obiara ntra ne fie efisɛ wama n’asraafo no “ahyɛde sɛ wonkum obiara a wobehu no abɔnten so no.” Ɛnnɛ, yebetumi de “mpia” a wɔbɔ din wɔ nkɔmhyɛ yi mu no atoto Yehowa nkurɔfo asafo ahorow mpempem pii a ɛwɔ wiase nyinaa no ho yiye. Saa asafo ahorow yi bɛkɔ so adi dwuma titiriw wɔ yɛn asetram, wɔ “ahohiahia kɛse” no mu mpo. (Adiyisɛm 7:14) Hwɛ sɛnea ehia sɛ yenya su a ɛfata wɔ asafo no ho na yɛde yɛn ho bɔ no daa!—Hebrifo 10:24, 25.

²⁵ Ɛrenkyɛ, Satan wiase no bɛba awiei. Sɛnea Yehowa bɛbɔ ne nkurɔfo ho ban wɔ saa bere a ɛyɛ hu no mu de, yennim. (Sefania 2:3) Nanso, yenim sɛ yɛn ti a yebenya adidi mu no gyina Yehowa mu gyidi a yebenya ne nokwaredi ne osetie a yɛbɛyɛ ama no so.

26. Ná dɛn ne “bonsu” no wɔ Yesaia bere so, na ɛne dɛn wɔ yɛn bere yi so, na dɛn na ɛbɛto “po mu asuboa kɛse” yi?

²⁶ Bere a Yesaia rehwɛ saa bere no kwan no, ɔhyɛ nkɔm sɛ: “Ɛda no na [Yehowa, “NW”] de n’afoa dennen a ɛsõ na ɛyɛ den no bɛtwe bonsu a ɔyɛ ɔwɔ a ne ho yɛ hare, bonsu a ɔyɛ ɔwɔ a ɔpompono no asõ, na wakum po mu asuboa kɛse no.” (Yesaia 27:1) Wɔ mmamu a edi kan mu no, na “bonsu” no gyina hɔ ma aman a Israel ahwete wɔ so, te sɛ Babilon, Misraim, ne Asiria. Saa aman yi rentumi nsiw Yehowa nkurɔfo kwan sɛ wɔremma wɔnsan nkɔ wɔn asase so ɛbere a ɛsɛ mu. Nanso, hena ne nnɛyi Bonsu no? Ɛte sɛ nea ɛyɛ Satan—“ɔwɔ dedaw no”—ne ne nneɛma nhyehyɛe bɔne a ɛwɔ asase so ha, n’adwinnade a ɔde ko tia honhom fam Israel no. (Adiyisɛm 12:9, 10; 13:14, 16, 17; 18:24) “Bonsu” no gyaee Onyankopɔn nkurɔfo wɔ 1919 mu, na ɛrenkyɛ ɔbɛyera koraa bere a Yehowa ‘kum po mu asuboa kɛse no.’ Enkosi saa bere no, biribiara nni hɔ a “bonsu” no bɛyɛ atia Yehowa nkurɔfo no a obedi mu nkonim ankasa.—Yesaia 54:17.

‘Bobeturo Ahuru Wɔ Ne Nsa Ani’

27, 28. (a) Dɛn na Yehowa bobeturo no de ahyɛ asase so ma? (b) Ɔkwan bɛn so na Yehowa bɔ ne bobeturo ho ban?

²⁷ Yesaia de dwom foforo yɛ mfaso a Yehowa nkurɔfo a wɔagyae wɔn benya no ho mfatoho fɛfɛ afei: ‘Ɛda no, monto bobeturo a ahuru wɔ ne nsa ani no ho dwom: Me, Yehowa, na mehwɛ no, migu no so nsu bere nyinaa mu; mehwɛ no anadwo ne awia, na hwee ammɛyɛ no.’ (Yesaia 27:2, 3) Honhom fam Israel nkaefo no ne wɔn mfɛfo a wɔyɛ adwumaden no de honhom fam nneɛma ahyɛ asase so ma ankasa. Ade a ɛsɛ sɛ ɛma wodi ahurusi—na wɔto dwom—bɛn ara ni! Ayeyi nka Yehowa, nea ofi ɔdɔ mu rehwɛ ne bobeturo no.—Fa toto Yohane 15:1-8 ho.

²⁸ Nokwarem no, anigye abesi Yehowa kan abufuw no ananmu! “Abohuru bi nni me mu; sɛ mihu nsɔe ne nguare ɛ, anka mede kõ mewura mu makɔhyew ne nyinaa. Gye sɛ woguan toa me, na wɔne me di asomdwoesɛm, asomdwoesɛm na ma wɔne me nni.” (Yesaia 27:4, 5) Nea ɛbɛyɛ na wahwɛ ahu sɛ ne bobe bɛkɔ so ama ‘ahuru aba ne nsa ani’ pii no, Yehowa sɛe biribiara a ɛte sɛ nwura a ebetumi asɛe ne bobeturo no de gya hyew. Enti, ɛnsɛ sɛ obiara de Kristofo asafo no yiyedi to asiane mu! Mmom no, momma yɛn nyinaa nso ‘Yehowa nsa a ɛyɛ den no mu,’ na yɛnhwehwɛ n’anim dom ne ahobammɔ. Sɛ yɛyɛ saa a, yɛma asomdwoe ba yɛne Nyankopɔn ntam—biribi a ɛho hia araa ma enti Yesaia bɔ din mprenu. Dɛn na efi mu ba? “Nna a ɛbɛba no mu Yakob begye ntini, na Israel afefɛw agu nhwiren, na wɔde aba ahyɛ wiase ani mama.” (Yesaia 27:6)c Yehowa tumi ho adanse bɛn ara na saa nkyekyem yi mmamu ma ɛda adi sɛɛ yi! Efi 1919 no, Kristofo a wɔasra wɔn no de “aba,” honhom fam aduan a ahoɔden wom, ahyɛ asase so ma. Ne saa nti, nguan foforo anokwafo ɔpepem pii abɛka wɔn ho ma wɔne wɔn ‘de ɔsom kronn rema Onyankopɔn awia ne anadwo.’ (Adiyisɛm 7:15) Wɔ wiase a aporɔw yi mu no, saafo yi de anigye kura Ne gyinapɛn ahorow a ɛkorɔn no mu. Na Yehowa ma wɔkɔ so nya nkɔanim. Mommma yemmmu yɛn ani nngu hokwan kɛse a yɛanya de di “aba” no bi, ne afoforo a yɛnam ayeyisɛm a yɛn ankasa yɛka so ma wonya bi di no so da!

[Ase hɔ nsɛm]

[Adaka wɔ kratafa 285]

“Torobɛnto Kɛse” Bi Bɔ Ahofadi Ho Dawuru

Wɔ 607 A.Y.B. mu no, Yuda yawdi yɛ kɛse bere a Yehowa de nnommumfa abaa twee ne man a awae aso no. (Kenkan Yesaia 27:7-11.) Ɔman no bɔne so paa sɛ mmoa a wɔde bɔ afɔre betumi apata. Enti, sɛnea obi betumi de ‘nteɛm a ɛyɛ den’ apam nguan ne mpɔnkye anaasɛ obetumi de mframa a ano yɛ den ‘atetew’ nhaban no, saa ara na Yehowa pam Israel fi wɔn asase so. Ɛno akyi no, nnipa a wɔyɛ mmerɛw mpo, a wɔde mmea gyina hɔ ma wɔn, tumi sɛe biribiara a aka wɔ asase no so.

Nanso, bere adu sɛ Yehowa gye ne nkurɔfo fi nnommum mu. Sɛnea yɛbɛka no no, ogyae wɔn sɛnea okuafo porow bobe aba a adan nneduafo wɔ ne dua so no. “Ɛda no, [Yehowa, “NW”] bɛporow n’aba afi asu [Eufrate] no hweam ano akosi Misraim subon no ano, na wɔatase mo, Israel mma, mmiako mmiako. Na da no wɔbɛhyɛn torobɛnto kɛse, na wɔn a wɔyerae Asiria asase so ne wɔn a wosum wɔn kɔɔ Misraim asase so no aba, na wɔabɛsɔre [Yehowa, “NW”], bepɔw kronkron no so, Yerusalem.” (Yesaia 27:12, 13) Wɔ Kores nkonimdi wɔ 539 A.Y.B. mu akyi no, ɔde ahyɛde mae sɛ Yudafo a wɔwɔ n’ahemman mu nyinaa, a na wɔn a wɔwɔ Asiria ne Misraim ka ho, nkɔ. (Esra 1:1-4) Ɛte sɛ nea wɔhyɛn “torobɛnto kɛse” bi a ɛrepae ahofadi akyerɛ Onyankopɔn nkurɔfo.

[Mfonini ahorow wɔ kratafa 275]

‘Sradeduan apontow’

[Mfonini wɔ kratafa 277]

Wɔn a na wɔyɛ nneduafo tiatia Babilon so

[Mfonini wɔ kratafa 278]

‘Monhyɛn mo mpia mu’